लूका 20
20
येशूक अधिकारम प्रश्न
मत्ती २१:२३-२७; मर्कूस ११:२७-३३
1एक दिन येशू मन्दिरक अङ्नम मनैन सिखाइटलह ओ खुशीक खबर प्रचार करटलह। तबहेँ अगुवन्हकसँग मुख्य पूजारीहुँक्र ओ शास्त्रीहुँक्र उहाँकठे अइल ओ 2असिक कह्टी पुछ्ल, “यी सब कर्ना अप्नकठे का अधिकार बा? अप्नह यी अधिकार के देहल?”
3येशू हुँकन कल, “मै फे टुँहन एकठो प्रश्न पुछटु, पैल्ह महीह जवाफ देओ। 4यूहन्ना मनैन बप्तिस्मा देना अधिकार कहाँसे पैल, परमेश्वरसे#२०:४ अर्थात् स्वर्गसे कि मनैनसे?”
5येशूक प्रश्नक बारेम हुँक्र अप्न-अप्न बट्वाइलग्ल, “आब हम्र का कही? ‘परमेश्वरसे’ कही कलसे, काजे टुह्र हुँकहार बट्वाइल समाचारम विश्वास नैकर्लो? कैक कह्हीँ। 6‘मनैनसे’ कही कलसे, यी सब मनै रिसैहीँ ओ हमन मुवाइक लाग पत्थ्रले मरहीँ, काकरकि यूहन्नह सबजन ‘अगमवक्ता हुइट’ कैक विश्वास कर्ठ।”
7उहओर्से हुँक्र कल, “यूहन्ना कहाँसे अधिकार पैल कना बात हमन थाहाँ नैहो।”
8तब येशू हुँकन जवाफ देल, “ओसिन हो कलसे, मै फे यी सक्कु काम कर्ना अधिकार कहाँसे पैनु कैक टुँहन नैकहम।”
दुष्ट अध्यरोन्हक बारेम आहान
मत्ती २१:३३-४६; मर्कूस १२:१-१२
9येशू मनैन् एकठो आहान कल, “एकठो जग्गाधनीक आपन अङ्गूरिक खेती रलहन। उ अङ्गूरिक खेती अध्यरोन जिम्मा लगाक अप्नजुन धेर दिनिक लाग परदेश लग्ल।#यशै ५:१ 10अङ्गूर टुर्ना समयम जग्गाधनी आपन एकठो नोकरह आपन बठा अङ्गूर लिह हुँकन्हकठे पठैल। तर हुँक्र ओहीह पिट्ल ओ छुच्छ हाँठ घुमादेल। 11उ जग्गाधनी द्वासर नोकरह पठैल। हुँक्र ओहीह फे पिट्ल ओ वाकर बेइज्जत कर्ल, ओ छुच्छ हाँठ घुमादेल। 12तब उ जग्गाधनी तीसर नोकरह पठैल। हुँक्र ओहीह अट्घट्टा पार्क पिट्ल ओ उहाँसे खेद्देल।
13“तबदोस्र उ जग्गाधनी मनमन विचार कर्ल, ‘आब मै का करुँ? म्वार एक्कठो प्रिय छावा बा। ओइहेह अध्यरोन्हकठे पठाइपरल। सायद हुँक्र म्वार छावह आदर करहीँ।’
14“तर उ अध्यरोन मालिकक् छावह आइट् देख्ल त, अप्न-अप्न सल्लाह पर्ल, ‘ऊ त हकवाला हो। ओहीह मुवादी, त यी सम्पत्ति हमार होजाई।’ 15तबदोस्र हुँक्र ओहीह घुचेट्टी अङ्गूरबारीक बाहर लैजाक वाकर हत्या कर्ल।
“आब अङ्गूरबारीक मालिक उ मनैन का करैहीँ? 16मालिक अपन्हे जाक उ दुष्ट अध्यरोन मुवादेहीँ। ओ अङ्गूरबारी औरजन्हक जिम्मा लगैहीँ।”
येशूक यी बात सुनुइयन कल, “असिन कबु जिन ह्वाए।”
17येशू हुँकन हेर्ल ओ कल, “यदि ओसिन हो कलसे, धर्मशास्त्रम म्वार बारेम लिख्गैल् यी बातक अर्थ का हो त?
