A Luk koe‑noogo 5

B yõga zĩm wʋsgo

(Mat 4.18-22, Mark 1.16-20)

1 # Mat 13.1,2, Mark 3.9,10, 4.1 Neb kʋʋngã sẽn dag n gũbg a Zeezi n pẽdgd taab n dat n wʋm Wẽnnaam goamã, tɩ bãmb yaool n dag n be Zenezarɛt ko‑kãsengã noorã, 2bãmb yãnda koom kogend a yiib sẽn be koomã noore, zĩm-yõagdb sẽn dag n sig n bas n pegsd b zĩm-gãmba. 3A Zeezi kẽe koglg a yembr sẽn dag n yaa a Sɩmo rẽnda, n kos-a t'a zãag bilf ne kʋɩl-koakã. La a Zeezi zĩnda koom koglgẽ wã n pa be n zãmsd neb kʋʋngã.

4A Zeezi sẽn gom n sɛ, b yeela a Sɩmo yaa: «Kẽng-y koomã sʋk n tɩ y lob y zĩm-gãmbã wã n yõg zĩma.» 5#Zã 21.3A Sɩmo leoka bãmba: «Karen-saamba, tõnd tʋma yʋngã tõr n ka tol n yõk bũmb ye. La yãmb sẽn yeelã yĩnga, m na n loba zĩm-gãmbã wã.» 6#Zã 21.6Bãmb sẽn lobã, b yõga zĩm wʋsgo, la b zĩm-gãmba wã rag n pãrsdame. 7Bãmb kamsa b tũud-n-taasã sẽn dag n be koglg a to wã pʋgẽ wã tɩ b wa n sõng-ba. B waame la b pidsa koom-kogend a yiibã hal tɩ b rat n lisi. 8A Sɩmo Pɩyɛɛr sẽn yã woto, a wõgemda a Zeezi taoor n yeele: «Zu-soaba, zãag-y y meng ne maam. Bala, mam yaa yel-wẽn maanda.» 9Bala, rabeem wʋsg dag n yõka yẽnda ne neb nins sẽn dag n be ne yẽnda wã, zĩmã bãmb sẽn yõgã waooglem yĩnga. 10La yɩɩ woto me ne a Zebde kom-dibli a Zak ne a Zã sẽn yaa a Sɩmo tũud-n-taasã. La a Zeezi yeela a Sɩmo yaa: «Da zoe rabeem ye. Sẽn sɩng ne moasã, fo na n yɩɩ nin-baooda.» 11Dẽ, bãmb lebg n talla kogendã n wa kʋɩl-koakẽ wã, n bas fãa la b tũ a Zeezi.

A Zeezi maaga wãoore

(Mat 8.1-4, Mark 1.40-45)

12A Zeezi rag n bee tẽng a yembr pʋgẽ, la rao a ye n be beenẽ tɩ yĩn-gãong bãag tar-a. A sẽn yãnd a Zeezi, a lʋɩɩme n fõgen a neng tẽnga, n bõos bãmb a woto: «Zu-soaba, yãmb sã n data, yãmb tõe n kɩtame tɩ mam lebg yɩlemde.» 13A Zeezi tẽega b nug n sɩɩs-a n yeele: «Mam datame, lebg yɩlemde.» Tao-tao bala, yĩn-gãong bãagã loog n bas-a lame. 14#Mk 14.1-32Dẽ, a Zeezi keooga yẽnda t'a ra gom bõn-kãng ne ned ye. La b yeel-a yaa: «Kẽng n tɩ wilg f meng maan-kʋʋdã, la f maan maoong wa sẽn zems a Moyiis sẽn yeelã, f yɩlgrã yĩnga, t'a tõe n yɩ kaset bãmb yĩnga.»

15A Zeezi yʋʋrã rag n saagd n yɩɩda pĩnda. Neb kʋʋng wʋsg tigma taab n na n kelg-ba, la b tõe n paam tɩ b maag b bãasã. 16La a Zeezi rag n kẽngda we-rasempʋɩɩsẽ, n tɩgd n pʋʋsdẽ.

