Ebr 8
8
Yezu bɛ́ wɔa wúlu-bɔlen kiã lɛa lɔn?
1 #
Loe 110.1
Ma bɛ́ boo mɛn diɛ, a gugurubaa ǹ bǎã n ka kɛ nɛ: Bɛa wúlu-bɔlen kiã kɛ lɛ tɔrɔ n wɔ lon, á n giã-n Lawa gole siĩn kɛ a kii dankan gusin lon gɔ́ɔ̃ nɛ. 2A n wúlu bɔ ǹ dí nyɛɛ *wúlu bɔ ǹ bǎã nɛ, bɛ giala, mà Lawa a kion taãn kɛ nɛ. Lawa din na á bɛa kion lɛ dɔ, min bie á dɔ wa.
3Wúlu-bɔlen kiã tumaa na á n koa, mà a gɔ ǹ mànan laanka wúlu mànan kɔ Lawa la. Bɛ lɛ nɛ, wɔ dɔn wúlu-bɔlen kiã lɛ doamaa nɛ, a màn kɔ́n yɛ a kɔ Lawa la. 4Bɛ̀ *Krita lɛ na á goã kanaa, bɛ̀ a ba wúlu-bɔle biɛ dinin wa. A giala, wúlu-bɔlen tan, ǹ nə́ gɔ ǹ mànan lɛn koe Lawa la, á kɔnpii ka Muizu a Dí-pɛn nɛ. 5#BBN 25.40 Bɛn bɛ́ wúlu bɔ ǹ dí mɛn nyɛɛ ke, bɛ n lon gɔ́ɔ̃-n wɔ kɛ a kɔnboe lɛa, a nyín ni. Bɛ na á kɔnpɛ ka sii kɛ nɛ, á n zɛnaa Muizu ni. A bɛ́ re mɔnaa kion lɛ doe, Lawa na á pɛ nɛ: «Toa n sii lɛ tumaa zɛnaa, ká a yɔrɔ bɛ́ á n nyaa n nɛ lɔn kele lɛ la.»
6Sonbore, dí mɛn nə n kɔ Yezu lɛ sɛ la, bɛ á gole á la kɛ-n lenlen. A giala, a din na á lɛ kɔ kɔn la sonbore sonbore kɛ a zɛlɛ baa, wɔ laanka Lawa bii ni, lɛ kɔ kɔn la mɛn giala bɛ́ we-n Lawa a lɛ-kɔ ǹ boo sonbore sonboren la.
7Sonbore, bɛ̀ *gɔ̀ boɛɛn na a yɛ lɛ kɔ kɔn la bibinaa lɛ ganaa wa, bɛ̀ mìi ba goɛ̃ la, ǹ kɔsɔ da a bǎã-n wa. 8#Zer 31.31-34 Sɛnɛ, Lawa ná a din a tɔrɔ lɛ a sãn pɛ kɛnɛn:
«Lɛawaan tá die,
ma din Dɛnaa n pii,
ma á re lɛ kɔ kɔn la dii we,
ka Izirayeli tɔrɔ minin kɛn nɛ,
ka Zudaa tɔrɔ minin kɛn dɔn nɛ.
9 Bɛa lɛ kɔ kɔn la dii kɛ lɛ a re goɛ̃
ka a zizi kɛ bɛ́ lɔn wa,
ma a zizi mɛn wɔ ka ǹ digolon ne,
bɛ̀ ma bɛ́ má soo ǹ ne,
má ǹ bɔ bɛ̀rɛbaa nɛ Ezipti gána nɛ.
Ǹ dinin man nə́ maa lɛ kɔ kɔn la kɛ lɛ ziziɛ̃,
bɛ lɛ nɛ,
ma dɔ́ tɔ́n nə ǹ toa walan.
10 Ma bɛ́ re lɛ kɔ kɔn la dii mɛn we
ka Izirayeli tɔrɔ minin kɛn nɛ, bɛ á ke:
Ma din Dɛnaa n pii,
máa bɛa lɛawaan kɛn lɛn kiɛ̃ kio,
man die maa dí-pɛn we ǹ yiri ni,
man die ǹ kiɛ̃ ǹ foo ganaa.
Ma á re goɛ̃ ǹ Lawa lɛa,
ǹ dɔn tá re goɛ̃ ma din a tɔrɔ lɛa.
11 Ǹ min kɔ́n ba re a din tɔrɔ min
hinlaa ǹ dɔɔ̃n darɛɛ doo a pɛ nɛ,
mà a Dɛnaa Lawa dɔ̃ wa.
A giala, ǹ tumaa á re ma doɛ̃,
a kũ ǹ bɔbɔnboɛɛn ganaa
a wo ǹ gole yaa.
12 Ma á re ǹ sãn toɛ ǹ nɛ,
ma a re n yiri koɛ ǹ sii baraan nɛ
doo duduu wa.»
13Lawa bɛ́ lɛ kɔ kɔn la dii boo diɛ, wɔ dɔ̃ mà a n nyɛɛ, mà a bibinaa kɛ zizi kɔ. A da yaa, màn mɛn bɛ́ á zizi kɔ a biikoo kiɛ̃, bɛ n woe papaã ganaa.
Currently Selected:
Ebr 8: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.