Tim1 3
3
Ga Lawa a sɔmɔ walan wolen boo
1Kɛ n boo lɛa, min doamaa bɛ́ a boo mɛn si taãn lɛa. Bɛ̀ min mɛn tá li a ga Lawa a sɔmɔ walan, dí taãn nɛ bɛa dɛnaa á giɛ li. 2#Tiiti 1.6-9 Ga Lawa a sɔmɔ walan wole doamaa nɛ a goã zɛ̀rɛ baãnaa lɛa, lɔ goon-dɛnaa lɛa, din-kũli lɛa, sii saa ka yiri-n wole lɛa, a tɔ wɔ ǹ gɔn nə́ siĩni. A doamaa nɛ a goã tii-kũli lɛa, á n boe minin daraa la. 3A doamaa bie a goã duvɛ̃ mii a la a din ni wa, a baran goã kakaarɛ wa, sɛnɛ, a goã min basiɛ̃ lɛa, sabara-baali lɛa. A baran n là kakã wɔrɔ sii li wa. 4A doamaa nɛ a boo a din a kion la, a tamaa sɔnbɔraanɛ, a toa a nɛnyaanan na a bɔlɔ ma, ǹ na a guguru kɔ. 5A giala, bɛ̀ min ba boe a din a kion la á tamaɛ wa, a n die siɛ lɔn a tɔn ga Lawa a sɔmɔ walan? 6A baran goã Lawa-nyankɔle tii lɛa, a yaa n siɛ din gole kɔ li wa. Bɛ bie wa dɔlɔ mɛn nə n bɔ *Sɛtaan ganaa, din gole kɔ taman yii, bɛ lɛ nə n boe a dɔ ganaa. 7Min mɛnɛn bɛ́ ǹ ba Lawa a sɔmɔ minin lɛa wa, bɛn doamaa nɛ ǹ siére sonbore pɛ a wɔ gɔn la, màn mɛn bɛ́ toɛ, a yii baran goã puusə wa, Sɛtaan dɔ gɔn baran dɔ a ganaa wa.
Lawa a sɔmɔ dí-nyalin boo
8Lawa a sɔmɔ dí-nyalin dɔn doamaa nɛ ǹ goã min yii guguru-an lɛa, koe ǹ da ǹ boo lɛ. Ǹ doamaa bie ǹ duvɛ̃ mi a la yii-n wa, ǹ baran ga màn li yɔrɔ baraa la wa. 9Sonbore mɛn nə n nyaa goleemali gɔ́ɔ̃ nɛ, ǹ doamaa nɛ ǹ bɛ tamaa ka gɔ́ɔ̃ fubaa nɛ. 10Ǹ dɔn sii doamaa nɛ a n gɔsɛ bɔrɔ. Bɛ kio, bɛ̀ zɛ̀rɛbaa ǹ sii kɔ́n ba ǹ ganaa wa, ǹ tá boe la ǹ Lawa a sɔmɔ dí-nyalin baa.
11Ǹ lɔn dɔn doamaa nɛ ǹ yii goã guguru. Ǹ baran goã minin tɔ-ziziɛ̃lin lɛa duduu wa. Ǹ goã din-kũlin lɛa, bɔlɔ pepere-pɛlen lɛa sii tumaa gɔ́ɔ̃ nɛ. 12Lawa a sɔmɔ dí-nyalin doamaa nɛ ǹ goã lɔ goondɛnan lɛa, ǹ nə́ boe ǹ nɛnyaanan tamaa la sɔnbɔraanɛ, ka ǹ dinin kion ne. 13A giala, min mɛnɛn bɛ́ Lawa a sɔmɔ dí nyɛɛ sɔnbɔraanɛ, bɛn tá re gugurubaa yii, ǹ boo la ǹ boo da ka foo tãbaa gole ne, wɔa golee Yezu *Krita li gɔ́ɔ̃ nɛ.
Wɔ bɛ́ wɔ golee màn mɛn li
14Man sɛ́wɔ kɛ kiɛ̃ diɛ n la, ma foo n doa nɛ, máa ma á re die n li kànaa ka boɛɛn nɛ. 15Sɛnɛ, bɛ̀ má belebɔ ma a die wa, n doamaa bɛ́ nɛ n dí mɛn nya Lawa a kion minin bii, sɛ́wɔ kɛ lɛ á re toɛ n bɛ dɔ̃. Bɛa kion lɛ n Lawa yiikoonaa a sɔmɔ lɛa, sonbore koa ǹ bǎã laanka a tamaa ǹ bǎã nɛ, ka yírəə bɛ́ we-n kion li lɔn, á n kuĩ koɛ lon. 16Sonbore ne, sii-durii mɛn bɛ́ wɔa golee Yezu li ǹ sii lɛa, á n nyaa, bɛ á gole á la yii ni:
Á n din baa minbuiin nɛ lɛa, á daa,
Lawa Yiri ná a peperebaa nyaa,
Lon a dia dí-a wolen nə́ yɛ miɛ̃.
A boo nə́ n kalaa tɔrɔn bii,
kanaa minin nə́ golee li,
Lawa tɔ́n saa á woo-n lon.
Currently Selected:
Tim1 3: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.