यूहन्ना 3
3
निकोदेमससे येशूक बातचित
1फरिसी समूहक निकोदेमस नाउँ रहल एकठो मनैया रलह। ऊ यहूदी महासभक एकठो सदस्य रलह। 2एक रात ऊ येशूकठे आक कल, “गुरुजी, परमेश्वर हमन सिखाइक लाग अप्नह पठैलह। यी बात हमन थाहाँ बा। यदि परमेश्वर साथ नैदेल कलसे, अप्नक करल अचम्मक चिन्ह कुई फे कर नैस्याकट्।”
3येशू हुँकहीन जवाफ देल, “जाट्टीसे मै टुँहीन कहटुँ, लौव हिसाबले नैजन्मट्सम कुई फे परमेश्वरक राज्य द्याख नैस्याकट्।”
4“का कली?” निकोदेमस छक्क पर्टी कल, “बुह्राइल मनैया कसिक आपन डाईक कोखीम फेदोस्र जाइसेकी ओ लौव हिसाबले जन्मसेकी?”
5येशू जवाफ देल, “जाट्टीसे मै टुँहीन कहटुँ, पानी ओ आत्माद्वारा नैजन्मट्सम कुई फे परमेश्वरक राज्यम जाइ नैस्याकट्। 6मनै त मानवीय जीवन केल जन्माइसेक्ठ, तर आत्मिक जीवन देहुइया त पवित्र आत्मा हुइट। 7टुह्र लौव हिसाबले जन्म पर्ठा कना बात सुन्क अचम्म जिन मानो। 8बयाल जहोँर मन लागल उहँरे बहठा। टुँ बयाल बहट् त सुन्ठो, तर उ कहाँसे अइठा, ओ कहाँ जैठा, उ बात नैजन्टो। ओसहेँक मनै आत्माद्वारा जन्मना बात फे टुँ नैजन्टो।”
9निकोदेमस उहाँह पुछ्ल, “यी कसिक हुइसेकी?”
10येशू हुँकहीन जवाफ देल, “टुँ इस्राएलीन्हक आदरणीय गुरु हुइटो, उहफे यी बात नैबुझ्टो? 11जाट्टीसे मै टुँहीन कहटुँ, हम्र जानल बात बट्वैठी ओ द्याखल बात टुँहन कठी। तर टुह्र हमार कहल बात नैपत्यैटो। 12मै टुँहन पृथ्वीम हुइल् बात कनु, तब फे टुह्र विश्वास नैकर्टो कलसे, यदि मै टुँहन स्वर्गक बात कहम त झन् कसिक विश्वास कर्बो? 13स्वर्गमसे आइल मै मनैयक छावा बाहेक स्वर्गम और कुई फे नैगैलहो। उहओर्से स्वर्गक बात महीह केल थाहाँ बा। 14जसिक मोशा उजार ठाउँम काँसक सँप्वा बनाक पोलम उठैल, ओसहेँक मै मनैयक छावा फे उठाजाइपर्ठा।#गन्ती २१:९ 15परिणाम स्वरूप, जे-जे मनैयक छावकम विश्वास करी, ऊ अनन्त जीवन पाई।
16“काकरकि परमेश्वर संसारह अत्रा धेर प्रेम कर्ल, उहाँ आपन एक्कठो छावह समेत देल। परमेश्वरक छावकम विश्वास करुइया कुई फे नाश नैहुई, तर ऊ अनन्त जीवन पाई। 17परमेश्वर संसारह दोषी ठह्राईक लाग आपन छावह संसारम नैपठैल, तर संसार उहाँद्वारा बाँचऽ कैक पठैलह। 18उहाँकम विश्वास करुइया कुई फे दोषी नैठह्रट्, तर विश्वास नैकरुइया दोषी ठहररहल, काकरकि ऊ परमेश्वरक एक्कठो छावकम विश्वास नैकर्लहो। 19ज्योति संसारम आरल। तर मनै ज्योतिह मन नैपरैल, बेनसे हुँक्र अन्धकारह मन परैल, काकरकि हुँकन्हक काम दुष्ट रलहन। यिहकारण हुँक्र दोषी ठह्राजैठ। 