Zaã 3

Yezu laanka Nikodɛmu a kɔn-yɛ

1Giĩ goon na á goã kun ka *Fariziɛ̃n nɛ, a tɔ n Nikodɛmu, Zuifun min yii-guguru-a goon ne. 2Ǹ kɔ́n pinaa tèlò-n, á daa Yezu li á pɛ nɛ: «Mìinaa, wɔsɛn tá doɛ̃, wáa Lawa na á n dia mà n da wɔ daraa. A giala, n bɛ́ kaãbaa ǹ siin mɛnɛn zɛnɛɛ, min kɔ́n ba boe la a bɛn zɛnaa, bɛ̀ Lawa ná a kun ka ǹ dɛnaa-n wa.»

3Yezu tɔ́n pɛ nɛ: «Masɛ n pii n ni, sonbore ne: Bɛ̀ min mɛn bie a wusoo a yɛ wa, ǹ dɛnaa a boe la a *Lawa a kiibaa yɛ wa.»

4Nikodɛmu tɔ́n pɛ nɛ: «Bɛ̀ min mɛn zizi kɔ, bɛ n boe la a wusoo a yɛ lɔn doo? Á boe la a wɔ ǹ dan gɔ́ɔ̃ nɛ a wusoo a yɛ gunyin paa?»

5Yezu tɔ́n pɛ nɛ: «Masɛ n pii n ni, sonbore ne: Bɛ̀ min mɛn bie a wusoo a yɛ Lawa wɔ baa-n ka mu laanka Yiri Fu pàã-n wa, ǹ dɛnaa a boe la a wɔ Lawa a kiibaa-n wa. 6Bɛ̀ min mɛn yɛ gɔ̀nɔn siĩn la, bɛa dɛnaa n gɔ̀nɔn siĩn lɛa. Bɛ̀ min mɛn dɔ yɛ ka Yiri Fu pàã nɛ, bɛ n yiri màn lɛa. 7Ma bɛ́ má pɛ n nɛ máa ǹ doamaa nɛ ǹ wusoo ǹ yɛ, n baran n kaãbaa bɛ-a wa. 8Bǎã mɛn bɛ́ kɔɔ̃n piɛ̃ ganaa, a n boe a wo walan. Min na á wuu miɛ, sɛnɛ a bɛ́ boe maa, a n woe maa, min ba bɛ doɛ̃ wa. Bɛ̀ min mɛn yɛ ka Yiri Fu pàã nɛ, a n miɛ̃; Lawa a nya ǹ dí ni, minbuiin nɛ a boe la a na a giala ma wa.»

9Nikodɛmu tɔ́n pɛ Yezu ni mà bɛ nə n zɛnɛɛ lɔn?

10Yezu tɔ́n pɛ nɛ: «Ma n Izirayeli minin darɛɛ, a da yaa n ba bɛa siin kɛn doɛ̃ wa! 11Masɛ n pii n ni, sonbore ne: Wɔsɛn bɛ́ màn mɛn doɛ̃, wɔ n boo diɛ bɛ wɔ gɔn la, wɔ bɛ́ wɔ́ màn mɛn yɛ, wɔ n siére biɛ bɛ wɔ gɔn la, sɛnɛ, ka bɛ́ ka a lɛ koe wɔsɛn boo-a wa. 12Siin mɛnɛn bɛ́ n zɛnɛɛ kanaa gɔ́ɔ̃ nɛ ka dinin yii nə́ ǹ ganaa, bɛ̀ masɛ tá bɛn boo diɛ, bɛ̀ ka a wɛɛ la wa, siin mɛnɛn bɛ́ n zɛnɛɛ lon, ka yii ná a ba ǹ ganaa wa, bɛ̀ man bɛn boo diɛ ka nɛ, ka n die siɛ lɔn ka tɔn waa bɛ la dɔn? 13A giala, min kɔ́n dii lon á wusoo á gisĩ tán wa, bɛ̀ á n bɔ Min a Nɛgiĩ ni, asɛ nə́ n toa lon á gisĩ tán. 14#MNS 21.9 Muizu miɛ̃ nyin da gɔn ganaa lon don lɔn ke, yǎa Min a Nɛgiĩ dɔ nə n diɛ lon miɛ̃, 15màn mɛn bɛ́ toɛ, bɛ̀ min mɛn golee li, bɛa dɛnaa nyin nyabaã yɛ.

16A giala Lawa kanaa narɛ parsiini, yǎa a ná a Nɛgiĩ kɔ, a Nɛgiĩ goon toto, màn mɛn bɛ́ toɛ, bɛ̀ min woo min golee li, ǹ dɛnaa baran bɔ̀n baa wa, sɛnɛ, a nyin nyabaã yɛ. 17Lawa bie a ná a Nɛgiĩ lɛ dia kanaa gɔ́ɔ̃ nɛ, mà a da kiri wɔ kanaa minin ganaa wa, sɛnɛ, a na á dia mà a da ǹ kirisibaa.

