Tim1 5
5
Golee Lawa li wolen kũ ǹ gɔn
1N nyan kakaarɛ kɔ min golen ganaa wa, sɛnɛ, boo da ǹ nɛ ka n bɛ́ boo diɛ n díi-n lɔn. Tɔntɔraan kũ n din dɔɔ̃nɔn lɛa. 2Lɔ zizin kũ n daanan lɛa, n lɔ tenən kũ n miãnɛnɛn lɛa, a yɔrɔ sonbore tumaa li.
3Lɔ giɔɔrɔn mɛnɛn bɛ́ min ná a ba ǹ la wa, ga bɛn walan, n nə ǹ guguru kɔ. 4Sɛnɛ, bɛ̀ nɛnyaanan tá lɔ giɔɔrɔ mɛn lon, hinlaa ta a nɔ̀ɔnɔn manɛ, bɛn lɛn doamaa nɛ, ǹ nə ǹ kɔ Lawa a zii lɛ nyaa ǹ dinin kion minin man bɔrɔ, ǹ nə ǹ yɛ-wolen gɔn dòo saraa ǹ la. Màn mɛn bɛ́ kɔɔ̃n Lawa ganaa, a din lɛ n ka bɛ nɛ. 5Lɔ mɛn bɛ́ giɔɔrɔ lɛa taãnɛ, á giã a dinsɔɔ̃ lenlenm bɛ na á n foo doa Lawa ganaa, á n sii sii a ganaa. A n gòã-kũ diɛ Lawa lɛ ganaa, a ná a nyankoe penleen ka tèlò ne. 6Sɛnɛ, ǹ mɛn bɛ́ n taasɛ ka bɔlɔ sɛ̀-mui siin dininsɔɔ̃nɔn nɛ, bɛ na á gã, haalɛ ta a yii á koo sisia. 7N doamaa nɛ n bɛ lɛ pɛ ǹ nɛ n laa, màn mɛn bɛ́ toɛ, min baran zɛ̀rɛ sii yɛ ǹ ganaa wa. 8Bɛ̀ min ba giɛ a din wɔn walan wa, sanparɛ a din a kion minin kɛn, bɛa dɛnaa na á n piã ka kɔ Lawa a zii lɛ nɛ. Á baraa á la golee Lawa li baãnaa nɛ.
9N bɛ́ re lɔ giɔɔrɔ mɛn tɔ diɛ lɔ giɔɔrɔn sɛ́wɔ nɛ, yǎa a kiɛ̃ lɛ̀ pɔsɔrɔ la. Ka bɛ dɔ nɛ, yǎa a goɛ̃ zuũ yɛ giĩ goon li wole lɛa. 10Yǎa a tɔ goɛ̃ boe-n sii sonbore zɛnaa gɔ́ɔ̃ nɛ, a goã a ná a nɛnyaanan too sɔnbɔraanɛ. Min mɛnɛn bɛ́ die a piɛ a bɛn kũ doɛ̃, á n din gisĩ ǹ dí nyɛɛ Lawa a minin manɛ#5.10 Grɛki bɔlɔ nɛ, a n kiɛ̃ nɛ mà a Lawa a minin gòãn pii., a nə́ n doe nɔmaa-wɔlen lɛ, á n sii sonbore tɔrɔ tumaa zɛnɛɛ.
