TDP 26
26
Màn lɛ bibinaa kɔ
1Kaa Lawa, Dɛnaa Lawa bɛ́ gána mɛn lɛ koe ka la mà a kaa wɔ baa, ka á re we a nɛ. Ǹ mɛn waáraa, bɛ̀ ka giã gána 2#BBN 23.19 lɛ nɛ kaa Lawa, Dɛnaa Lawa ń die koe ka la, ka bɛ́ re màn mɛn tumaa a wuru boe a tán la, ka a tumaa a lɛ bibinaa kɔn kaa kɛsɛ nɛ, ka da nɛ bǎã kɛ nɛ kaa Lawa, Dɛnaa Lawa lɛ ń die boe, bɛ̀ a n din nyaa a nɛ. 3Lawa a wúlu-bɔle mɛn bɛ́ dí la bɛa pinaa kɛ lɛ nɛ, didie wo ka a wɔ nɛ bɛ li a pɛ nɛ: «N Lawa, Dɛnaa Lawa na á n lɛ kɔ wɔsɛn digolon la, mà á re gána lɛ koe wɔ la. Man pii n ni pelo, máa má dɔ bɛa gána lɛ nɛ.»
4Bɛ kio, wúlu-bɔle kɛsɛ lɛ si a bɔ a gɔn, a wo da tán kaa Lawa, Dɛnaa Lawa a *wúlu bɔ ǹ bǎã kɛ yɔrɔ-a.
5Bɛ kio kəni, a golee a Lawa, Dɛnaa Lawa yɔrɔ-a a pɛ kɛnɛn: «Ma digolo na á goã Aramu tɔrɔ lɛa n binbirin boe. Á woo Ezipti gána nɛ, á giã walan gùlibaa nɛ, kun ka minin kɛn nɛ ǹ nə́ goã diɛ zii. Ǹ goã tɛ dinin wa. A bɛ́ walan, a minin lɛn nə́ mɔnaa, ǹ nə́ gána gole baa, pàã nə́ ǹ lon. 6Sɛnɛ, Ezipti minin lɛn nə́ bɔ wɔ yii ni, ǹ nə́ wɔ kaa dí kaka nyɛɛ ganaa, ǹ nə́ doobaabaa kaa wɔ ganaa.
7Bɛ lɛ nɛ, wɔ́ n lɛ dɛ wɔ digolon Lawa, Dɛnaa Lawa lɛ ganaa, a dɔ́ wɔa lɛ-dɛ ma. Ǹ bɛ́ nɔmaa mɛn diɛ wɔ mìi ni, ǹ bɛ́ fuu mɛn nyɛɛ wɔ nɛ, ǹ bɛ́ boe wɔ yii-n lɔn, á bɛ yɛ. 8Dɛnaa Lawa na á tɔ́n sii kakan zɛnaa, kaãbaa ǹ sii dadaran lɛa, á nyɛ́ɛ gole da ǹ nɛ, á wɔ waa ka pàã nɛ, á wɔ bɔ Ezipti gána nɛ. 9A din na á daa wɔ nɛ bǎã kɛ nɛ, á gána kɛ lɛ kɔ wɔ la, bɔ̀nyaa laanka zoo nyɔɔ bɛ baa sii gána mɛn nɛ. 10Dɛnaa Lawa tán mɛn lɛ kɔ ma la, a màn lɛ bibinaa nə́ ke má daa kɔ Dɛnaa Lawa la.»
Bɛ kio, bɛa dɛnaa màn lɛ da tán Dɛnaa Lawa yɔrɔ-a, a kaa tán, a kaa Lawa, Dɛnaa Lawa lɛ guguru kɔ. 11Kaa Lawa, Dɛnaa Lawa bǐɛ̃ mɛn tumaa baa ka la, ka dinin laanka kaa kion minin ni, ka bɛa nyɛnyɛɛ wɔ kun ka *Levii tɔrɔn laanka gùlin kɛn nɛ, ǹ mɛnɛn lɛn bɛ́ giã-n ka bii.
