BBN 3
3
1Muizu na á goã ǹ daãgiĩ Zetro a tɔɔn lɛduĩ. Zetro lɛ n Madiã gána a wúlu-bɔlen kiã lɛa. Á woo ka tɔɔn lɛn nɛ don bii, á dɔ kele kɔ́n li. Lawa na á bɛa kele lɛ bɔ á n die n din nyɛɛ la, a tɔ n Sinayii kele. 2#NDS 7.30-34 Dɛnaa a lon a dia dí-a wole nə́ n din nyaa nɛ, tɛ buə̃ bii daãn ganaa. Á ga, daãn lɛ n tɛ lɛa, sɛnɛ, a kuĩ wa. 3Muizu pɛ: «Man die n bɔyɛɛ ma ga yii a màn yɛ gole kɛ ganaa. Wàa na á baa daãn lɛ a kuĩ wa?»
4Dɛnaa yɛ mà à n bɔyaa a n die giɛ, Lawa tɔ́n nə n toa daãn lɛ bii á lɛ dia la: «Muizu! Muizu!»
A ná a lɛ si: «Ma á ke!»
5Lawa pɛ nɛ: «N baran n mɔrɔ wa! N kɔsɔnɔn waa n nə ǹ bɔ n gòãn ganaa, a giala, n bɛ́ golee-n bǎã mɛn nɛ, Lawa a bǎã nɛ.»
6Á pɛ nɛ doo: «Ma nə n digolo a Lawa lɛa, Abrahamu a Lawa lɛa, Izaaki a Lawa lɛa, Zakɔba Lawa lɛa.»
Muizu màn kɔ a yɔrɔ lɛ, a giala, nyɛ́ɛ na á goã a ganaa a ga Lawa ganaa. 7Dɛnaa pɛ: «Má maa zaman lɛ a nɔmaa yɛ Ezipti gána nɛ, má ǹ lɛ-dɛ ma ǹ lɛduə̃li baraan kɛn dɛ gɔn. Sonbore, ma tá ǹ fuun lɛn doɛ̃. 8Man má gisĩ, má n die ǹ sii Ezipti minin kɛn la, man die soe ǹ ne ma ǹ bɔ gána kɛ nɛ, ma wo ǹ ne gána gole sonbore kɔ́n nɛ, tɔɔ-too laanka tán-kɔsiɛ bɛ́ bǐɛ̃ koe gána mɛn nɛ. Bɛa gána kɛ lɛ n Kanaan minin wɔ lɛa, ka Ɛti tɔrɔn ne, Amɔɔrɔ tɔrɔn nɛ, Perɛzi tɔrɔn nɛ, Ivii tɔrɔn ne ka Zebuzu tɔrɔn nɛ. 9Kanna kəni, Izirayeli nɛnyaanan lɛn lɛ-dɛ dɔ ma ganaa. Ezipti minin bɛ́ nɔmaa mɛn diɛ ǹ mìi ni, má bɛ dɔ yɛ. 10Kanna, woo, man die n diɛ *Faarahɔn li, n soo ka maa zaman lɛ nɛ, Izirayeli nɛnyaanan lɛn, n nə ǹ bɔ Ezipti gána nɛ.»
11Muizu pɛ Lawa nɛ: «Masɛ n wàaǹ lɛa kəni, ma tɔn wo Faarahɔn li, ma soo ka Izirayeli nɛnyaanan nɛ ma ǹ bɔ Ezipti gána nɛ?»
12Lawa pɛ nɛ: «Ma á kunun n ni. Sii mɛn bɛ́ nyɛɛ n nɛ, mà masɛ din nə má n dia bɛ á ke: Bɛ̀ ń soo ka zaman lɛ nɛ ń nə́ ǹ bɔ Ezipti gána nɛ, ǹ tá re dí nyɛɛ Lawa nɛ kele kɛ la.»
