Efɛ 2
2
Nyin dii yɛ Krita wɔ gɔ́ɔ̃-n boo
1 #
Kol 2.13
Lɛlɛ, ka ǹ ká goã geren lɛa Lawa wɔ paǹ li, kaa sã ǹ siin lɛa, ka kaa sii baraan nɛ. 2Ka ǹ ká goã bɛ lɛ gɔ́ɔ̃-n lɛlɛ, bɛ̀ ka bɛ́ tɔn koe kanaa kɛ a zɛnaa ǹ siin lɛ. Kanaa lɛ a goledɛnaa mɛn bɛ́ kii lɛa lon laanka tán biin ni, yiri lɛa dí nyɛɛ Lawa bɔlɔ-tiilin bii, ka ǹ ká goã bɛ bɔlɔ sii. 3Wɔ tumaa n wɔ́ goã ka bɛn lɛn bɛ́ lɔn, wɔ ǹ wɔ́ goã wɔa sii zɛnɛɛ wɔa minbuiinbaa ǹ foo sii babaraan li. Wɔ gɔ̀nɔn laanka wɔ yiri bɛ́ giɛ màn mɛn li, wɔ ǹ bɛ zɛnɛɛ. Wɔa minbuiinbaa kɛ lɛ a lɛa nɛ, wɔ́ goã kɔnboe ka Lawa a foo-yoo kɛ lɛ nɛ, ka gialakunun tumaa wɔ bɛ́ lɔn.
4Sɛnɛ, Lawa a makara-doɛ̃ á gole. Á wɔ narɛ ka kɔn-narɛɛ gole ne. 5Bɛ lɛ nɛ, wɔ bɛ́ geren lɛa wɔa sã ǹ siin lɛa ǹ mɛn waáraa, a din na á wusoo á yiikoonaabaa kɔ wɔ la kun ka *Krita nɛ. Lawa a bǐɛ̃baa a lɛa nɛ ká kirisibaa. 6Wɔa tá kun ka Yezu Krita-n lɛ a lɛa, Lawa wusoo á yiikoonaabaa kɔ wɔ la kun ka a din ni, mà wɔ die wɔ boo la, wɔ goã pàã la kun ka a din ni lon. 7Lawa na á ná a bǐɛ̃baa lɛ nyaa wɔ nɛ ka Yezu Krita nɛ. A na á zɛnaa miɛ̃, mà min tumaa dɔ̃ biikoo tumaa li, mà asɛ a bǐɛ̃baa lɛ a golebaa miã banban. 8Lawa a bǐɛ̃ lɛ a lɛa nɛ, ká kirisibaa goleemali pàã ganaa. Bɛa kirisibaa kɛ bie boe ka dinin li wa, Lawa a bǐɛ̃baa ǹ màn nɛ. 9A bie ka dinin doakasie-n giala pii wa. Bɛ lɛ nɛ, min kɔ́n ba boe la a n din laakalaa wa. 10A giala, mà Lawa din na á wɔ yɔrɔ bɔ, á wɔ zɛnaa wɔa tá kun ka Yezu Krita-n kɛ gɔ́ɔ̃ nɛ, mà wɔ boo la wɔ nya ǹ dí sonboren nya. Lawa din na á saa lɛlɛ, á bɛa nya ǹ dín kɛn lɛn yɔrɔ bɔ, ń giɛ wɔ tá ǹ siin zɛnɛɛ.
