A Luk koe‑noogo 7
7
Sodaas koabg naab tʋmtʋmd yĩns maagre
1A Zeezi sẽn gom gom-kãense ne neb nins sẽn dag n kelgd bãmbã n sɛ, b kẽnga Kapɛrnaom. 2Sodaas koabg naab a ye n dag n tar a tʋmtʋmd‑nongr sẽn gãe ne bãag n kolg kũum. 3Yẽnda sẽn wʋm tɩ b gomd a Zeezi yelle, a tʋma Zʋɩf-rãmbã kãsem-dãmb bãmb nengẽ tɩ b tɩ kos-b tɩ b wa n fãag a tʋmtʋmdã. 4Bãmb sẽn ta a Zeezi nengẽ, b bõosa bãmb ne pẽdgr n yeele: «Rao-kãngã zemsame tɩ y maan a sẽn kotã n kõ-a. 5Bala, yẽnda nonga tõnd buudã, la yaa yẽnda n me tõnd karen-doogã.» 6Dẽ, a Zeezi dag n tũuda bãmb n dabda, la b sẽn kolg yirã, sodaas koabg naabã tʋma a zo-rãmb tɩ b tɩ yeel a Zeezi yaa: «Zu-soaba, da nams-y y meng a woto ye. Bala, mam ka zems tɩ yãmb kẽ mam zakẽ ye. 7Yaa woto yĩng me n kɩt tɩ mam ka tags tɩ mam zemsame tɩ wa yãmb nengẽ m toorã. Yãmb ye n gom bala, la mam tʋmtʋmdã na n paama laafɩ. 8Bala, neb sẽn yɩɩd maam n so maam, tɩ mam me so sodaase. Mam sã n yeel a yembr t'a kẽnge, a kẽngdame, la m sã n yeel a to t'a wa, a watame. Mam sã n yeel m tʋmtʋmd t'a maan woto, a maandame.» 9Dẽ, a Zeezi sẽn wʋm gom-kãensã wã, a yɛɛsa bãmba. La b wẽnemdame n yeel neb kʋʋngã sẽn da pʋgd bãmbã yaa: «Mam yeta yãmb tɩ hal baa Israyɛll pʋgẽ, mam nan ka yã tẽ-kãseng a woto ye.» 10La b sẽn tʋm-b rãmbã sẽn lebg n ta yiri, b mikame tɩ tʋmtʋmda paama laafɩ.
A Zeezi vʋʋga pʋg‑kõor biiga
11Dẽ poore, a Zeezi kẽnga tẽng a yembr sẽn boond tɩ Nayin. Bãmb karen-biisã ne neb wʋsg dag n tũuda bãmba. 12A Zeezi sẽn wa n kolg tẽngã noore, mikame tɩ neb n dag n tʋk kũum n dabd mumbu. Yẽnda dag n yaa pag a yembr sẽn yaa pʋg‑kõor bi-ribl yende. La tẽngã neb wʋsg rag n yãagda pagã. 13Zu-soabã yãnda pagã, t'a nimbãaneg yõk-b tɩ b yeel-a yaa: «Ra yãb ye!» 14A Zeezi kolgame n tik pãndarã, la neb nins sẽn dag n tʋk-a wã yalsame. A Zeezi yeelame yaa: «Bi-bɩɩga, mam yeta foom tɩ f yiki.» 15La sẽn ki-a wã yikame n zĩnd n sɩng n gomda, t'a Zeezi lebs-a a ma. 16Nebã fãa yɛɛsame n pẽgd Wẽnnaam n yetẽ: «Wẽnnaam no-rɛɛs kãseng puka tõnd sʋka, la Wẽnnaam waa n gesa b nebã.» 17Nebã sẽn gom a Zeezi yell woto wã, saaga Zʋʋde soolmã fãa ne a tẽn-kɩremsã.
