TDP 16
16
Kiɛ̃mala ǹ zɔ́n
1 #
BBN 12.1-20; LWS 23.5-8; MNS 28.16-25 *Abibu mui ke, ka n yiri koa bɛ li, ka *kiɛ̃mala ǹ zɔ́n zɛnaa a nɛ, ka kaa Lawa, Dɛnaa Lawa guguru kɔ nɛ. A giala, bɛa mui lɛ nɛ, Dɛnaa Lawa ka waa tèlò-n, á ka bɔ Ezipti gána nɛ.
2Ka bɛ́ re wúlu mànan mɛnɛn koe Dɛnaa Lawa la kiɛ̃mala ǹ zɔ́n lɛ wɔ lɛa, tɔɔ bisinin laanka a dadaran nɛ, kaa Lawa, Dɛnaa Lawa din bɛ́ re bǎã mɛn boe a n tɔ da la, ka die ka bɛn dɛ walan. 3Yɔ bù bɛ́ buuru mɛn li, ka nyan bɛ sɔ̃ kun ka bɛa zɔ́n lɛ a màn-bii-n wa. Yɔ bù bɛ́ a ba buuru mɛn li wa, ka bɛ sɔ̃ lɛawaa sɔbaa gɔ́ɔ̃ nɛ. Nɔmaa ǹ buuru ni, a giala, ka n ká soo Ezipti gána-n ka fuu ni. Bɛ̀ ka á bɛa buuru lɛ soɛ̃, ka n yiri kɔ kaa soo Ezipti gána-n lɛ li, kaa yiikoonaabaa lɛawaan tumaa gɔ́ɔ̃ nɛ. 4Bɛa lɛawaa sɔbaa lɛ gɔ́ɔ̃ nɛ, yɔ bù doamaa bie a yɛ min kɔn a kion kaa gána lɛ-n wa. Ka bɛ re tɔɔ mɛn dii zɔ́n lɛ a giala kɔ pinaa wasamiɛ̃nɛ, ka nyan toa bɛa siĩ lɛ̀ waa wa. 5Kaa Lawa, Dɛnaa Lawa kiwin mɛnɛn kɔ ka la, ka doamaa bie ka kiɛ̃mala ǹ zɔ́n lɛ zɛnaa bɛ kɔn nɛ wa. 6Sɛnɛ, kaa Lawa, Dɛnaa Lawa din bɛ́ re bǎã mɛn boe a n tɔ da la, ka zɛnaa walan, wasamiɛ̃nɛ, wasa a yii sã biikoo li, a kɔnpɛ ka kaa soo Ezipti gána-n pinaa nɛ. 7Ka siĩ lɛ kɔrɛ, kaa Lawa, Dɛnaa Lawa din bǎã mɛn lɛ bɔ, ka sɔ̃ walan, baayɛlɛ, ka tɔn wusoo ka wo kaa mɔnaa kionən ne. 8Lɛawaa sɔrɔ gɔ́ɔ̃ nɛ, yɔ bù bɛ́ a ba buuru mɛn li wa, ka bɛ sɔ̃. A lɛawaa sɔbaabaa ǹ wɔ pinaa, ka n lɛ sɔkɔn kaa Lawa, Dɛnaa Lawa lɛ tɔ-bɔ a lɛa. Ka nyan toa ka dí kɔn nyan bɛa pinaa wa.
Kaa-piɛ ǹ zɔ́n
9 #
LWS 23.15-21; MNS 28.26-31 Bɛ̀ ǹ nə́ *belee kurii giala kɔ, a saa bɛa waáraa lɛ ganaa, ka piizii sɔbaa nimi. 10Bɛ̀ bɛ lɛ pã, ka *kaa-piɛ ǹ zɔ́n zɛnaa ka kaa Lawa, Dɛnaa Lawa tɔ bɔ nɛ. Kaa Lawa, Dɛnaa Lawa bɛ́ re barka diɛ ka ganaa a mànan mɛnɛn kɔ ka la, ka da ka bɛ lɛ kɔn nɛ a kɔnpɛ ka ka pàã yii ni, ka dinin dùũ *wúlu màn lɛa. 11Kaa Lawa, Dɛnaa Lawa bɛ́ re bǎã mɛn lɛ boe a n tɔ da la, ka die ka n nyɛnyɛɛ walan a din yɔrɔ-a: ka dinin ni, kaa nɛnyaanan nɛ, ka bɛ̀rɛgiĩn laanka kaa bɛ̀rɛlɔn nɛ ka *Levii tɔrɔn kɛn nɛ kaa kiwin ni, kɔnlɛ ka gùlin ni, nɛ-toenən ne ka lɔ giɔɔrɔn nɛ, ǹ mɛnɛn bɛ́ giã-n ka bii. 12Ka dɔn nə n yiri koa a nɛ, mà ka n ká goã bɛ̀rɛn lɛa Ezipti gána nɛ. Ka landa boon kɛn tamaa, ka kɔ ǹ lɛ.