A Zeezi maaga ned sẽn ki bogre

(Mat 9.1-8, Mark 2.1-12)

17Daar a yembre, a Zeezi rag n zãmsda nebã. Fariizẽ-dãmb ne tõog karen-saam-dãmb n dag yi Galɩle tẽmsã fãa ne Zʋʋde, la ne Zeruzalɛm n wa n zĩ be. La Zu-soabã pãng rag n bee ne a Zeezi tɩ bãmb maagd bãad-dãmba. 18La ade, neb n tʋk ned sẽn ki bogre, ne gãaga, n dag n baood n na n kẽes-a, n sik-a a Zeezi taoore. 19La nebã sẽn yaa wʋsg tɩ bãmb ka mi b sẽn na n tũ zĩig ning n kẽes-a wã yĩnga, bãmb dʋʋ roogã zugu, n maan võore, n sik ki-bogrã ne a gãagã a Zeezi taoor nebã sʋka. 20A Zeezi sẽn yã b tẽebã, b yeela raoã yaa: «Fo paama f yel-wẽnã sugri.» 21Tõog karen-saam-dãmbã ne Fariizẽ-dãmbã sɩngame n tagsdẽ n yetẽ yaa: «Yaa yɛ ned la yõwã n paoogd Wẽnnaam a woto? Sã n ka Wẽnnaam b yembre, ãndã n tõe n kõ yel-wẽn sugri?» 22A Zeezi bãnga bãmb tagsdã, n gom ne-b n sok-b yaa: «Bõe yĩng tɩ yãmb tagsd a woto y sũyã pʋse? 23Bʋg yeelg n yaa naana n yɩɩda? Fo paama f yel-wẽnã sugrã» bɩ, bɩ «yik n kẽnã»? 24La sẽn na n yɩlẽ tɩ Yãmb bãng tɩ Ninsaal Bi‑riblã tara noor dũni ka tɩ kõ yel‑wẽnã sugrã, bãmb yeela Ki‑bogrã yaa: «Yik n dɩk f gãagã n kuili.» 25La wakat-kãng bala, a yika bãmb taoore, n dɩk gãag ning yẽnda sẽn dag n gãe a zugã, n loog n kuiis a yir la a pẽgd Wẽnnaam. 26Bãmb fãa rag n yɛɛsame, la b waoogd Wẽnnaam. La rabeem yõka bãmb tɩ b yeel yaa: «Tõnd yãnda bõn-bãnd rũndã.»

A Leevi boolgo

(Mat 9.9-13, Mark 2.13-17)

27Dẽ poore, a Zeezi yiime, la b yãnda yaood-dɛɛgd sẽn zĩ a tʋʋm zĩigẽ, t'a yʋʋr la a Leevi. A Zeezi yeela yẽnda: «Wa tũ maam.» 28A Leevi basa fãa n yik n tũ a Zeezi. 29A Leevi maana tigr kãseng a yiri, a Zeezi yĩnga. La yaood-dɛɛgdb wʋsg ne neb a taab n dag n be be n zĩ n dɩt ne bãmba. 30#Luk 15.1,2Fariizẽ-dãmbã ne bãmb tõog karen-saam-dãmbã rag n yẽgemdame n yet a Zeezi karen-biisã yaa: «Bõe yĩng tɩ yãmb dɩtẽ la y yũud ne yaood dɛɛgdbã la yel-wẽn maandbã?» 31A Zeezi leoka bãmb yaa: «Ka neb nins sẽn tar laafɩ wã n baood tɩp ye: yaa bãad-dãmbã. 32Mam ka wa n na n bool nin-tɩrs tɩ b wa tek yam n kos sugr ye, yaa yel-wẽn maandbã. »

Sokr no-loeer wɛɛngẽ

(Mat 9.14-17, Mark 2.18-22)

33Bãmb yeela a Zeezi yaa: «A Zã karen-biisã ne Fariizẽ-dãmbã karen-biis loeta noor naoor wʋsg n pʋʋsdẽ, tɩ yãmb karen-biisã yaool n dɩtẽ la b yũuda.» 34A Zeezi leoka bãmb yaa: «Yãmb tõe n modga pʋg-paal sɩd tũud-n-taas tɩ b loe noor wakat ning pʋg-paal sɩdã sẽn ket n be bãmb sʋk sɩda? 35Day n wat tɩ b na n yiis pʋg-paal sɩdã n bas-ba. Dẽ, da-kãense, b na yaool n loe noore.» 36A Zeezi wẽe bãmb yel-bũnd me n yeele: Ned kõn kẽeg fu-paalg n yãk a peend n na n lisg fu-kʋdg ye. Sã n ka rẽ, yẽnda n kẽeg fu-paalga, la peendã yẽnda sẽn yãkã ka zemsd ne fu-kʋdgã ye. 37La ned ka suiid reezẽ rãam paalg ko-wao-kʋdẽ ye. Sã n ka rẽ, reezẽ rãam paalgã na n kɩtame tɩ ko-waoosã pusi. Reezẽ rãamã na raage, la ko-waoosã na sãame. 38La b tog n suii reezẽ rã‑paalg ko-wao-paals pʋse. 39La ned sã n yũ reezẽ rã-kʋdgo, a ka leb n dat reezẽ rã‑paalg ye. Bala, a yetame tɩ reezẽ rãam kʋdgã yaa noogo.

Currently Selected:

A Luk koe‑noogo 5: MPBU

Highlight

Copy