लूका 19
19
कर उठैना हाकिम जखायस
1येशू यरीहो सहरम गैल ओ उहँरेसे यरूशलेम जाइटलह। 2उ सहरम जखायस नाउँ रहल एकठो धनी मनैया रलह। ऊ कर उठैना मनैन्हक हाकिम रलह। 3येशू के हुइट त कैक ऊ उहाँह ह्यार चहल, तर पुट्क्यार रलकओर्से ओ मनैन्हक भीडले ऊ उहाँह द्याख नैसेक्ल। 4उहओर्से ऊ दौरटी मनैन्हक भीडसे आघ जाक एकठो अञ्जीरक रुख्वम चिहुर्ल। येशू उह डगर जाइटलह।
5येशू जब जखायस चिउह्रल रुख्वठे पुग्ल, तब उहाँ उप्परओर हेर्क जखायसह कल, “जखायस, झट्ट उत्रो, काकरकि आज महीह टुँहार घर बैठपर्ना बा।” 6ऊ रूख्वमसे झट्ट उत्रल ओ खुशीसे येशूह आपन घर लैगैल।
7भीडमक मनै यी देख्ल त, हुँक्र असिक गन्गनाइलग्ल, “येशू त ओसिन पापी मनैयक घर पौह्ना पर गैल।”
8उहाँहुँक्र जखायसक घर बैठल ब्याला, जखायस सक्कुजन्हक सामुन्नेम ठह्र्याक कल, “प्रभु, हेरी, मै आपन आधा सम्पत्ति गरीबन बाँटदेहेम ओ कौनोजहनसे ठग्क लेराखलहुइम कलसे, वाकर चार गुणा फिर्ता कैदेहेम।”
9तब येशू हुँकहीन कल, “टुँ फे परमेश्वरम अब्राहामअसक विश्वास कर्लकओर्से आज टुँहार परिवारम मुक्ति आरहल। 10काकरकि मै मनैयक छावा, हेराइल मनैन ख्वाज ओ बँचाए आरनु।”#मत्ती १८:११
स्वानक पैँसक आहान
मत्ती २५:१४-३०
11उहाँहुँक्र यरूशलेमक लग्घ रलह ओ मनैजुन, उहाँ आब परमेश्वरक राज्य स्थापना कैक राज्य करक लाग बाट कना गलत विचार करटलह। उहओर्से जखायसक घरम येशूक बात सुन्टीरहल मनैन उहाँ एकठो और आहान सुनैल। 12उहाँ कल, “एकठो खानदानी मनैया आपन देशक राजा होक अइना विचारले बरादूरीक देशम जैना निर्णय कर्ल।#१९:१२ रोमी साम्राज्यक समयम, रोम आपन अधीनम धेरजसिन स्थानीय राजह आपन क्षेत्र या देशम शासन कर देहँट्। हरेक लौव राजह रोमी सम्राटह भ्याँट कर रोमम जाइपरन, उह सम्राट उ व्यक्तिह आधिकारिक रूपम राजा नियुक्त करँट्। 13जैनासे आघ ऊ आपन दश जन नोकरन बलैल ओ हरेकजहन एक-एकठो स्वानक पैँसा#१९:१३ स्वानक पैँसा: एकठो स्वानक पैँसा लगभग सय दिनिक ज्याला बराबर रह। देक कल, ‘मै घुम्क नैआइट्सम यी पैँसले ब्यापार करहो।’
14“तर हुँकहार आपन देशक मनै हुँकहीन मन नैपराइँट्। उहओर्से ऊ गैल त, हुँक्र असिन खबर पठैल, ‘यी मनैया हमार राजा हुइल् हम्र नैचहटी।’
15“तर उ मनैया राजा होक अइल। तबदोस्र उ पैँसा देहेल आपन नोकरन बलैल ओ के कत्रा नाफा करल कैक हिसाब मङ्ल।
