BBN 14

Faarahɔn nə Izirayeli nɛnyaanan kialan lui

1Dɛnaa boo da Muizu ni: 2«A pɛ Izirayeli nɛnyaanan lɛn manɛ, mà ǹ nə n lɛ goa ǹ da gole Piayirɔti kiwi yɔrɔ-a, Migdɔli kiwi laanka tà bii ni. Ǹ giã walan Bali-Sefɔn yɔrɔ-a gɔrɔ, kunu tà lɛ ganaa. 3*Faarahɔn tá re pii ǹ wɔ paǹ li kəni, mà ǹ nə́ ke n binbirin boe gána lɛ nɛ, ǹ yiri n yoo ne, don papaã ǹ la. 4Lawa mà asɛ á re toɛ Faarahɔn too kaka kɔ, a yoo a ǹ kio loo. Sɛnɛ, mà asɛ á re a din tɔ bɔ ǹ siin zɛnɛɛ Faarahɔn laanka a pàã din tumaa ganaa. Mà Ezipti gána minin tumaa á re doɛ̃, mà asɛ din nə Dɛnaa Lawa lɛa.»

Ǹ dɔn nə́ zɛnaa miɛ̃. 5Minin nə́ pɛ Faarahɔn nɛ, mà Izirayeli nɛnyaanan lɛn nə́ baa si. Faarahɔn laanka a dí-nyalin taasiɛ nə́ n bɔyaa Izirayeli nɛnyaanan zaman lɛ wɔ paǹ li. Ǹ nə́ pɛ: «Wɔ n wɔ́ wàa zɛnaa kɛnɛn, wɔ́ toa Izirayeli nɛnyaanan lɛn nə́ soo, ǹ nə́ wɔa dí toa walan.» 6A ná a wotoro yɔrɔ bɔ, a ná a zaman kũ, ǹ nə́ woo kun ka a din ni. 7Á soo ka ziabaa ǹ wotoro sonbore biɛsɔrɔ (600) nɛ, ka Ezipti gána a ziabaa ǹ wotoron tumaa nɛ, zia-baalin nə́ ǹ gɔ́ɔ̃ nɛ. 8Dɛnaa toa Ezipti gána a kii Faarahɔn too kaka kɔ. Á yoo á Izirayeli nɛnyaanan loo, Izirayeli nɛnyaanan mɛnɛn nə soo, ǹ nə́ n bɔ bɛ̀rɛbaa nɛ. 9Izirayeli nɛnyaanan lɛn bɛ́ ǹ nə́ golee tà lɛ-a, Ezipti minin lɛn nə́ ǹ loo. Ǹ nə́ daa dɔ ǹ ganaa walan, dia-n woe Piayirɔti kiwi la, Bali-Sefɔn yɔrɔ-a. Faarahɔn na á daa ka ziabaa ǹ màn tumaa nɛ: a zia-baalin ni ka a sùin ni, a wotoron ne, ka a wotoron sùi lɛ-kũlin ni. 10Faarahɔn bɛ́ á diri, Izirayeli nɛnyaanan nə́ n yii saa, ǹ nə́ ga. Ǹ nə́ yɛ mà Ezipti minin lɛn man nə́ zii saa, ǹ tá ǹ kio lui. Nyɛ́ɛ nə́ ǹ kũ parsiini, ǹ nə́ n lɛ dɛ Dɛnaa Lawa ganaa. 11Ǹ nə́ pɛ Muizu ni: «Yalan man nə́ nyaabaa Ezipti gána nɛ, ń nə́ die wɔ kiɛ gɛ̀ kooro li don bii? Wàa mɛn sii ni ń zɛnaa wɔ-n kɛnɛn? N bɛ́ ń wɔ kũ ń soo wɔ nɛ, ń wɔ bɔ Ezipti gána nɛ. 12Táa wɔ pɛ n nɛ gána lɛ-n walan, wáa n toa wɔ dí nya Ezipti minin lɛn manɛ! Wɔa dí nya Ezipti minin lɛn ma-n tá soɛ wɔ ganaa gã don bii kɛ nɛ.» 13Muizu pɛ zaman lɛ nɛ: «Ka baran nyɛ́ɛ baa wa. Ka golee kiĩni ka ga Dɛnaa a minin kirisibaa ǹ sii kɛ ganaa a n die zɛnɛɛ ka-n pelo. Sonbore, ka yii bɛ́ Ezipti minin mɛnɛn ganaa pelo ke, ka yii ba re ǹ yii doo duduu wa. 14Dɛnaa din nə die kaa zia gii diɛ. Kasɛn nə giã ka kiĩni!»

