TDP 14
14
Landa sii gɛ̀-koa wɔ paǹ li
1 #
LWS 19.28; 21.5 Ka n kaa Lawa, Dɛnaa Lawa lɛ a nɛnyaanan lɛa. Bɛ lɛ nɛ, ta gɛ̀ na á gã ka la, ka nyan nyaǹ kiɛ̃ ka gɔ̀nɔn ganaa wa, ka nyan nə n mìi kɔɔ̃ wa. 2#BBN 19.5-6; TDP 4.20; 7.6; 26.18; Tiiti 2.14; Piɛ1 2.9 Kaa Lawa, Dɛnaa Lawa din na á ka bɔ á ka koa a din wɔ lɛa. A din na á ka bɔ tɔrɔ kɔsɔn kɛn tumaa bii kanaa, màn mɛn bɛ́ toɛ, ka a dinsɔɔ̃ gɔn màn baa.
Siĩ soɛ̃ boo
3Màn mɛn tumaa bɛ́ bɔbɔnɛɛ Dɛnaa Lawa yii li, ka nyan toa ka bɛ kɔn wɔ ka lɛ-n wa. 4Ka bɛ́ boe la ka mànan mɛnɛn siĩ sɔ̃, bɛn man ka kɛn nɛ: dii ni, sère ne, ka bòe ne, 5don a zù ni, yuùn ni, luu ni, tiã nɛ, don sère ne, woree ne ka don bòe ne. 6Màn mɛn tumaa gòon bii bɛ́ diɛ nɛ, a gòon tɔ́n nə́ paa, a ná a màn-bii baɛ̃ a gɔ́ɔ̃ nɛ bɛ̀ a timəə la a sɔ̃, ka á boe la ka bɛa siĩ sɔ̃.
7Sɛnɛ, ǹ mɛnɛn bɛ́ ǹ màn-bii baɛ̃ ǹ gɔ́ɔ̃ nɛ bɛ̀ ǹ timəə la ǹ sɔ̃, ǹ mɛnɛn dɔn gòon bii bɛ́ diɛ nɛ, bɛn bii, ka baran kɛn sɔ̃ wa: nyɔɔmaa nɛ, fuiin ni, ka daaman nɛ. A giala, ǹ tá ǹ màn-bii baɛ̃ ǹ gɔ́ɔ̃ nɛ bɛ̀ ǹ timəə la ǹ sɔ̃, sɛnɛ, ǹ gòon tɔ́n bii ba diɛ nɛ wa. Ka ga bɛn ganaa màn gɔgɔrɛn lɛa. 8Ka ga birii dɔ ganaa màn gɔgɔrɛ lɛa. A giala, a gòon bii tá diɛ nɛ, sɛnɛ, a ba a màn-bii baɛ̃ a gɔ́ɔ̃ nɛ, bɛ̀ a timəə la a sɔ̃ wa. Ka nyan bɛa mànan kɛn lɛn siĩ sɔ̃ wa, ka baran n gɔn din da ǹ gere ganaa wa.
9Mu mànan bii, mu baa ǹ mànan laanka fɔrɔ bɛ́ ǹ mɛnɛn ganaa, ka á boe la ka bɛn sɔ̃. 10Sɛnɛ, mu baa ǹ mànan laanka fɔrɔ bɛ́ a ba ǹ mɛnɛn ganaa wa, ka nyan toa ka bɛn sɔ̃ wa. Ka ga bɛn ganaa màn gɔgɔrɛn lɛa.
11Bàan mɛn tumaa bɛ́ *yoreene Lawa yii li, ka á boe la ka bɛ sɔ̃. 12Sɛnɛ, ka nyan kɛn sɔ̃ wa: giogialatã-a nɛ, dənsə ne, kɔ̀ mu la ǹ lòn ne, 13sía tɔrɔ tumaa nɛ ka zèwo tɔrɔ tumaa nɛ, 14zankoo tɔrɔ tumaa nɛ, 15kɔnaason ne, kɔlɔ nɛ, mu li ǹ sɛwɔ nɛ, baafɔɔ tɔrɔ tumaa nɛ, 16kɔlɔkuun ni, gere yala bàan nɛ, bɔlɔ pɔɔ̃naa nɛ, 17bàan tà-baalin ni, 18taban nɛ, gɔgɔrɔ tɔrɔ tumaa nɛ, bàanan koo sàn nɛ, ka kion fòn ne. 19Màn baaran mɛn tumaa bɛ́ nyàa ka ná a ganaa, ka ga bɛ tumaa ganaa màn gɔgɔrɛ lɛa. Ka nyan sɔ̃ wa. 20Bàan mɛn tumaa bɛ́ yoreene Lawa yii li, ka á boe la ka bɛa siĩ sɔ̃.
