MNS 21
21
Izirayeli minin nə́ boo Kanaan minin la
1 #
MNS 33.40
Aaradi kiwi a kii ke, Kanaan min lɛa, giã-n gána lɛ a gusin a lɛ̀gɔn la, bɛ ná a boo ma, mà Izirayeli minin tá die ka Ataarimu zii kɛ nɛ. Á tɔ́n zia da Izirayeli minin lɛn ganaa, á minin baa bɛ̀rɛn lɛa ǹ bii. 2Bɛ kio, Izirayeli minin lɛn nə́ n lɛ kɔ Dɛnaa Lawa la ǹ nə́ pɛ: «Bɛ̀ ń lɛ kɔ ń tɔrɔ kɛa minin wɔ wɔsɛn gɔn, wɔsɛn manə ǹ kiwin tumaa bɔ̀n biɛ lenlen.» 3Dɛnaa Lawa Izirayeli minin boo lɛ si, á Kanaan minin lɛn wɔ ǹ gɔn. Izirayeli minin lɛn nə́ ǹ dɛ lenlen, ǹ nə́ ǹ kiwin dɔn ziziɛ̃. Ǹ nə́ nɔmaa ǹ nə́ bɛa bǎã lɛ bii Ɔrmaa, bɛ giala mà "bɔ̀n".
Miɛ̃ nyín mɛn nə n zɛnaa ka zan nɛ
4 #
TDP 2.1
Izirayeli minin lɛn nə́ n toa Hɔɔrɔ kele bǎã nɛ, ǹ nə́ Sawɛɛ tà zii kɛ saa, màn mɛn bɛ́ toɛ ǹ Edɔmu gána lɛ lɛ bɔ ǹ da. Sɛnɛ zaman lɛ gù gã zii la. 5#Kor1 10.9 Ǹ ná a giala kɔ, ǹ nə́ boo diɛ Lawa laanka Muizu ganaa kɛnɛn: «Wàa na á baa ka wɔsɛn waa ká soo wɔ nɛ Ezipti gána nɛ, ka n die wɔ dii diə gole kɛ nɛ? A giala, buuru ba bǎã kɛ lɛ-n wa, mu dɔ ba a-n wa. Bɛa màn-bii naarɛ kɛ wɔsɛn gɔ̀nɔn bɔ.»
6Dɛnaa Lawa tɔ́n miɛ̃ babaraan kaa zaman lɛ ganaa. Bɛa miɛ̃ babaraan lɛn nə́ zaman lɛ a min gigiã kũ, ǹ nə́ gã. 7Zaman lɛ tɔ́n daa dɔ Muizu li, ǹ nə́ pɛ nɛ: «Wɔsɛn nə́ sii baraa zɛnaa, a giala, wɔ boo da n laanka Dɛnaa Lawa ganaa. Dɛnaa Lawa nyankɔ, a miɛ̃n lɛn wɔlɔ lui wɔ ganaa.»
Muizu Lawa nyankɔ zaman lɛ a lɛa. 8Dɛnaa Lawa tɔ́n pɛ nɛ: «Miɛ̃ babaraa nyín zɛnaa n pɛnɛ bàlà sasa ganaa lon. Bɛ̀ miɛ̃ min woo min kũ, yǎa ǹ dɛnaa nə n yii saa a ga bɛa miɛ̃ nyín lɛ ganaa, ǹ dɛnaa á die liɛ.»
9 #
Kiin2 18.4; Zaã 3.14 Muizu tɔ́n miɛ̃ nyín zɛnaa ka zan nɛ, á pɛnɛ bàlà sasa ganaa lon. Miɛ̃ goã min mɛn tumaa kuĩ, bɛ̀ ǹ mɛn nə́ n yii saa á ga miɛ̃ nyín lɛ ganaa, ǹ dɛnaa n liɛ.
