Dan 4
4
1Kii lɛ wusoo á pɛ kɛnɛn: – Masɛ Nebukadenezɔɔrɔ-n má goã maa kion, yii-nyɛɛ la, ma foo yii n kɔɔ̃nɛ maa kii kion kɛ nɛ. 2Ǹ kɔn pinaa tèlò-n, ma bɛ́ nyuù ni, má narɛɛ kɔn wɔ, á nyɛ́ɛ da ma ganaa parsiini. Ma siin mɛnɛn yɛ, ǹ nə́ ma yiri lɔlɔkɔn parsiini. 3Má tɔ́n pɛ máa ǹ *Baabilonii gána a doɛ̃-wɔlen tumaa sɔkɔn maa piɛ, màn mɛn bɛ́ toɛ, ǹ ma a narɛɛ lɛ a binyəə pɛ ma nɛ. 4Kɔ́lɔnbaalin nə́ daa, wɔ-kũlin ni, doɛ̃-wɔlen ne ka bòon ne. Ǹ bɛ́ ǹ nə́ wɔ kion, má maa narɛɛ lɛ pɛ ǹ nɛ. Sɛnɛ, ǹ boo la ǹ ná a giala pɛ ma-n wa. 5Bɛ kio ne, Danayeli dɔ́ tɔ́n wɔ. A din lɛ nɛ ǹ tá bíi Bɛlsazaara a kɔnpɛ ka maa lawa kɛ tɔ nɛ, lawa sonboren lɛn yiri na á goã a lon. Má narɛɛ lɛ a boo da a yii-n kɛnɛn: 6«Kɔ́lɔnbaalin goledɛnaa Bɛlsazaara, ma á doɛ̃, máa lawa sonboren kɛn yiri tá nsɛ lon, sii-durii kɔn ba piɛ̃ n ganaa wa. Ma sii mɛn yɛ maa narɛɛ lɛ gɔ́ɔ̃ nɛ, bɛ pɛ ma nɛ, n na a giala dɔ pɛ ma nɛ.
7Ma bɛ́ waa nɛ, ma màn mɛn yɛ,
bɛ n ka kɛ nɛ:
Máa man giɛ
bɛ̀ da goon nə́ ke kanaa lɛ bii,
da lɛ a sasabaa miã banban.
8Da lɛ gole kɔ, á gegere kɔ,
a sasabaa woo
yǎa lon a labaran ganaa,
ta min nə kanaa lɛ gùrù mɛn-a,
a yii na a ganaa.
9Da lɛ a luu na á goã siĩni,
á goã nɛ koe giãgiã,
màn-bii goã yii la min tumaa wɔ lɛa.
Don mànan man
nə́ goã giɛ̃ a wúlu li,
bàanan man
nə́ goã ǹ kii doe a gùrùn ganaa,
màn tumaa a màn-bii
na á goã boe a din lɛ nɛ.
10Ma bɛ́ waa nɛ, ma màn mɛn yɛ, bɛ n ka kɛ nɛ: Máa man giɛ, bɛ̀ lon a dia dí-a wole sonbore goon nə́ ke, á n toa lon, á gisĩ tán. 11Á paraa ka pã, á pɛ kɛnɛn:
Ka da lɛ kuru ka daa,
ka a gùrùn bɔbɔ,
ka a luu sɔlɔ ka bɔ-a,
ka a nɛ pɛsɛ̃,
ń giɛ don mànan kɛn
tá baa sii ǹ nə n bɔ a giulun,
ń giɛ bàanan kɛn tá yui,
ǹ nə n bɔ a gùrùn ganaa.
12Sɛnɛ, ka a giala piri
laanka a gòonən toa tán,
a goã tán buu-n don,
fɔlɔ laanka zan
zɔraka ná a lɛnpɛnɛ!
Pele á die n toɛ lon
bɛ̀ a na a gɔ̀nɔn basã,
buu ke boe tán,
á die bɛ soɛ̃ kun
ka don mànan nɛ.
13A taasiɛ á re n bɔyɛɛ,
minbuiinin taasiɛ
ná a re yii a lon doo wa,
tɔɔn taasiɛ á re n koe la.
Á re goɛ̃ bɛ gɔ́ɔ̃ nɛ yǎa lɛ̀ sɔbaa.
14Bɛa dɔlɔ boo ke,
lon na dia wolen man nə́ daa pɛ,
boo kɛ lɛ,
lon a dia dí-a wolen
man nə́ daa pɛ,
màn mɛn bɛ́ toɛ,
minbuiinin nə dɔ̃,
mà Lawa mɛn bɛ́ lon sɔsɔɔ, bɛ n
minbuiinin kiibaa mìi la.