A Zãmbatiis tʋma neb a Zeezi nengẽ
(Mat 11.2-19)
18A Zã karen-biisã togsa yẽnda bõn-kãens fãa. 19A Zã boola a karen-biis a yiib n tʋm-b tɩ b tɩ sok Zu-soabã n gese, yaa bãmb la sẽn tog n wa-a wã bɩ, bɩ bãmb tog n gũu ned a to? 20Raopã sẽn ta a Zeezi nengẽ, b yeelame yaa: «A Zãmbatiis tʋma tõnd yãmb nengẽ tɩ d wa sok n gese, yaa yãmb la sẽn tog n wa-a wã bɩ, bɩ tõnd tog n gũu ned a to?» 21Wakat-kãng bala, a Zeezi maaga bãad-dãmb wʋsgo, koms-rãmba, la sɩ-wẽns sẽn tar-b rãmba, la b pugs zoens wʋsg nini. 22#Eza 35.5,6, Eza 61.1La a Zeezi leok-b lame n yeele: Kẽng-y n tɩ togs-y-yã a Zã bũmb nins yãmb sẽn yã la y wʋmã:
«Zoens nin pugsdame, põe kẽndame,
wãoob paamda maagre,
wʋms wʋmdame,
kũum vʋʋgdame,
koe-noogã moonda naong rãmb sʋka.
23La bark bee ned ning mam sẽn kõn yɩ kug-lakdg a yĩngã zugu.» 24A Zã sẽn tʋm-b rãmbã sẽn looge, a Zeezi sɩngame n gom ne neb kʋʋngã a Zã yell n yeele: Yãmb kẽng n tɩ gesa bõe we-rasempʋɩɩgẽ wã? Tãnwĩig sobg sẽn miimda? 25La bõe la yãmb sẽn kẽng n tɩ gesã? Rao sẽn yer waoogr futu? Ad neb nins sẽn yer fu-bʋgsã, la b vɩ bõn neeb sʋkã bee rĩm-dãmb zagsẽ. 26La bõe la yãmb sẽn kẽng n tɩ gesã? Wẽnnaam no-rɛɛsa? Mam yeta yãmb tɩ n-yẽe, la a pʋs n yɩɩda Wẽnnaam no-rɛɛsa. 27#Mal 3.1Yaa yẽnda yell la b sẽn gʋls n yeel tɩ: «Gese, mam tʋmda m koe-toagsd t'a reng fo taoor n segl f waoongã.» 28Mam yeta yãmb tɩ pagb sẽn dog b rãmbã sʋka, baa a yembr ka be sẽn yaa-a kãseng n yɩɩd a Zã ye. La baoosgo, sẽn yaa-a yao-zʋʋg Wẽnnaam soolmẽ wã yaa kãseng n yɩɩd a Zã. 29#Mat 21.32, Luk 3.12Nebã fãa ne yaood dɛɛgdbã sẽn wʋm a Zã goamã, b reega a Zã lisgã, n wilg tɩ Wẽnnaam yaa tɩrga. 30La Fariizẽ-dãmbã ne tõog karen-saam-dãmbã sẽn zãgs t'a Zã kõn lis bãmbã, b tõdga bũmb ning Wẽnnaam sẽn dag n seglg bãmb yĩngã. 31Dẽ, a Zeezi kẽnga taoor n yeele: «Mam na n mamsa zamaan‑kãngã neb ne bõe? La b wẽnda ãnda? 32Bãmb wẽnda kamb sẽn zĩ raagẽ n boond taab n yetẽ yaa: ‹Tõnd peeba wɩɩg yãmb yĩnga, la yãmb ka sao ye. Tõnd yɩɩla kʋʋr yɩɩla, la yãmb ka yãb ye.› 33Bala, a Zãmbatiis waame n ka wãbd buri, la a ka yũud reezẽ rãam ye, tɩ yãmb yetẽ tɩ zĩn n tar-a. 34Ninsaal bi-riblã sẽn wa wã, b rɩtame la b yũuda, tɩ yãmb yetẽ tɩ rao-kãngã yaa yão-be-neda, la rã-yũuda, la yaood dɛɛgdbã ne yel-wẽn maandbã zoa. 35La Wẽnnaam kambã sẽn deegd Wẽnnaam yamã kɩta kaset t'a yaa yam.»
