SGK 21

Izaaki a yɛ

1Lawa daa á n dɔ Saaraa lɛ, ka a bɛ́ á pɛ-n lɛlɛ lɔn. A n lɛ kɔ la ka sii mɛn nɛ, á bɛ lɛ zɛnaa. 2#Ebr 11.11 Saaraa nɔ̀ si. Lawa pɛ mà á re nɛ yii biikoo mɛn li, á nɛgiĩ yɛ Abrahamu ni bɛa biikoo lɛ li, bɛ á zɛnɛɛ bɛ̀ Abrahamu a zizimaa nɛ. 3Saaraa nɛ mɛn lɛ yɛ nɛ, Abrahamu ná a tɔ kɔ mà Izaaki. 4#SGK 17.12; NDS 7.8 A nɛgiĩ Izaaki lɛ a yɛ lɛawaa kiwisi, á kuru ka Lawa goã á pɛ, á laa a ganaa lɔn.

5Izaaki bɛ́ yii, bɛ̀ Abrahamu lɛ̀ paabiɛ nɛ.

6(Izaaki tɔ lɛ giala mà "Yaa-wɔ"). Saaraa tɔ́n pɛ: «Lawa na á toa masɛ á foo kɔɔ̃nbaa ǹ yaa we! Min woo min bɛ́ re kɛ miɛ̃ masɛ wɔ paǹ li, á re yaa diɛ bɛn tumaa ganaa.»

7Á pɛ dɔn: «Die n boe la a pɛ Abrahamu ni, mà masɛ Saaraa á die nɛ diɛ ma gòã la doo? Masɛ á ke má nɛgiĩ yɛ nɛ, a zizi kɔ lɛ gɔ́ɔ̃ nɛ.»

Agaara laanka Isimayeli a loo

8Nɛ lɛ gole kɔ. Saaraa bɛ́ a ná a lɛ bɔ nyɔ ganaa ǹ mɛn waáraa, Abrahamu màn-bii gigiã zɛnaa.

9Ǹ kɔn pinaa, bɛ̀rɛlɔ lɛ Ezipti min lɛa, bɛ nɛ mɛn yɛ Abrahamu ni, Saaraa bɛa nɛgiĩ lɛ yɛ sàn koe. 10#Gal 4.29-30 Saaraa tɔ́n pɛ Abrahamu ni: «Bɛ̀rɛlɔ lɛ laanka a nɛgiĩ lɛ loo, a giala, bɛ̀rɛlɔ kɛa nɛgiĩ kɛ doamaa bie, a kíɛ̃ gii kɔn ka maa nɛgiĩ Izaaki-n wa.»

11Bɛa boo lɛ busu Abrahamu ganaa parsiini, a giala, mà a din a nɛ n ka Isimayeli dɔ nɛ. 12#Rɔm 9.7; Ebr 11.18 Sɛnɛ, Lawa pɛ nɛ: «N foo baran busu nɛginin kɛ laanka bɛ̀rɛlɔ kɛa sii gɔ́ɔ̃-n wa. Bɛ̀ Saaraa boo mɛn pɛ n nɛ, a tumaa si. A giala, n tɔrɔ giala basa n die boe Izaaki ni. 13Sɛnɛ, ma á re bɛ̀rɛlɔ lɛ a nɛgiĩ lɛ dɔ tɔrɔn mɔnɛɛ ǹ gána baa, a giala, n din a nɛ n ka a dɔ nɛ.»

14Abrahamu yoo baayɛlɛ yiisoone, á màn-bii saa, á mu kaa mu bɔnaa nɛ, á ǹ kɔ Agaara la. Á nɛ lɛ saa á da a dɔ̀ɔ̃ nɛ, á da zii. Agaara woo n penpelen da Bɛɛr-Sebaa don. 15Mu bɔnaa lɛ a mu bɛ́ á nya, á n gɔn bɔ nɛ lɛ ganaa, á daa da boɛɛn kɔ́n giulun. 16Bɛ kio, a din kiɛ̃ á woo giã tán tìãlɛa, á n wɔlɔ lui nɛ lɛ ganaa, ka kiɛ zũ a wo mɛnaa tán bɛ́ lɔn. A giala, a na á goã pii a din gɔ́ɔ̃-n kɛnɛn: «He, maa nɛ kɛ baran gã ma yii-n wa!» A bɛ́ giã-n tán tìãlɛa, á n lɛn saa lon á wuu pɛ. 17Lawa nɛginin lɛ lɛ ma, a dia dí-a wole tɔ́n nə n toa lon, á lɛ dia Agaara la, á pɛ nɛ: «Agaara, wàa nə n ganaa? N baran nyɛ́ɛ baa wa, a giala, Lawa nɛ lɛ lɛ ma bǎã lɛ-n walan. 18Yoo! N nɛ lɛ saa n bɔ tán, n kũ a gɔn ganaa. A giala, ma á die a tɔrɔn mɔnɛɛ, a n baa gána gole lɛa.»

