TDP 22
22
Min kɔsɔ gɔn màn tamaa
1 #
BBN 23.4-5
Bɛ̀ n miã a dii hinlaa a sère na á papaã, n nyan toa n nə n baa ka n nə n yɛ wa. A loo n wo kɔ n miã lɛ la. 2Bɛ̀ tɔɔ lɛ a dɛnaa bǎã á sɔsɔɔ n piɛ ganaa hinlaa bɛ̀ n ba ǹ dɛnaa doɛ̃ wa, n tɔɔ lɛ kũ n wo da n kion, n toa n kion yǎa ǹ dɛnaa die giɛ li. Bɛa biikoo li, n bɔ n kɔ la. 3Ta min a dundun na á papaã, ta a mɔnaa nɛ, ta a màn woo màn nɛ, bɛ̀ ká yɛ, ka zɛnaa miɛ̃. Ka nyan toa ka n baa ka ka yɛ wa.
4Bɛ̀ ká ka miã a dundun hinlaa a dii yɛ á mɛnaa zii la, ka nyan toa ka n baa ka ka n ka yɛ wa. Ka doamaa nɛ ka n dɔ ka miã lɛ lɛ, ka tɔɔ lɛ saa ka da lon.
Landan kɔnɔn
5Lɔ doamaa bie a giĩn dɔnkɛ wɔ wa, giĩ dɔ doamaa bie a lɔn dɔnkɛ wɔ wa. A giala, bɛ̀ min mɛn bɛ miã zɛnaa, ǹ dɛnaa na á sii bɔbɔnɛɛ zɛnaa kaa Lawa, Dɛnaa Lawa yɔrɔ-a.
6Bɛ̀ ka n zii la yǎa ka bàan kii yɛ da la hinlaa a n tán, a gìi hinlaa a nɛn ná a nɛ, ǹ dan nə́ waa-n la, ka doamaa bie ka bàan dan lɛ laanka a nɛn lɛn waa kun wa. 7Ka doamaa-n ka bàan dan lɛ toa a woo, ka a nɛn lɛn goa ka wo ǹ ne. Bɛ lɛ n die toɛ kaa wɔ bǐɛ̃ kɔ, ka nyin sasa yɛ kanaa.
8Bɛ̀ ká kion dii dɔ, ka a lɛ kìri dɔ á woo lon, màn mɛn bɛ́ toɛ, min baran bɔ a kala la a mɛnaa, a sii saa a kɔ ka la wa.
9 #
LWS 19.19
Ka nyan màn tɔrɔ kɔsɔ zumu kaa rezɛ̃ wuru-n wa. Bɛ̀ ká bɛ zɛnaa, màn lɛ tumaa n Lawa wɔ biɛ: n màn tɔrɔ kɔsɔ mɛn zumu, ka *rezɛ̃ da lɛ a nɛ nɛ. 10Ka nyan dii laanka dundun naa kɔn, mà ka n buu kɔsɛ ǹ nɛ wa. 11Mɔnaa mɛn bɛ́, ǹ nə́ sère ka laanka bòosa lɔlɔkɔn ǹ nə́ tã nɛ, ka nyan bɛ wɔ wa.
12 #
MNS 15.37-41
Ka bɛ́ mɔnaa mɛn koe ka lɛ, ka die ka pàsa kaa bɛ lɛkoro sii ganaa.
Landa mɛn nə n koa lɔn wɔ paǹ li
13Kɔntan, kaa min kɔn tá re lɔ siɛ, a giã kun ni, bɛ kio, lɔ lɛ tìĩ daa a bɔ a nyin ni. 14Bɛ̀ á pɛ mà a giã ǹ gɔn na a ba siĩn wa, á ná a tɔ ziziɛ̃ á pɛ: «Má lɔ kɛ saa, má n mɔrɔ a ganaa, sɛnɛ, ma wo yaa kion wa.» 15Bɛ̀ á bɛ baa, màn mɛn bɛ́ nyɛɛ, mà nɛlɔ lɛ goã kion, ǹ di laanka ǹ dan nə bɛ saa, ǹ da nɛ kiri wɔ ǹ bǎã nɛ, ǹ nyaa min golen ne. 16Nɛlɔ lɛ di die a pɛ min golen lɛn man kɛnɛn: «Masɛ din a nɛlɔ n ke, má kɔ giĩ kɛ la a lɔ lɛa. Sɛnɛ, a tìĩ na á bɔ a nyin ni. 17Á ke a zɛ̀rɛ biɛ a giã ǹ gɔn taman yii á n pii mà asɛ wo maa nɛlɔ lɛ yaa kion wa. Màn mɛn bɛ́ nyɛɛ mà á goã kion, bɛ á ke!» Ǹ kɔn yɛ mɔnaa mɛn la bibinaa nɛ, lɔ lɛ di laanka ǹ dan bɛ lɛ bɔ kiwi lɛ a min golen yɔrɔ-a. 18Bɛ gɔ́ɔ̃ nɛ, bɛa kiwi lɛ a min golen nə giĩ lɛ kũ ǹ dɔlɔ bɔ a ganaa. 19Ǹ doamaa nɛ ǹ wɔrɔ paabiɛ#22.19 wɔrɔ paabiɛ: Gɔn si ǹ giɔ̀mɔ màn paa a kaa kun ni. da a mìi ni, ǹ bɛ si ǹ kɔ nɛlɔ lɛ a díi la. A giala, giĩ lɛ na á soɛ da Izirayeli minin nɛlɔ la. A giĩ lɛ toa a yii n koo, lɔ lɛ na a wɔ lɛa, a doamaa dɔ bie a loo wa.
