Ebr 10
10
1Ǹ goã n yii diɛ bǐɛ̃n mɛnɛn la, di-pɛ lɛ n bɛa kɔnboe nuùnaà nyɛɛ, a bie bɛa sii lɛ din taãn kɛ lɛa wa. Lɛ̀ woo lɛ̀, wúlu mànan manə n boe. Min mɛnɛn bɛ́ n mɔrɛ Lawa ganaa, di-pɛ lɛ n boe la, a bɛn baa min lɛ-piɛ̃n lɛa lɔn ka wúlu mànan kɛn barka nɛ? 2Bɛ̀ maǹ nə́ min lɛ-piɛ̃n baa, bɛ̀ wúlu-bɔ nə́ n lɛ da. A giala, mà Lawa guguru-kɔlen nə́ *yoreen kɔ gunyin goon dinsɔɔ̃, bɛ̀ ǹ foo dɔ ba ǹ zɛ̀rɛ biɛ doo ka sii baraa kɔ́n nɛ wa. 3Sɛnɛ, bɛa wúlu-bɔn kɛn lɛn man nə́ goã, minin yiri gisĩ ǹ sii baraan nɛ lɛ̀ woo lɛ̀. 4A giala, dii gɔ̀lɔ̀n laanka butumu mà a boe la, a sii baraan nya duduu wa.
5 #
Loe 40.7-9
Bɛ lɛ nɛ, *Krita bɛ́ die kanaa, á pɛ Lawa nɛ:
N goã giɛ wúlu mànan
laanka gɔ ǹ mànan li wa,
sɛnɛ, ma nə ń gɔ̀nɔn siĩ kɔ ma la.
6 *Wúlu màn tiɛ̃n laanka sii baraan toa
ǹ wúlu mànan nə kaa n foo la wa.
7 Bɛ lɛ nɛ, masɛ Krita pɛ:
«Lawa! Ma á ke,
man die n foo sii zɛnɛɛ»,
a n kiɛ̃-n miɛ̃
Lawa a Boo Sɛ́wɔ nɛ maa wɔ gɔn la.
8Krita na á pɛ bibinaanɛ: «Wúlu mànan laanka gɔ ǹ mànan nɛ, wúlu màn tiɛ̃n laanka sii baraan toa ǹ wúlu mànan kɛn nɛ, Lawa a giɛ bɛn li wa, ǹ kaa a foo la wa,» a laanɛ ǹ nə́ goã n zɛnɛɛ, á kɔnpii ka Dí-pɛn nɛ. 9Á tɔ́n pɛ doo: «Lawa! Ma á ke, man die n din lɛ foo sii zɛnɛɛ.» Bɛa yɔrɔ kɛ lɛ la, Lawa na á lɛlɛ a wúlu zizin kɛn tumaa papaã, á Krita a wúlu mànbaa kɛ da ǹ bǎã nɛ. 10Yezu Krita na á Lawa foo sii kɛ lɛ zɛnaa, a ná a din gɔ̀nɔn kɛ kɔ, mà a n baa wúlu màn kɛ lɛa, ǹ mɛn bɛ́ á n zɛnaa gunyin goon toto, bɛ lɛ nɛ, á wɔ yoreen koe.
11 #
BBN 29.38
Wúlu-bɔle gogoonmaa na á goã a dí nyɛɛ baraabaraa, a ná a din wúlu tɔrɔ goon lɛ boe gunyin damata. Bɛn nə goã boe la ǹ tá sii baraan nyɛɛ yǎa duduu wa. 12#Loe 110.1 Sɛnɛ, Krita sɛ na á n din kɔ, wúlu màn goon toto lɛa sii baraan lɛa, bɛ kio á giã Lawa gusin lon yǎa duduu, 13a nə n yii diɛ, yǎa Lawa sìi diɛ a zɔ́ɔn ganaa. 14A min mɛnɛn yoreen kɔ, a na á bɛn baa min lɛ-piɛ̃n lɛa yǎa duduu, a din kɔ wúlu màn lɛa gunyin goon toto kɛ lɛ barka nɛ.
15Yiri Fu dɔ tá bɛa sii kɛ lɛ a siére biɛ wɔ nɛ. 16#Zer 31.33-34 Á pɛ:
«Ma bɛ́ re lɛ kɔ kɔn la mɛn we kɔn-a ǹ nɛ,
bɛ á ke:
ma din Dɛnaa n pii,
máa bɛa lɛawaan kɛn lɛn kiɛ̃ kio,
man die maa dí-pɛn lɛn we ǹ foo ne,
man die ǹ kiɛ̃ ǹ yiri ni.»
17Á pɛ doo: «Ma a re n yiri koɛ ǹ sii baraan laanka ǹ kɔkɔrɔbaa siin ni doo duduu wa.» 18Haya, bɛ̀ sii baraa nə́ n toa, sii baraa toa ǹ wúlu ba n boe doo wa.
