लूका 22
22
येशूह मुवैना योजना
मत्ती २६:१४-१६; मर्कूस १४:१०-११; यूहन्ना ११:४५-५३
1खमिर नैमिलाइल रोटी खैना टिहार लग्घ आरलहा। यहीह मुक्ति-दिवस फे कैजैठा।#प्रस १२:१-२७ 2मुख्य पूजारीहुँक्र ओ शास्त्रीहुँक्र येशूह कसिक मुवाइ सेक्जाई कैक मौका ख्वाजँट्, काकरकि यदि बिना कारण येशूह मुवैलसे, मनै विरोध करहीँ कैक हुँक्र डराइँट्।
3यहूदा इस्करियोत बाह्र जन चेलावँमध्ये एकठो रह। वाकर मनम शैतान काम कर्लस। 4ऊ मुख्य पूजारीन्हकठे ओ मन्दिरक रेखदेख करुइयन्हक हाकिमहुँकन्हकठे जाक अप्न येशूह पक्राइ सेक्ना उपायक बारेम बात बट्वाइल। 5वाकर बात सुन्क हुँक्र खुशी हुइल ओ ओहीह पैँसा देना बातम सहमत हुइल। 6तबठेसे यहूदा मनै थाहँ नैपैना हिसाबले येशूह पक्रादेना मौका ख्वाज लागल।
अन्तिम भोजन
मत्ती २६:१७-२५; मर्कूस १४:१२-२१; यूहन्ना १३:२१-३०
7खमिर नैमिलाइल रोटी खैना टिहार आइल्। उ टिहारक पैल्ह दिनह मुक्ति-दिवस कहँट्। उह दिन भेँरीक पठ्रू बलि चह्राजाए। 8येशू पत्रुस ओ यूहन्नह कल, “जाओ मुक्ति-दिवस मनैना खानक व्यवस्था मिलाओ।”
9हुँक्र उहाँह पुछ्ल, “हम्र मुक्ति-दिवसक खाना खैना व्यवस्था कहाँ मिलाई?”
10येशू कल, “टुह्र यरूशलेम सहरम पुग्बो त, गग्रीम पानी बोक्ल एकठो मनैयह भेटैबो। ऊ जौन घरम जाई, टुह्र फे वाकर पाछपाछ उह घरम जैहो। 11ओ उ घरक मालिकह कहहो, ‘गुरु पुछ पठैल: मै आपन चेलन्हकसँग मुक्ति-दिवसक खाना खैना क्वाठा कहाँ बा?’#२२:११ यहूदी व्यवस्था अनुसार मुक्ति-दिवसक खाना यरूशलेमम खाइ पर। उहाँ आइल जौन तिर्थयात्री क्वाठा मङ्ग्लसे फे, मुक्ति-दिवस टिहार मनाइक लाग क्वाठा देना यहूदी चलन रलहन। 12तब ऊ टुँहन उप्रक ताल्हक बर्का क्वाठा देखैहीँ। उ क्वाठा छुटीछुटी टेबल ओ बैठ्ना ढैक ठीकठाक पारल रही। उहँ हमार लाग खैना व्यवस्था मिलैहो।”
13हुँक्र सहरम पुग्ल त, येशूक कहलअस भेँटैल, ओ उहँ मुक्ति-दिवसक खाना खैना व्यवस्था मिलैल।
प्रभुभ्वाज
मत्ती २६:२६-३०; मर्कूस १४:२२-२६; १ कोरिन्थी ११:२३-२५
