TDP 3
3
Ɔgu a bǎã si la boo
1Bɛ kio, wɔ́ n bɔyaa wɔ́ Basan gána zii saa. Basanan kii Ɔgu soo kun ka a zaman tumaa nɛ, á daa n da wɔ lɛ Edreyii kiwi, á zia baa wɔ ganaa. 2Dɛnaa Lawa tɔ́n pɛ ma nɛ: «N baran nyɛ́ɛ baa-n wa. A giala, má wɔ n gɔn, a din ni, a zaman tumaa nɛ, ka a gána nɛ. Amɔɔrɔn kii Sihɔn mɛn goã giã-n Ɛsibɔn, n sii mɛn zɛnaa bɛ nɛ, bɛ lɛ miã zɛnaa a dɔ nɛ.» 3Wɔa Lawa, Dɛnaa Lawa lɛ tɔ́n Basanan kii Ɔgu dɔ wɔ wɔ gɔn, ka a zaman tumaa nɛ. Wɔ́ ǹ dɛ wɔ́ ǹ nya, haalɛ wɔ min goon din toa-n wa. 4Wɔ́ a kiwin lɛn tumaa si bɛa waáraa lɛ nɛ Argɔbu a bǎã kɛ nɛ. Kiwi din goã, mà wɔ n wɔ si ǹ la wa. A kaa kun kiwi pɔsɔrɔ, Basan gána nɛ, Ɔgu goã ǹ mìi la. 5Kungɔn sɔsɔrɔn man nə́ goã bɛa kiwin lɛn tumaa lɛnpɛnɛ, goo nə́ ǹ kiɛnlɛn lɛ bɛ̀ ǹ tã, bɛ̀ ǹ fɔlɔ bàlà da a bii. Kiwi bisin gigiã dɔ́ goã a nɛ, kungɔnɔn nə́ ǹ ba bɛn ganaa wa. 6Wɔ́ ǹ yu lenlen, giĩn ni, lɔn nɛ ka nɛnyaanan nɛ, wɔ́ bɛn dɛ, ka wɔ goã wɔ́ zɛnaa Ɛsibɔnɔn kii Sihɔn nɛ lɔn. Wɔ n wɔ́ goã wɔ́ bɛ dɔ a kiwin tumaa yu. 7Sɛnɛ tɔɔn nɛ, ka wɔ màn mɛn tumaa dɔ yɛ bɛa kiwin lɛn nɛ, wɔ́ bɛn goa wɔa wɔ lɛa.
Galaati gána gii
8Bɛa waáraa lɛ nɛ, gána mɛn lɛ goã Zurdɛ̃ tà a lɛ̀giala gɔn la, wɔ́ bɛ kũ wɔ́ si Amɔɔrɔ tɔrɔn kii min paa kɛ la. A n siɛ Arnɔn tà gòã kɛ ganaa, a wo n doa Ɛrmɔn kele ganaa. 9Sidɔn minin man Ɛrmɔn lɛ bíi Sirinyɔn, Amɔɔrɔ tɔrɔn man bíi Seniiri. 10Wɔ́ diə bǎã kɛa kiwin tumaa si, Galaati laanka Basan gána tumaa nɛ, a wo Salkaa laanka Edreyii kiwi yaa. Bɛn man Basan gána a kiwin lɛa, Ɔgu goã gána mɛn lɛ mìi la. 11Basanan kii Ɔgu dinsɔɔ̃ na á goã Refayimu tɔrɔn lɛn min giala-nyɔmiɛ̃ lɛa. Ǹ na a gere da goo mɛn nɛ, fɔlɔ goo ne. A din lɛ n ke tɔn Amɔn tɔrɔn kɛn kiwi Rabaa. A sasabaa n mɛtərə sii ka talɛɛ, a gɔ́ɔ̃ a golebaa n mɛtərə paa.
12Bɛa gána lɛ, wɔ́ si wɔ́ baa wɔa wɔ lɛa bɛa waáraa lɛ nɛ. A n siɛ Aroɛɛrɛ kiwi ganaa Arnɔn tà lɛ-a, a Galaati a kele yii kɛa talɛɛ laanka a kiwin kaa a nɛ. Man má bɛn kɔ Urubɛn tɔrɔn laanka Gaadi tɔrɔn la. 13Galaati gána lɛ a gialakun ke, ka Basan gána tumaa nɛ, Ɔgu goã ǹ mɛn lɛ mìi la, má bɛ kɔ Manaasee tɔrɔn kɛn talɛɛ la. Argɔbu bǎã kɛ tumaa, ka Basan gána tumaa nɛ, maǹ nə́ goã bɛn bíi Refayimu tɔrɔn gána. 14Manaasee tɔrɔ Yayiiri ke, bɛ́ Argɔbu bǎã kɛ tumaa si yǎa Gesuuru tɔrɔn laanka Maakaati tɔrɔn gèlè la. Á n din tɔ kɔ Basan gána lɛ a kiwin ganaa. Maǹ bɛa bǎã lɛ bíi pelo mà Yayiiri a gána. 15Má Galaati gána kɛ kɔ Makiiri tɔrɔn la. 16A saa Galaati ganaa, a wo Arnɔn tà kɛ yaa, má bɛ kɔ Urubɛn tɔrɔn laanka Gaadi tɔrɔn la. Arnɔn tà kɛ na a gèlè lɛa, gusin a lɛ̀gɔn la. A n woe yǎa Yabɔki tà lɛ-a, Amɔn tɔrɔn gèlè la. 17A lɛ̀nyɛɛn gèlè n boe Zurdɛ̃ tà a nyankɔrɔ lɛ kɛ nɛ, Zenezarɛti tà laanka yìsi mu kɔsɛ kɔsɛ kɛ bii, a wo n doa Pisigaa kele gòã lɛ ganaa lɛ̀giala-n.