Giã siã giulun zɔ́n
13 #
LWS 23.33-36,39-43; MNS 29.12-38 Bɛ̀ ká kaa belee duwəə, ká kaa rezɛ̃ mu bɔ ká nya ǹ mɛn waáraa, ka *giã siã giulun zɔ́n zɛnaa lɛawaa sɔbaa gɔ́ɔ̃ nɛ. 14Ka kaa zɔ́n lɛ zɛnaa ka nyɛnyɛɛ nɛ, ka dinin laanka kaa nɛnyaanan nɛ, kaa bɛ̀rɛgiĩn laanka kaa bɛ̀rɛlɔn nɛ, Levii tɔrɔn kɛn nɛ, gùlin ni, ka nɛ-toenən laanka lɔ giɔɔrɔn nɛ, ǹ mɛnɛn bɛ́ giã-n ka bii. 15Kaa Lawa, Dɛnaa Lawa din bɛ́ re bǎã mɛn lɛ boe, ka die ka bɛa zɔ́n lɛ zɛnaa walan, ka Lawa tɔ bɔ nɛ yǎa lɛawaa sɔbaa. Kaa wɔ n die goɛ̃ ka nyɛnyɛɛ dinsɔɔ̃ nɛ, a giala, a din nə die toɛ kaa tán-kɔsiɛ bǐɛ̃ kɔ, a din dɔ n die barka diɛ kaa nya ǹ dí tumaa ganaa.
16Kaa Lawa, Dɛnaa Lawa din bɛ́ re bǎã mɛn lɛ boe, lɛ̀ goon gɔ́ɔ̃ nɛ, kaa giĩn tumaa doamaa nɛ ǹ wo n dinin nyaa a yɔrɔ-a walan, gunyin sɔɔ: *yɔ bùbaã buuru zɔ́n li, kaa-piɛ ǹ zɔ́n li ka giã siã giulun zɔ́n nɛ. Sɛnɛ, ǹ nyan toa ǹ wo Lawa yɔrɔ-a ka ǹ gɔn kooro-n wa. 17Kaa Lawa, Dɛnaa Lawa bɛ́ re barka diɛ ka ganaa a màn mɛn kɔ ka la, didie die a Lawa gɔ ǹ wɔ bɔ a wɔ nɛ, a kɔnpɛ ka a pàã yii ni.
Sii yɔrɔ bɔ ka peperebaa nɛ
18Ka die ka sii yɔrɔ-bɔlen laanka zaman-lɛduə̃lin koa kaa tɔrɔn lɛn wɔ lɛa, kiwin lɛn tumaa nɛ, kaa Lawa, Dɛnaa Lawa bɛ́ re kiwin mɛnɛn koe ka la. Bɛn tá re zaman lɛ a sii yɔrɔ boe ka peperebaa nɛ. 19#BBN 23.6-8; LWS 19.15 Ka nyan toa ka sii yɔrɔ bɔ ǹ gɔn ziziɛ̃ wa. Ka nyan bɔnbii-a wɔ wa, ka nyan toa min ka lɛ pii ka màn nɛ wa. A giala, lɛ pii ǹ màn nə sii-dɔ̃lin yii tiɛ̃, a min peperen kaa boo kɔkɔrɔ diɛ ganaa. 20Ka n doa ka kɔ peperebaa lɛ, màn mɛn bɛ́ toɛ, kaa Lawa, Dɛnaa Lawa bɛ́ gána mɛn lɛ koe ka la, ka yii boo la a goã koo, ka bɛa gána lɛ si ka baa kaa wɔ lɛa.
Soɛ̃ siin
21Ka bɛ́ re *wúlu bɔ ǹ bǎã mɛn doe kaa Lawa, Dɛnaa Lawa wɔ lɛa, ka nyan toa ka dì gɔn kɔn zumu bɛ li wa. 22#LWS 26.1 Ka nyan toa ka tíĩ kɔn doa walan wa. A giala, kaa Lawa, Dɛnaa Lawa a lɛ koe bɛ miã siin lɛn ganaa wa.
Currently Selected:
TDP 16: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.