Wɔ bɛ́ n mɔrɛ Lawa ganaa ka foo-doa-n lɔn
19Bɛ lɛ taman yii, dɔɔ̃nɔn lɛn, foo-doa tá wɔ lon, wɔ wɔ Bǎã Sonbore Sonbore kɛ nɛ ka Yezu mà kɛ barka nɛ, mà ke á kaa wúlu màn lɛa. 20Yezu na á zii dii lɛ bũ wɔ nɛ, yiikoonaabaa ǹ zii ni. Bɛ n kiɛ̃ kion bii kuru kɔn-a mɔnaa kɛ nɛ, bɛ giala, mà a na á n din gɔ̀nɔn kɛ kɔ. 21Wúlu-bɔlen kiã tá wɔ lon, a n giã-n lon, Lawa a kion mìi la. 22#LWS 8.30; Eze 36.25 Bɛ lɛ tɔ ganaa, ka daa wɔ n mɔrɔ Lawa ganaa ka foo sonbore ne, ka golee Lawa li taãn-taãn nɛ, wɔ foo n yoreen ne, gɔ́ɔ̃gɔ́ɔ̃ ǹ zɛ̀rɛ kɔ́n ná a ba wɔ ganaa wa, wɔ́ gɔ̀nɔn dɔ n pii-n ka mu sonbore ne. 23Wɔ baran talaa wa, wɔ bɛ́ pii wáa wɔ́ lɛ kɔ foo-doa mɛn ganaa, ka daa wɔ wo nyɛɛn bɛ gɔ́ɔ̃ nɛ, a giala, Lawa mɛn nə n lɛ kɔ, bɛ á bɔlɔgoondɛnaa lɛa. 24Ka daa wɔ n yiri kɔ kɔn li, wɔ kɔn da kɔn-narɛɛ ganaa ka dí sonboren nyɛɛ nɛ. 25Min tɛnɛn lɛ mui ka wusu lɛsɔkɔn bǎã-n nɛ. Bɛ a siĩn wa. Ka daa wɔ n doa wɔ kɔn foo taã lɛsɔkɔn gɔ́ɔ̃ nɛ, sanparɛ ka yii bɛ́ Dɛnaa a lɛawaa lɛ ganaa dirii.
26Wɔa sonbore doɛ̃ taãn-taãn kio, bɛ̀ wɔ á tɔn nə n tiɛ̃ sii baraa zɛnɛɛ, sii baraa toa ǹ wúlu kɔ́n banban doo wa. 27#Iza 26.11 Sɛnɛ, yii da kiri-kurii laanka tɛ la dinsɔɔ̃ na a tan, bɛ n nyɛ́ɛ sii gole lɛa. Bɛa tɛ lɛ n die Lawa bɔlɔ tii wolen kuĩ ka lenlen. 28#TDP 17.6; 19.15 Min mɛn bɛ́ Muizu a Dí-pɛ lɛ ziziɛ̃, bɛ̀ min paa hinlaa min sɔɔ yɛ, ǹ nə́ bɛa sii lɛ a siéren baa, bɛ nə n dii a gã, makara-bɔ ba a-n wa. 29Sɛnɛ, min mɛn bɛ́ Lawa a Nɛgiĩ kɛ puusə koe, á n giɛ Lawa a lɛ kɔ kɔn la ǹ mà kɛ lɛ ganaa sàn kɔ ǹ màn lɛa, mà mɛn bɛ́ a ná a yoreen kɔ, á n boo baraa diɛ Lawa a bǐɛ̃baa ǹ Yiri Fu kɛ ganaa, ka a taasɛ mà bɛ doamaa-n ka dɔlɔ baraa-n wa? 30#TDP 32.35-36 Sonbore, Lawa mɛn boo kɛ da, wɔ á bɛ doɛ̃: «Ma din nə gɛ̀ dòo boe, ma din nə dòo sarɛɛ.» Á pɛ doo: «Ma din Dɛnaa á re kiri kuri maa zaman la.» 31Min mɛnaa Lawa yiikoonaa kɛ gɔn dɔlɔ a lɛa, bɛ á baraa taãn-taãnɛ.
32Ka n yiri gisĩ kaa giala-kɔ nɛ. Bɛa biikoon li, kaa Lawa a wɔlɔ fúlu yɛ lɛ kio, ka fuu gigiã yɛ, ka sii si ka ganaa. 33Paǹ kɔ́n li, ǹ nə́ ka da yaa lɛa minin yɔrɔ-a, ka sɔ nɛ ka fuun ni. Paǹ kɔsɔ dɔ li, ká kaa dɔɔ̃nbaa nyaa nɔmaa-wɔlen kɛn lɛn manɛ. 34Sonbore, ká kaa wɔ gii yɛ kòso nɛn fuu ni. Ǹ nə́ ka gɔn mànan si ka la, ká lɛ kɔ bɛa mànan kɛn lɛn woo ganaa ka nyɛnyɛɛ nɛ, a giala, ká dɔ̃ mà naforo sonbore nyabaã wolen tá ka lon. 35Haya, ka baran toa ka n gɔn bɔ kaa foo-doa kɛ ganaa wa, a saraa ǹ màn tá gole. 36Sonbore, ka laadoo tá sii simaa ganaa, ka boo la ka Lawa dùũ lɛ zɛnaa ka a lɛ pã, ka tɔn a lɛ-kɔ ǹ sii lɛ a zɛnaa yɛ. 37#Abak 2.3-4 A giala, Lawa a boo n pii:
«Kànaa ka biikoo boɛɛn nɛ,
min mɛn bɛ́ die, bɛ á re doe,
a re beleboe wa.
38 Sɛnɛ, maa min mɛn bɛ́,
ma din Lawa foo sii zɛnɛɛ
ka goleemali ni,
bɛ tá re nyin nyabaã yii.
Sɛnɛ, bɛ̀ á kanaa á zii da,
a sii a re kɔɔ̃n koe ma ganaa doo wa.»
39Min mɛnɛn bɛ́ kanɛɛ bɛ̀ ǹ papaã, wɔsɛn ba bɛn kɔnɔn lɛa doo wa. Sɛnɛ, wɔsɛn man golee Lawa li, wɔ á kirisibiɛ bɛa yɔrɔ kɛ lɛ la.
Currently Selected:
Ebr 10: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.