SGK 31

Zakɔba a baa si a n bɔ Laban li boo

1Zakɔba ma, mà Laban a nɛgiĩn man pii mà asɛ na á ǹ di Laban gɔn màn tumaa si, á n kɔ lɛ. Mà ǹsɛn di na á toa á pàãma baa. 2Zakɔba ga Laban yɔrɔ ganaa, á dɔ̃ mà ǹsɛn bii a kɔɔ̃n kɔn, ka lɛlɛ wɔ bɛ́ lɔn doo wa. 3Dɛnaa tɔ́n pɛ Zakɔba nɛ: «Wusoo n wo n dikion, ǹ dɔɔ̃nɔn li. Ma á die goɛ̃ kunun n ni.»

4Zakɔba lɛ dia minin li, mà ǹ pɛ Raseli laanka Leyaa nɛ, mà asɛ bɛ́ a tɔɔn lɛn li bǎã mɛn nɛ don, mà ǹ da asɛ yaa walan. 5Ǹ bɛ́ ǹ nə́ daa, á pɛ ǹ nɛ:

– Ka di yɔrɔ bɛ́ lɔn lɛlɛ masɛ wɔ paǹ li, má yɛ, a ba miɛ̃ doo wa. Sɛnɛ, ma di a Lawa goã kun ka ma nɛ. 6Ka dinin tá doɛ̃, mà má dí nya kaa díi ni ka ma we din tumaa nɛ. 7Kaa díi ma bebele, á maa saraa bɔyaa gunyin fù. Sɛnɛ, Lawa na a lɛ kɔ mà a mɛnaa ma la wa. 8Bɛ̀ á pɛ mà a n die ma sarɛɛ ka tɔɔ sɛsian nɛ, tɔɔn lɛn tumaa n nɛ yii sɛsia. Bɛ̀ á pɛ mà a n die ma sarɛɛ ka tɔɔ sɛsia wakakan nɛ, tɔɔn lɛn tumaa n nɛ yii sɛsia wakaka. 9Lawa na á kaa díi lɛ a tɔɔn lɛn si la, á ǹ kɔ ma la. 10Tɔɔn lɛn dii waáraa bɛ́ á dɔ, má n narɛ. Narɛɛ lɛ gɔ́ɔ̃ nɛ, má butumu sɛsian yɛ, sɛsia wakakadɛnan laanka a kɛkɛrɛdɛnan nɛ dii tɔɔn lɛn la. 11Narɛɛ lɛ gɔ́ɔ̃ nɛ, Lawa a lon a dia dí-a wole lɛ lɛ dia ma la á pɛ: «Zakɔba!» Má a lɛ si, máa ma á ke. 12Lon a dia dí-a wole lɛ tɔ́n pɛ ma nɛ: «N yii saa n ga butumu sɛsian kɛn tumaa ganaa, a sɛsia wakakadɛnan kɛn laanka a kɛkɛrɛdɛnan kɛn nɛ dii tɔɔn lɛn la. A na á n baa miɛ̃, a giala, Laban bɛ́ sii mɛn zɛnɛɛ n nɛ, ma yii yɛ. 13#SGK 28.18-22 Lawa mɛn bɛ́ á n din nyaa n nɛ Betɛli, n kɔlɔ doa Lawa mɛn lɛ wɔ lɛa, n nyɔɔ kaa a mìi ni, n nə n lɛ koa Lawa mɛn lɛ li Betɛli, a din Lawa lɛ n ka masɛ nɛ. Sisia kəni, yoo n nə n bɔ gána kɛ nɛ, n wo n yɛ ǹ gána nɛ.»