11Lɔ giɔɔrɔ tenən kɛn, n nyan bɛn tɔ kiɛ̃ wa. A giala, bɛn foo dùũ nə ǹ nyɛnɛɛ, ǹ wɔlɔ lui *Krita ganaa, ǹ kiɛ wusoo a wɔ zuũ li ganaa. 12Maǹ dɔlɔ diɛ ǹ dinin mìi-n ka bɛa yɔrɔ kɛ lɛ nɛ. A giala, ǹ lɛ kɔ sii mɛn ganaa bibinaanɛ, ǹ nə́ wusoo ǹ nə́ n piã ka bɛ nɛ. 13Ka bɛ dɔ nɛ, dí bɛ́ a ba ǹ gɔn wa, maǹ kiɛnlɛn koe kɔn. Ǹ dí nyabaã kɛ dinsɔɔ̃ bie wa, sɛnɛ, maǹ nə n lɛ dɔ we boo tumaa nɛ, ta ǹ mɛn ba ǹ bǎã-n wa. Boo mɛn ba da ǹ boo lɛa wa, maǹ bɛ diɛ. 14Bɛ lɛ-n ma á giɛ li, máa lɔ giɔɔrɔ tenən nə wusoo ǹ wɔ giĩ li, ǹ nɛnyaanan yɛ, ǹ ga ǹ dinin kion walan, màn mɛn bɛ́ toɛ, wɔa zɔ́ɔn baran wɔ tɔ ziziɛ̃ wa. 15A giala, ǹ tɛnɛn dinin nə́ papaã gɔrɔ, ǹ nə́ kɔ *Sɛtaan kio lɛ. 16Bɛ̀ lɔ giɔɔrɔn tá lɔ golee Lawa li wole mɛn a kion, a doamaa nɛ a n dɔ ǹ lɛ. A doamaa bie a toa Lawa a sɔmɔ nə n toɛ̃ ka bɛn guĩ-n wa. Màn mɛn bɛ́ toɛ, lɔ giɔɔrɔ kɔsɔn mɛnɛn bɛ́ min ba ǹ la wa, a boo la a n dɔ bɛn lɛ.
17Ga Lawa a sɔmɔ walan wolen mɛnɛn bɛ́, ǹ dí nyɛɛ a yɔrɔ li, bɛn doamaa-n ka saraa paa nɛ. Sanparɛ ǹ mɛnɛn bɛ́, ǹ nə́ Lawa a boo laakalaa laanka minin daraa baa ǹ nya ǹ dí lɛa. 18#TDP 25.4; Mat 10.10; Luk 10.7 A giala, Lawa a boo n pii mà Tɔɔ mɛn bɛ́ wii goɛ, n doamaa bie n kurəə a soɛ̃ ganaa wa. Á n pɛ dɔn mà Dí-nyali doamaa-n ka a saraa nɛ.
19 #
TDP 17.6; 19.15 N nyan lɛ kɔ, n zɛ̀rɛ koa ga Lawa a sɔmɔ walan wole ganaa, bɛ̀ n nə́ n boo ma, á bɔ siére paa hinlaa siére sɔɔ lɛ-n wa. 20Ǹ mɛnɛn bɛ́ sii baraan zɛnɛɛ, yiɛ ǹ ganaa min tumaa yɔrɔ-a, màn mɛn bɛ́ toɛ nyɛ́ɛ gialakunun kũ. 21Man boo kɛ pii n ni, ma á laɛ n ganaa, Lawa laanka Yezu Krita yɔrɔ-a, ka Lawa a lon a dia dí-a wole sonboren ne, máa n kɔ bɛa doroon kɛn lɛn lɛ. N baran ǹ kɔn soɛ kɔ ǹ miã-n wa, n baran minin bɔkɔnlɛ dɔ wɔ sii kɔ́n gɔ́ɔ̃-n wa.
22N baran saa lɛlɛ, n nə n gɔn da min kɔ́n la fufuu, n Lawa a sɔmɔ dí kɔ la wa. N baran n sii wɔ min kɔsɔ a sii baraa-n wa. N din tamaa *yoreen ne.
23Mu kooro dinsɔɔ̃ mii lɛ da. Duvɛ̃ bɔnboɛɛn mi n nɔ̀-busii lɛ taman yii, a giala, a tá n kuĩ paapaa.
24Minin tɛnɛn tan, ǹ sii baraan man yii foaãnɛ, bɛ̀ ǹ nə́ ǹ tɔn kiri din wɔ ǹ ganaa wa. Sɛnɛ, minin tɛnɛn tan, bɛn wɔn tá re n doɛ̃ foaãnɛ ǹ kiri wɔmaa kio. 25Zɛnaa ǹ sii sonboren lɛn dɔn man yii foaãnɛ miɛ̃. Haalɛ ta ǹ mɛnɛn ba yii foaã wa, ǹ ba boe la ǹ goã durii-n wa.
Currently Selected:
Tim1 5: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.