प्रेरित 2
2
पवित्र आत्मा अइलक
1पेन्तिकोस कना टिहार आइल। विश्वासीहुँक्र सबजन एक्क ठाउँम जम्मा होरलह।#लेवी २३:१५-२१; व्य १६:९-११ 2तब स्वर्गसे एकचोट्टे आँधीबौखाअस आवाज आइल ओ हुँक्र रहल सलघरम आवाज सुनमिलल्। 3तब आगीक लहरअस देखपर्ना कयौठो चिज देखपरल ओ भाग-भाग होक ओठे रहल सबजन्हकम पर्लन। 4हुँक्र सबजन पवित्र आत्मले भरगैल ओ पवित्र आत्मले बोल्ना शक्ति पाक हुँक्र अप्न नैजानल भाषा ब्वाल लग्ल।#२:४ नैजानल भाषा कलक नैसिखल भाषा हो।
5उ समयम संसारक विभिन्न देशमसे परमेश्वरक डर मन्ना यहूदीहुँक्र यरूशलेमम आरलह। 6जब मनै असिन हल्लाखल्ला सुन्ल, तब हुँक्र विश्वासीन्हकठे भीड लाग्गैल। हुँक्र छक्क पर्ल, काकरकि हुँकन सबजहन आपन-आपन भाषम ब्वालट् सुन्ल। 7हुँक्र एकदम छक्क पर्ल ओ कल, “यी बोलुइयन सब गालील क्षेत्रक मनै नैहुइट का? 8हम्र विभिन्न देशक मनै हमार आपन-आपन भाषा हुँकन ब्वालट् सुनटी। हुँक्र हमार फरक-फरक भाषा कसिक ब्वाल जन्ल? 9हम्र पार्थीक, मादीक, एलामीक, मेसोपोटामियक, यहूदियक, कापाडोकियक, पोन्टसक ओ एशियक बासिन्दाहुँक्र हुइटी। 10हम्र फ्रिगिया, पामफिलिया, मिश्रदेश ओ कुरेनी सहरक लग्घ रहल लिबियक विभिन्न क्षेत्रसे आरली, ओ रोम सहरसे आइल यहूदीहुँक्र ओ यहूदी विश्वास स्वीकार करल गैरयहूदीहुँक्र फे बाटी। 11क्रेट टापु, अरब देशसे आइल मनै बाटी। हम्र हुँकन परमेश्वरक अचम्म कामक बारेम हमार आपन-आपन भाषम ब्वालट् सुनटी।” 12असिक अचम्म ओ अलमलम पर्क हुँक्र अप्न-अप्न पुछीकपुछा कर भिर्ल, “याकर अर्थ का हो?”
13तर और जन हुँकन हँस्टी कल, “हिँक्र धेर मत्वार होरल।”
पत्रुसक प्रचार
14तब पत्रुस एघार चेलन्हकसँग ठह्रेइल ओ सबजन सुन्नागरी बोल्ल, “यहूदिया क्षेत्रक मनै ओ यरूशलेमम बैठुइयन सबजन, म्वार बात ध्यान देक सुनी, मै अप्नहुँकन यी बातक जानकारी कराइटुँ। 15अप्नहुँकन्हक स्वाँचलअस हिँक्र मत्वार नैहुइट। भक्खर त बिहानिक नौ बजरहल। 16तर योएल अगमवक्तक कहल बात यिह हो:
17परमेश्वर कठ,
‘आखिरी दिनम मै सब मनैन्हकम रहक लाग
आपन आत्मा पठादेहम।
टुन्हक छाई-छावन अगमवाणी बोलहीँ,
टुन्हक जवान मनै दर्शन देखहीँ,
ओ टुन्हक उमेर ढल्कल मनैजुन सपना देखहीँ।#योए २:२८-३२
18उ दिनम मै आपन सेवक-सेविकन्हकम रहक लाग
आपन आत्मा पठादेहम,
ओ हुँक्र अगमवाणी बोलहीँ।
19आकाशम मै अचम्म-अचम्मक चिन्ह देखैम
ओ पृथ्वीम अचम्म-अचम्मक काम करम।
रगत, आगी ओ धूवाँधुक्कुन देखपरी।
20परमप्रभुक महान ओ गौरवमय दिन अइनासे आघ
दिनऽक साराओर अन्धार होजाई,
ओ जोन्ह्या रगतअस लाल होजाई।
21परमप्रभुसे बिन्ती करुइया सबजन उद्धार पैहीँ।’
22“इस्राएल देशक मनै म्वार बात सुनी! परमेश्वर नासरत सहरक येशूद्वारा अप्नहुँकन्हक सामुन्नेम शक्तिशाली ओ अचम्मक काम, ओ चिन्ह देखाक अप्न उहाँह पठैलह कना बातक प्रमाण देल। यी बात अप्नहुँकन थाहँ बा। 23परमेश्वर आपन ज्ञान ओ योजना अनुसार येशूह अप्नहुँकन्हक हाँठम सुम्पलह ओ अप्नहुँक्र दुष्ट मनैन्हक सहायताले उहाँह क्रूसम कील्ला ठोक्क मुवैली।#मत्ती २७:३५; मर्क १५:२४; लूक २३:३३; यूह १९:१८ 24तर परमेश्वर येशूह मुवलमसे जियारख्ल। मृत्युक शक्तिसे परमेश्वर उहाँह छुट्कारा देरख्ल। काकरकि मृत्यु उहाँह मुलक्मुल रहल कराइ नैस्याकल्।#मत्ती २८:५-६; मर्क १६:६; लूक २४:५ 25राजा दाऊद फे उहाँक बारेम असिक कैरख्ल:
‘मै प्रभुह सड्डभर आपन सामुन्नेम देख्टीबाटुँ।