18 #
Zoz 1.12-15
Bɛa waáraa lɛ nɛ, má tɔ́n nə n laa ka ganaa, má pɛ ka-n kɛnɛn: «Kaa Lawa, Dɛnaa Lawa na á gána kɛ lɛ kɔ ka la, kaa wɔ lɛa. Kaa zia-baalin tumaa nə ǹ ziabaa ǹ mànan goa, ǹ mɛ ǹ dɔɔ̃n Izirayeli minin gialakunun lɛn nyɛɛnɛ, ǹ Zurdɛ̃ tà kuru. 19Kaa lɔn laanka kaa nɛnyaanan nɛ, má pɛ máa bɛn dininsɔɔ̃nɔn nə golee kiwin kɛn nɛ má ǹ kɔ ka la, kun ka kaa tɔɔn nɛ. A giala, ma á doɛ̃, máa kaa tɔɔn tá mɔnaa nɛ. 20Ka n dɔ ka dɔɔ̃nɔn lɛn lɛ, yǎa Dɛnaa Lawa susui koe ǹ la, ka a bɛ ke á kɔ ka dɔn la lɔn. Kaa Lawa, Dɛnaa Lawa bɛ́ gána mɛn koe ǹ dɔn la, Zurdɛ̃ tà kio lɛ̀nyɛɛnɛ, bɛ̀ ǹ dɔn nə́ ǹ wɔ gii yɛ, ma bǎã mɛn kɔ ka la, didie tɔn nə n bɔyaa kəni, a da giã a wɔ nɛ.»
21Má tɔ́n nə n gɔn waa Zozoe ne bɛa waáraa lɛ nɛ, má pɛ nɛ: «Kaa Lawa, Dɛnaa Lawa sii mɛn zɛnaa kii min paa kɛ nɛ, n din yii bɛ́ á yɛ. Ka bɛ́ re boe bǎã mɛn tumaa nɛ Zurdɛ̃ tà kio, Dɛnaa Lawa n die ǹ dɔn kiin biɛ miɛ̃. 22Ka baran nyɛ́ɛ baa ǹ nɛ wa. A giala kaa Lawa, Dɛnaa Lawa lɛ, a din nə zia diɛ kaa lɛa.»
Muizu sii mɛn nyankɔ Lawa lon
23 #
MNS 27.12-14; TDP 32.48-52 Má tɔ́n gòã-kũ da Dɛnaa Lawa ganaa bɛa waáraa lɛ nɛ, má pɛ nɛ: 24«Ma nə n sii kɛ zɛnaa, n tá n golebaa laanka n boo sii la nyɛɛ ma nɛ. A giala, lawa mɛn kɔsɔ bɛ́ boe la a n nya ǹ dín kɛn miã nya, a n tɔ bɔ ǹ siin kɛn zɛnaa, a banban lon wa, a banban tán wa. 25Bǐɛ̃ kɔ n toa ma Zurdɛ̃ tà kɛ kuru, gána sonbore ke a kio, ma bɛ yɛ, kele yii sonbore kɛ laanka Liban kelen kɛn nɛ.»
26Sɛnɛ, ka dinin lɛn taman yii, Dɛnaa Lawa foo yoo masɛ li, a n too kɔ ma lon wa. A na á pɛ ma-n kɛnɛn dinin: «Á ma gɔ̀nɔn bɔ. N nyan toa n bɛa boo kɛ lɛ da masɛ-n doo wa. 27Dii Pisigaa kele kɛ la, n nə n yii saa n ga lɛ̀nyɛɛnɛ, gɔsɛ a lɛ̀gɔn la, gusin a lɛ̀gɔn la ka lɛ̀giala nɛ. Ga gána lɛ-a ka n yii ni, sɛnɛ, n ba re Zurdɛ̃ tà kɛ kuri wa. 28N gɔn waa Zozoe ne n na a gù we yii, n na a foo taã. A giala, n yii bɛ́ gána mɛn ganaa, Zozoe lɛ din nə die Zurdɛ̃ tà kuri ka zaman kɛ nɛ, a wo bɛa gána lɛ kɔ ǹ la.»
29Wɔ́ nɔmaa wɔ́ giã nyankɔrɔ lɛ kɛ nɛ, Bɛti-Pewɔɔrɔ yɔrɔ-a.
Currently Selected:
TDP 3: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.