लूका 21
21
गरीब विधवक भेटी
मर्कूस १२:४१-४४
1येशू मन्दिरम रहल समयम धनी-धनी मनैन भेटी चह्रैना बाकसम भेटी चह्राइट् देख्ल। 2ओ एकठो गरीब विधवा तामक दुइठो पैँसा चह्राइट् फे देख्ल। 3यी देख्क येशू कल, “जाट्टीसे मै टुँहन कहटुँ, यी गरीब विधवा सबजहनसे धेर भेटी चह्रारख्ली, 4काकरकि सबजन आपन-आपन खर्च टार्क उब्रल पैँसा चह्रैल, तर यी गरीब विधवा आपन सर्वस्व चह्रादेली।”
अन्तिम दिनिक चिन्ह
मत्ती २४:१-४१; मर्कूस १३:१-३१
5मजामजा पत्थ्रले बनल ओ परमेश्वरह चह्राइल भेटीक पैँसले सजिसजाउ हुइल् मन्दिरक बारेम येशूक चेलावँ बात बट्वाइटलह। येशू हुँकन्हक बात सुन्ल त कल, 6“समय आइ त, एक पत्थ्रक उप्पर और पत्थ्रा रह नैदेक सब ध्वस्त बनाजाई।”
7हुँक्र कल, “गुरुजी, यी घटना कैह्या हुई? यी घटना हुइक लाग बा कैक हम्र कसिक थाहाँ पैबी?”
8येशू कल, “होसियार रहो, त टुह्र ध्वाखा नैपैबो। काकरकि धेर जन ‘ख्रीष्ट मैहे हुइटुँ’ कैक दाबी कर्टी अइहीँ ओ ‘संसारक अन्त्य हुइक लाग बा’ कह्हीँ, तर हुँकन्हक बात विश्वास जिन करहो। 9जब टुह्र घमासान लडाइँ ओ हूलदङ्गा सुन्बो, तब जिन डरैहो। यी त हुइहीपरी, तर संसारक अन्त्यभर तबहेँ नैहुई।”
10येशू हुँकन कल, “जातिक विरोधम जाति, ओ राज्यक विरोधम राज्य उठी। 11जहोँरतहोँर बराबरा भुइँचाल जाई, महामारी हुई ओ अनिकाल परी। आकाशम रहल शक्ति डगमगाजाई ओ डरलग्टिक चिन्ह देखपरी।
12“तर यी घटना हुइनासे आघ, टुह्र धेर सँतावा पैबो। मनै टुँहन म्वारम विश्वास कर्लकओर्से सभाघरम लैजाक टुन्हक विरोधम मुद्दा चलैहीँ ओ टुँहन झेलखानम डारदेहीँ। हुँक्र टुँहन म्वार चेला हुइलकओर्से राजा ओ सरकारक आघ समेत लैजैहीँ। 13टुह्र उहब्याला म्वार बारेम हुँकन खुशीक खबर सुनैना मौका पैबो। 14टुँहन लागल आरोपक जवाफ कसिक देना कैक आघहेँसे चिन्ता जिन करहो।#लूक १२:११-१२ 15काकरकि उ ब्याला टुँहन अक्किलबुद्धि मै देहम्। तब कौनो विरोधी फे टुन्हक वचन काट नैसेकी। 16टुन्हक आपनऽ डाई-बाबा, दादुभैयन, नातपात ओ संगसाथीहुँक्र टुँहन पक्रादेहीँ। टुह्रमध्ये कत्रा जन त मुवा फे पैबो। 17टुह्र म्वार चेला हुइलकओर्से, उ समयम, सारा मनै टुँहन हेल्हा करहीँ। 18तर टुह्र ढुक्क होओ, काकरकि परमेश्वर टुन्हक वास्ता करहीँ ताकि टुन्हक कपारिक एकठो भुत्ला फे नैझरी। 19उहओर्से यदि टुह्र, आपत्विपत्म पर्लसे फे, म्वारम विश्वास कर्लरबो कलसे, टुह्र स्वर्गम अनन्त जीवन पैबो।”
20तब येशू कल, “जब टुह्र विरोधी सेनाहुँकन यरूशलेम सहरह चारिओर्से घेरा डारल देख्बो, तब टुह्र सहरक विनाश लग्घ आरहल कैक जनहो। 21उ समयम, यहूदिया क्षेत्रम रहुइयन भाग्क पर्वत्वम नुक्जैहीँ। यरूशलेमम रहुइयन सहर छोर्क चलजैहीँ। गाउँम रहुइयन सहरम जिन पैठहीँ। 22काकरकि उ ब्याला परमेश्वरक दण्ड परी। यी दण्ड यरूशलेमक बारेम धर्मशास्त्रम लिखल बात पूरा करी।#यशै ६३:४; यर ५:२९; होशे ९:७ 23उ समयम गर्भवती जन्नीमनैन्हक ओ दूध खवैना डाई मनैन्हक कत्रा बिजोग हुहीन, काकरकि भागबेर हुँकन भारी धौ हुइहीन। सारा मुलुकम महासङ्कष्ट आई ओ मनैन्हकम परमेश्वरक कर्रा दण्ड परहीन्। 24विरोधी सेनावँ आकुरजहन तरवालले हत्या करहीँ ओ आकुरजहन नोकरचाकर बनाइक लाग कैद कैक और देशम लैजैहीँ। गैरयहूदीहुँक्र यरूशलेम सहरह आपन कब्जम लेह्हीँ। हुँकन्हक समय पूरा नैहुइट्सम हुँक्र शासन कर्टिरहीँ।”
