Ruth 1
1
Nakata
Elimelekun Moabmun aullaktun
1Kangagaaluk Israelmiuni uktuktit atannektuktillugit nunangat nekaekpiangman, inuk Bethlehemiutak Judea ilagiyauplunilu nuliyaminun engniminunlu Moabmiun nunanganungaktun naiyukuplugit talvani. 2Tamna inuk atikaktuk Elimelegmik aipangalu taiyauyuk Naomimik engningiglu Maglonmik Kilionmiglu. Tapkua Judeami Bethlehemiuni ilauvaktugaluit Efrethamiunun. Tamarmik Moabmiun nunangaanun tikitugit naiyuinakpaktun. 3Elimelegli Naomium uinga tukuman, angnak avaliektuk engningik kihimi. 4Talva nukagik tamarmik nulianiktuk Moabmiunik atikaktunik Orpamik Ruthmiglu. Taikani ukivakaakhutiglunin kulinik. 5Maglon Kilionlu tukuinangmaniktauk, angnak tamna ilaekpaktuk engniminnik uiminiglu.
Naomi Ruthlu Bethlehemungauyuk
6-7Naomi Moabmiuniupluni tuhaagami Atangum inungni ikayukpangmagik nekihainik Moabmiun nunaanin kimagahualekpaktaa. Talva tamna aullagahualegami ukuangik mallaugumayuk tamarmik aullakhutik Judeam nunaanun. 8Taffumani Naomi ukuaminun ukaktugaluak, “Takki uteyyavutik tamaptik ilaptingnun Atangum ikayungniagaatik iliptik nakuutpiagaptik uvamnun ilaptingnuntauk inutillugit. 9-10Ataneglu pipkaili tamaptik uinikikuplutik munagiyaulutiglu.”
Talva Naomium ukuani kimagahualegmatik kunikhugik, tamarmik kialektuk ukakhutik, “Immanak, aullakatauluk ilingnun nuakatingnun.”
11Naomi kiuyugaluak utiuyyavutik ilaa, “Hug mallauyumainalekpitik uvamnun? Engninignianahugilekpitinga uikhaptingnik? 12-13Aigiagittik akuakpallaagama uinigiamnik aiyungnaktuk. Unukpanlunin uinikumali uvanga engninikuplunga utakihimaniakpitik uinikuplutik takkuninga uiniktaililutiglu allanik? Immanak aiyungnakpiaktuk. Atanek ikayugunaegunakhingman naglingnaktutiglu.” 14Kialengmiyuk talva Orpaumlu hakini kunikhugu angilgaktuk, Ruthimli kimagumangitagaluanga. 15Naomiumlu Ruth ukallautimiyaa, “Takki, nukaungun nunakatiminun godiminunlu utiulengman aigiagin, malingnaglugu tamna.”
16Ruthli kiuyugaluak ukakhuni, “Kimaktailiyyavangma ilingnihimakuplunga. Namungauguvinlunin mallauniaktunga. Nanilikiak naiyuguvin, taikani naiyungniaktungalu uvanga. Nunakatillu ilvin, uvanga nunakatigihunguyatkalu tapkua, Godinlutauk Godiginiaktagalu talva. 17Nanilunin tukuguvin tukuniaktunga taikanilu iluvektauhunguyungatauk. Antangum kapiahuktiyyavanga avipkaiguma ilingnin umatillunuk.”
18Naomi ilihimagami Ruthium kimagunaimani ukaguektuk.
19Aullakatigiktuk Bethlehemun tikitutik. Tikinmanik Bethlehemiun tamarmik kuglukpiaktun angnait ukakhutik, “Naomiuva una?”
20Kiuyulli, “Taitailiyyavaffinga Naomimik (imaatun – kuvianaktumik) Maramik (kuvianaitumik) kihimi, Godim Aiyukhaitum aiyukaktitpangmanga. 21Kangayyuak aullakpagama hamanga ilagivaktatka uiga engnikkalu tayyali Atangum utektitaanga ilaektillunga ihagiahukpiagaluakhungalu. Hug taiviffinga Naomimik ihuigiyautillunga aiyukaktitauplungalu Atanengmun Aiyukhaitumun?”
22Talva taimaitumik Naomi Moabmiun nunanganin utekpaktuk ilagiplugu ukuani Moabmiutak Bethlehemun, tikimanik inuit katitiginahualektun mukpauyakhainik nauthimayunik.
Currently Selected:
Ruth 1: AQ
Highlight
Share
Copy
Want to have your highlights saved across all your devices? Sign up or sign in