14खैना ब्याला हुइल् त, येशू ओ उहाँक चेलावँ खाए बैठ्ल। 15उहाँ आपन चेलन कल, “मै दुःख भोग्नासे आघ टुँहनसे सँग बैठ्क मुक्ति-दिवस कना यी टिहारक खाना खैना म्वार भारी इच्छा रह। 16काकरकि परमेश्वरक राज्यम याकर अर्थ पूरा नैहुइट्सम, मै यी खाना फेदोस्र नैखैम।”#२२:१६ परमेश्वरक राज्यम याकर अर्थ पूरा नैहुइट्सम, मै यी खाना फेदोस्र नैखैम: परमेश्वर मिश्रदेशक बन्धनमसे यहूदीहुँकन कसिक छुट्कारा देल कना सम्झनम हुँक्र मुक्ति-दिवसक खाना खाइट्। मुक्ति-दिवसक खानक अर्थ पूरा हुइना कलक क्रूसम येशूक मृत्युक ओ मुवलमसे फेदोस्र जिलक कारण, मनै पापक बन्धनमसे छुट्कारा पैना ओ भविष्यम स्वर्गम परमेश्वरसे सङ्गति कर्ना हो।
17येशू अङ्गूरिक मद#२२:१७ अङ्गूरिक मद डिनडिन लग्नाहा रह, तर पिलसे मनै मत्वार नैहुइँट्, ओ यहूदी समाजम यी मद पिना सामान्य बात रह। रहल खोर्या लेक परमेश्वरह धन्यवाद देल, ओ आपन चेलन देटी कल, “लेओ ओ बाँट-बाँट खाओ। 18मै टुँहन कहटुँ, परमेश्वरक राज्य नैआइट्सम मै अङ्गूरिक मद फेदोस्र नैपियम।”
19तबदोस्र येशू रोटी लेक परमेश्वरह धन्यवाद देल, ओ रोटी खन्टाक चेलन खाइक लाग देटी कल, “टुन्हक लाग देगैल् यी म्वार शरीर हो, म्वार सम्झनम असिक कर्टीरहहो।” #२२:१९ लूका २२:१९ ओ १ कोरिन्थी ११:२३-२६ म, चेलन्हक लाग येशूक करल मुक्तिक कामक सम्झनम, हुँक्र रोटी खैना ओ अङ्गूरिक मद पिना काम कर्टिरहहीँ कना येशूक चाहना रहल बात स्पष्ट लिखल बा।
20असिक खाक सेक्ल त, येशू अङ्गूरिक मद रहल खोर्या लेक कल, “यी त टुन्हक लाग बहाजैना म्वार रगत हो। परमेश्वर मनैनसे कर्लक लौव बाचह यिह रगत क्रियाशील बनैठा।#यर ३१:३१-३४ 21तर हेरो, महीह ध्वाखा देहुइया फे हमारसँग खाए बैठल बा।#भज ४१:९ 22धर्मशास्त्रम लिखलअस मै मनैयक छावह त, मुवही परी। तर महीह ध्वाखा देहुइयह धिक्कार बा।” 23यी सुन्क चेलावँ “असिन खराब काम के करी” कैक अप्न-अप्न पुछीकपुछा कर्ल।
सबसे बरा के हो?