20दुष्ट काम कर्ना सबजन ज्योतिह हेल्हा कर्ठ। ज्योतिक आघ अइलसे हुँकन्हक करल सब काम छर्लङ्ग देखपर्जैठा कना डरले हुँक्र ज्योतिक लग्घ नैपर्ट। 21तर सत्य हिसाबले चल्ना मनै ज्योतिक आघ अइठ ओ हुँकन्हक करल काम परमेश्वरक इच्छा अनुसार करल हो कना बात स्पष्ट रूपले देखपर्ठा।”
बप्तिस्मा देहुइया यूहन्नक थप गवाही
22तबदोस्र येशू आपन चेलन्हकसँग यहूदिया क्षेत्रम गैल, ओ कुछ समयसम हुँकन्हकसँग उहँ रल, ओ बप्तिस्मा देल। 23यूहन्ना फे सालीमक लग्घ एनोनम बप्तिस्मा देहँट्, काकरकि उहाँ प्रशस्त पानी रह। मनै बप्तिस्मा लिहक लाग हुँकाहारठे आइँट्। 24उ समयसम यूहन्ना झ्यालखानम नैपर्लरलह।#मत्ती १४:३; मर्क ६:१७; लूक ३:१९-२० 25यूहन्नक चेलाहुँक्र ओ एकठो यहूदी मनैया शुद्ध हुइना विषयम वाद-विवाद करलग्ल। 26उहओर्से यूहन्नक चेलाहुँक्र हुँकाहारठे आक कल, “गुरुजी, सुनी! यर्दन लद्यक उपार अप्नकसँग एकठो मनैया रलह। उहाँक बारेम अप्न गवाही देलही। आब उहाँ बप्तिस्मा देहट ओ सबजन उहाँकठे जाइट।”
27यूहन्ना जवाफ देल, “परमेश्वर नैदेहट्सम मनै कुछु फे पाइ नैसेक्ट। 28‘मै ख्रीष्ट नैहुइटुँ, तर मै उहाँसे आघ पठागैल मनैया हुइटुँ’ कैक म्वार कहल बात त टुह्र सुनरख्लो।#यूह १:२० 29दुल्ही त दुल्हक हो। दुल्हक सङ्घारी पञ्ज्र रह पैलकम ओ दुल्हक आवाज सुन पैलकम धेर आनन्दित हुइठ। म्वार आनन्द फे यिह हो, ओ आब यी आनन्द पूरा होरहल। 30उहाँ महान झन् महान हुइटी जाइपर्ठा, तर मै घट्टी झन् घट्टी जाइपर्ठा।
31“उहाँ स्वर्गसे अइल ओ सबसे महान् बाट। हम्र पृथ्वीम जन्मल् मनै पृथ्वीम हुइल बात बट्वैठी। तर उहाँ स्वर्गसे अइल ओ सबसे महान् बाट। 32उहाँ आपन द्याखल ओ सुनल बात बटोइठ। तर फे उहाँक बट्वाइल बात कुई फे विश्वास नैकरट्। 33उहाँक कहल बात विश्वास कर्ना मनै परमेश्वर सत्य हुइट कैक ठोकुवा कर्ठ। 34परमेश्वरद्वारा पठागैल् छावा उहाँक वचन बोल्ठ, काकरकि परमेश्वर उहाँह आपन पवित्र आत्मक भरपूर देरख्ल। 35परमेश्वर बाबा आपन छावह प्रेम कर्ठ, ओ सब चिज उहाँक हाँठम देरख्ल।#मत्ती ११:२७; लूक १०:२२ 36परमेश्वरक छावकम विश्वास कर्ना मनै अनन्त जीवन पैठ, तर छावक आज्ञा नैमन्ना मनै कबु फे अनन्त जीवनक अनुभव कर नैपैट। तर परमेश्वरक रिस हुँकन्हकम पर्टीरठन।”
Currently Selected:
यूहन्ना 3: thl
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