25येशू कल, “दिन, जोन्ह्या ओ तोरैँयम डरलग्टिक चिन्ह देखपरी। आँधीबौखा ओ समुद्रम उठल छल्कक् गर्जनले सारा जातिन्हकम महासङ्कष्ट आई।#यशै १३:१०; इज ३२:७; योए २:३१; प्रका ६:११-१२ 26संसारम हुइना घटनक डरले मनै मूर्छा परहीँ, काकरकि आकाशमण्डलक सब शक्ति डगमगाई। 27तब मनै मै मनैयक छावह शक्ति ओ महिमम बद्रीम आइट् देखहीँ।#दान ७:१३; प्रका १:७ 28उहओर्से जब असिन घटना हुई लागी त, साहसी होक आपन नजर उठैहो, काकरकि परमेश्वर टुँहन हाली बचाडरहीँ।”
29येशू आपन चेलन झन् स्पष्टसे बुझाइक लाग एकठो आहान कल, “अञ्जीरक रूख्वा ओ और रूख्वक बारेम विचार करो ना। 30जब रूख्वा पल्हाइल कलसे, टुह्र घाम छ्याँक लग्घ बा कैक जन्ठो। 31ओसहेँक जब टुह्र म्वार कहलअस डरलग्टिक घटना हुइट् देख्बो, तब परमेश्वरक राज्य लग्घ आरहल कैक जनहो।
32“मै टुँहन जाट्टीसे कहटुँ, यी सब घटना पूरा नैहुइट्सम यी पुस्ता#२१:३२ यी पुस्ता: याकर अर्थ फरक-फरक तरिकाले लाग सेकी। यदि यी सब घटना (पद ३२) कलक यरूशलेमक विनाश (पद ८-२४) हो, तर येशू फेदोस्र यी संसारम अइना बात (पद २५-२७) नैहो कलसे, यी पुस्ता (पद ३२) कलक येशूक समयम जिटीरहल मनै हुइट। जे होस, यदि यी सब घटनम येशू फेदोस्र यी संसारम अइना बात समेत पर्ठा कलसे, यी पुस्ता कलक हुँक्र हुइट, जे अन्तिम समयक घट्ना घटबेर जिटीरठ, या एकमुष्ठ रूपम यहूदी जातिक मनै हुइट (यर्मिया ३१:३५-३६), या येशूह इन्कार कर्ना मनै हुइट (लूका ७:३०-३१; २०:४६-४७)। याकर और सम्भावित अर्थ यी युग या यी संसार फे हुइसेकी। नैबित्ने हो। 33आकाश ओ धर्ती बित्क जाई, तर म्वार वचन कबु नैबिती।”
जागा रना बारेम सिखैलक
34येशू आपन चेलन कल, “यदि टुह्र परमेश्वरसे धेर और चिजम मन लगैठो कलसे, होसियार रहो। यी जीवनक फिक्री जिन करो। यदि टुह्र खा पिक मत्वारऽ रना ओ मौजमस्ती कर्ना कामम लग्लरबो कलसे, टुह्र महीह भेटाइक लाग तयार नैहुइनेहुइटो, काकरकि फान्डम चिरैँया बाझअस टुह्र नैचिताइल समयम मै अइम। 35मै अइम त, सारा संसारक मनैन झट्का परहीन। 36सब सङ्कष्ट सह सेक्ना शक्ति, ओ मै मनैयक छावा न्याय कर लगम त, टुह्र म्वार सामुन्नेम निर्धक्क होक ठह्र्याइ सेक्ना साहस पाइक लाग सब समयम प्रार्थना कर्टी जागा रहो।”
37 #
लूक १९:४७
येशू हरेक दिन मन्दिरम जाक मनैन सिखाइँट् ओ रात हुइलसे जैतून पर्वत्वम जाक सुतँट्।#२१:३७ मत्ती २१:१७ अनुसार, येशू (ओ उहाँक चेलावँ) जैतून पर्वत्वम रहल बेथानी गाउँम रात रहँट्। उहाँहुँक्र मरियम, मार्था ओ लाजरसक घरम रात रहल हुइसेक्ठ (यूहन्ना ११:१)। मुक्ति-दिवसक समयम यरूशलेमम अउइयन आसपासक गाउँम या टनिक दूरीक गाउँम जाक रात रना सामान्य बात रह, काकरकि यरूशलेमम धेर भीड रह। 38सब मनै उहाँक शिक्षा सुन बिहान्नी मन्दिरम आजाइँट्।
Currently Selected:
लूका 21: thl
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