Izirayeli minin nə́ woo Pisiga kele la
10Izirayeli minin lɛn nə́ yoo, ǹ nə́ woo golee Obɔti. 11Bɛ kio, ǹ nə́ yoo Obɔti, ǹ nə́ woo golee Ye-Abarimu, diə gole kɛ nɛ Moabu gána yɔrɔ-a, dia-n woe lɛ̀giala li. 12Ǹ bɛ́ ǹ nə́ yoo walan, ǹ nə́ woo golee Zerɛdi tà lɛ-a. 13Ǹ bɛ́ ǹ nə́ yoo walan dɔ nɛ, ǹ nə́ woo golee Arnɔn tà kio. Bɛa tà lɛ nə n toɛ Amɔɔrɔ tɔrɔn tán la, a mu baa si a da bɔ diə gole kɛ nɛ, a tɔn nə n baa Moabu tɔrɔn laanka Amɔɔrɔ tɔrɔn tán gèlè lɛa. 14Bɛ lɛ nɛ, ǹ nə́ pɛ Dɛnaa Lawa a zia boon sɛ́wɔ kɛ nɛ:
«Wayɛbu tà ke Sufaa,
bɛ laanka a tà gòãn nɛ,
15Arnɔn laanka a tà gòãn nɛ,
ka tà basan mɛnɛn nə́ ke dia-n woe Aara ganaa,
ǹ mu nə́ n diɛ Moabu gána gèlè para li.»
16Bɛ kio, Izirayeli minin lɛn nə́ yoo ǹ nə́ woo bǎã kɛ nɛ, ǹ nə́ bíi "Tù". Walan lɛ nɛ, Dɛnaa Lawa pɛ Muizu ni mà a zaman lɛ sɔkɔn, màn mɛn bɛ́ toɛ asɛ mu kɔ ǹ la. 17Izirayeli minin lɛn nə́ tɔ́n loe kɛ lɔ:
«Mu bɔ, tù! Ka a para pɛ!
18Tù mɛn lɛ á ke,
nyɛɛnaandɛnan nə́ fɔ̃,
zaman lɛ a min yii guguru-an nə́ fɔ̃,
ka ǹ pàã zɛnaa ǹ bàlàn nɛ,
ka ǹ bàlàn nɛ.»
Bɛ kio, Izirayeli minin lɛn nə́ n toa diə gole lɛ nɛ, ǹ nə́ woo Matanaa. 19Ǹ nə́ n toa Matanaa, ǹ nə́ woo Nahalieli, ǹ nə́ yoo Nahalieli ǹ nə́ woo Bamɔti. 20Ǹ nə́ tɔ́n nə n toa Bamɔti, ǹ nə́ woo nyankɔrɔ lɛ kɛ nɛ kiɛ̃ Moabu gána nɛ, dia-n woe kele kɛ ganaa, ǹ nə́ bíi Pisigaa. Bɛa kele lɛ baã n zuməə-n diə gole kɛ la.
Izirayeli minin nə́ boo Sihɔn laanka Ɔgu la
21Izirayeli minin nə́ minin dia woe pii Amɔɔrɔ tɔrɔn kii Sihɔn nɛ:
22Toa wɔ bɔ n gána nɛ wɔ kiɛ̃. Wɔ ba re kanɛɛ wɔ bɔ wuru gɔ́ɔ̃-n wa, wɔ ba re boe *rezɛ̃ da wuru gɔ́ɔ̃-n wa, wɔ ba re tù mu dɔ mii wa. Wɔsɛn man die koe gána lɛ a zii gole kɛ lɛ miɛ̃, yǎa wɔ soe wɔ n boe n tán la.
