A Mark koe‑noogo 15

A Pilat kaoo a Zeezi bʋʋdo

(Mat 27.1-2,11-14, Luk 23.1-5, Zã 18.28-38)

1Yibeoog pĩnda, maan-kʋʋdbã kãsem-dãmb tigma ne kãsem-dãmbã la tõog karen-saam-dãmbã, la kaoreng yɛl bʋ-bʋʋdbã fãa. Bãmb sẽba a Zeezi n tall-b n tɩ kɩs a Pilate. 2A Pilat soka a Zeezi: Yãmb yaa Zʋɩf-rãmbã rĩmã? A Zeezi leoka yẽnda a woto: Yãmb n yeele. 3Maan-kʋʋdbã kãsem-dãmbã rõda bãmb ne bũmb wʋsgo. 4A Pilat leb n soka bãmb yaa: Yãmb ka leokd tɩ bũmb la? Ges-y bũmb nins fãa b sẽn dõt yãmbã. 5La a Zeezi ka tol n leok tɩ bũmb ye. La rẽ yɛɛsa a Pilate.

B kaoo a Zeezi bʋʋd tɩ b toga kʋʋbo

(Mat 27.15-31, Luk 23.13-25, Zã 18.38—19.16)

6Tigr fãa, a Pilat dag n yiisda bi-bɛɛg a yembre, nebã sẽn kos a soabã n base. 7La ned a yembr sẽn boond t'a Barabaas dag n bee bi-bees roogẽ ne tẽn-dãmbdba, bala, tẽn-dãmbg wakate, b kʋʋ neda. 8Kʋʋngã rʋʋme n tɩ kos a Pilat bũmb ning a sẽn mi n maand n kõt bãmbã. 9A Pilat soka bãmb b sã n datame t'a bas Zʋɩf-rãmbã dĩmã n kõ-ba. 10Bala, yẽnda bãngame tɩ yaa sũ-kiir yĩng la maan-kʋʋdbã kãsem-dãmbã yõk a Zeezi n wa n kɩs yẽnda. 11La maan-kʋʋdbã kãsem-dãmbã kɩtame tɩ nebã kos tɩ b yiis a Barabaas n base. 12A Pilat leb n gomame n sok bãmb tɩ b ratame tɩ yẽnda maan a soab ning bãmb sẽn boond tɩ Zʋɩf-rãmbã dĩmã bõe? 13Bãmb leb n kelmame n yeele: Ka-y bãmb da-pɩk zugu. 14A Pilat soka bãmba: B maana bõe sẽn yaa wẽnga? La nebã leb n kelma ne pãng n yɩɩd pĩnda: Ka-y bãmb da-pɩk zugu. 15A Pilat sẽn dat n noog nebã sũur yĩnga, a yiisa a Barabaas n base. La yẽnda sẽn kɩt tɩ b pãb a Zeezi ne kalwaase, yẽ rɩka bãmb n kõ nebã tɩ b ka-b da-pɩk zugu.

16Sodaasã talla a Zeezi n kẽng zakã pʋgẽ, sẽn dat n togs tɩ sodaasã zakẽ, la bãmb tigma sodaasã fãa sẽn be zĩ-kãngã. 17B yeelga a Zeezi fu-miuugu, la b kala gõos wa maanfo, n fõgen bãmb zugu. 18Dẽ, sodaasã sɩngame n pʋʋs bãmb n yeele: Zʋɩf-rãmbã dĩma, tõnd pʋʋsda yãmba. 19La bãmb wẽe a Zeezi zug ne tãnwĩiga, n tʋbs bãmb kolkoodo, la b yĩgimdame n wõgemd bãmb taoore. 20Bãmb sẽn yaal a Zeezi a woto n sɛ, b pidga fu-miuugã n lebs a Zeezi futã n yeelg-ba, la b talla bãmb n na n tɩ ka da-pɩk zugu.

B kaa a Zeezi da-pɩk zugu

(Mat 27.32-56, Luk 23.26-49, Zã 19.17-30)

21 # Rom 16.13 Bãmb modga ned a yembr sẽn yi weoogẽ n loogdẽ t'a tʋk a Zeezi da-pɩkã. A yʋʋr la a Sɩmo, n yaa Sirɛn neda. Yẽnda yaa a Alegsãndr ne a Rufuus ba. 22Bãmb talla a Zeezi n kẽng zĩig ning sẽn boond tɩ Golgota, sẽn dat n togs tɩ zu-wang zĩiga. 23Bãmb kõo a Zeezi rãam sẽn kalem ne miir la a Zeezi ka yũ ye.

24 # Yɩɩn 22.19 Bãmb kaa a Zeezi da-pɩk zugu,

la b pʋɩɩ bãmb futã n maan bãnde,

n na n bãng ned kam fãa

sẽn na n paam fuug ninga.