Zaman goon baa Krita wɔ gɔ́ɔ̃-n boo
11Ka bie ká yɛ Zuifun lɛa wa. Zuifun man nə́ goã ka bíi soroman, ǹ nə́ n dinin bíi kurii wolen. Bɛa kurii lɛ n sii a kɔnboe lɛa, ǹ nə́ goã zɛnɛɛ ǹ dinin gɔ̀nɔn ganaa. Ka goã lɔn lɛlɛ, ka n yiri koa ka bɛ nɛ. 12Ka dɔ̃ mà bɛa biikoo li, mà ka ǹ ká goã sɔsɔɔ kɔn ka Krita nɛ. Lawa zaman mɛn bɔ, ka goã kun ka bɛ-n wa, ka ǹ ká goã tiin lɛa. A lɛ kɔ a zaman la ka màn mɛn nɛ, á lɛ kɔ kɔn la wɔ la, kaa wɔ gii goã bɛ-n wa. Ka ǹ kanaa miɛ̃, ka yiri a doa-n màn kɔ́n ganaa wa, kaa Lawa banban. 13Sɛnɛ kanna, Yezu Krita wɔbaa gɔ́ɔ̃ nɛ, ka bɛ́ ká goã sɔsɔɔ a ganaa, ka n ká wusoo ka n mɔrɔ a ganaa, Krita din a gɛ̀ pàã ganaa.
14A giala, Krita din na á là nyantoro kɔ wɔ la, á Zuifun laanka tɔrɔ kɔsɔn baa zaman goon toto lɛa. A bɛ́ á n gɔ̀nɔn kɔ, kungɔn mɛn goã wɔ niɛ̃ kɔn, a n wɔ biɛ kɔn a zɔ́ɔn lɛa, á bɛ wuru. 15#Kol 2.14 Á Zuifun Landa ziziɛ̃ kɔnlɛ ka a dí-pɛn kɛn laanka ǹ zɛnaa ǹ gɔnɔn nɛ. Bɛ a zɛnaa miɛ̃ kɛ lɛ gɔ́ɔ̃ nɛ, a na á zɔɔ̃ li, mà a tɔrɔ paa kɛ lɛ baa zaman dii goon toto lɛa, kun ka a din ni. A na á baa miɛ̃ á là nyantoro koa. 16#Kol 1.20 Krita a gã gɔn la kɛ pàã nɛ tìĩ bɔ kɔn nyin ni nya. Á tɔrɔ màn paa kɛ baa goon, á ǹ kaa kun ka Lawa nɛ. 17#Iza 57.19 Kasɛn tɔrɔ kɔsɔn mɛnɛn nə goã sɔsɔɔ Lawa ganaa, ka Zuifun mɛnɛn nə goã kunu a ganaa, Krita na á daa là nyantoro yɛ ǹ Boo Tii Kɔɔ̃n kɛ pɛ ka nɛ, ka bɛa yɔrɔ kɛ nɛ. 18Sonbore ne, a din Yezu Krita lɛ pàã nɛ, wɔ Zuifun laanka tɔrɔ kɔsɔn tá boe la, wɔ golee Díi Lawa yɔrɔ-a, ka Yiri Fu goon toto a dɔmalɛ nɛ.
19Bɛ lɛ a lɛa, ka tɔrɔ kɔsɔn lɛn bie tiin lɛa doo wa, ka bie gùlin dɔn lɛa wa. Sɛnɛ ka ǹ kɛnaan lɛa, kun ka Lawa a zaman kɛ nɛ, ka ǹ Lawa a sɔmɔ wɔn lɛa. 20Ǹ bɛ́ kion mɛn doe, Yezu a dia dí-a wolen laanka Lawa a boo gii-dalin kion gòã-daa kɛ la, kasɛn dɔn man bɛ lɛa. Yezu Krita dinmaa na a gùrù koa ǹ kɔlɔ lɛa. 21Kion lɛ tumumaa nə n tele a din li, á yoo lon á Dɛnaa guguru kɔ ǹ kion sonbore baa. 22Ka laanka gialakunun kɛn tumaa nɛ, kaa tá kun ka Krita-n a lɛa, ka dɔn gii n bɛa kion kɛ lɛ nɛ. A n miɛ̃, màn mɛn bɛ́ toɛ, Lawa bɛ́ kion mɛn nɛ ka a din a Yiri Fu ni, ka bɛa kion lɛ baa taãn-taãnɛ.
Currently Selected:
Efɛ 2: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.