16“तब पहिल नोकर आक कहल, ‘राजा, मै अप्नक देहल पैँसले दश गुणा धेर कमारख्नु।’
17“राजा कल, ‘स्याबास! टैँ असल नोकर हुइट्या। टैँ डान्चे धनम फे विश्वासयोग्य हुइल्या। मै आब टोहीह दशठो सहरक हाकिम बनैम्।’
18“द्वासर नोकर आक कहल, ‘राजा, मै अप्नक देहल पैँसले पाँच गुणा धेर कमारख्नु।’
19“राजा कल, ‘स्याबास! मै आब टोहीह पाँचठो सहरक हाकिम बनैम्।’
20“तीसर नोकर आक कहल, ‘राजा, अप्नक देहल पैँसा यिहाँ बा। मै आपन रुमालम बहन्नु ओ नुकाक ढैरख्नहुँ। 21मै अप्नसे डरैनु, काकरकि अप्न बरा खरो बाटी। अप्न ज्या नैढर्टी उह लेठी, ओ ज्या नैबुइटी ओक्र कट्नी कर्ठी।’
22“राजा ओहीह कल, ‘दुष्ट नोकर, ट्वार मुहक वचनले मै टोहीह दण्ड देहम। यदि मै ज्या नैढर्टुं उह लेठुँ, ओ ज्या नैबुइटुँ ओक्र कट्नी कर्ठुं कैक टैँ जन्लरलह्या कलसे, 23म्वार देहल पैँसा बैंकम काकर नैढर्ल्या? ढर्ट्या कलसे, आब मै ब्याजसहित पैँसा फिर्ता पैनेरनहुँ।’
24“तबदोस्र राजा आपन लग्घ ठह्र्याइल मनैन् कल, ‘वाकरठेसे पैँसा अछिन्क दश गुणा धेर पैँसा कमाइल मनैयह देडारो।’
25“हुँक्र कल, ‘उ मनैयकठे त दश गुणा धेर पैँसा पलिबाटस।’
26 #
मत्ती १३:१२; मर्क ४:२५; लूक ८:१८ “‘मै टुँहन कहटुँ, ज्याकरठे बा ओहीह झन् धेर देजाई, तर ज्याकरठे नैहो वाकरठेसे रहल फे अछिन्जाई।#१९:२६ यी पदक अर्थ हो: जे इमान्दार ओ मेहनती बा, ओहीह झन् धेर क्षमता देजाई, तर जे बेइमान ओ अल्छी बा, वाकरठे रहल डान्चे क्षमता फे जातसे हेराजहिँस। 27महीह राजा नैमन्ना म्वार विरोधीन यिहाँ आनो, ओ म्वार सामुन्नेम मुवादेओ।’”
यरूशलेमम येशूक जयजयकार
मत्ती २१:१-११; मर्कूस ११:१-११; यूहन्ना १२:१२-१९
28येशू यी बात बट्वाक सेक्ल त, उहाँहुँक्र यरूशलेमओर लग्ल। 29उहाँहुँक्र जैतून पर्वत्वठे#१९:२९ जैतून पर्वत्वठे समुद्र सतहसे लगभग ८३० मिटर उचाइ रहल जैतूनिक पर्वत्वा यरूशलेमक पूरुबओर बा। रहल बेथफागे ओ बेथानिया कना ठाउँम पुग्ल त, येशू दुइठो चेलन असिक कैक आघ पठैल, 30“उ हाउ गाउँम जाओ। गाउँम पैँठ्टीकि, टुह्र कुई फे नैचिउह्रल् गधक एकठो जवान बच्छोह भेटैबो। ओहीह छोर्क यिहाँ अनहो। 31कुई टुँहन ‘काजे यहीह छ्वारटो?’ कही कलसे, ‘प्रभुह याकर चाहा बाटन’ कहहो।”
32उ दुनु चेलावँ गैल ओ येशूक कहल्अस गधक बच्छोह भेँटैल। 33ओहीह छ्वारबेर गधक मालिक हुँकन कल, “यहीह काकर छ्वारटो?”
