Kol 2
2
1Sonbore, ma bɛ́ dí kaka mɛn nyɛɛ ka a lɛa, ka Lawodisee minin ni, ka min gigiã kɔsɔn mɛnɛn bin bɛ́ ǹ ma yɛ duduu wa, man giɛ li ka bɛ dɔ̃. 2Man giɛ li máa ka foo tãbaa yɛ, ka kaa kun taãn-taãnɛ kɔn-narɛɛ gɔ́ɔ̃ nɛ. Man giɛ li máa ka sii-doɛ̃ sonbore yɛ parsiini, là bɛ́ sii-doɛ̃ mɛn nɛ, Lawa din duru á daa dɔ pelo ganaa, bɛ giala, mà *Krita din. 3Minbuiin nɛ bɛ́ boe la, a sii mɛn tumaa dɔ̃ Lawa wɔ gɔn la, Krita din nə́ bɛ tumaa nyɛɛ.
4Man bɛ pii ka nɛ, màn mɛn bɛ́ toɛ, min kɔ́n baran boo la, a ka yiri sã ka lɛ gɔ́ɔ̃ paparɛ boon ne wa. 5Haalɛ ta ma dinmaa kɛ ba ka bii wa, ma tá kun ka nɛ ka ma yiri ni. Ka lɛ bɛ́ kun ke, min kɔ́n ná a boe la a ka na, a ka bɔ Krita a goleemali ganaa wa, ma foo á kɔɔ̃n bɛa lɛa.
Màn tumaa a yɛ kun ka Krita-n boo
6Ka bɛ́ ká lɛ kɔ Yezu Krita lɛ ganaa kaa Mìinaa lɛa ke, ka goã kaa-n kun a din lɛ nɛ. 7Ka toa ka goã golee-n taãn-taãn a din li, ka kaa sii tumaa zɛnaa, ka doa a din ganaa. Ka toa ka wo nyɛɛnɛ, ka golee a din li taãn-taãnɛ, a kɔnpɛ daraa kɛ nɛ ǹ nə́ kɔ ka la. Ka toa ka bǐɛ̃ dɔ̃ Lawa nɛ parsiini.
8Ka ka dinin kũ, ka baran toa min kɔ́n ka sã ka yiri binbiri bɔ ǹ boon ne wa, minbuiinin landa boon kɛn, màn kɔ́n ná a ba ǹ nɛ wa, kanaa màn pàãdɛnan lɛa, ǹ nə́ ǹ ba doa-n Krita ganaa wa. 9-10Sɛnɛ Krita lɛ sɛ n màn dadaran laanka a goledɛnan kɛn tumaa mìi la. Lawa a Lawabaa din tumaa na á kaa kun, á minbuiin baa asɛ nɛ, á giã a nɛ ka a lɛ-piɛ̃maa nɛ. Kasɛn dɔn kaa-kun ka Krita-n lɛ barka nɛ, ka Lawa a sii tumaa lɛ-piɛ̃ yɛ.
11Bɛa kaa-kun lɛ taman yii, kurii na á n zɛnaa ka ganaa, bɛa kurii lɛ, minbuiin nɛ bie á zɛnaa wa, bɛa kurii lɛ n boe Krita li, bɛ na á ka si gɔ̀nɔn siĩ siin kɛn la. 12#Rɔm 6.4 Sonbore ne, ǹ bɛ́ ǹ nə́ *batɛmu da ka ganaa, a n goon ka maǹ nə́ ka bĩ kun ka Krita nɛ, ka yii wusoo á kaa kun ka a din ni, a giala, Lawa pàã mɛn na a yii kaa á bɔ geren bii, ka golee bɛ lɛ li. 13#Efɛ 2.1-5 Kasɛn mɛnɛn bɛ́ ká goã goon ka geren ne, kaa sii baraan laanka kaa soromabaa a lɛa, Lawa na á wusoo á ka yii kaa kun ka Krita lɛ din ni. Lawa lɛ na á wɔa sii baraan tumaa toa wɔ nɛ. 14#Efɛ 2.15 Sãn mɛnɛn tumaa goã giɔ̀mɔ lɛa wɔ bɔlɔ-a, Lawa bɛn tumaa saa kun ka dí-pɛ kɛ nɛ ǹ yɔrɔ diɛ wɔ la, á ǹ bɔ wɔ mìi ni, á ǹ tuturu ka Krita a dere gɔn ganaa nɛ. 15Bɛa yɔrɔ kɛ lɛ la, Lawa na á lon màn pàãdɛnan laanka a goledɛnan pàã nya. A na á sìi da ǹ ganaa buə̃buə̃ ne, á ǹ kũ ka kòso nɛn bɛ́ lɔn, á ǹ kaa kun ka zaman kɛ nɛ, woe gɔ̀lɔ̀baa ǹ da-zii we a Nɛgiĩ ni.