Màn a fùbaa ǹ wɔ
12 #
TDP 14.28-29
Lɛ̀ sɔɔ woo lɛ̀ sɔɔ, ka màn mɛn yɛ kaa tán-kɔsiɛ gɔ́ɔ̃ nɛ, ka a fùbaa ǹ wɔ tumaa bɔ. Bɛ̀ ká bɔ, ka kɔ Levii tɔrɔn kɛn la, gùlin ni, nɛ toenən ne ka lɔ giɔɔrɔn nɛ, màn mɛn bɛ́ toɛ, ǹ dɔn nə màn bii ǹ dinin bǎã nɛ ǹ kã. 13Bɛ kio, ka tɔn kɛ pɛ kaa Lawa, Dɛnaa Lawa yɔrɔ-a: «Màn mɛn doamaa bɛ́ nɛ a dɔ Lawa ganaa, má bɛ waa má bɔ maa kion, má kɔ Levii tɔrɔn la, gùlin ni, nɛ-toenən ne, ka lɔ giɔɔrɔn nɛ, a kɔnpɛ ka n gɔn waa ǹ boon kɛn tumaa nɛ, ń nə́ ǹ pɛ ma nɛ. Ma bɛa gɔn waa ǹ boon kɛn lɛn kɔn la bɔ wa, ma yiri dɔ bɔ ǹ nɛ wa. 14Ma bɛ́ maa yɔrɔ-kɔsiɛ gɔ́ɔ̃ nɛ ǹ mɛn waáraa, ma màn kɔn bɔ a nɛ má bii wa, ma màn kɔn bɔ a nɛ má *gɔ̀ sii zɛnaa-n wa, ma ǹ kɔn dɔ kɔ geren la wa. Má n too kɔ maa Lawa, Dɛnaa Lawa lon, má zɛnaa á kɔnpɛ ka a gɔn waa ǹ boo lɛ tumaa nɛ. 15Sisia kəni, n toa n bǎã sonbore kɛ-n lon, n barka da n din a minin Izirayeli tɔrɔn lɛn ganaa, ka tán kɛ dɔ nɛ ń kɔ wɔ la, bɔ̀nyaa laanka zoo nyɔɔ bɛ baa sii gana mɛn nɛ, a kɔnpɛ ka n lɛ-kɔ kɛ nɛ ń wɔ wɔ digolon manɛ.»
Lawa laanka Izirayeli minin nə lɛ mɛn kɔ kɔn la
16Pelo, kaa Lawa, Dɛnaa Lawa nə n gɔn wɛɛ ka nɛ, mà ka kɔ asɛ a landa boon laanka asɛ a sii yɔrɔ bɔ ǹ boon kɛn lɛ. Mà ka ǹ tamaa ka kɔ ǹ lɛ, ka ka foo tumaa nɛ, ka kaa taasiɛ tumaa nɛ. 17Pelo ká pɛ mà Dɛnaa Lawa n kaa Lawa lɛa. Mà ka tá re a bɔlɔ sii dɔn, ka a landa boon kɛn tamaa, a gɔn waa ǹ boon laanka a sii yɔrɔ bɔ ǹ boon kɛn nɛ, ka n too kɔ a lon. 18#BBN 19.5; TDP 4.20; 7.6; 14.2; Tiiti 2.14; Piɛ1 2.9 Dɛnaa Lawa dɔ pɛ pelo mà ka na a asɛ a zaman lɛa, mà ka na a dinsɔɔ̃ wɔ lɛa, ka a bɛ́ á pɛ ka-n lɔn, ka a gɔn waa ǹ boon kɛn tumaa tamaa. 19A giala, Lawa tɔrɔ kɔsɔn mɛnɛn tumaa zɛnaa, a n die gugurubaa koe ka la, a ka tɔ bɔ, ka golebaa yɛ a la bɛn manɛ. Bɛ gɔ́ɔ̃ nɛ, a n giɛ li ka goã asɛ din wɔ lɛa, ka a bɛ́ á pɛ lɔn.
Currently Selected:
TDP 26: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.