यूहन्ना 1
1
वचन मनैया हुइल
1सृष्टि हुइनासे आघहेँ वचन रलह। वचन परमेश्वरकसँग रलह ओ वचन परमेश्वर जो रलह। 2सृष्टि हुइनासे आघहेँ वचन परमेश्वरकसँग रलह।
3यिह वचनद्वारा परमेश्वर सब चिजिक सृष्टि कर्लह। उहाँद्वारा बाहेक कुछु चिजिक सृष्टि नैहुइल्। 4वचन सृष्टि हुइल् चिजह जीवन देहुइया रलह। यी जीवन देहुइया मनैन्हक लाग ज्योति रलह। 5यी ज्योति अन्धकारम चम्कठ। अन्धकार ज्योतिह बुटाइ नैसेक्लहो।
6परमेश्वरक पठाइल एकठो मनैया अइल, हुँकहार नाउँ यूहन्ना रलहन।#मत्ती ३:१; मर्क १:४; लूक ३:१-२ 7ऊ उह ज्योतिक बारेम साक्षी देहक लाग अइलह। सब मनै ज्योतिह चिह्न्क विश्वास करहीँ कना उद्देश्यले ऊ अइलह। 8यूहन्ना अपन्हे उ ज्योति नैरलह, तर ज्योतिक बारेम साक्षी देहक लाग अइलह। 9हरेक मनैन ज्ञान देना सत्य ज्योति संसारम आइटलह।
10उहाँ संसारम रलह, संसार उहाँद्वारा जो बन्लहा, तर फे संसार उहाँह नैचिन्हल। 11उहाँ आपनऽ मनैन्हकठे अइल, तर उहाँक आपनऽ मनै उहाँह इन्कार कैदेल। 12तर उहाँह स्वीकार कर्ना ओ विश्वास कर्ना सबजहन उहाँ परमेश्वरक सन्तान हुइना अधिकार देल। 13हुँक्र मनैन्हक वंशसे, शारीरिक इच्छले, या कौनो पुरुषक कल्पनाद्वारा जन्म पाक परमेश्वरक सन्तान हुइल् नैहुइट। हुँक्र त परमेश्वरसे जन्मल् रठ।
14उ वचन मनैया हुइल ओ हमार बीचम रल। उहाँ अनुग्रह ओ सत्यले भरिपूर्ण रलह। हम्र उहाँक महिमा देख्ली। उ त परमेश्वर बाबकठेसे आइल एक्कठो छावक महिमा रलहन।
15यूहन्ना उहाँक बारेम गवाही देल। ऊ उच्च स्वरले कल, “म्वार पाछ अउइया महीसे धेर महान् बाट, काकरकि उहाँ मै जन्मनासे आघहेँ रलह। म्वार कहल यी बात उहाँकऽ बारेम हो।” 16उहाँक अनुग्रहक भरिपूर्णतामसे हम्र सबजन एक पाछ और आशिष पारख्ली। 17काकरकि व्यवस्था मोशाद्वारा देगैल्, तर अनुग्रह ओ सत्यता येशू ख्रीष्टद्वारा आइल। 18परमेश्वरह कुई फे कबु नैदेख्लहो। परमेश्वर बाबकसँग रना एक्कठो छावा उहाँह प्रकट कैदेरख्ल।
बप्तिस्मा देहुइया यूहन्नक गवाही
मत्ती १:३-१२; मर्कूस १:१-८; लूका ३:१-१८
19जब यरूशलेमसे यहूदीहुँक्र पूजारीहुँकन ओ लेवीहुँकन#१:१९ लेवीहुँक्र पूजारीन्हक कामम सहायता पुगैना मनै रलह। हुँक्र लेवी-कुलक मनै रलह। (गन्ती ३:१७-३७) यूहन्नकठे “टुँ के हुइटो?” कैक पुछ पठैल, तब ऊ का कल कलसे, 20“मै ख्रीष्ट नैहुइटुँ” कैक स्वीकार कर्ल। ऊ स्पष्ट रूपले यी बात कैदेल।
21हुँक्र हुँकहीन पुछ्ल, “का टुँ एलिया हुइटो तो?”
ऊ कल, “नाहीँ, मै नैहुइटुँ।”
हुँक्र कल, “का टुँ संसारम हमार आशा करल अइना अगमवक्ता हुइटो तो?”
ऊ जवाफ देल, “नाहीँ।”#व्य १८:१५,१८; मला ४:५
22हुँक्र कल, “टुँ के हुइटो? हमन जनादेओ, तब हम्र जाक हमन पठुइयन जवाफ देह सेक्बी। टुँ अपन्हेह के हुइटुँ कठो तो?”
23ऊ कल “यशैया अगमवक्तक कहलअस, उजार ठाउँम चिल्ला-चिल्लाक बोलुइयक मै आवाज हुइटुँ, ‘प्रभुक डगर स्वाझ बनाओ।’”#यशै ४०:३
24उ बात पुछ आइल मनैन फरिसीहुँक्र पठारख्लह। 25हुँक्र हुँकहीन पुछ्ल, “ओसिन हो कलसे, टुँ ख्रीष्ट फे नैहुइटो, एलिया फे नैहुइटो, ओ हमार आशा करल अगमवक्ता फे नैहुइटो कलसे, काजे बप्तिस्मा देठो?”