Krita ka si sii la lɔn
16 #
Rɔm 14.1-6
Bɛ lɛ tɔ ganaa, ka baran toa min kɔ́n ka zɛ̀rɛ baa màn-bii hinlaa màn-mii sii ganaa wa, hinlaa a ka zɛ̀rɛ baa zɔ́n pinaan koa ganaa, ka mui diin ni, ka susu ǹ piin ni wa. 17Bɛa mànan kɛn tumaa na á goã nyɛɛnaan wɔn kɛn kɔnboen lɛa. Sɛnɛ, màn lɛ a taãn-taãn lɛ, Krita lɛ dinmaa nɛ. 18Ka baran toa minin nə koɛ̃ɛn wɔ ka-n wa. Bɛa minin kɛn lɛn man taasɛ, mà ǹsɛn man min dadaran lɛa, ǹ yii wɔlɔ yɛ siin lɛa, maǹ soɛ bɔ ǹ din-gisiĩ narɛ, ka lon a dia dí-a wolen guguru kɔ nɛ. Bɛa minin kɛn tɔrɔ piɛ̃maa-n ka din gole kɔ nɛ, mìi dɔ ba la wa, bɛ̀ á n bɔ ǹ dinin minbuiin nɛbaa ǹ taasiɛ wɔ ǹ gɔn kɛ lɛ nɛ, 19#Efɛ 4.16 ǹ ba goɛ̃ doa-n Krita ganaa wa, Krita mɛn bɛ́ màn din tumaa mìi lɛa. A din mìi kɛ lɛ barka nɛ gɔ̀nɔn lɛ din tumaa lɛ, Lawa a sɔmɔ lɛa, bɛ n goɛ̃ doa-n kɔn, a nə́ n toe, màn mɛn bɛ́ toɛ a gole kɔ a kɔnpɛ ka Lawa din dùũ ni.
20Ka ǹ ká gã kun ka Krita nɛ, Krita ka bɔ kanaa a màn pàãdɛnan pàã giulun. Wàa na á baa ka á ka dinin diɛ kanaa a sii-zɛnaa ǹ gɔnɔn pàã giulun, ka ǹ pɛ mà ka ǹ tɔn kanaa wɔn lɛa doo? Wàa na á baa ka á toɛ, ǹ tá kɛn miãn diɛ ka mìi-n doo? 21«N baran kɛ saa wa, n baran kɛ wɔ n lɛ-n wa, n baran n gɔn da kɛ ganaa wa.» 22Bɛa boon kɛn lɛn bɛ́ n diɛ mànan mɛnɛn tumaa wɔ gɔn la, bɛ̀ ǹ tá dí nyɛɛ ǹ nɛ, bɛn tumaa n ziziɛ̃. Bɛa boon kɛn lɛn man minbuiinin dí-pɛn lɛa ka ǹ daraan nɛ. 23Sonbore, bɛa dí-pɛn kɛn lɛn minin nə́ giɛ ǹ ganaa, ka yiridɛnaabaa ǹ siin manɛ, ǹ dinin zii boen ne, ǹ soɛ bɔ ǹ din gisiĩ siin ni, ka ǹ fuu nyaa ǹ dinin gɔ̀nɔn nɛ siin ni. Là ba bɛa siin kɛn lɛn kɔ́n nɛ wa, maǹ kɔɔ̃n minbuiin nɛ gɔ̀nɔn dinsɔɔ̃ ganaa.
Currently Selected:
Kol 2: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.