यूहन्ना 14
14
चेलन येशूक सान्त्वना
1येशू हुँकन कल, “आपन हृदयह दुःखीत हुइ जिन देओ। टुह्र परमेश्वरम विश्वास कर्ठो, म्वारम फे विश्वास करो। 2म्वार बाबक घरम रना ठाउँ धेर बाटन, ओ मै टुन्हक लाग ठाउँ तयार पार जाइटुँ। ओसिन नैरहट् कलसे मै टुँहन कने नैरनहुँ। 3मै टुन्हक लाग ठाउँ तयार पार्क फेदोस्र आइकठुँ, ओ टुँहन लैजाइकठुँ, कि मै जहाँ रहम टुह्र फे उहँ रनेबाटो। 4मै जहाँ जाइटुँ, टुह्र उ ठाउँ जैना डगर चिह्न्लबाटो।”
एक्कठो डगर येशू
5थोमा नाउँक चेला उहाँह कल, “प्रभु, अप्न कहाँ जाइटी, हमन थाहाँ नैहो, तब हम्र डगर कसिक चिन्ह्बी?”
6येशू हुँकहीन कल, “डगर, सत्य ओ जीवन मैहे हुइटुँ। मैद्वारा बाहेक कौनोजन फे बाबकठे पुग नैसेक्नेहुइट। 7टुह्र महीह चिह्न्टो कलसे, म्वार बाबह फे चिह्न्ने रलहो। आब उहाँह चिह्न फे रख्लो ओ देख फे रख्लो।”
8फिलिप नाउँक चेला येशूह कल, “प्रभु, हमन बाबह देखादी, ओत्रा हुइ त हम्र सन्तुष्ट होजैबी।”
9येशू हुँकहीन कल, “फिलिप, अत्रा दिनसम मै टुन्हकसँग पलबाटुँ, उहफे टुँ महीह नैचिह्न्टो? जे महीह देखराखल, ऊ बाबह फे देखराखल। महीह देख्क फे टुँ काजे ‘बाबह देखादी’ कठो? 10मै बाबकम बाटुँ, बाबा म्वारम बाट कैक का टुह्र विश्वास नैकर्टो? जौन बात मै बोल्ठुँ, उ बात म्वार आपन तर्फसे नैबोल्टुँ तर म्वारम बास करुइया बाबा म्वारमसे आपन काम कर्टिबाट। 11मै बाबकम बाटुँ, बाबा म्वारम बाट कैक टुह्र विश्वास करो। यदि म्वार कहल बात विश्वास नैकर्टो कलसे, म्वार करल काम हेर्क महीह विश्वास करो।
12“जाट्टीसे मै टुँहन कहटुँ, जे महीह विश्वास करी, ऊ म्वार करल काम फे करी, ओ उहीसे झन् बराबरा काम कर्नेबा, काकरकि मै बाबकठे जाइटुँ। 13टुह्र म्वार नाउँम ज्या मङ्बो, म्वारतर्फसे बाबक महिमा प्रकट ह्वाए कैक मै टुन्हक लाग उ काम कैदेनेबाटुँ। 14टुह्र म्वार नाउँम कुछु मङ्बो कलसे मै उ टुँहन देनेबाटुँ।
पवित्र आत्मक प्रतिज्ञा
15“यदि टुह्र महीह प्रेम कर्ठो कलसे, म्वार आज्ञा फे पालन कर्नेबाटो। 16ओ मै बाबह बिन्ती कर्नेबाटुँ, उहाँ टुन्हकसँग सड्डभर रहक लाग और सहायक पठादेनेबाट। 17उ सहायक त सत्यक आत्मा हुइट। उहाँह संसारक मनै स्वीकार कर नैसेक्ट, काकरकि संसार ना उहाँह द्याखट् ना चिन्हट्। तर टुह्र उहाँह चिह्न्ठो, उहाँ टुन्हकम बास कर्ठ, ओ टुन्हकसँग रह्नेबाट।
18“मै टुँहन टुवरअस नैछोर्नेहुइटुँ, मै टुन्हकठे अइनेबाटुँ। 19आब कुछ समय पाछ संसार महीह नैदेख्ने हो, तर टुह्र महीह देख्नेबाटो। मै जीवित रलकओर्से, टुह्र फे जीवित रह्नेबाटो। 20परमेश्वर म्वारम बाट, ओ मै परमेश्वरम बाटुँ कैक उ दिन टुह्र जन्नेबाटो। 21महीह प्रेम करुइया उह हो जे म्वार आज्ञा स्वीकार कर्ठा ओ पालन कर्ठा। महीह प्रेम करुइयह म्वार बाबा फे प्रेम करुइयाबाट। मै ओहीह प्रेम करुइयाबाटुँ, ओ मै अपन्हेह वाकरठे प्रकट करुइयाबाटुँ।”
22तब यहूदा नाउँक चेला (यहूदा इस्करियोत नाही, द्वासर) उहाँह कल, “प्रभु, अप्न कली, अप्न अपन्हेह हमारठे केल प्रकट करुइयाबाटी, संसारकठे नाहीँ, काजे?”
23येशू ओहीह कल, “जे महीह प्रेम कर्ठा, ऊ म्वार वचन पालन कर्नेबा, ओ म्वार बाबा ओहीह प्रेम कर्नेबाट, ओ हम्र उ मनैयकठे अइनेबाटी ओ वाकरम बास कर्नेबाटी। 24महीह प्रेम नैकरुइया म्वार वचन पालन नैकरट्। जौन वचन टुह्र सुन्ठो, उ वचन म्वार नैहो, तर महीह पठुइया म्वार बाबक वचन हो।
25“यी सब बात मै टुन्हकठे रहिबेर कैरख्नु। 26बाबा म्वार नाउँम पठैना सहायता कर्ना पवित्र आत्मा टुँहन सब बात सिखैनेबाट, ओ मै टुँहन कहल सब बात सम्झना करैनेबाट। 27मै टुँहन शान्ति देक जाइटुँ। म्वार शान्ति मै टुँहन देहटुँ, यी संसारक देहलअस शान्ति नैहो। आपन मनम दुःखीत जिन होओ ओ जिन डराओ।
28“‘मै यिहाँसे जाइटुँ ओ फेदोस्र टुन्हकठे अइनेबाटुँ’ कैक कहल म्वार बात त टुह्र सुन्डर्लो। टुह्र महीह प्रेम कर्टो कलसे मै बाबकठे जाइटुँ कहट् सुन्क टुह्र खुशी हुइनेरलहो, काकरकि बाबा महीसे महान बाट। 29यी हुइनासे आघ मै यी सब बात टुँहन कैदेरख्नु, ताकि जब यी ह्वाए आई तब टुह्र विश्वास कर सेको। 30आब मै टुँहनसे धेर नैबट्वाइठुँ, काजेकलसे यी संसारक शासक अइटीबा। वास्तवम म्वारउप्पर वाकर कौनो अधिकार नैहुइटस। 31तर सब मनै मै बाबह प्रेम कर्ठुं कना बात जान सेकहीँ कैक मै बाबक आज्ञा अनुसार कर्ठुं। उठो, आब हम्र यिहाँसे जाई।”
Currently Selected:
यूहन्ना 14: thl
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
