Zaã1 4
4
Lawa Yiri laanka zɔ́ɔ yiri boo
1Maa giaáran lɛn, minin mɛnɛn bɛ́ n dinin biɛ Lawa Yiri kɛ a dɛnan lɛa, ka nyan golee bɛn tumaa li wa. Ka n da ǹ gɔ́ɔ̃ li bɔrɔ ka ga ǹ ganaa, bɛ̀ ǹ yiri lɛ n boe Lawa li. A giala, Lawa a boo gii-dali soɛ-bɔlen nə́ mɔnaa kanaa lɛ gɔ́ɔ̃ nɛ. 2Bɛ̀ Lawa Yiri tá ǹ li, ka bɛ́ re doɛ̃ lɔn bɛ á ke: min mɛn bɛ́ pii, mà Yezu *Krita na á daa minbuiin lɛa, Lawa Yiri tá bɛ lon. 3Sɛnɛ, min mɛn bɛ́ n piɛ̃, mà asɛ a bɛ doɛ̃ Yezu wɔ paǹ li wa, bɛ yiri kɛ bie boe Lawa li wa. Yiri mɛn bɛ́ a li, Krita a Zɔ́ɔ yiri ni. Ká ma, mà a doamaa nɛ a daa, sɛnɛ, a tá kanaa dinin gɔrɔ.
4Sɛnɛ, maa nɛnyaanan lɛn, kasɛn mɛnɛn bɛ́ Lawa wɔn lɛa, kasɛn nə́ boo Lawa a boo gii-dali soɛ-bɔlen kɛn la. A giala, Yiri mɛn bɛ́ ka lon, a pàã la kanaa kɛ a minin wɔ nɛ. 5Ǹsɛn man boo diɛ kanaa wɔ gɔn la, kanaa nə n too koe ǹ lon, a giala, maǹ kanaa din wɔn lɛa. 6Sɛnɛ, wɔsɛn man Lawa wɔn lɛa. Min mɛn bɛ́ n din koe Lawa-doɛ̃ la, bɛ nə n too koe wɔ lon. Min mɛn bɛ́ a Lawa wɔ lɛa wa, bɛ ba n too koe wɔ lon wa. Yiri mɛn bɛ́ sonbore pii ka minin sã ǹ yiri ke, wɔ ǹ bɛn bɔkɔnlɛ doɛ̃ bɛ li.
Lawa a minin-narɛɛ boo
7Maa giaáran lɛn, ka daa wɔ kɔn narɛ, a giala kɔn-narɛɛ n boe Lawa li. Min mɛn bɛ́ ǹ miã narɛ, bɛ n Lawa a nɛ lɛa, a n Lawa doɛ̃. 8Bɛ̀ min mɛn ba ǹ miã narɛ wa, bɛa Lawa doɛ̃ wa, a giala, Lawa n minin-narɛli lɛa. 9Lawa na a minin narɛ ǹ sii zɛnaa wɔ bii lɔn, bɛ á ke: a ná a Nɛgiĩ goon toto dia kanaa lɛ nɛ, ń giɛ, wɔ á yiikoonaabaa yii a pàã ganaa. 10Minin-narɛɛ lɛ n ka kɛ nɛ: a bie ka wɔsɛn man wɔ́ Lawa narɛ wa, sɛnɛ, asɛ na á wɔsɛn narɛ, a ná a Nɛgiĩ dia, wɔa sii baraan sawaa ǹ wúlu màn lɛa. 11Maa giaáran lɛn, bɛ̀ Lawa wɔ narɛ miɛ̃, wɔ dɔn doamaa nɛ wɔ kɔn narɛ. 12#Zaã 1.18 Min kɔ́n yii tɔn Lawa yɛ wa. Sɛnɛ, bɛ̀ wɔ á kɔn narɛ, Lawa n goɛ̃ kun wɔ nɛ, a minin narɛ ǹ sii dɔ nə n zɛnɛɛ wɔ nɛ a giala yii li.
13Wɔ bɛ́ siɛ lɔn wɔ dɔ̃, mà wɔ tá kun Lawa nɛ, a dɔ n kun wɔ dɔn nɛ, bɛ á ke: a na á ná a Yiri kɔ wɔ la. 14Wɔsɛn yii yɛ, wɔ na a siére pii, wáa Díi Lawa na á ná a Nɛgiĩ dia, mà a kanaa kirisibaali baa. 15Min mɛn bɛ́ pii mà Yezu n Lawa a Nɛgiĩ lɛa, Lawa n kun bɛa dɛnaa nɛ, ǹ dɛnaa dɔ n kun Lawa nɛ. 16Lawa bɛ́ wɔ narɛ ka yɔrɔ mɛn nɛ, wɔsɛn tá bɛ doɛ̃, a giala wɔ́ golee li.
Minin-narɛli n ka Lawa nɛ. Bɛ̀ min mɛn dɔ minin-narɛli baa, ǹ dɛnaa n goɛ̃ kun ka Lawa nɛ, Lawa dɔ n goɛ̃ kun ka a dɔ nɛ. 17Bɛ̀ kɔn-narɛɛ tá wɔ li a giala yii li, wɔ foo á re goɛ̃ doa-n kiri-kurii pinaa. A giala, wɔ́ goã kanaa kun ka Lawa nɛ, ka Krita bɛ́ á zɛnaa lɔn. 18Nyɛ́ɛ ba kɔn-narɛɛ-n wa, kɔn-narɛɛ sonbore n nyɛ́ɛ boe wɔ ganaa. Bɛ̀ wɔ á nyɛ́ɛ biɛ mà min tá re dɔlɔ boe wɔ ganaa, bɛ n nyɛɛ mà wɔ ba ǹ dɛnaa narɛ a giala yii li wa.
19Wɔsɛn wɔ paǹ li, wɔ ǹ Lawa narɛ, a giala, Lawa na á wɔ narɛ bibinaanɛ. 20Bɛ̀ min pɛ, mà asɛ á Lawa narɛ, ǹ dɔɔ̃n dɔ tìĩ n boe-n a nyin ni, soɛ-bɔle ne. Lawa mɛn bɛ́ a yii ba a ganaa wa, a boe la a bɛ narɛ, bɛ̀ ǹ dɔɔ̃n mɛn bɛ́ a yii ná a ganaa, bɛ̀ a ná a bɛ narɛ wa. 21Krita dí-pɛ mɛn kɔ wɔ la, bɛ n ka kɛ nɛ: Min mɛn bɛ́ Lawa narɛ, a doamaa nɛ a ǹ dɔɔ̃n dɔ narɛ.
Currently Selected:
Zaã1 4: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.