19Lawa ná a yii bũ, á tù goon yɛ tán mu ná a nɛ. Á kiɛ̃ á woo mu bɔnaa lɛ pã, á daa mu kɔ nɛ lɛ la. 20Lawa nə́ n dɔ nɛginin lɛ lɛ, yǎa á gole kɔ. Á giã Paaran don, á n baa sa-zũli gole lɛa. 21Ǹ dan Ezipti gána nɛ goon wɔ lɔ lɛa, á kɔ la.

Abrahamu laanka Abimelɛki lɛ kɔ kɔn la mɛn wɔ kɔn nɛ

22 # SGK 26.26 Bɛa biikoo li, Abimelɛki laanka a sɔraasin goledɛnaa Piikɔlɔ pɛ Abrahamu ni: «Ń bɛ́ sii mɛn tumaa zɛnɛɛ, Lawa tá kunun n ni ka a din tumaa nɛ. 23Bɛ lɛ taman yii, n liɛ masɛ nɛ ka Lawa nɛ kànaa sisia, mà n ba re masɛ bebele, n nə n bɔ ma li wa. N ba re maa nɛnyaanan dɔn laanka maa nɔ̀ɔnɔn bebele, n nə n bɔ ǹ li wa. Man kũ doɛ̃ lɔn, ń bɛ́ giã-n gána mɛn nɛ, n masɛ laanka bɛ lɛ dɔ kũ doɛ̃ miɛ̃.»

24Abrahamu ná a lɛ si á pɛ: «Má n liɛ.»

25Abrahamu dɔ nə́ n foo pɛ Abimelɛki ni tù goon wɔ paǹ li, Abimelɛki a dí-nyalin nə́ goã ǹ nə́ n paraa a ganaa. 26Abimelɛki tɔ́n pɛ: «Min mɛn bɛ zɛnaa, ma ba ǹ dɛnaa doɛ̃ wa. N bin bɛ́ n tɔn kɛ pɛ masɛ-n dinin wa, ma dinmaa dɔ tɔn ma wa, yǎa pelo.»

27Abrahamu sèren kũ ka bòen laanka diin ni, á ǹ kɔ Abimelɛki la, ǹ dinin min paa tumaa lɛ kɔ kɔn la wɔ. 28Abrahamu sère luu sɔbaa na, á ǹ kaa ǹ gɔrɔn. 29Abimelɛki nɔ̀n da Abrahamu la: «Wàa na á baa, n tá bɛa sère luu sɔbaa lɛ niɛ̃, ǹ kiɛ ǹ gɔrɔn?»

30Abrahamu tɔ́n pɛ: «Ma ǹ li, máa n lɛ kɔ n nə ǹ si ma gɔn, màn mɛn bɛ́ toɛ, ǹ nə n baa maa siére lɛa, ǹ nə n yiri da a nɛ, mà masɛ din nə má tù kɛ fɔ̃.»

31Bɛ lɛ na á toa, ǹ nə́ bɛa bǎã lɛ bíi, mà Bɛɛr-Sebaa (bɛ giala mà "Sɔbaa Tù" ka "Liɛwɔ Tù" ni), a giala, mà ǹ dinin min paa tumaa na á n liɛ walan.

32Ǹ nə́ lɛ kɔ kɔn la wɔ Bɛɛr-Sebaa. Bɛ kio, Abimelɛki yoo, á n bɔyaa á woo Filisiti minin gána nɛ, kun ka a sɔraasin goledɛnaa Piikɔlɔ nɛ.

33Abrahamu da kɔ́n zumu Bɛɛr-Sebaa, yiri koamanɛ ǹ sii lɛa. Maǹ da lɛ bíi Tamarisi. Lawa mɛn bɛ́ a tan yǎa duduu, á bɛ lɛ nyankɔ walan, bɛ̀ á bíi "Dɛnaa". 34Abrahamu giã Filisiti minin gána lɛ nɛ, á belebɔ walan.

Currently Selected:

SGK 21: SBPE2011

Highlight

Copy