14Raseli laanka Leyaa Zakɔba lɛ si: «Màn mɛn doamaa bɛ́ a dɔ wɔ ganaa dikion kíɛ̃ lɛa, wɔa wɔ gii tá bɛ-n doo ya? 15Wɔ di bie á wɔ kũ bǎã kɔsɔ minin lɛa wa ya? A giala, a na á wɔ sã á wɔ giɔ̀mɔ bii dinin. 16Bɛ lɛ nɛ, Lawa gɔn màn mɛn tumaa si wɔa díi la, bɛ n wɔsɛn dinin laanka wɔa nɛnyaanan wɔ lɛa. Lawa màn mɛn tumaa pɛ n nɛ, bɛ tumaa zɛnaa sisia.»

17Zakɔba yoo, a ná a nɛnyaanan laanka a lɔn kaa nyɔɔmaan la. 18A ná a tɔɔn tumaa loo, a màn mɛn tumaa yɛ Mezopotamii gána nɛ, á yoo ka bɛ tumaa nɛ, mà a n wusii woe ǹ di Izaaki li Kanaan gána nɛ. 19Laban na á goã á woo a tɔɔn ka kuru ǹ bǎã nɛ. Raseli bɛ toa walan, a ná a kion lɛduə᷉ ǹ dìn goa a kio.

20Zakɔba Siiriin giĩ Laban mìi dɔ li, a na a baa sii boo lɛ da a yiri-a wa. 21Á baa si ka a gɔn màn din tumaa nɛ, á n nanaa á Efrati tà kuru, á n yɔrɔ dia Galaati a kelen kɛn la.

Lawa n Zakɔba kanbiɛ Laban ganaa

22A lɛawaa sɔɔbaa ǹ wɔ pinaa, ǹ nə́ pɛ Laban nɛ, mà Zakɔba baa si. 23Laban nə́ ǹ dɔɔ̃nɔn kũ, ǹ nə́ tɔ wɔ lɛawaa sɔbaa, ǹ ná a kio lui, ǹ nə́ tɔ́n dɔ a ganaa Galaati kelen lɛn la. 24Ǹ kɔn pinaa tèlò-n, Lawa nə́ n din nyaa Siiriin giĩ Laban nɛ ka narɛɛ nɛ, á pɛ nɛ: «N din kũ, n nyan toa n sii kɔ́n zɛnaa Zakɔba-n wa.»

25Laban Zakɔba loo á dɔ a ganaa. Á woo yaa bɛ̀ a ná a mɔnaa kion doa Galaati kelen la. Laban laanka ǹ dɔɔ̃nɔn lɛn dɔn nə́ ǹ wɔn doa walan. 26Laban Zakɔba bíi á pɛ nɛ: «Wàa-ǹ sii n ka kɛ nɛ ń zɛnaa? N nə́ ń masɛ mìi dɔ ma li, n maa nɛlɔn goa ń baa si ǹ ni, ka ǹ bɛ́ zia nɛn kuĩ bɛ̀rɛn lɛa lɔn. 27Wàa na á baa, ń ma mìi dɔ ma li, n nə́ n duru ń baa si? Bɛ̀ n nə́ n pɛ ma nɛ, bɛ̀ maǹ die tùtu laanka maà dii, ǹ loe lɔ, ǹ nə n da zii ka nyɛnyɛɛ nɛ. 28N toa má fòo din da maa nɛlɔn laanka maa nɔ̀ɔnɔn man wa. Bɛ n baãnaabaa ǹ sii lɛa ń zɛnaa. 29Ma á boe la ma sii baraa zɛnaa ǹ nɛ. Sɛnɛ, n díin Lawa na á pɛ ma-n gunun tèlò-n mà man din kũ, ma baran màn kɔ́n zɛnaa n nɛ wa. 30N dikion sii bɛ́ n ganaa sisia, bɛ lɛ nɛ ń baa si. Sɛnɛ, wàa na á baa, n tá masɛ a kion lɛduə̃ ǹ dìn kɛn dɔn koɛ̃?»