A Zeezi bee Fariizẽ a Sɩmo yiri
36Fariizẽ a yembr bõosa a Zeezi tɩ b wa n dɩ ne yẽnda. A Zeezi kẽe Fariizẽ wã yir n zĩnd n na dɩ. 37#Mat 26.7, Mark 14.3, Zã 12.3La gese, pag a ye n dag n be tẽngã pʋgẽ n yaa yel-wẽn maanda. Yẽnda bãngame t'a Zeezi zĩi Fariizẽ wã zakẽ n dɩtẽ. Yẽnda talla albatr tʋk sẽn pid ne tɩdare, 38n wa n yals a Zeezi poorẽ, b naoã sɛɛgẽ. A dag n yãbdame, n sɩng n madgd a Zeezi naoã ne a nintãmã, la a rag n yẽesd-b ne a zoobdã, n mogsd bãmb naoã la a zãgsd-b ne tɩdarã. 39Fariizẽ ning sẽn bool a Zeezi wã sẽn yã woto, a tagsa a sũurẽ n yeele: «Rao-kãngã sã n dag n yaẽ Wẽnnaam no-rɛɛsa, b rag n na bãngẽ pag ning sẽn sɩɩsd bãmbã sẽn yaa ned ninga, la a sẽn yaa bũmb ninga: yel-wẽn maand bala.»
40A Zeezi goma ne a Sɩmo n yeel-a yaa: «Sɩmo, mam dat n togsa foom bũmbu.» T'a leoke: «Karen-saamba, togs-y-yã.» 41A Zeezi yeela yẽnda yaa: «Ned a ye n dag n be tɩ neb a yiib tar yẽnda samde. A yembrã rag n tara deniye kobs-nu samde, t'a to wã tar pis-nu. 42La bãmb sẽn dag n ka tar n na yao wã yĩnga, yẽnda basa b yiibã fãa samã taale. Bãmb b yiibã sʋka, bʋg n na n nong yẽnda n yɩɩda?» 43A Sɩmo leokame: «Mam tagsdame tɩ yaa ned ning sẽn dag n tara sam-kẽeng tɩ b bas-a taalã.» A Zeezi yeela yẽnda: «Fo togsa sɩda.» 44Dẽ, a Zeezi wẽnemda paga sẽnẽ n yeel a Sɩmo yaa: «Fo nee pʋg-kãngã? Mam kẽe fo zakẽ, la fo ka kõ maam koom tɩ m waas m nao ye. La yẽnda, a madga mam nao ne a nintãm, n yẽes-b ne a zoobdo. 45Fo ka mok maam ye, la hal mam sẽn kẽ wã tɛka, yẽnda mogsda mam nao n ka basdẽ ye. 46Fo ka sõog mam zug kaam ye, la yẽnda, a waala mam nao ne tɩdare. 47Yaa woto yĩnga, mam yeta foom tɩ yẽnda paama a yel-wẽnã sẽn yaa wʋsgã sugri. Bala, yẽnda wilga a nonglem kãsenga. La ned ning b sẽn kõt sugr bũmb bilf yĩng nonglem yaa bilfu.» 48La a Zeezi yeela pagã yaa: «Fo paama f yel-wẽnã sugri.»
49Neb nins sẽn dag n zĩ ne bãmb n dɩtẽ wã sɩngame n tags b sũyẽ wã a woto: «Dao-kãngã yaa ãndã n kõt baa yel-wẽnã sugri?» 50La a Zeezi yeela pagã yaa: «Fo tẽeb n fãag foom. Kẽng ne bãane.
Currently Selected:
A Luk koe‑noogo 7: MPBU
Highlight
Share
Copy
Want to have your highlights saved across all your devices? Sign up or sign in
Moore Bible © Bible Society of Burkina Faso, 2014.