21 #
BBN 23.19; 34.26 Ka nyan toa ka màn gere kɔn sɔ̃ wa. Gùlin mɛnɛn bɛ́ kaa kiwin ni, ka kɔ bɛn la, bɛn tá boe la ǹ sɔ̃. Bɛ̀ a miɛ̃ wa, ka sã tii la. A giala, kasɛn man ka gɔrɔn, kaa Lawa, Dɛnaa Lawa a zaman lɛa.
Ka baran bòe nɛ siĩ kɔrɛ n dan nyɔ mu li wa.
Lawa wɔ gii bɔ boo
22 #
LWS 27.30-33; MNS 18.21 Ka bɛ́ re màn mɛn yii kaa wuru-n lɛ̀ woo lɛ̀, ka bɛ tumaa a fùbaa ǹ wɔ bɔ ka kaa a gɔrɔn. 23Kaa Lawa, Dɛnaa Lawa din bǎã mɛn bɔ á n tɔ da la, ka kaa mànan fùbaa ǹ wɔ lɛ bii a yɔrɔ-a walan: *belee ne, duvɛ̃ nɛ, nyɔɔ nɛ, ka kaa tɔɔ dadaran laanka a bisinin kɛn nɛ bibinaan nɛ. Bɛ lɛ n die toɛ ka nyɛ́ɛ baa kaa Lawa, Dɛnaa Lawa yii ni lɛawaa tumaa li. 24Bɛ̀ kaa Lawa, Dɛnaa Lawa toa kaa bɔ don bǐɛ̃ kɔ, ka bɛ́ re màn mɛn boe ka kaa a gɔrɔn, a bǎã mɛn lɛ bɔ á n din tɔ da la, kɔntan ka a re boe la ka gũ ka wo-n walan wa, zii lɛ a sɔsɔɔbaa a la yii-n taman yii. 25Bɛ̀ á miɛ̃, ka bɛa mànan lɛn sã. Kaa Lawa, Dɛnaa Lawa bǎã mɛn bɔ á n din tɔ da la, ka a wɔrɔ gũ ka gɔn, ka wo-n walan. 26Màn mɛn tumaa sii bɛ́ ka ganaa, ka á boe la ka pii ka bɛa wɔrɔ lɛ-n walan: ta dii ni, ta sère ne, ta bòe ne, ta duvɛ̃ nɛ ta yɔ kakaarɛn manɛ. Ka bɛ tumaa bii kaa Lawa, Dɛnaa Lawa lɛ yɔrɔ-a walan, ka n nyɛnyɛɛ kun ka kaa kion minin ni. 27Sɛnɛ, *Levii tɔrɔn mɛnɛn bɛ́ kaa kiwin ni, ka nyan toa ka yiri bɔ ka bɛn nɛ wa. A giala, ǹ bǎã yɛ ǹ wɔ gii lɛa ka bii wa.
28Lɛ̀ sɔɔ woo lɛ̀ sɔɔ, ka lɛ̀ sɔɔbaa ǹ wɔ lɛ a mànan fùbaa ǹ wɔ si ka sɔkɔn kaa kiwin ni. 29Levii tɔrɔn kɛn, bǎã ná a banban ǹ wɔ lɛa ka bii wa, bɛn tá re die bɛa màn-bii lɛ kɔn siɛ, kɔnlɛ ka gùlin ni, nɛ-toenən laanka lɔ giɔɔrɔn nɛ, ǹ mɛnɛn bɛ́ giã-n kaa kiwin ni. Ǹ tumaa á die màn bii ǹ kã. Bɛ̀ á n baa miɛ̃, kaa Lawa, Dɛnaa Lawa á die barka diɛ ka ganaa, ka a nya ǹ dí tumaa gɔ́ɔ̃ nɛ.
Currently Selected:
TDP 14: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.