Lawa n zii lɛ buĩ tà mu bii

15Dɛnaa pɛ Muizu ni: «Wàa na á baa, n tá n lɛ dii ma ganaa? A pɛ Izirayeli nɛnyaanan lɛn manɛ, mà ǹ yoo ǹ zii tɔ wɔ! 16N dinmaa lɛ nə n bàlà saa lon, n nə n gɔn dia tà lɛ la. N tà lɛ bii kuru kɔn, màn mɛn bɛ́ toɛ, Izirayeli nɛnyaanan nə kiɛ̃, ǹ gòã ná a ba n siɛ̃ mu li wa. 17Ma á re toɛ Ezipti minin lɛn too kaka kɔ, màn mɛn bɛ́ toɛ, ǹ wɔ mu lɛ li ka kio. Má tɔn ma din tɔ bɔ ǹ sii zɛnaa Faarahɔn ganaa, ka a ziabaa ǹ mànan tumaa nɛ, a wotoron ne, ka a sùi lɛ-kũlin ni. 18Bɛ̀ má ma din tɔ bɔ ǹ sii zɛnaa Faarahɔn ganaa, ka a wotoron laanka a sùi lɛ-kũlin ni bɛa yɔrɔ kɛ la, Ezipti minin tá re doɛ̃, mà ma din nə Dɛnaa Lawa lɛa.»

19Dɛnaa a lon a dia dí-a wole mɛn goã tɔ we Izirayeli nɛnyaanan lɛn nyɛɛnɛ, bɛ́ kiɛ̃ á giã ǹ kio ganaa. Tɛmaa bara lɛ dɔ yoo ǹ nyɛɛnɛ, á daa ǹ kio. 20Bɛa bara lɛ wɔ Ezipti minin lɛn laanka Izirayeli nɛnyaanan bii ni. Bara lɛ na á goã, a n wɔlɔ fúli paǹ goon, bɛ̀ tèlò a wɔlɔ tì tá paǹ kɔsɔ kɛ li. Tèlò lɛ tumaa gɔ́ɔ̃ nɛ, ǹ nə n mɔrɔ kɔn wa.

21Muizu nə́ n gɔn saa lon tà lɛ la. Dɛnaa lɛ̀giala piɛ̃ gole kɔ́n da bɔ ganaa tèlò lɛ tumaa gɔ́ɔ̃ nɛ. Á tà lɛ a mu kurəə ne, mu lɛ nə́ n na kɔn, tà lɛ gɔ́ɔ̃ n laa nɛ. 22#Kor1 10.1-2; Ebr 11.29 Izirayeli nɛnyaanan lɛn nə́ wɔ tà gɔ́ɔ̃ gere lɛ nɛ, ǹ nə́ kiɛ̃. Mu lɛ n soe-n kɔn ǹ paǹan paanan li ka kungɔn bɛ́ lɔn. 23Ezipti minin lɛn nə́ ǹ kio loo, ǹ nə́ wɔ ǹ kio. Faarahɔn a sùin tumaa, ka a wotoron ne ka a sùi lɛ-kũlin ni, ǹ nə́ wɔ yǎa mu lɛ bii. 24Baayɛlɛ yiisoo lɛn li, Dɛnaa nə n toa tɛ laanka tɛmaa bara lɛ bii, á ga Ezipti minin lɛn ganaa, á lɔlɔkɔn wɔ ǹ bii. 25Á ǹ wotoro gòãn guguru kɔ, ǹ da-baa-a kaka kɔ. Ezipti minin lɛn nə́ pɛ kɔn nɛ: «Ka daa wɔ wusoo, wɔ n bɔ Izirayeli nɛnyaanan lɛn kio. A giala, Dɛnaa Lawa din nə ǹ zia gii diɛ Ezipti ganaa!»

26Dɛnaa pɛ Muizu ni: «N gɔn saa lon tà lɛ la, mu lɛ wusoo a daa, a kaa Ezipti minin kɛn la, ka ǹ wotoron laanka ǹ sùi lɛ-kũlin ni.»

27Muizu nə́ n gɔn saa lon tà lɛ la. Haya, lɛawaa biikoo li, tà mu wusoo a ná a lɛlɛ a giã ǹ gɔn saa. Ezipti minin lɛn baasiimaa nə́ n da mu lɛ lɛ gɔrɔ. Dɛnaa toa ǹ nə́ papaã li. 28Mu lɛ wusoo á daa, á n kɔ wotoron lɛ, ka sùi lɛ-kũlin ni. Faarahɔn a zia-baalin mɛnɛn tumaa kaa tà lɛ gɔ́ɔ̃ nɛ Izirayeli minin lɛn kio, min kɔ́n bɔ bɛn bii wa. 29Sɛnɛ, Izirayeli nɛnyaanan man nə́ tɔ wɔ tà gɔ́ɔ̃ gere bii, mu lɛ n soe-n kɔn ka kungɔn bɛ́ lɔn ǹ paǹan paanan li.

30Dɛnaa din na á Izirayeli nɛnyaanan kirisibaa Ezipti minin ganaa bɛa pinaa kɛ lɛ nɛ. Izirayeli nɛnyaanan yii Ezipti minin geren yɛ tà lɛ lɛ-a. 31Izirayeli nɛnyaanan nə́ Dɛnaa Lawa Pàãyiidɛnaa kɛ a sii nyaa Ezipti minin ni ǹ gɔn yɛ. Zaman lɛ nyɛ́ɛ baa Dɛnaa nɛ. Ǹ nə golee Dɛnaa li, ka Muizu mɛn dɔ bɛ́, a dí-nyali lɛa.

Currently Selected:

BBN 14: SBPE2011

Highlight

Copy