25Yaa sõ-bɩɩmd wakat la b ka bãmb da-pɩkã zugu.

26Gʋlsem ning sẽn wilgd b sẽn dõd bãmb ne bũmb ningã yeta a woto: Zʋɩf-rãmbã rĩmã.

27 # Eza 53.12 Bãmb kaa fãadb a yiib da-pɩgs zut ne a Zeezi: A yembr b rɩtgo, a to wã b goabga. 28[Woto, gʋls-sõng sẽn yet tɩ b lagma bãmb nin‑wẽns sʋkã paam pidsgu.]

29 # Yɩɩn 22.8, 109.25, Mark 14.58, Zã 2.19 Neb nins sẽn loogd be wã tʋʋ bãmba, n gõms b zut n yeele: «N-faa! Yãmb sẽn tõe n sãam wẽnd doogã n lebs n me-a rasem a tãab pʋgẽ wã, 30bɩ y fãag y meng n wa n sig da-pɩkã zugu.» 31Maan-kʋʋdbã kãsem-dãmbã ne tõog karen-saam-dãmbã me goma ne taab n yaal bãmb n yeele: B fãaga neb a taaba, n yaool n ka tõe n fãag b meng ye. 32Bɩ Kiris sẽn yaa Israyɛll dĩmã sig da-pɩkã zug moasã tɩ d yã n tẽ. La neb nins b sẽn ka da-pɩgs zut ne bãmbã me goma bãmb wẽnga.

33Sẽn ta wĩnto-sʋka, dũni gill fãa lebga lik bida hal tɩ ta wẽn-kaoore. 34#Yɩɩn 22.2La wẽn-kaoor wakate, a Zeezi zẽka b koɛɛg n kelem n yeele:

Eloyi! Eloyi! Lama sabaktani?

Sẽn dat n togs tɩ: ‹Mam Wẽnnaam! Mam Wẽnnaam! Yaa bõe tɩ yãmb bas maam?› 35Neb kẽer sẽn dag n be beenẽ wã sẽn wʋm a woto, b yeelame: Gese, bãmb boonda a Eli. 36#Yɩɩn 69.22La bãmb ned a yembr wudgame n dɩk neoodgo, n los miismẽ, n yaag n sel tãnwĩig n kõ bãmb tɩ b yũ, la a yeele: Bas-y tɩ d ges a Eli sã n na wa n sik bãmba.

37La a Zeezi zẽka b koɛɛg n kelem ne pãnga, la b kiime.

38 # Yik 26.31-33 Wẽnd doogã fu-lilldig sɩnga yĩngr n kẽeg n tãag tẽnga.

39Sodaas koabg naabã sẽn dag n yas t'a neng tees a Zeezi wã, a sẽn yã b kũumã sẽn yɩ to-to wã, a yeelame: Hakɩɩka, rao-kãngã yaa Wẽnnaam Bi-ribla.

40 # Luk 8.2,3 Pagb kẽer me n dag n yas yɩɩg n getẽ. A Maari sẽn yit Magdala, ne a Maari sẽn yaa a Zak-bil ne a Zooze ma, la a Salome dag n bee bãmb sʋka. 41Bãmb dag n tũuda a Zeezi n sõngd bãmb wakat ning b sẽn dag n be Galɩle. Pagb a taab wʋsg da tũu a Zeezi n wa Zeruzalɛm.

A Zeezi mumbu

(Mat 27.57-61, Luk 23.50-56, Zã 19.38-42)

42Dag n yaa seglg daare, sẽn dat n togs tɩ daar ning sẽn deng vʋʋsg daarã. La wĩndgã sẽn kolg lʋɩɩs yĩnga, 43a Zozɛf sẽn yit Arimate waame. Yẽnda yaa kaorengã yɛl bʋ-bʋʋd nebã fãa sẽn waoogd‑a, la a me rag n gũuda Wẽnnaam soolem waoongo. Yẽnda maana raood n kẽng a Pilat nengẽ n tɩ kos a Zeezi kũumã. 44A Pilat sẽn wʋm t'a Zeezi zoe n kiime, a yɛɛsame, la a kɩtame tɩ b bool sodaas koabg naabã t'a wa, t'a sok-a n na n bãng b sã n kii sẽn kaoose. 45Sodaas koabg naabã sẽn wilg yẽnda yellã sẽn yɩ to-to wã, a kõo a Zozɛf a Zeezi kũumã. 46La a Zozɛf raa lẽ peen-peelse, n sik a Zeezi kũumã da-pɩkã zugu, n vil-b ne pɛɛlã n gãneg-b yaoog sẽn tuk kugr zug pʋgẽ, la a bilma kugr n lud yaoogã noore. 47A Maari sẽn yit Magdala ne a Zooze ma a Maari rag n geta zĩig ning b sẽn gãneg bãmbã.

Currently Selected:

A Mark koe‑noogo 15: MPBU

Highlight

Copy