20Sɛnɛ, bɛ̀ sii lɛ taãn baa, màn kɔn ná a yɛ bɛ́ n nyɛɛ mà a woo nɛlɔ lɛ yaa kion sonbore wa, 21ǹ nɛlɔ lɛ kũ ǹ soo ne ǹ di a kiɛnlɛ-a. Bɛ kio, kiwi lɛ a giĩn nə kɔlɔ kaã bɔ a ganaa ǹ dɛ a gã, a giala, a bɛ́ á n toa ǹ di kion á giĩ si, a na á sìi da ǹ sii zɛnaa Izirayeli gána nɛ. Ka zɛnaa miɛ̃ ka sii baraa bɔ ka bɔ ka bii. 22Lɔ mɛn bɛ́ zuũ li, bɛ̀ ǹ nə́ giĩ mɛn kũ a gialaa giɛ bɛ li, giĩ lɛ laanka lɔ lɛ nɛ, ǹ doamaa nɛ ǹ nə ǹ dinin paanan dɛ. Ka zɛnaa miɛ̃ ka sii baraa bɔ ka bɔ Izirayeli gána nɛ.
23Bɛ̀ nɛniɛ mɛn a san tan, bɛ̀ giĩ kɔsɔ kaa bɛa nɛniɛ lɛ lɛ kiwi gɔ́ɔ̃ nɛ yǎa a kũ a ga li, 24ka ǹ dinin paanan kũ ka da ǹ nɛ kiri wɔ ǹ bǎã, ka kɔlɔ kaã bɔ ǹ ganaa, ka ǹ dɛ ǹ gã. Nɛniɛ lɛ doamaa-n ka gɛ̀ nɛ a giala, a n lɛ dɛ mà min da asɛ si wa, a da yaa, a n kiwi gɔ́ɔ̃ nɛ. Giĩ lɛ dɔ doamaa-n ka gɛ̀ nɛ, a giala, a na á ga ǹ miã a lɔ-wɔsiɛ li. Ka zɛnaa, miɛ̃ ka sii baraa bɔ ka bɔ ka bii.
25Sɛnɛ, bɛ̀ giĩ lɛ na á kaa nɛniɛ lɛ lɛ don á kũ á ga li, a da yǎa nɛniɛ lɛ a san tan, ǹ doamaa nɛ ǹ giĩ lɛ dinsɔɔ̃ dɛ a gã. 26Ka nyan sii kɔn zɛnaa nɛlɔ lɛ sɛ-n wa, a giala, a sii kɔn zɛnaa, bɛ́ n gɛ̀ boe wa. Bɛa sii kɛ n goon ka min mɛn nə́ ke, ǹ miã kɔsɔ mɛnaa la á dɛ. 27Giĩ lɛ bɛ́ na á woo nɛniɛ lɛ yaa don, haalɛ ta nɛniɛ lɛ nə́ n lɛ dɛ, min kɔn ba re yii a si la wa.
28 #
BBN 22.16-17
Nɛniɛ mɛn nə́ ke a san ná a banban, bɛ̀ giĩ mɛn kaa bɛ lɛ, yǎa a kũ ka pàã nɛ á ga li, bɛ̀ ǹ nə́ ǹ kũ bɛ ganaa, 29giĩ lɛ doamaa nɛ a wɔrɔ posooro kɔ nɛniɛ lɛ a díi la. A bɛ́ á ga li á nya, a toa a yii n koo, lɔ lɛ na a wɔ lɛa, a doamaa dɔ bie a loo wa.
Currently Selected:
TDP 22: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.