SGK 28

1Izaaki Zakɔba bíi, á lɛn bǐɛ̃ bíi li. Á pɛ á laa a ganaa: «N nyan toa n Kanaan nɛ wɔ lɔ lɛa wa dɛ! 2Yoo n wo n náa a díi Betoeli a piɛ, Mezopotamii gána nɛ, n nə n diãgiĩ Laban a nɛlɔn kɛn goon saa lɔ lɛa walan. 3Lawa Pàãyiidɛnaa die a barka wɔ a nɛ, a die a toa n nɛnyaanan yɛ ǹ mɔnaa, a die a n baa tɔrɔ gigiã a díi lɛa. 4#SGK 17.4-8 Lawa barka mɛn wɔ Abrahamu ni, a die a bɛ lɛ miã wɔ n dɔ laanka n tɔrɔn nɛ. Lawa gána mɛn kɔ Abrahamu la, a bɛ́ gùli lɛa gána mɛn lɛ nɛ, Lawa die a toa a n wɔ baa.»

5Izaaki Zakɔba dia, á woo Aaramun giĩ Betoeli a nɛgiĩ Laban li, Mezopotamii gána nɛ. Zakɔba laanka Ezawu ǹ dan Rebeka ǹ miãgiĩ ni.

6Ezawu ma, mà Izaaki lɛn bǐɛ̃ bíi Zakɔba li, á da zii, mà a wo Mezopotamii, a lɔ saa walan. Á ma dɔn, mà a bɛ́ lɛn bǐɛ̃ bíi li, mà á pɛ á laa a ganaa mà a nyan toa a Kanaan nɛ saa lɔ lɛa wa. 7Á ma dɔn, doo, mà Zakɔba nə́ ǹ di laanka ǹ dan bɔlɔ si miɛ̃, á woo Mezopotamii gána nɛ. 8Ezawu dɔ̃ mà Kanaan nɛlɔn lɛn ba kɔɔ̃nɛ ǹ di Izaaki ganaa wa. 9Bɛ lɛ nɛ, á woo Abrahamu a nɛgiĩ Isimayeli li, á bɛa nɛlɔ Maalati dɔ wɔ lɔ lɛa, á ti a lɔn lɛn ganaa. Maalati n Nebayɔti ǹ miãnɛn lɛa.

Zakɔba a narɛɛ

10Zakɔba soo Bɛɛr-Sebaa, á Kaaran kiwi zii saa. 11Á dɔ bǎã kɔ́n nɛ, wasa mɛ a ganaa walan. Á bɛa bǎã lɛ a kɔlɔ goon saa, á n mìi da la, á waa walan. 12#Zaã 1.51 A bɛ́ nyuù ni, narɛɛ daa la. A yii n kalan gɔn goon ganaa, á n toa tán a mìi la dɔ Lawa ganaa. Á Lawa a lon a dia dí-a wolen yɛ, koe lɛ dii bɛ̀ ǹ gisĩ. 13#SGK 13.14-15 A yii n Dɛnaa ganaa golee-n a nyɛɛnɛ, á n pii ni: «Masɛ n Dɛnaa, Abrahamu a Lawa lɛa, man Izaaki a Lawa lɛa. Ń bɛ́ waa-n tán mɛn la, man die koe n din laanka n tɔrɔn la. 14#SGK 12.3; 22.18 N tɔrɔn tá re mɔnɛɛ ka tán tii bɛ́ lɔn. N gána á die gole koe, a wo lɛ̀giala laanka lɛ̀nyɛɛn li, a wo gɔsɛ a lɛ̀gɔn laanka gusin a lɛ̀gɔn la. Kanaa a tɔrɔn tumaa wɔ á re bǐɛ̃ koe, n din wɔ laanka n tɔrɔn wɔ gɔ́ɔ̃ nɛ. 15Á ke, ma á kunun n ni! N bɛ́ re woe bǎã woo bǎã nɛ, ma á re n tamaɛ, ma á re toɛ, n nə n bɔyaa n da gána kɛ nɛ. Ma a re n toɛ walan duduu wa, ma n lɛ kɔ n la ka sii mɛn tumaa nɛ, yǎa ma bɛ tumaa zɛnɛɛ n nɛ.»

16Zakɔba yii bɛ́ á kaa, á n bɔ nyuù ni, á pɛ: «Sonbore pɛ á pɛsaã, Dɛnaa din ni bǎã lɛ nɛ! Sɛnɛ, ma n ma dɔ̃ wa.»

17Nyɛ́ɛ kũ, á pɛ: «He, bǎã kɛ á nyɛ́ɛ diɛ koe! Kɛ bie bǎã kɔsɔ lɛa, á kiɛ̃ Lawa a kion la wa, lon a kiɛnlɛ n ka kɛ nɛ.»

18Zakɔba yoo baayɛlɛ yiisoone. A goã á kɔlɔ mɛn wɔ a mìi li, á bɛ saa á doa tán, á nyɔɔ kaa a mìi ni. 19Á bɛa bǎã lɛ bíi Betɛli, bɛ giala mà "Lawa a Kion". Sɛnɛ lɛlɛ, kiwi lɛ tɔ na á goã Luuzu. 20Bɛ kio, Zakɔba nə́ n lɛ koa Lawa li á pɛ: «Bɛ̀ Lawa tá kun ka masɛ nɛ, ma bɛ́ zii tɔ mɛn we, bɛ̀ á ma tamaa bɛ gɔ́ɔ̃ nɛ, bɛ̀ á màn-bii kɔ ma la ka wɔ ǹ mɔnaa nɛ, 21bɛ̀ masɛ nə́ n bɔyaa, má daa ma dikion ka bǐɛ̃ nɛ, Dɛnaa á re masɛ a Lawa biɛ. 22Ma kɔlɔ doa bǎã mɛn nɛ, bɛa bǎã lɛ á re Lawa a kion biɛ. Lawa bɛ́ re màn woo màn koe masɛ la, ma á re a fùbaa ǹ wɔ boe a wɔ lɛa.»

Currently Selected:

SGK 28: SBPE2011

Highlight

Copy