Lawa na a din tɔ pɛ Muizu-n lɔn
13 #
BBN 6.2-3
Muizu pɛ Lawa nɛ: – Á ke! Man die woe Izirayeli nɛnyaanan lɛn li ma pɛ ǹ nɛ: «Ka digolon Lawa na á ma dia ka li.» Bɛ̀ ǹ nə́ pɛ ma nɛ mà a tɔ n die, man die pii ǹ ni máa wàa?
14 #
SNS 1.4,8 Lawa pɛ Muizu-n kɛnɛn: – Ma tɔ n "Ma Tan". A pɛ Izirayeli nɛnyaanan lɛn manɛ, mà "Ma Tan" na á n dia ǹ li. 15Boo da Izirayeli nɛnyaanan lɛn man kɛnɛn: «Dɛnaa Lawa lɛ, ka digolon Lawa lɛa, Abrahamu ni, Izaaki ni ka Zakɔba nɛ, bɛn Lawa kɛ na á ma dia ka li "Dɛnaa" lɛ na a tɔ lɛa yǎa duduu, ka n die bíi miɛ̃ biikoo tumaa li.» 16Woo, n Izirayeli a min golen lɛ sɔkɔn, n pɛ ǹ nɛ kɛnɛn: «Dɛnaa Lawa lɛ, ka digolon Lawa lɛa, Abrahamu ni, Izaaki ni ka Zakɔba nɛ, bɛn Lawa kɛ na á n din nyaa ma nɛ. Á pɛ mà ǹ bɛ́ màn mɛn tumaa zɛnɛɛ ka nɛ Ezipti gána nɛ, mà asɛ n die n doe ka lɛ, bɛa lɛa. 17Á pɛ doo, mà asɛ n die soe ka nɛ a ka bɔ Ezipti gána a nɔmaa kɛ li, a wo ka nɛ gána kɔ́n nɛ, tɔɔ-toe laanka tán-kɔsiɛ bɛ́ bǐɛ̃ koe gána mɛn nɛ. Bɛa gána kɛ lɛ n Kanaan minin wɔ lɛa, ka Ɛti minin ni, Amɔɔrɔ minin ni, Perɛzi minin ni, Ivii minin ni, ka Zebuzu minin ni.» 18Izirayeli a min golen lɛn tá re n too koe ka lon, ǹ laanka n din tá re woe Ezipti gána a kii lɛ li, ka pɛ-n kɛnɛn: «Dɛnaa lɛ, Ebrəən Lawa lɛa, bɛ na á n din nyaa wɔsɛn manɛ. Kanna, wɔ doamaa nɛ wɔ lɛawaa sɔɔ zii tɔ wɔ, wɔ wo don bii, wɔ *wúlu mànan bɔ wɔa Dɛnaa Lawa nɛ.» 19Sɛnɛ, ma á doɛ̃ máa Ezipti gána a kii lɛ a re lɛ koe ka soo wa, yǎa bɛ̀ pàã nə́ n nyaa nɛ. 20Ma á re n gɔn siɛ lon, ma koe sii gigiã zɛnaa Ezipti minin bii, ma fuu nyaa ǹ nɛ. Bɛn kio, kii lɛ á re toɛ ka woo. 21#BBN 12.35-36 Ma á re zaman lɛ gìĩ we Ezipti minin lɛn nyin ni, bɛa biikoo li kəni, bɛ̀ ǹ tá woe, ǹ ba re woe ka ǹ gɔn kooron ne wa. 22Izirayeli lɔ gogoonmaa á re nɔ̀n diɛ Ezipti lɔ kɛ la a kion ka ǹ miãkɛn dɔ nɛ, ka wɔrɔgiala mànan nɛ, ka sana wɔn nɛ, ka mɔnaa dadaran nɛ. Ǹ tá re bɛn we ǹ nɛgiĩn laanka ǹ nɛlɔn ganaa. Ǹ tá re Ezipti minin lɛn gɔn mànan sii bɛa yɔrɔ kɛ lɛ la.
Currently Selected:
BBN 3: SBPE2011
Highlight
Share
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
