SGK 38

Zudaa laanka Tamaara

1Bɛa waáraa lɛ nɛ, Zudaa yoo á n bɔ ǹ dinɛn lɛn li, á woo giĩ goon li Adulaamu kiwi, a tɔ n Iraa. 2Á Kanaan giĩ Suwaa a nɛlɔ yɛ walan, á bɔ á saa a lɔ lɛa. A bɛ́ á giã kun ni, 3lɔ lɛ nɔ̀ si, á nɛgiĩ yɛ, Zudaa ná a tɔ kɔ Ɛrɛ. 4Á wusoo á nɔ̀ si, á nɛgiĩ yɛ doo, á bɛ tɔ kɔ mà Onan. 5Bɛ kio, á wusoo á nɔ̀ si, á nɛgiĩ kɔsɔ yɛ, á bɛ tɔ kɔ mà Selaa. Lɔ lɛ bɛ́ Selaa yii ǹ mɛn waáraa, bɛ̀ Zudaa n giã-n Kezibu kiwi.

6Á lɔ wɔ á kɔ a nɛgiĩ bibinaa Ɛrɛ lɛ la. Lɔ lɛ tɔ n Tamaara. 7Ɛrɛ a zɛnaa ǹ sii tìĩ bɔ Dɛnaa nyin ni, Dɛnaa nɔmaa a ná a nyin bɔ. 8Zudaa tɔ́n pɛ ǹ diɛ̃ Onan nɛ: «N din doamaa nɛ, n giã kun ka n gologiĩ a lɔ lɛ nɛ, màn mɛn bɛ́ toɛ, n nə gologiĩ lɛ tɔrɔ yɛ la.»

9Sɛnɛ, Onan bɛ́ doɛ̃ mà nɛ lɛ ba re asɛ wɔ biɛ wa, bɛ̀ á woo giã kun ka ǹ gologiĩ a lɔ lɛ nɛ ǹ mɛn waáraa, bɛ̀ á dɔ̃ mà asɛ kíi á die, a n toɛ bɛ̀ a kaa tán, màn mɛn bɛ́ toɛ, a baran ǹ gologiĩ lɛ tɔrɔ yɛ wa. 10A zɛnaa ǹ sii lɛ kɔɔ̃n kɔ Dɛnaa ganaa wa, Dɛnaa ná a dɔ nyin bɔ. 11Zudaa tɔ́n pɛ ǹ manaa Tamaara nɛ: «Ń bɛ́ giɔɔrɔ lɛa, wo giã n dikion bɔrɔ, yǎa maa nɛgiĩ Selaa kɛ doe giĩbaa ganaa.»

A giala, a na á goã pii a din gɔ́ɔ̃ nɛ kɛnɛn: «Bɛ̀ ma toa Selaa wɔ lɛ, a dɔ tɔn gã ka ǹ golon kɛn wɔ bɛ́ lɔn!» Tamaara soo á woo giã ǹ dikion.

12A woo bɛ́ á belebɔ, Suwaa a nɛlɔ mɛn bɛ́ Zudaa li, bɛ́ gã. Zudaa bɛ́ a ná a gɛ̀ koa á nya, á yoo á woo a sère ka-kurulin li Timinaa kiwi, kun ka a giaáragiĩ Adulaamun giĩ Iraa lɛ nɛ. 13Minin nə́ pɛ Tamaara nɛ, mà ǹ zuũdi lɛ n woe a sèren ka kuri Timinaa. 14Tamaara bɛ́ á bɛ ma, a ná a giɔɔrɔbaa ǹ mɔnaan waa á ǹ bɔ a din ganaa, á mɔnaa pɛnɛ a din mìi ganaa. A bɛ́ á n din bɔyaa miɛ̃, á soo á woo giã Timinaa zii la, bɛ̀ n tá re woe Enayimu kiwi. A giala, á dɔ̃ mà Selaa dɔ lɔ saa ganaa, a da yaa ǹ nə́ ǹ ba tɔn asɛ koe la lɔ lɛa wa. 15Zudaa bɛ́ á Tamaara yɛ tán, a ná á baa lɔ kɔrɔ kɔ́n lɛa, a giala, a na á mɔnaa kɔ a din mìi lɛ. 16A bɛ́ a bie á dɔ̃, mà asɛ din manaa-n wa, á kanaa á woo a li zii lɛ la, á pɛ nɛ mà haya, mà asɛ á die le!

Tamaara na a lɛ si mà a n die wàa mɛn koe asɛ la, a tɔn giã kun ka asɛ nɛ?