Bɛ̀ a din tá li mà a kɔ min mɛn la,
a n koe bɛ la,
a din nə din gisĩi
wole siɛ a da kiibaa la.
15Masɛ kii Nebukadenezɔɔrɔ narɛɛ mɛn wɔ, a din nə ka kɛ nɛ. A bɛ́ màn mɛn giala pii, a nə nsɛ Bɛlsazaara ganaa, n bɛ pɛ ma nɛ. A giala, maa gána lɛ a doɛ̃-wɔlen tumaa bii, min kɔn yɛ, á boo la a ná a giala pɛ ma-n wa. Sɛnɛ, nsɛ á boe la. A giala, lawa sonboren kɛn yiri tá n lon.»
Danayeli n narɛɛ lɛ a binyəə pii
16Danayeli lɛ ǹ nə́ bíi Bɛlsazaara, kii a boo lɛ nyɛ́ɛ da a ganaa, a ná a yiri din lɔlɔkɔn. Á golee, boo din ba n diɛ la wa. Kii lɛ din tɔ́n pɛ nɛ: «Bɛlsazaara, narɛɛ kɛ laanka a giala baran n yiri lɔlɔkɔn wa.» Bɛlsazaara tɔ́n na a lɛ si á pɛ: – Maa dɛnaagiĩ, toa bɛ̀ narɛɛ lɛ yɔrɔ n dianɛ n zɔ́ɔn la. A bɛ́ sii mɛn giala pii, toa bɛ̀ a yɔrɔ n dianɛ n ziadɛnan la. 17Ma nə́ n da yɛ, gole, gegere, a sasabaa woo yǎa lon a labaran ganaa, min nə́ n toɛ kanaa paǹ tumaa nɛ a yii ná a ganaa. 18A luu na á goã siĩni, a nɛ n gigiã, min tumaa goã màn-bii yii la. Don mànan man nə́ goã n susui a wúlu li, bàanan nə́ goã ǹ kii doe a gùrùn la. 19Kii, bɛa da kɛ lɛ, n din ni! A giala, n dɔ nə n gole kɔ, ń pàã yɛ ka da kɛ lɛ bɛ́ lɔn. N golebaa lɛ nə́ n da wɔlɔ la, á woo yǎa lon, n goledɛnaabaa lɛ woo yǎa kanaa paǹ tumaa ganaa. 20Bɛ kio, n nə n lon a dia dí-a wole sonbore goon yɛ, bɛ nə́ n toa lon, á n gisĩ tán. A na á goã parɛɛ á n pii kɛnɛn: «Ka da lɛ kuru, ka kakã! Sɛnɛ, a giala piri ke, ka bɛ toa tán buu ni don, fɔlɔ laanka zan zɔraka ná a lɛnpɛnɛ. Pele á re boe lon a pã a ganaa, á re buu soɛ̃ kun ka don mànan nɛ, yǎa lɛ̀ sɔbaa.»
21Danayeli mà kii ganaa: «Narɛɛ lɛ bɛ́ màn mɛn giala pii, Lawa mɛn bɛ́ lon sɔsɔɔ, bɛ bɛ́ mà màn mɛn, sii mɛn bɛ́ re masɛ a dɛnaagiĩ kii yii, bɛ n ka kɛ nɛ: 22Ǹ tá re n lui ǹ nə n bɔ minbuiinin bii, n tá re giɛ̃ kun ka don mànan nɛ. N tá re buu soɛ̃ ka dii bɛ́ lɔn, pele á re goɛ̃ bɛ̀ a n gɔ̀nɔn basã. N tá re goɛ̃ bɛ gɔ́ɔ̃ nɛ lɛ̀ sɔbaa, yǎa n doɛ̃, mà Lawa mɛn bɛ́ lon sɔsɔɔ lɛ-n, minbuiinin kiibaa mìi la, a bɛ́ li a kɔ min mɛn la, a n koe bɛ la. 23Á pɛ dɔn, mà ǹ da lɛ giala piri toa tán. Bɛ giala n ka kɛ nɛ: Bɛ̀ ń dɔ̃ ǹ mɛn waáraa mà lon a Lawa n màn tumaa mìi la, a kiibaa lɛ á re wusii a dɔ n ganaa. 24Kii, maa doree n ka kɛ nɛ, ma á koe n la: N sii baraan kaa, n kɔ peperebaa lɛ, n nə n mɛnaa minin la kɛ dɔ kaa, n makara bɔ doobaan ganaa. Bɛ̀ ń lɛ kɔ ń zɛnaa miɛ̃, kɔntan màn tá tɔn miɛ n yii-nyɛɛ li.»