24तबदोस्र चेलावँ परमेश्वरक राज्य आई त, हुँक्रमध्येम सबसे बरा पद के पाइ कैक अप्न-अप्न वादविवाद करलग्ल।#मत्ती १८:१; मर्क ९:३४; लूक ९:४६ 25उहओर्से येशू हुँकन कल, “यी संसारक शासकहुँक्र जनतन्हकम मनमानी शासन चलैठ। हुँक्र अपन्हेह जनतन्हक उपकार करुइयन सम्झठ।#मत्ती २०:२५-२७; मर्क १०:४२-४४ 26तर टुह्र ओसिन जिन होओ। बेनसे टुह्रमध्ये बरा हुइखोजुइया साधारण मनैयाअस ओ अगुवा हुइखोजुइया सेवकअस व्यवहार करपर्ठा।#मत्ती २३:११; मर्क ९:३५ 27कौन मनैया बरा हो: खाए बैठुइया मालिक कि खाना देहुइया नोकर? मालिक नैहो का? तर मै टुन्हक बीचम सेवा करुइयाअस बाटुँ।#यूह १३:१२-१५ 28म्वार सब दुःखकष्टम म्वारसँग रहुइयन टुह्रहे हुइटो। 29म्वार परमेश्वर बाबा महीह राज्य कर्ना अधिकार देहल्अस, मै फे टुँहन राज्य कर्ना अधिकार देहटुँ। 30मै राजा हुइम त, टुह्र म्वारसँग खानपिन कर्बो ओ राजगद्दीमअस आपन-आपन आसनम बैठ्क इस्राएलक बाह्र कुलक न्याय कर्बो।”#मत्ती १९:२८
पत्रुस इन्कार कर्ना बारेम
मत्ती २६:३१-३५; मर्कूस १४:२७-३१; यूहन्ना १३:३६-३८
31तबदोस्र येशू पत्रुसह कल, “सिमोन, सिमोन#२२:३१ सिमोन, सिमोनयेशू पत्रुसह एकठो महत्वपूर्ण बातक चेताउनी देहक लाग रलह। उहाँ पत्रुसक ध्यान खिँचक लाग दुइचो “सिमोन, सिमोन” कैक कल। येशू पत्रुस नाउँ (याकर अर्थ चट्टान अर्थात् बल्गर ओ आदरणीय चरित्र हो) नैलेल, तर हुँकहार और नाउँ सिमोन लेल, जौन नाउँले सम्भवत: पत्रुस और मनैन्हकअस कमजोर बाट कना बुझ्जाए।, हेरो! भुस ओ गोहूँ अल्गाइक लाग किसान गोहूँ ओसाइअस, परमेश्वरम जाट्टीसे विश्वास करुइयन ओ नैकरुइयन अल्गाइक लाग शैतान टुन्हक जाँच कर्ना अनुमति माङराखल। 32तर टुँहार विश्वास कमजोर जिन ह्वाए कैक मै टुँहार लाग प्रार्थना कैदेनु। टुँ विश्वासम फेदोस्र बल्गर हुइबो त, आपन दादुभैयन फे विश्वासम बल्गर हुइक लाग सहायता करहो।”
33पत्रुस कल, “प्रभु, मै अप्नकसँग झ्यालखानम जाइपर्लसे फे या मुवपर्लसे फे तयार बाटुँ।”
34येशू कल, “पत्रुस, मै टुँहीन कहटुँ, आज रात मुर्घा बस्नासे आघ, टुँ महीह चिन्बोचिन्बोनैकर्टुं कैक तीनचो इन्कार कर्बो।”
चेलावँ तयार रहपर्ना बारेम
35तबदोस्र येशू आपन चेलन कल, “मै टुँहन खुशीक खबर प्रचार कर पठाइबेर टुँहन पैँसा, झ्वाला, ओ चप्पल बोक्क लैजाइ नैदेनु। टुह्र छुच्छ हाँठ गैलो त, का टुँहन कुछु चिजिक हर्जा हुइल्?”