‘घर बनुइयन रद्दी ठह्राक फाँकल् पत्थ्रा त
कोनोक मुख्य पत्थ्रा बनल।’#भज ११८:२२
18उ पत्थ्रम खसुइयन सबजन चकनाचूर हुहीँ, ओ ज्याकरम उ पत्थ्रा खसी ओहीह किचुलप्वाटा पारदी।”#२०:१८ यी पदह असिक फे कह सेक्जैठा: गग्री पत्थ्रम गिरल कलसे भुज्रीभुज्रा हुइअस, पत्थ्रा गग्रीम गिरल कलसे गग्रीह भुज्रीभुज्रा पारअस, महीह इन्कार करुइयन फे ओस्त हुहीन।
19शास्त्रीहुँक्र ओ मुख्य पूजारीहुँक्र येशूह तबहेँ पकर्डर्ना विचार कर्ल काकरकि येशू अङ्गूर खेतिक आहान हुँकन्हक्के विरोधम कलह कैक हुँक्र बुझ्ल। तर हुँक्र उहाँह नैपकर्ल, काकरकि यदि उहाँह पक्रलसे, हुँक्र मनै हूलदङ्गा मच्चाडरहीँ कैक डरैल।
कर तिर्ना बातम येशूह फँसाइ खोज्लक
मत्ती २२:१५-२२; मर्कूस १२:१३-१७
20उहओर्से हुँक्र उहाँह पक्रना दाउ ह्यारलग्ल। हुँक्र कुछ मनैन धर्मी भेष लेक गोप्य रूपम येशूक जासूस कर पठैल। येशूह जासुसद्वारा कौनो बातम फँसाइ सेक्लसे, उहाँह दोष लगाक पकर्ना ओ रोमी बडाहाकिमक हाँठम सुम्पना विचारम हुँक्र रलह। 21जासूसहुँक्र येशूह कल, “गुरुजी, अप्न इमान्दार बाटी ओ अप्नक शिक्षा सत्य बा कैक हम्र जन्ठी। अप्न केक्रो पक्षपात नैकर्टी, बेनसे मनैन सत्यसे परमेश्वरक वचन सिखैठी। 22आब कही, हम्र रोमी सरकारह कर तिर्ना ठीक हो कि नाहीँ?”#२०:२२ हुँक्र येशू गल्ती कर्ना अवस्था सिर्जना करटलह। हुँक्र येशू या त मोशक व्यवस्थक विरोध करहीँ या त रोमी सरकारक विरोध करहीँ कना आशम रलह। यदि येशू रोमी सरकारह कर तिर्ना ठीक हो कट कलसे, उहाँ मोशक व्यवस्थक विरोध कर्लक हुइनेरह, काजेकलसे उ व्यवस्था यहूदीहुँक्र गैरयहूदीन कर तिर्ना निषेध कर्ठा। यदि येशू रोमी सरकारह कर तिर्ना ठीक नैहो कट कलसे, उहाँ सरकारक विरोध कर्लक हुइनेरह ओ सरकार उहाँह जेल डार सेक्ने रह या सम्भवत: मृत्युदण्ड देह सेक्ने रह।
23येशू हुँकन्हक कपटी चाल थाहाँ पाक कल, 24“महीह चाँदीक एकठो पैँसा देखाओ, यिहिँम क्याकर छाप ओ नाउँ बा?”#२०:२४ ग्रीक भाषक स्रोतमसे यी पदक शाब्दिक अनुवाद, “महीह एकठो दिनारी देखाओ यिहिँम क्याकर चित्र ओ नाउँ खोपगैल् बा?”
हुँक्र कल, “रोमी सरकारक।”
25तब येशू हुँकन कल, “ओसिन हो कलसे, रोमी सरकारक चिज रोमी सरकारह ओ परमेश्वरक चिज परमेश्वरह देओ।”
26हुँक्र मनैन्हक सामुन्नेम येशूह कौनो बातम फे फँसाइ नैसेक्ल। तबदोस्र हुँक्र चूपचाप लग्ल, काकरकि हुँक्र उहाँक जवाफ सुन्क छक्क परलरलह।
मुवलमसे फेदोस्र जिना बारेम
मत्ती २२:२३-३३; लूका २०:२७-४०
27मनै मुवलमसे फेदोस्र नैजिट कहुइया सदुकी#२०:२७ सदुकी: सदुकीहुँक्र यहूदीन्हक एक समूह रलह। संख्यम धेर नैरलसे फे, हुँक्र राजनैतिक ओ धार्मिक रूपले शक्तिशाली रलह। समूहक कौनो-कौनो मनै येशूकठे आक कल,#प्रे २३:८ 28#व्य २५:५“गुरु, मोशा हम्र यहूदीन्हक लाग असिन व्यवस्था लिखदेरख्ल: ‘यदि कौनो मनैया सन्तान बिना जन्मैल मुवल कलसे, वाकर भैया भौजाइ जन्नी लिह ओ आपन दादुक लाग सन्तान जन्माए।’