26यूहन्ना हुँकन जवाफ देल, “मै त पानीक बप्तिस्मा देठुँ, तर टुन्हक माझम एक जन बाट, जेहीह टुह्र नैचिह्न्टो। 27म्वार पाछ अउइया उहाँ जो हुइट। मै त उहाँक जुत्तक टेनी छोर्ना योग्यक फे नैहुइटुँ।”
28यी सब बात यर्दन लद्यक उपार बेथानियम हुइलहा। उ ब्याला यूहन्ना यिह ठाउँम बप्तिस्मा देहटलह।
परमेश्वरक पठ्रू
29द्वासर दिन येशूह आपनओर आइट देख्क यूहन्ना कल, “हेरो, सारा संसारह पापमसे छुट्कारा देहक लाग बलि हुइना परमेश्वरक पठ्रू! 30मै उहाँकऽ बारेम कनहुँ, ‘म्वार पाछ एक जन अइटीबाट, उहाँ महीसे महान् बाट, काकरकि उहाँ मै जन्मनासे आघहेँ रलह।’ 31पैल्ह मै उहाँह चिन्ह्ल नैरनहुँ, तर इस्राएलीन्हक बीचम उहाँह चिन्हाइ सेकम कैक मै बप्तिस्मा देटी आइटुँ।”
32यूहन्ना आम्ही का कल कलसे, “मै पवित्र आत्मह स्वर्गमसे ढुकुरअस आक उहाँकम परट् देख्नु। 33यी घट्नासे आघ मै उहाँह चिन्ह्ल नैरनहुँ, तर पानीले बप्तिस्मा देहो कैक महीह जे पठैल, उहाँ जो महीह कल, ‘जौन मनैयकम पवित्र आत्मह आक परट् देख्बो, पवित्र आत्मले बप्तिस्मा देहुइया उहाँ जो हुइट।’ 34मै पवित्र आत्मह ढुकुरअस येशूकम परट् देख्नु। उहओर्से मै साक्षी देठुँ, कि उहाँ जो परमेश्वरक छावा हुइट।”
सुरुक चेलाहुँक्र
35द्वासर दिन फेदोस्र यूहन्ना आपन दुइ जन चेलन्हकसँग उह ठाउँम ठह्र्याइल रलह। 36ऊ येशूह नेङ्ग्टी जाइट् देख्ल त कल, “हेरो, उहाँ परमेश्वरक पठ्रू हुइट।”
37हुँकहार कहल यी बात सुन्क उ दुइ जन चेलावँ येशूक पाछ लग्ल। 38येशू घुम्क हेर्ल, ओ हुँकन पाछ-पाछ आइट् देख्क हुँकन पुछ्ल, “टुह्र का चाहटो?” हुँक्र उहाँह कल, “रब्बी” (याकर अर्थ हो, गुरुजी), “अप्न कहाँ रठी?”
39उहाँ हुँकन कल, “आक हेरो ना।” हुँक्र गैल, ओ उहाँक बैठल ठाउँ देख्ल। उ ब्याला चार बजटह। उहओर्से उ दिन हुँक्र उहाँकसँग बास बैठ्ल।
40यूहन्नक बात सुन्क येशूक पाछ लग्ना दुइ जनमध्ये एक जन त सिमोन पत्रुसक भैया अन्द्रियास रलह। 41ऊ सबसे पैल्ह आपन दादु सिमोन पत्रुसह भेँटैल ओ कल, “हम्र मसीह अर्थात् ख्रीष्टह भेँटैली।” 42अन्द्रियास सिमोनह येशूकठे लैगिल। येशू सिमोनह हेर्क कल, “टुँ योआनेसक छावा सिमोन हुइटो। आबठेसे, टुँ केफास कैजिबो।” (केफासक अर्थ पत्थर हो ओ यहीह ग्रीक भाषम पत्रुस कैजैठा।)
फिलिप ओ नथानेल
43द्वासर दिन येशू गालील क्षेत्रम जैना विचार कर्ल ओ गैल। उ ब्याला उहाँ फिलिपह भेँटैल ओ कल, “म्वार पाछ लागो।”
44फिलिप फे पत्रुस ओ अन्द्रियासकअस बेथसेदा सहरक मनैया रलह। 45तबदोस्र फिलिप नथानेलह भेँटैल ओ कल, “धर्मशास्त्रम मोशा ओ अगमवक्ताहुँक्र ज्याकर बारेम लिख्रख्लह, उहाँह हम्र भेँटैली। उहाँ त नासरतम रना योसेफक छावा येशू पो हुइट।”
46यी बात सुन्क नथानेल हुँकहीन कल, “का नासरतसे कौनो असल चिज आइसेक्ठा तो?”
फिलिप हुँकहीन कल, “आक हेरो ना!”
47येशू नथानेलह आपनठे आइट् देख्क हुँकहार बारेम कल, “एकठो पक्का इस्राएलीह हेरो। हुँकाहारम कुछु छलकपट नैहुइटन।”
48नथानेल कल, “अप्न महीह कसिक चिह्न्ली?” येशू हुँकहीन जवाफ देल, “फिलिप टुँहीन बलैनासे आघ टुँ अञ्जीरक रूख्वटर रहलब्याला जो मै टुँहीन देखरख्नहुँ।”
49नथानेल उहाँह कल, “गुरुजी, अप्न परमेश्वरक छावा हुइटी, अप्न त इस्राएलक राजा हुइटी।”
50येशू हुँकहीन कल, “का मै टुँहीन अञ्जीरक रूख्वटर देख्नु कलक कारण टुँ विश्वास कर्लो? टुँ यहीसे फे महान चिज देख्बो।” 51उहाँ हुँकहीन कल, “जाट्टीसे मै टुँहन कहटुँ, टुह्र स्वर्ग उघ्रल ओ परमेश्वरक स्वर्गदूतन मै मनैयक छावकम उप्पर जाइट् ओ टर ओल्हाइट् देख्बो।”#उत २८:१२
Currently Selected:
यूहन्ना 1: thl
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
