SNS 12
12
Lɔ laanka tɔɔ babaraa piɛ̃ wole
1Kaãbaa ǹ sii gole nə́ n din nyaa lon: lɔ nɛ, á wasa wɔ a din ganaa dɔnkɛ lɛa, mui ná a gòãn giulun, leere fulupaa n pɛnɛɛ nɛ a mìi ganaa kii bafolo lɛa. 2A na á goã nɔ̀ nɛ, a nə n lɛ dii a nɔɔ̀rɔ kɔ ǹ là-paparɛ gunun.
3 #
Dan 7.7
Kaãbaa ǹ sii gole kɔsɔ dɔ nə́ n din nyaa lon doo: Tɔɔ babaraa piɛ̃ wole tã ganganbiɛ goon ne. A mìi n sɔbaa, a bɛn nə fù. Kiibaa ǹ bafolo n we-n a mìi sɔbaa lɛ gogoonmaa ganaa. 4#Dan 8.10 Á leere talakɔn sɔɔbaa ǹ wɔ nɔɔ ka a mui ni, á kaa tán. Á daa golee lɔ nɛ-yɛle lɛ yɔrɔ-a, bɛ̀ a ná a nɛ lɛ yɛ lɔn gɔrɔ, a kũ a sɔ̃. 5#Loe 2.9; Iza 66.7 Lɔ lɛ ná a nɛ lɛ yɛ, nɛgiĩ lɛa, bɛa nɛgiĩ kɛ lɛ n die tɔrɔ din tumaa lɛduĩ ka fɔlɔ bàlà ná a gɔn. Ǹ nə́ nɛ lɛ saa ǹ nə́ woo koa Lawa li a kii dankan nɛ. 6Lɔ lɛ baa si á woo don gɔ́ɔ̃ nɛ, Lawa din na á bɛa bǎã lɛ yɔrɔ bɔ á koa nɛ, mà ǹ die ǹ too walan, yǎa lɛawaa duu goon biɛpaa ka pɔsɔrɔ (1 260).
7 #
Dan 10.13,21; 12.1; Zud 9 Bɛ na á n baa lon mànan kɔn-dɛ á yoo lɛa. Lon a dia dí-a wolen goledɛnaa Miseli, bɛ laanka lon a dia dí-a wole gialakunun kɛn nə́ zia baa tɔɔ babaraa piɛ̃ wole lɛ ganaa. Tɔɔ babaraa piɛ̃ wole lɛ dɔ laanka a dia dí-a wolen nə́ zia baa ǹ ganaa, 8sɛnɛ, ǹ boo ǹ la wa. Ǹ giã ǹ bǎã dɔ yɛ lon doo wa. 9#SGK 3.1; Luk 10.18 Ǹ nə́ tɔɔ babaraa piɛ̃ wole gangabiɛ lɛ kũ ǹ nə́ zũ kanaa. A din ni lɛlɛ a miɛ̃ kɛ lɛ lɛa, ǹ nə́ bíi: «Nɔ̀ɔn Babaraa,» hinlaa *Sɛtaan, a n kanaa min tumaa yiri siɛ̃. Ǹ nə́ zũ tán la kun ka a dia dí-a wolen tumaa nɛ.
10 #
Zɔb 1.9-11; Zak 3.1 Má lɛn gole goon ma, boe lon, a n pii:
«Sisia wɔa Lawa na á gɔ̀lɔ̀baa yɛ!
A ná a din pàã nyaa,
a ná a kiibaa saa.
Sisia, a bɛ́ á min mɛn bɔ á baa kii lɛa,
pàã n bɛ gɔn!
A giala wɔ dɔɔ̃nɔn biɛ-kɔle na á fɔ̃,
asɛ mɛn bɛ́ á goã ǹ biɛ koe tèlò-n ka baayɛlɛ nɛ,
wɔa Lawa yɔrɔ-a,
ǹ nə́ bɔ lon ǹ nə́ zũ tán.
11Wɔ dɔɔ̃nɔn nə́ gɔ̀lɔ̀baa yɛ
ka Sère Nɛ mà kɛ pàã nɛ,
ka ǹ siérebaa ǹ boo pàã nɛ.
Haalɛ ta maǹ giɛ̃ bɛa lɛa,
ǹ tá lɛ koe bɛ ganaa á la ǹ yiikoonaabaa nɛ.
12Bɛ lɛ a lɛa, kasɛn mɛnɛn bɛ́ lon,
kaa bǎã ná a nɛ, ka n nyɛnyaa!
Sɛnɛ, tán nɛ ka yìsi mu gole ne,
bɔ̀n kasɛn yɛ!
A giala Sɛtaan gisĩ ka li.
A n doɛ̃ mà biikoo bǐɛ̃ ba a gɔn doo wa,
a foo n yoo-n parsiini.»
13Tɔɔ babaraa piɛ̃ wole lɛ bɛ́ á dɔ̃ mà maǹ ná asɛ zũ tán, a na á kiɛ̃ gɔrɔ, a n lɔ nɛgiĩ-yɛle kɛ kialan lui. 14#Dan 7.25; 12.7 Sɛnɛ, ǹ nə́ giogialatã-a gole kɛ nyàan kɔ lɔ lɛ la, mà a yoo a wo a giã ǹ bǎã lɛ-n don gɔ́ɔ̃ nɛ, maǹ die toe walan, yǎa lɛ̀ sɔɔ ka talɛɛ, a wɔlɔ á re sɔsɔɔ koe miɛ̃ kɛ ganaa. 15Bɛ lɛ ganaa, miɛ̃ lɛ pisəə ka mu ni, bɛ n baa sii tán ka tà mu bɛ́ lɔn, mà a boo la a lɔ lɛ saa a kiɛ̃ nɛ. 16Sɛnɛ, tán daa lɔ lɛ a gu ganaa, á n lɛ bũ á tɔɔ babaraa piɛ̃ wole kɛ a tà mu kɛ piɛ̃ ka daɛn nɛ. 17Bɛ lɛ ganaa, tɔɔ babaraa piɛ̃ wole lɛ foo yoo lɔ lɛ li parsiini, á kiɛ̃ á woo a nɛnyaan gialakunun gialaa, ǹsɛn mɛnɛn bɛ́ Lawa a dí-pɛn lɛ sii, ǹ nə́ n foo doɛ Yezu a boo ganaa.
18Tɔɔ babaraa piɛ̃ wole lɛ tɔ́n giã mu gole lɛkoro lɛ-a.
Currently Selected:
SNS 12: SBPE2011
Highlight
Copy
Compare
Share
Want to have your highlights saved across all your devices? Sign up or sign in
San Bible Protestant Edition © Bible Society of Burkina Faso, 2011.