उहाँ म्वार दाहिन पाञ्जर पलरलकओर्से मै नैडरैबुँ।#भज १६:८-११
26उहओर्से मै मनम आनन्दित बाटुँ,
ओ खुशीले अप्नक स्तुतिप्रशंसा कर्ठुं।
मै आशम जिएम।
27काकरकि अप्न महीह मुलक्मुल रह नैदेनेहुइटी।
अप्न आपन पवित्र जनक शरीरह कुह फे नैदेनेहुइटी।
28अप्न महीह जीवनक डगर देखारख्ली,
अप्नकसँग रहबेर मै खुशीले रमैठुँ।’
29“हेरो भैयौ, हमार पुर्खा दाऊदक बारेम मै पक्कासे कहसेक्ठुँ। उहाँ मुल त मनै गर्यम ढर्लन ओ उ गर्या आम्हीसम फे पलबा। 30दाऊदक आपनऽ सन्तानमसे एकजहन ख्रीष्ट बनाक हुँकाहारअस शासन कर्ना अधिकार देना बात परमेश्वर प्रतिज्ञा कैरख्लह। दाऊद एक अगमवक्ता रलह, ओ हुँकहीन यी बात थाहाँ रलहन।#भज १३२:११; २ शमू ७:१२-१३ 31दाऊद भविष्यम हुइना घटना पैल्हहेँ थाहाँ पारख्लह ओ ख्रीष्ट मुवलमसे फेदोस्र जिना बारेम बोल्टीरलह। ऊ कल, ‘उहाँ मुलक्मुल नैरल ओ उहाँक शरीर फे नैकुह्लन।’ 32यिह येशूह परमेश्वर मुवलमसे फेदोस्र जियारख्लन। हम्र सबजन यी बातक साक्षी बाटी। 33परमेश्वर बाबा येशूह उच्च मान सहित आपन दाहिन पाञ्जर बैठैलन ओ आपन प्रतिज्ञा अनुसार उहाँह पवित्र आत्मा देलन। प्रभु येशू उह पवित्र आत्मह आब हमारम रहक लाग पठादेरख्ल, जौन बात अप्नहुँक्र देख्टीबाटी ओ सुन्टीबाटी। 34काजेकलसे येशूकअस दाऊद शरीरम स्वर्ग नैगैल तर फे ऊ असिक कल,
‘परमप्रभु म्वार प्रभुह कल,
“म्वार दाहिन पाञ्जर बैठो,#भज ११०:१
35जबसम मै टुँहार शत्रुन हराक
टुँहार पौलीक पाउदान नैबनैम।”’
36उहओर्से इस्राएलक सब मनै यी बात पक्कासे जान परी, अप्नहुँक्र क्रूसम टङ्गाक मुवैलक येशूह परमेश्वर प्रभु ओ ख्रीष्ट बनारख्ल।”
37पत्रुसक बात सुन्क मनै धेर दुःखीत हुइल, ओ हुँक्र पत्रुस ओ और प्रेरितहुँकन कल, “हेरो भैयौ, ओसिन हो कलसे आब हम्र का करी?”
38तब पत्रुस कल, “अप्नहुँक्र सबजन आपन-आपन पापी मन परिवर्तन कैक परमेश्वरकठे घुमी, त उहाँ अप्नहुँकन क्षमा करहीँ, ओ परमेश्वरकठे अइलक प्रमाणक रूपम येशू ख्रीष्टक नाउँम बप्तिस्मा ली। तब अप्नहुँक्र पवित्र आत्मक वरदान पैबी। 39यी प्रतिज्ञा अप्नहुँकन्हक लाग, अप्नहुँकन्हक सन्तानन्हक लाग ओ गैरयहूदीन्हक लाग फे हो, जेहीजेही परमप्रभु परमेश्वर बलैठ।”
40पत्रुस हुँकन अस्तह-अस्तह धेर बात सिखैल ओ अर्ती देटी कल, “येशूह इन्कार कर्टिरना यी मनैन्हकम अइना दण्डसे टुह्र आपन जीवन बचाओ।” 41पत्रुसक देहल सन्देशम धेर जन विश्वास कर्ल ओ बप्तिस्मा लेल। उ दिन करीब तीन हजार विश्वासीहुँक्र मण्डलीम थपगैल।
विश्वासीन्हक सङ्गति
42हुँक्र प्रेरितहुँकन्हक सिखाइल बात मानँट्, ओ सङ्गति कर्ना, सँगसँग खानपिन कर्ना (प्रभुभ्वाज समेत) ओ प्रार्थना कर्ना कामम लग्लरहँट्। 43प्रेरितहुँक्र अचम्म-अचम्मक काम कर्ल ओ चिन्ह देखैल। ओ सबजन परमेश्वरक धेर आदर कर्ल। 44प्रभुकम विश्वास करुइयन सबजन जम्मा हुइटीरहँट् ओ हुँकन्हक सब चिज साझ्या रलहन।#प्रे ४:३२-३५ 45हुँक्र आपन-आपन जग्गाजमिन ओ चिजबिज बेँच्क आइल पैँसा मनैन्हक आवश्यकता अनुसार बाँट्देहँट्। 46हुँक्र हरेक दिन मन्दिरम जम्मा होक आराधना करँट्, ओ प्रभुभ्वाज मनाइबेर घर-घरम खुशी ओ नम्र होक सँगसँग खाना खाइँट्। 47हुँक्र परमेश्वरक प्रशंसा करँट् ओ और सबजन हुँकन् मन पराइँट्। प्रभु उद्धार पाइल मनैन् हरेक दिन हुँकन्हक बगालिम थपदेटीरहँट्।
Currently Selected:
प्रेरित 2: thl
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