#२०:२८ यहूदी समाजम आपन पिह्री बचाइक लाग छावा पैना एकठो महत्वपूर्ण बात रह। यदि कौनो मनैया सन्तान बिना जन्मैल मुवल कलसे, वाकर भैया भौजाइ जन्नी लिह। हुँकन्हकमसे जन्मल पैल्ह छावा मुवल दादुक लाग, ओ वाकर नाउँ फे दादुकऽ नाउँ ढैजाए। दादुक श्रीसम्पत्ति उह छावा खाए। 29आब मानिले, एकठो परिवारम सात भाइ छावन रलह। बर्का भ्वाज करल, तर सन्तान बिना जन्मैल मुगैल्। 30तब मन्ह्ला आपन भौजीह लिहल। ऊ फे सन्तान बिना जन्मैल मुगैल्। 31सन्ह्ला फे आपन भौजीह लिहेल्। ऊ फे सन्तान बिना जन्मैल मुगैल्। असहेँक सक्कु भाइ उ जन्नीसे भ्वाज कर्ल, तर सन्तान बिना जन्मैल मुगैल। 32अन्तिमम उ जन्नी फे मुगैल्। 33आब कही, हुँक्र मुवलमसे फेदोस्र जिहीँ ओ स्वर्ग जैहीँ कलसे, ऊ क्याकर जन्नी हुई? काकरकि सक्कु भैयनसे वाकर भ्वाज होरलहस।”
34येशू हुँकन कल, “भ्वाजकाज कना बात त यी संसारक मनैन्हक लाग हो।#२०:३४ ग्रीक भाषक स्रोतमसे यी पदक शाब्दिक अनुवाद, “यी संसारम मनै भ्वाज कर्ठ ओ भ्वाज करक लाग देजैठ। पद ३५ म फे असहेँ बात बा।” 35मुलसे फेदोस्र जिक स्वर्ग जाइक लाग जे-जे योग्य ठह्राजैहीँ, तब हुँकन्हक लाग भ्वाजकाजक बात नैरहहीन। 36हुँक्र फेदोस्र नैमुट, काकरकि हुँक्र स्वर्गदूतअस होजैठ। हुँक्र त परमेश्वरक सन्तान हुइट, काकरकि हुँक्र मुलसे फे परमेश्वर फेदोस्र हुँकन जियादेठन। 37मोशक लिखल किताबम मुवलमसे फेदोस्र जिक स्वर्ग जैना बात त टुह्र जन्लरहपर्ना हो। उ विषयम जर्टिरहल झप्टीमसे परमप्रभु मोशह कल, ‘टुन्हक पितापुर्खा अब्राहाम, इसहाक ओ याकूबक परमेश्वर हुइटुँ।’#प्रस ३:६ 38उहाँ मुवल मनैन्हक नाहीँ, तर जिटीह रहुइयन्हक परमेश्वर हुइट, काकरकि उहाँक लाग सबजन जिटीह बाट।”
39कुछ शास्त्रीहुँक्र येशूह कल, “गुरु, अप्न ठीक कली।” 40तबदोस्र उहाँह प्रश्न पुछ्ना कुई फे आँट नैकरल।
ख्रीष्ट क्याकर सन्तान?
मत्ती २२:४१-४६; २३:१-७; मर्कूस १२:३५-४०
41तबदोस्र येशू हुँकन कल, “ख्रीष्ट दाऊदक सन्तान हुइट कैक मनै काजे कठ? 42काकरकि दाऊद अपन्हे भजन लिखबेर ख्रीष्टह परमप्रभु कैरख्ल,
‘परमप्रभु म्वार प्रभुह कल,
“म्वार दाहिन पाञ्जर बैठो,#भज ११०:१
43जबसम मै टुँहार शत्रुन हराक
टुँहार पौलीक पाउदान नैबनैम।”’
44उहओर्से, यदि दाऊद उहाँह प्रभु कठ कलसे, ख्रीष्ट कसिक दाऊदक सन्तान केल हुइट?”
45सबजन येशूक बात सुन्टीरलह। तब उहाँ आपन चेलन हेर्क कल, 46“शास्त्रीनसे होसियार रहो। काकरकि हुँक्र धर्मकर्म कर्ना झुहार पहिरण पहिर्क यहँरउहँर घुम ओ सार्वजनिक ठाउँम मानसम्मान पाइ चहठ। हुँक्र सभाघरम मुख्य आसन ओ भ्वाजभत्यारम फे मुख्य-मुख्य ठाउँ रोज्ठ। 47हुँक्र विधवन्हक श्रीसम्पत्तिमसे नाजायज फाइदा लेठ, तर हुँक्र मनैन्हक सामुन्नेम अपन्हेह धर्मी देखाइक लाग भर परमेश्वरसे नम्मा-नम्मा प्रार्थना कर्लक बहाना बनैठ। असिन मनै झन् धेर दण्ड पैहीँ।”
Currently Selected:
लूका 20: thl
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