34हुँक्र कल, “प्रभुह याकर चाहा बाटन।”
35हुँक्र गधक बच्छोह येशूकठे अन्ल ओ आपन-आपन चद्री गधकम बिछैल। तब येशू वाकरम चिहुर्ल। 36मनै, येशूह स्वागत कर्लक चिन्हक रूपम, आपन-आपन चद्री उहाँक आघ-आघ डगरिम बिछादेल।
37जब येशू, यरूशलेमक लग्घ, जैतून पर्वत्वमसे ओल्हैना ठाउँ पुग्ल त, सब चेलावँ येशूक करल शक्तिशाली काम समझ्क खुशी हुइटी कर्रसे परमेश्वरक जयजयकार कर भिर्ल,
38“परमेश्वरक नाउँम अउइया राजक
प्रशंसा ह्वाए।
स्वर्गम शान्ति ह्वाए।
परमेश्वरक महिमा ह्वाए।”#भज ११८:२६
39बगालिम रहल फरिसीहुँक्र येशूह कल, “गुरुजी, आपन चेलन चूप लगाई।”
40येशू जवाफ देल, “मै टुँहन कहटुँ, हिँक्र चूप लगहीँ कलसे पत्थ्रा चिल्लाइ भिरजाई।”
सहरक दुर्दशा
41येशू यरूशलेमक लग्घ पुग्ल। उहाँ सहरह देख्क रुइल ओ कल, 42“यदि टुह्र शान्ति कसिक पाजैठा कना बात, आज हुइलसे फे, महसुस कर्टो कलसे हुइनेरह। तर आब शान्ति पैना तरिका टुन्हक नजरमसे नुकल बा, काकरकि टुह्र महीह स्वीकार नैकर्लो। 43समय आइ त, सहरम असिन डरलग्टिक घटना हुई, कि टुन्हक शत्रु चारिओर मोर्चा बहन्लरह्हीँ। हुँक्र गिन्यौर सहरह घेर्लरह्हीँ, ताकि टुह्र कहोँरेसे फे भाग नैपैबो। 44हुँक्र सारा सहरक घर असिक भत्कादेहीँ, कि गाह्रमक एकठो पत्थ्रा फे और पत्थ्रक उप्पर नैरही। ओ हुँक्र टुह्र सबजहन मुवादेहीँ। परमेश्वर टुन्हक शत्रुन ओसिक कर देहीँ, काकरकि उहाँ दया कैक टुँहन बचाइक लाग महीह पठैल, तर टुह्र महीह नैचिह्न्लो।”
मन्दिरम किन-बेँच करुइयन खेद्लक
मत्ती २१:१२-१७; मर्कूस ११:१५-१९; यूहन्ना २:१३-२२
45तबदोस्र येशू यरूशलेमम पुग्ल त, मन्दिरक अङ्नम जाक किनबेच करुइयन उहाँसे खेद्देल। 46येशू हुँकन सिखैटी कल, “‘म्वार घर परमेश्वरसे प्रार्थना कर्ना घर हुई’ कैक धर्मशास्त्रम लिखल नैहो का? तर टुह्र यहीह ‘डाँका मर्ना ठाउँ’ बनारख्लो।”#यशै ५६:७; यर ७:११
47तबठेसे येशू हरेक दिन मन्दिरक अङ्नम मनैन सिखाइँट्। तर मुख्य पूजारीहुँक्र, शास्त्रीहुँक्र ओ और अगुवन मिल्क येशूह मुवैना उपाय ख्वाज लग्ल।#लूक २१:३७ 48जे होस, हुँक्र उहाँह मुवैना कुछु उपाय नैपैल काकरकि मनै उहाँक शिक्षा मन पराइँट्।
Currently Selected:
लूका 19: thl
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