हुँक्र कल, “नैहुइल्।”#मत्ती १०:९-१०; मर्क ६:८-९; लूक ९:३; १०:४
36येशू कल, “आब टुन्हकठे पैँसा बा कलसे, पैँसा बोको, झ्वाला बा कलसे, झ्वाला फे बोको। ओ तरवाल नैहो कलसे, आपन झुल्वा बेँच्क हुइलसे फे तरवाल किनो। 37धर्मशास्त्रम ‘उहाँ अपराधीम गनगैल’ कैक लिखल बा। यी बात म्वार बारेम लिख्गैल् हो, म्वार जीवनम पूरा हुइहीपरी, ओ पूरा हुइना दिन फे पुगरहल।”#यशै ५३:१२
38चेलावँ कल, “हेरी, प्रभु, हमारठे दुइठो तरवाल पलबा।”
येशू कल, “बस, होगैल्!”#२२:३८ कुई-कुई यी बातह असिक फे बुझ्ठ: येशू कल, “होगैल्, यी बात छोरदेओ।”
येशू प्रार्थना कर्लक
मत्ती २६:३६-४६; मर्कूस १४:३२-४२
39तबदोस्र येशू आपन चेलन्हकसँग सहरसे बाहर रहल जैतून पर्वत्वम गैल। उहाँहुँक्र रात बैठ सड्ड उहँ जाइँट्। 40उहाँहुँक्र उ ठाउँम पुग्ल त, येशू चेलन कल, “प्रार्थना कर्टिरहो त परीक्षम नैपर्बो।” 41येशू अप्नजुन टनिक दूर जाक ढोक्र्यागैल ओ परमेश्वरसे प्रार्थना करलग्ल, 42“परमेश्वर बाबा, अप्नक इच्छा बा कलसे, यी दुःख म्वारमसे हटादी।#२२:४२ ग्रीक भाषक स्रोतमसे शाब्दिक रूपम अनुवाद कर्लसे “यी खोर्या म्वारठेसे हटादी” कना हुइठा। खोर्या कलक परमेश्वर सारा संसारक पापह दण्ड देहबेर येशू सहपर्ना दुःख हो। तर म्वार इच्छा अनुसार नैहोक अप्नक इच्छा अनुसार ह्वाए।” 43उहाँ प्रार्थना करबेर एकठो स्वर्गदूत आक उहाँह सहना शक्ति देल। 44येशू आउर जोड्दार हिसाबले परमेश्वरसे प्रार्थना कर्ल, काकरकि उहाँ धेर दुःखीत रलह ओ उहाँक मनम पीर परलरलहन। प्रार्थना करबेर उहाँक पस्ना रगतक बुन्डाअस भूइँयम गिरटलहन।
45येशू परमेश्वरसे प्रार्थना कैक सेक्क उठ्ल ओ चेलन्हकठे घुम्क अइल त, चेलन शोकले डट्कर्क निन्दाइल देख्ल। 46उहाँ हुँकन कल, “काजे सुतल् बाटो? उठो ओ प्रार्थना कर्टिरहो त परीक्षम नैपर्बो।”
येशूह पक्रलक
मत्ती २६:४७-५६; मर्कूस १४:४३-५०; यूहन्ना १८:३-११
47येशू आपन चेलनसे बात बट्वैटीरलह त, एक बगाल मनै आगैल। हुँकन अनुइया यहूदा रह, जे येशूक बाह्र जन चेलामध्येक एकठो चेला रह। यहूदी चलन अनुसार, यहूदा अभिवादन कना अर्थम येशूह चुम्बन करक लाग उहाँक लग्घ गैल्। 48येशू ओहीह कल, “यहूदा, काजे टुँ चुम्बन कैक मै मनैयक छावह ध्वाखा देहटो?”
49खतरा हुइना देख्क येशूकठे रहल चेलावँ कल, “प्रभु, हम्र तरवाल झम्काई?” 50हुँक्रमध्ये एकठो चेला तरवाल झम्काडारल, त प्रधान पूजारीक कमारक दाहिन कान च्वाट्टसे काटगैलस।
51तर येशू कल, “होगैल्, रहन्देओ।” तब उहाँ उ मनैयक कान छुक चोखादेल।
52मुख्य पूजारीहुँक्र, मन्दिरक द्वरपालेन्हक कप्तानहुँक्र ओ और अगुवाहुँक्र येशूह पक्र आरलह। येशू हुँकन कल, “का मै डाँका हुइटुँ, टुह्र तरवाल ओ भाला लेक महीह पक्र आरलो? 53मन्दिरम दिनका दिन मै टुन्हक्केसँग रहुँ, तब टुह्र महीह पक्रबोनैकर्लो। तर आब टुन्हक समय आरहल, जब अन्धकारक रज्वा राज्य करपैठा।”#लूक १९:४७; २१:३७
पत्रुसक इन्कार
मत्ती २६:६९-७५; मर्कूस १४:६६-७२; यूहन्ना १८:१२-१८,२५-२७
54हुँक्र येशूह पकर्क प्रधान पूजारीक घरम लैगैल। पत्रुस दूरसे हुँकन्हक पाछपाछ गैल। 55मनै प्रधान पूजारीक अङ्नम पुग्ल त, आगी सुङ्गाक तापलग्ल। पत्रुस फे हुँकन्हकसँग आगी तापटलह। 56एकठो कमारी पत्रुसह हुँकन्हकसँग आगी तापत् द्याखल। तबदोस्र उ कमारी हुँकहीन निहार्क ह्यारल ओ कहल, “यी मनैया फे येशूकसँग रह।”
57तर पत्रुस अस्वीकार कर्टी कल, “बाबु, टुँ का कहटो? मै ओहीह चिह्न्ना फे नैचिह्न्टुँ।”
58टनिक बेर पाछ और मनैया पत्रुसह देख्ल त, हुँकहीन कल, “भैया, पक्क फे टुँ उह बगालक हुइटो।”
पत्रुस फेदोस्र अस्वीकार कर्टी कल, “मै उ बगालिक कहाँ रहम?”