31Zakɔba tɔ́n Laban lɛ si: «Man má nyɛ́ɛ baa, man pii, máa n nə ǹ die n nɛlɔn lɛn sii ma la. 32Bɛ̀ n nə́ n dìn lɛn yɛ maa minin kɛn mɛn lon, bɛa dɛnaa gã. Ga maa mànan lɛn bii, wɔ dɔɔ̃nɔn lɛn tumaa yɔrɔ-a. Bɛ̀ màn mɛn tá n wɔ lɛa, n bɛ bɔ n bɔ ǹ li.»

Zakɔba a doɛ̃ mà Raseli na á dìn lɛn koã wa.

33Laban wɔ Zakɔba a mɔnaa kion, bɛ kio, á wɔ Leyaa wɔ nɛ, bɛ kio, á wɔ bɛ̀rɛlɔ min paa lɛ wɔ nɛ, a màn kɔ́n yɛ wa. Á soo Leyaa a mɔnaa kion, á wɔ Raseli wɔ nɛ. 34Raseli na á goã á dìn lɛn goa, á ǹ duru nyɔɔmaa a kɛkɛrɛ giulun, á giã la. Laban mɔnaa kion gɔ́ɔ̃ tumaa gugusi, á ga, a màn kɔ́n yɛ wa. 35Raseli tɔ́n pɛ ǹ di lɛ nɛ: «Díi, bɛ̀ n yaa, masɛ á boe la ma á yui lon n yɔrɔ-a wa, n foo baran busu ma li wa, a giala, lɔn lɛawaa n ma ganaa.»

Laban wɔlɔ gugusi, a dìn lɛn yɛ wa. 36Zakɔba foo yoo parsiini, á yoo Laban gialaa. Á pɛ nɛ: «Ma zɛ̀rɛ n ka ǹ mɛn nɛ? Sii baraa mɛn nɛ ma zɛnaa, n nə́ yui masɛ kio lui piɛɛ̃piɛɛ̃ kɛnɛn? 37N bɛ́ ń masɛ a mànan tumaa gugusi, n kion gɔ́ɔ̃gɔ́ɔ̃ ǹ màn goon toto din yɛ kunun ǹ ni? Soo ne, maa minin lɛn laanka n din a minin yɔrɔ-a, ǹ wɔsɛn min paa waa kɔn. 38Ma lɛ̀ fuə n ke kun n ni, n sère dan bin nɛ daa wa, n bòe dan bin nɛ daa wa. Ma bin sère gɔ̀lɔ̀ bɔ n tɔɔn lɛn bii, má dɛ má sɔ̃ wa. 39Bɛ̀ don mànan nə́ n tɔɔ mɛn kũ, ma bin na a siĩ lɛkaran goa, má daa ǹ kɔ n la wa, ma din nə nɛn bɛ̀ ma ǹ saraa. Bɛ̀ minin nə́ tɔɔ mɛn koã ma li penlee-n hinlaa tèlò-n, n nə ǹ goɛ̃ bɛ̀ n bɛ liɛ ma la. 40Penlee ne, sɛ̀fuu n ma dii, tèlò-n nyan kɛ n boe ma ganaa, ma goã nyuù naɛ ma yii-a wa! 41Ma lɛ̀ fuə n ke n kion. Má dí nya n nɛ lɛ̀ fulusii gɔ́ɔ̃ nɛ, n nɛlɔ min paa kɛn lɛa. Ma dí nya n nɛ lɛ̀ sɔrɔ gɔ́ɔ̃ nɛ, màn mɛn bɛ́ toɛ, ma tɔɔn yɛ. Sɛnɛ, ń maa saraa bɔyaa gunyin fù. 42Bɛ̀ ma di gole Abrahamu a Lawa, ma di Izaaki bɛ́ nyɛ́ɛ biɛ Lawa mɛn lɛ nɛ, bɛ̀ bɛ bie á goã kun ka masɛ-n wa, bɛ̀ n nə ǹ die toɛ ma gɔn kooro woo. Sɛnɛ, Lawa ga masɛ á nɔmaa ganaa, ma dí kaka mɛn nya, á bɛ yɛ. Bɛ lɛ nɛ, a ná a yɔrɔ bɔ gunun tèlò-n.»