23Sɛnɛ, Sihɔn toa Izirayeli minin lɛn nə́ kiɛ̃ a tán la wa. Á ná a zaman tumaa sɔkɔn, á woo ǹ gialaa diə gole gɔ́ɔ̃ nɛ, á dɔ Zaasaa, á zia da ǹ ganaa. 24Izirayeli minin lɛn nə́ boo la. Ǹ nə́ saa Arnɔn tà ganaa gusin a lɛ̀gɔn la, ǹ ná a gána lɛ kũ, yǎa Yabɔki gɔsɛ a lɛ̀gɔn la, ǹ nə́ kũ miɛ̃ yǎa Amɔn tɔrɔn tán gèlè la lɛ̀giala gɔn la. Bɛa gèlè kɛ lɛ n Kungɔn lɛa. 25Izirayeli minin lɛn nə́ Amɔɔrɔ tɔrɔn kiwin tumaa si, ǹ nə́ giã ǹ nɛ. Ǹ nə́ giã Ɛsibɔn kiwi dɔ nɛ, ka a kiwi bisinin tumaa nɛ. 26A giala, Ɛsibɔn lɛ na á goã Amɔɔrɔn kii Sihɔn lɛ a kiwi gole lɛa. Sihɔn lɛ na á goã á zia da Moabu gána a kii bibinaa kɛ ganaa, á ná a gána tumaa si la, yǎa Arnɔn tà li. 27Bɛ lɛ n ke loe-lɔlin tá pii mà:
Ka da Ɛsibɔn!
Ka wusoo ka Sihɔn a kiwi
lɛ da a giala la!
28 #
Zer 48.45-46
Tɛ soo Ɛsibɔn kiwi,
Tɛ buə̃ soo Sihɔn a kiwi,
á n daa Aara kiwi la,
Moabu gána nɛ,
á n daa dì nyìnin kɛn la,
ka Arnɔn a wúlu bɔ ǹ bǎãn nyɛɛnandɛnaan nɛ.
29Moabu gána,
koe bɔ n ganaa!
Dì Kemɔɔsi guguru-kɔlen,
kaa wɔ nya!
Ǹ nə́ baa da kaa nɛgiĩn gòã li.
Ǹ nə́ kaa nɛlɔn baa kii Sihɔn,
Amɔɔrɔ tɔrɔ kɛa bɛ̀rɛn lɛa.
30Wɔ́ kiɛ dɔrɔ ǹ ganaa.
A kũ Ɛsibɔn ganaa yǎa Dibɔn,
màn tumaa bɔ̀n baa.
Wɔ́ bɔ̀n da miɛ̃ yǎa Nofaa,
ka Madabaa nɛ.
31Izirayeli minin lɛn man nə́ giã Amɔɔrɔ tɔrɔn gána nɛ, ka bɛa yɔrɔ lɛ nɛ. 32Muizu minin dia woe giɛ Zazɛɛrɛ kiwi ganaa ka durii ni. Bɛ kio, Izirayeli minin lɛn nə́ Zazɛɛrɛ kiwi lɛ a kiwi bisinin si ǹ nə́ nɔmɔ ǹ ganaa. Amɔɔrɔ tɔrɔ mɛnɛn nə goã giã-n bɛa kiwin kɛn lɛn nɛ, Muizu bɛn loo. 33Izirayeli minin lɛn nə́ wusoo, ǹ nə́ n yɔrɔ dia paǹ kɔsɔ li, ǹ nə́ Basan zii kɛ saa ǹ nə́ woo. Basan gána a kii Ɔgu laanka a minin tumaa tɔ́n soo, ǹ nə́ woo wɔ ǹ lɛ, màn mɛn bɛ́ toɛ ǹ zia da ǹ ganaa Edreyii kiwi. 34Dɛnaa Lawa pɛ Muizu ni: «N baran nyɛ́ɛ baa-n wa. Masɛ á die we n gɔn, kɔnlɛ ka a zaman tumaa laanka a gána nɛ. Amɔɔrɔ tɔrɔn kii Sihɔn kɛ lɛ á goã pàã la Ɛsibɔn kiwi, a goã á sii mɛn zɛnaa bɛ nɛ, bɛ lɛ miã zɛnaa Ɔgu dɔ nɛ.»
35Izirayeli minin lɛn nə́ boo Ɔgu la, kɔnlɛ ka a nɛgiĩn laanka a zaman tumaa nɛ, min goon din yii goã koo wa. Ǹ nə́ gána lɛ si ǹ nə́ nɔmɔ a ganaa.
Currently Selected:
MNS 21: SBPE2011
Highlight
Share
Compare
Copy
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.