Narɛɛ lɛ a sii a Nebukadenezɔɔrɔ yɛ
25Sii lɛ tumaa nə́ n zɛnaa kii Nebukadenezɔɔrɔ nɛ. 26Lɛ̀ goon, boo lɛ a diɛ kio, ǹ kɔn pinaa, a na á goã n gòãn boboe kɔn a kii kion kɛ a kala la Baabilonii gána nɛ. 27Á n toa walan á pɛ: «Baabilonii kiwi gole lɛ á ke! Masɛ din nə má dɔ, maa kiibaa ǹ bǎã lɛa. Bɛ lɛ n die toɛ minin nə dɔ̃ mà pàã gole tá masɛ lon, mà gugurubaa tá masɛ a kiibaa lɛ nɛ.» 28Bɛa boo lɛ din nya a lɛ-n wa, bɛ̀ lɛn goon bɛ́ á bɔ lon á pɛ nɛ: «Kii Nebukadenezɔɔrɔ, man pii n ni, máa kiibaa lɛ nə́ n si n la. 29Ǹ tá re n lui ǹ nə n bɔ minbuiinin bii, n tá re goɛ̃ kun ka don mànan nɛ, n tá re buu soɛ̃ ka dii wɔ bɛ́ lɔn. N tá re goɛ̃ bɛ gɔ́ɔ̃ nɛ lɛ̀ sɔbaa, yǎa n doɛ̃ mà lon a Lawa gole lɛ n minbuiinin kiibaa mìi la, mà a bɛ́ li dɔn a kɔ min mɛn la, mà a n koe bɛa dɛnaa la.» 30A din bǎã-n gɔrɔ, sii lɛ nə́ n zɛnaa Nebukadenezɔɔrɔ nɛ: Ǹ nə́ loo ǹ nə́ bɔ minbuiinin bii, a na á goã buu soɛ̃ ka dii bɛ́ lɔn, pele na á goã a gɔ̀nɔn basɛ̃. A mìi ka pã á sɔsɔrɔ kɔ ka giogialatã-a nyàa ka nɛ, a gòon tɔ́nɔn nə́ n baa sosolo ka bàan gòon tɔ́nɔn bɛ́ lɔn.
Nebukadenezɔɔrɔ wusoo á minbuiin nɛ baa
31Nebukadenezɔɔrɔ pɛ kɛnɛn: – Lɛ̀ sɔbaa lɛ lɛ bɛ́ á pã, masɛ Nebukadenezɔɔrɔ nə́ n yii saa má dia lon ǹ kɔn pinaa, minbuiinin taasiɛ wusoo á wɔ ma nɛ. Lawa mɛn bɛ́ lon sɔsɔɔ, a yii n koo yǎa duduu, má barka da bɛ nɛ. Má a tɔ bɔ, má a guguru kɔ:
A giala, a goledɛnaabaa
lɛ a nyɛɛ wa,
a kiibaa kɛ na a tan yǎa duduu.
32Kanaa minin tumaa
ba màn kɔn lɛa a yɔrɔ-a wa.
A din foo sii nə n zɛnɛɛ,
lon a dia dí-a wolen laanka
kanaa minin wɔ paǹ li.
Min kɔn banban,
bɛ boo la a na a gɔn kũ, a pɛ nɛ:
«Wàa mɛn sii n ka kɛ nɛ n tá zɛnɛɛ?»
33A din bǎã-n gɔrɔ, minbuiinin taasiɛ wusoo á daa wɔ ma nɛ. Gugurubaa mɛn goã ma lon maa kiibaa lɛ gɔ́ɔ̃ nɛ, zín laanka siĩnbaa mɛn goã ma la, bɛn nə́ wusoo ǹ nə́ n kɔ ma la. Maa yiri kɔmala wolen laanka ma kiodɛnaa dadaran nə́ n nanaa ǹ nə́ daa ga ma li, ǹ nə́ wusoo ǹ nə́ ma koa maa kiibaa la, màn nə́ wusoo á mɛ maa golebaa li, á la lɛlɛ ń wɔ kɛ nɛ. 34Bɛ lɛ na á toa,
masɛ Nebukadenezɔɔrɔ á lon a Kii lɛ tɔ boe sisia,
ma na a tɔ siɛ lon,
man gugurubaa diɛ a tɔ la.
A giala, a nya ǹ dí tumaa n siĩni,
a zɛnaa ǹ sii tumaa n pepere.
Min mɛnɛn bɛ́
din gole kɔ ǹ sii zɛnɛɛ,
pàã tá a lon a bɛn gisĩ.
Currently Selected:
Dan 4: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.