Laban laanka Zakɔba a lɛ kɔ kɔn la

43Laban Zakɔba lɛ si, á pɛ: «Nɛlɔn kɛn man masɛ a nɛlɔn lɛa, ǹ nɛnyaanan dɔn man maa wɔn lɛa, tɔɔn kɛn man masɛ a tɔɔn lɛa. N yii bɛ́ màn mɛn tumaa ganaa, ma din wɔn manɛ. Pelo, man die boe la, ma wàa zɛnaa maa nɛlɔn kɛn laanka ǹ gɔ́ɔ̃gɔ́ɔ̃ ǹ nɛnyaanan manɛ? 44A bɛ́ miɛ̃, daa wɔ n lɛ kɔ kɔn la, siérebaa ǹ sii goa wɔ dinin bii ni.»

45Zakɔba kɔlɔ goon saa á doa tán. 46Bɛ kio, á pɛ a minin manɛ, mà ǹ kɔlɔ goa ǹ da nɛ. Ǹ nə́ kɔlɔ goa ǹ nə́ da kɔn la. Bɛ kio, ǹ tumaa giã bɛa kɔlɔ dakɔnla lɛ la, ǹ nə́ màn bii. 47Laban bɛa bǎã lɛ bíi Yegara-Saaduta, Zakɔba sɛ́ bíi Galɛɛdi. 48Laban tɔ́n pɛ: «Kɔlɔ dakɔnla kɛ n siére lɛa pelo, wɔsɛn min paa bii ni. Bɛ lɛ na á toa, ǹ nə́ bíi Galɛɛdi bɛ giala mà "Siére a kɔlɔ dakɔnla".» 49Ǹ nə́ bíi dɔn mà Mispaa bɛ giala mà "Gamawalan ǹ bǎã". A giala, Laban na á goã á pɛ: «Bɛ̀ wɔ n bɔ kɔn yɔrɔ-a ǹ mɛn waáraa, Dɛnaa die a wɔ wɔ bii, a n yii doa wɔsɛn min paa la. 50Bɛ̀ ń fuu nyaa maa nɛlɔn kɛn nɛ, bɛ̀ ń lɔ kɔsɔn goa n ti ǹ ganaa, haalɛ ta min ba wɔ li siére lɛa wa, Lawa n siére lɛa wɔ bii ni.»

51Bɛ kio, Laban pɛ Zakɔba nɛ: «Ga kɔlɔ dakɔnla kɛ ganaa, ga kɔlɔ kɛ ganaa, wɔ doa wɔ dinin min paa bii ni. 52Kɔlɔ dakɔnla kɛ laanka kɔlɔ doa kɛ n siére lɛa. Masɛ nə n liɛ, máa maa re n gòã diɛ ǹ kio, ma pɛ máa man die sii baraa zɛnɛɛ n nɛ wa. N dɔ baran n gòã da ǹ kio, n pɛ mà n nə ǹ die sii baraa zɛnɛɛ ma-n wa. 53Abrahamu laanka Nahɔɔrɔ a Lawa, ka digolon lɛn Lawa lɛ die a kiri kuru wɔ bii.» Zakɔba nə́ n liɛ ka Lawa nɛ, ǹ di Izaaki bɛ́ nyɛ́ɛ biɛ Lawa mɛn lɛ nɛ. 54Bɛ kio, Zakɔba wúlu bɔ kele lɛ la, á lɛ dia a minin lɛn la, mà ǹ da màn bii. Ǹ nə́ màn bii, ǹ nə́ waa kele lɛ la walan.

Currently Selected:

SGK 31: SBPE2011

Highlight

Copy