59लगभग एक घण्टा पाछ और मनैया कहल, “यी मनैया पक्क फे येशूकसँग रलह, काकरकि यी गालील क्षेत्रक हुइट।”
60पत्रुस कल, “अप्न का बात बट्वाइटी, महीह थाहँ नैहो।” ऊ बोल्टीरलह त मुर्घा बासगैल्। 61तब प्रभु घुम्क पत्रुसह हेर्ल। तब “आज रात मुर्घा बस्नासे आघ टुँ महीह तीनचो अस्वीकार कर्बो” कैक येशूक कहल बात पत्रुस सम्झल। 62उ बात सम्झटीकि, पत्रुस बाहर जाक ह्वाँकह्वाँक-ह्वाँकह्वाँक रुइलग्ल।
येशूक गालीबेजती
मत्ती २६:६७-६८; मर्कूस १४:६५
63येशूह कब्जम लेहुइयन उहाँह गिल्ला कर्ल ओ उहाँह पिट्ल। 64हुँक्र येशूक आँखिम पट्टी बाहान्देल ओ उहाँह कल, “टोहीह के पिटल? ल्या कोह्!” 65असिक हुँक्र उहाँह अनेक गालीबेजती कर्ल।
महासभक सामुन्ने येशू
मत्ती २६:५९-६६; मर्कूस १४:५५-६४; यूहन्ना १८:१९-२४
66यहूदी महासभक सदस्यम जनतन्हक अगुवाहुँक्र, मुख्य पूजारीहुँक्र, ओ शास्त्रीहुँक्र रलह। अजरार हुइल् त, महासभक बैठक बैठल। सिपाहीहुँक्र येशूह उह बैठकम अन्ल। 67हुँक्र येशूह कल, “का ख्रीष्ट टैँहे हुइट्या? हुइट्या कलसे ‘हुइटुँ’ कोह्।”
येशू कल, “मै ‘हुइटुँ’ कहम त फे अप्नहुँक्र नैपत्यैनेहुइटी। 68यदि मै कुछु पुछम कलसे, अप्नहुँक्र जवाफ नैदेनेहुइटी। 69तर आबठेसे मै मनैयक छावा, सर्वशक्तिमान् परमेश्वरक दाहिन पाञ्जर#२२:६९ परमेश्वरक दाहिन पाञ्जर: परमेश्वरक दाहिन पाञ्जर कलक अधिकार, शक्ति ओ आदरक ठाउँ हो। बैठम्।”
70हुँक्र सबजन येशूह पुछ्ल, “का टैँ जाट्टीसे परमेश्वरक छावा हुइट्या?”
येशू कल, “अप्नहुँकन्हक कहलअस जाट्टीसे त हुइटुँ।”
71हुँक्र अप्न-अप्न कल, “यी दोषी रहल बात त हम्र यक्र मुहसे सुन्डर्ली। आब हमन और साक्षी का चाहल?”
Currently Selected:
लूका 22: thl
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
