Gal 1
1
1Masɛ Pooli n dia dí-a wole lɛa. Bɛ bie á bɔ minbuiin nɛ kɔ́n li wa. Min kɔ́n dɔ na a zɛlɛ baa wa. Yezu *Krita laanka Díi Lawa na á ma bíi, Díi Lawa mɛn Yezu lɛ din yii kaa, á bɔ geren li. 2Dɔɔ̃nɔn mɛnɛn tumaa bɛ́ kànaa kun ka masɛ nɛ, wɔ n fòo diɛ kasɛn Galaasi gána a Lawa a sɔmɔn manɛ. 3Wɔ Di Lawa laanka Dɛnaa Yezu Krita die ǹ bǐɛ̃ zɛnaa ka nɛ, ǹ là nyantoro kɔ ka la. 4Yezu Krita lɛ na á n din kɔ wɔa sii baraan lɛa, màn mɛn bɛ́ toɛ, a wɔ kirisibaa sisia a kanaa babaraa kɛ ganaa. Bɛ na á n zɛnaa, á kɔnpɛ wɔ Di Lawa din foo sii ni. 5Tɔ golebaa die a goã a din wɔ lɛa yǎa duduu. A n miɛ̃.
Boo Tii Kɔɔ̃n goon toto boo
6Dɔɔ̃nɔn lɛn, kɛ masɛ tɔwaa kaa wɔ paǹ li parsiini! Lawa na á ka bíi Yezu Krita a bǐɛ̃ pàã ganaa. Sɛnɛ, asɛ mɛn ka bíi, ká n yɔrɔ bɔyaa, ká bɔ la bǎã goon ne, ká n yɔrɔ da Boo Tii Kɔɔ̃n kɔsɔ la. 7Sonbore, a bie ka Boo Tii Kɔɔ̃n kɔsɔ na a tan wa. Sɛnɛ, man pii ka-n miɛ̃, a giala, minin tan, ǹ nə́ ka yiri lɔlɛkɔn. Boo Tii Kɔɔ̃n mɛn nə n da Krita wɔ paǹ li, maǹ zoɛ̃ mà ǹ bɛ bɔyaa. 8Sɛnɛ, bɛ̀ min daa Boo Tii Kɔɔ̃n kɔsɔ pɛ ka nɛ, a ná a ba goon ka kɛ lɛ nɛ, má pɛ ka-n wa, koe die a bɔ ǹ dɛnaa ganaa. Haalɛ ta ma dinmaa lɛ nɛ, hinlaa lon a dia dí-a wole kɔ́n nɛ. 9Má bɛ pɛ ka-n gɔrɔ. Man wusii ma á pii ka-n kanna doo, máa bɛ̀ min mɛn daa Boo Tii Kɔɔ̃n kɔsɔ pɛ ka nɛ, a ná a ba goon ka kɛ lɛ nɛ má pɛ ka-n wa, máa koe die a bɔ ǹ dɛnaa ganaa!
10Maa boo kɛ á nyɛɛ, mà man giɛ li, man din sii kɔɔ̃n kɔ minbuiinin ganaa ya? Haayii, man giɛ li máa ma sii kɔɔ̃n kɔ Lawa ganaa. Man giɛ li, máa maa sii kaa minbuiinin foo la? Haayii, bɛ̀ man tɔn giɛ li, mà maa sii kaa minbuiinin dɔn foo la, bɛ̀ ma a Krita a dí-nyali lɛa doo wa.
Pooli dia dí-a wole baa lɔn
11Ma dɔɔ̃nɔn lɛn, man pii ka nɛ, máa ma bɛ́ Boo Tii Kɔɔ̃n mɛn pii ka nɛ, minbuiin nɛ a boo koe bie wa. 12Minbuiin nɛ bie á kɔ ma la wa, min kɔ́n dɔ bie á ma daraa ganaa wa. Sɛnɛ, Yezu Krita din na á ma yii toɛ̃ ka a doɛ̃ nɛ.
13 #
NDS 8.3; 22.4,5; 26.9-11 Ma goã doa-n kɔn ka Zuifun zii-n biikoo mɛn li, maa zɛnaa ǹ sii bɛ́ ka yɔrɔ mɛn nɛ, ká bɛ boo ma. Ma goã boe Lawa a sɔmɔn lɛn minin yii-n lɔn, má n wen waa máa yǎa ǹ ziziɛ̃, ka á bɛ doɛ̃. 14#NDS 22.3 Má goã woe nyɛɛnɛ Zuifun zii kɛ nɛ, má la ma din miã lɛn tumaa nɛ ma tɔrɔ minin bii. A giala, din kɔ sii ganaa goã ma nɛ wɔ digolon landa siin kɛn lɛa parsiini.
15-16 #
NDS 9.3-6; 22.6-10; 26.13-18 Sɛnɛ bɛ kio, Lawa lɛ kɔ mà ma a Nɛgiĩ dɔ̃, màn mɛn bɛ́ toɛ, ma a sii nyaa tɔrɔn tumaa nɛ. Bɛ lɛ a lɛa nɛ, á ma bɔ gɔrɔ, bɛ̀ ma tɔn yɛ dinin wa. A din a bǐɛ̃baa gɔ́ɔ̃ nɛ, á ma bíi, mà ma dí nya asɛ nɛ. Bɛ bɛ́ á n zɛnaa, ma nɔ̀n da min kɔ́n la ka yiri-n wa. 17Min mɛnɛn nə dia dí-a wolen baa masɛ nyɛɛnɛ, ma wo Zeruzalɛmu dɔ din ni, ma nɔ̀n da bɛn la wa. Sɛnɛ, man má woo Larabu gána nɛ, má tɔn nə n bɔyaa má daa Damaasi kiwi. 18#NDS 9.26-30 Lɛ̀ sɔɔ bɛ kio, má woo Zeruzalɛmu, má kɔn dɔ̃ ka Piɛrɛ nɛ. Wɔ́ goã kun piizii paa. 19Sɛnɛ, bɛa lɛawaan kɛn lɛn tumaa gɔ́ɔ̃ nɛ, ma kɔn yɛ ka Yezu a dia dí-a wole kɔsɔ-n wa, yǎa Dɛnaa din dɔɔ̃ngiĩ Zaaki kɛ dinsɔɔ̃. 20Ma bɛ́ boo mɛn diɛ ka-n ke, man diɛ Lawa din yɔrɔ-a, ma bie soɛ boe wa. 21Bɛ dɔ kio ne, má tɔ́n woo Siirii ka Siliisii gána nɛ. 22Bɛa biikoo kɛ lɛ li, Krita a sɔmɔ min kɔ́n ba maa sii yɔrɔ doɛ̃ Zudee gána-n wa. 23Yǎa ǹ bɛ́ miɛ min kɔsɔn nə́ pii: «Min mɛn goã boe wɔ yii-n lɛlɛ, á n wɔa goleemali ziziɛ̃, bɛ lɛ din nə goleemali boo laakalɛɛ kanna.» 24Ǹ nə́ goã Lawa tɔ gole koe masɛ a lɛa.
Currently Selected:
Gal 1: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.