17Zudaa tɔ́n pɛ nɛ mà asɛ n die bòe nɛ goon boe a tɔɔn bii a dia la.

Lɔ lɛ tɔ́n pɛ nɛ mà asɛ lɛ kɔ, sɛnɛ, mà a lɛ koa ǹ màn kɔ asɛ la, bɛ̀ màn dia lɛ baa die.

18Zudaa tɔ́n nɔ̀n da la mà a n giɛ wàa li, lɛ koa ǹ màn lɛa?

Lɔ lɛ ná a lɛ si mà asɛ n giɛ a din gɔn bǎã li, ka biɛ nàn kɛ nɛ, ka bàbàla kɛ nɛ a gɔn.

Á bɛn lɛn kɔ la, á kũ á ga li, yǎa a nɔ̀ baa a ganaa. 19Á yoo á woo piɛ, a ná a mɔnaa lɛ bɔ a mìi lɛ, á na a giɔɔrɔbaa ǹ mɔnaan goa, á ǹ wɔ. 20Bɛ kio, Zudaa ná a giaára Adulaamun giĩ lɛ dia, mà a wo lɛ koa ǹ mànan lɛn si lɔ lɛ la, a da ǹ nɛ. A bɛ́ a yɛ wa, 21á tɔ́n nɔ̀n da Enayimu kiwi minin la mà lɔ kɔrɔ ke, bɛ̀ a giã tán zii para-a kànaa, mà a n maa?

Bɛn ná a lɛ si mà lɔ kɔrɔ bin yɛ kànaa duduu wa.

22Zudaa a giaáragiĩ lɛ nə́ n bɔyaa, á daa pɛ nɛ mà asɛ yɛ wa, mà kiwidɛnan lɛn nə́ pɛ dinin, mà lɔ kɔrɔ ba ǹsɛn li walan wa.

23Zudaa tɔ́n pɛ nɛ kɛnɛn: «Wo ka mànan lɛn nɛ! Wɔ baran sìi da wɔ dinin ganaa wa. Yǎa ma bɛ́ má bòe nɛ lɛ dia la. N dɔ bɛ́ ń woo ne, ń ga li ń fɔ̃!»

24Mui sɔɔ bɛ kio, min daa pɛ Zudaa nɛ: «N manaa Tamaara lɛ kɔrɔbaa zɛnaa. A n nɔ̀-n dinin!» Zudaa tɔ́n pɛ: «Ka kũ ka soo-n kanaa, ka tã.»

25Ǹ bɛ́ kuĩ soe-n kanaa, á minin dia mà ǹ wo pɛ asɛ zuũdi Zudaa lɛ-n kɛnɛn: «Mànan kɛn bɛ́ giĩ mɛn wɔn lɛa, bɛ lɛ a nɔ̀ nɛ ma tá a nɛ. Haya! Gɔn bǎã kɛ nɛ, ka biɛ nàn kɛ laanka bàbàla kɛ bɛ́ min mɛn wɔn lɛa, n doa n nə ǹ dɛnaa dɔ̃!»

26Zudaa nə́ ǹ yɛ a din a mànan lɛa, á tɔ́n pɛ: «Ń landa sii tamaa, ń la masɛ nɛ. A giala, bɛ̀ ma doamaa nɛ, ma n kɔ maa nɛgiĩ Selaa la lɔ lɛa, sɛnɛ, ma n kɔ la wa.»

Sɛnɛ, Zudaa giã kun ka Tamaara-n bɛ kio doo duduu wa.

27A bɛ́ nɛ yii biikoo mɛn li, ǹ nə́ yɛ mà bɛlɛmanan man a gɔ́ɔ̃ nɛ. 28Goon bɛ́ á n gɔn dia, nɛ-yoli lɛ bɛa gɔn lɛ kũ, á gɛ̀sɛ tiɛɛ̃n yii a ganaa, á pɛ: «Kɛ na á yɛ bibinaanɛ.»

29Sɛnɛ, nɛ lɛ wusoo ka a gɔn nɛ, ǹ miã kɛ soo a nyɛɛnɛ. Nɛ-yoli lɛ tɔ́n pɛ: «Á soo ǹ bǎã bɔ, a din ni dɛ!»

Ǹ ná a tɔ kɔ Perɛzi, bɛ giala mà "Soo ǹ bǎã". 30Bɛ kio, gɛ̀sɛ tiɛɛ̃n bɛ́ á n yii ǹ miã mɛn gɔn ganaa, bɛ́ soo. Ǹ nə́ bɛ tɔ kɔ Zeraa.

Currently Selected:

SGK 38: SBPE2011

Highlight

Copy