18Bɛ̀ min mɛn golee Lawa a Nɛgiĩ li, kiri ba n we bɛa dɛnaa ganaa wa. Bɛ̀ min mɛn golee li wa, kiri nə́ n wɔ bɛa dɛnaa ganaa á nya, a giala a na a golee Lawa a Nɛgiĩ li wa. 19Kiri lɛ a wɔ ǹ mìi á ke: Wɔlɔ fúlu daa kanaa gɔ́ɔ̃ nɛ, sɛnɛ, wɔlɔ tì kɔɔ̃n kɔ minbuiinin ganaa á la wɔlɔ fúlu ni, a giala ǹ zɛnaa ǹ siin ba siĩn-n wa. 20Sonbore ne, min mɛn bɛ́ sii baraa zɛnɛɛ, wɔlɔ fúlu a kɔɔ̃n bɛa dɛnaa ganaa wa, a soe wɔlɔ fúlu li, n na a sii baraan yaa kiɛ̃ boe kanaa wa. 21Sɛnɛ, bɛ̀ min mɛn tá sii sonbore zɛnɛɛ, bɛa dɛnaa n soe wɔlɔ fúlu li, màn mɛn bɛ́ toɛ, minin na a zɛnaa ǹ siin yɛ foaãnɛ.»

Zaã wusoo á boo mɛn da Yezu wɔ gɔn la

22Bɛ kio, Yezu woo Zudee gána-n kun ka a kialandɛnan nɛ, á giã walan kunun ǹ ni lɛawaa dan kɔ́n, á goã *batɛmu diɛ minin ganaa. 23Zaã sɛ na á goã batɛmu diɛ minin ganaa Ayinɔn kiwi, mu bɛ́ gigiã bǎã mɛn nɛ, kunu Salimu kiwi ganaa. Minin man nə́ goã die a li walan, bɛ̀ a batɛmu da ǹ ganaa. 24#Mat 14.3; Mar 6.17; Luk 3.19-20 Sonbore, bɛ á zɛnɛɛ, bɛ̀ ǹ tɔn Zaã da kòso-n bɔrɔ wa.

25Ǹ kɔ́n pinaa, liere yoo giĩ goon laanka Zaã a kialandɛnan bii, *gɔ̀ bɔ minin ganaa ǹ landa wɔ gɔn la. 26Ǹ nə́ kiɛ̃ ǹ nə́ woo dɔ Zaã li ǹ nə́ pɛ nɛ: «Mìinaa, táa n goã kun ka giĩ goon ne Zurdɛ̃ tà kio, n siére baa a wɔ gɔn la? Á ke, a din nə batɛmu diɛ minin ganaa sisia, min tumaa n woe a din li.»

27Zaã tɔ́n pɛ ǹ nɛ: «Min ba boe la a màn kɔ́n yɛ, bɛ̀ Lon a Lawa ná a kɔ la wa. 28#Zaã 1.20 Ka dininmaan kɛn lɛn, ka dinin man masɛ a siéren lɛa, má pɛ ka nɛ máa ma bie Minin Nyin-sili lɛa wa, sɛnɛ, Lawa min mɛn dia a nyɛɛnɛ, masɛ din ni. 29Lɔ tii nə ǹ zuũ wɔ lɛa haalɛ. Ǹ zuũ lɛ a giaára ke a li, bɛ̀ ǹ zuũ lɛ foo á kɔɔ̃nɛ, a giaára lɛ dɔ nə n nyɛnyɛɛ kun ni. Masɛ wɔ n miɛ̃, nyɛnyɛɛ lɛ piɛ̃ tá masɛ lon. 30A doamaa nɛ a golebaa yɛ, masɛ kiɛɛrɛ kɔ.»

Min mɛn bɛ́ á bɔ Lawa li lon á daa

31Min mɛn bɛ́ á bɔ Lawa li lon á daa, bɛ lɛ n min din tumaa mìi la. Min mɛn bɛ́ tán la kànaa, bɛa dɛnaa n kanaa minbuiin lɛa, a n boo diɛ kanaa mànan wɔ gɔn la. Min mɛn bɛ́ á bɔ Lawa li lon á daa, 32a yii bɛ́ á sii mɛn yɛ, a too bɛ́ á boo mɛn mà, a n bɛ lɛ a siére biɛ, sɛnɛ, min kɔ́n ba lɛ koe a boo-a wa. 33Bɛ̀ min mɛn lɛ kɔ a boo ganaa, bɛa dɛnaa n nyɛɛ mà Lawa n sonbore-pɛle lɛa. 34Lawa bɛ́ á min mɛn dia, bɛa dɛnaa lɛ n Lawa a boon pii, a giala, Lawa din na a Yiri koe la ka a parsiini. 35#Mat 11.27; Luk 10.22 Díi Lawa tá a Nɛgiĩ lɛ narɛ, á sii din tumaa toa a gɔn. 36Bɛ̀ min mɛn golee a Nɛgiĩ lɛ li, nyin nyabaã n bɛa dɛnaa lon; bɛ̀ min mɛn na a bɔlɔ si wa, bɛa dɛnaa a die yiikoonaabaa yii wa, sɛnɛ, Lawa foo n goɛ̃ busii-n bɛ li.

Currently Selected:

Zaã 3: SBPE2011

Highlight

Copy