लूका 8
8
पुगअपुगम सहायता करुइयन
1तबदोस्र येशू सहर-सहर ओ गाउँ-गाउँम जाक परमेश्वरक राज्यक बारेम खुशीक खबर प्रचार कर्ल। बाह्र जन चेलावँ फे उहाँकसँगसँग रलह। 2भूत लागलमसे ओ रोगसे चोखाइल धेर जन्नीमनै फे सँगसँग रलह। हुँक्रमध्ये सातठो भूत लग्लकमसे चोखाइल मगदाला सहरक मरियम फे रलही।#मत्ती २७:५५-५६; मर्क १५:४०-४१; लूक २३:४९ 3शासक हेरोदक नोकरमध्ये मुख्य मनैया खुजासक गोसिन्या योअन्ना रलही। सँगसँग सुसन्ना ओ और धेर जन्नीमनै फे रलह। येशू ओ उहाँक चेलन्हक पुगअपुगम सहायता करुइयन हिँक्रहे रलह।
बीया बुउइयक बारेम आहान
मत्ती १३:१-९; मर्कूस ४:१-९
4कैयौ सहरसे धेर मनै येशूकठे अइटीरलह। उहाँ यी आहान हुँकन कल, 5“हेरो! एकठो किसान बीया ब्वाय निक्रल। बुइटीबुइटी, आकुर बीया डगरिम परल। उ बीया मनै डब्ल ओ चिरैँचुरुङ्गन आक खाडर्ल। 6आकुर बीया माटी कम रहल पत्थ्राहा जग्गम परल। उ बीया जम्ना त जामल, तर धेर ओडी नैरलकओर्से, हाली सुख्गैल्। 7आकुर बीया कँटाहा जग्गम परल,#८:७ कँटाहा जग्गा कलक काँटक जर या बीया रहल जग्गा कहल हो। उहओर्से जब बुइल बीया जाम, तब वाकर सँगसँग काँट फे जामजाए, ओ बालीसे फे ढ्याङ होजाए। तर काँटकमार जम्ल बीया फे बाह्र नैपाइल। 8आकुर बीया मलगर जग्गम परल। उ बीया जामल ओ उहिँम सय गुणा फारा लागल।” तब येशू कल, “ज्याकर सुन्ना कान बा, यी बात उह बुझी।”
आहानक उद्देश्य
मत्ती १३:१०-१७; मर्कूस ४:१०-१२
9येशूक चेलावँ उहाँह, “यी आहानक अर्थ का हो?” कैक पुछ्ल। 10येशू हुँकन कल, “टुँहन परमेश्वरक राज्यक रहस्यमय बात बुझ्ना अक्किल देगैल् बा। तर और मनैनभर मै आहानम शिक्षा देठुँ ताकि,
हुँक्र देख्ना त देख्ठ,
तर बुझ्बो-बुझ्बो नैकर्ट।
सुन्ना त सुन्ठ,
तर बुझ्बो-बुझ्बो नैकर्ट।”#यशै ६:९-१०
आहानक अर्थ
मत्ती १३:१८-२३; मर्कूस ४:१३-२०
11“यी आहानक अर्थ का हो कलसे, बीया कलक परमेश्वरक वचन हो। 12डगरिम परल बीया कलक ओसिन मनै हुइट: हुँक्र वचन सुन्ठ, तर सुन्टीकि, शैतान आक हुँकन्हकमसे वचन लैजिठा ओ हुँकन विश्वास कर ओ मुक्ति पाए नैदेहट्। 13अस्तक पत्थ्राहा जग्गम परल बीया कलक ओसिन मनै हुइट: हुँक्र जब वचन सुन्ठ, तब खुशीसे स्वीकार कर्ठ। तर हुँक्र वचनह आपन मनम गहिँरसम जर ट्याक नैदेलकओर्से, हुँक्र धेर समयसम विश्वास नैकर्ट। हुँकन्हक जीवनम सतावट या समस्या अइठन त, विश्वासमसे पाछ हट्जैठ। 14कँटाहा जग्गम परल बीया कलक ओसिन मनै हुइट: हुँक्र वचन सुन्ठ, तर पाछ जीवनक बारेम चिन्ता, मनैन लोभैना धनसम्पत्ति, ओ और मोजमजा कर्ना चिजिक ल्वाभलालचले वचनह बाह्र नैदेहट्। उहओर्से हुँकन्हकम फारा नैफरट्, 15तर मलगर जग्गम परल बीया कलक ओसिन मनै हुइट: हुँक्र वचन सुन्क खुशीसे स्वीकार कर्ठ। हुँक्र इमान्दार ओ आज्ञाकारी रलकओर्से मलगर माटीम धेर उब्जनी हुइअस फारा#८:१५ आत्मिक फारा हो। धेर फरैठ।”
दियक आहान
मर्कूस ४:२१-२५
16तबदोस्र येशू कल, “कौनोजन दिया बार्क ढक्यले छोप्ठ या खट्टेक टर ढर्ठ का? बेनसे घरम अउइयन अजरार पैहीँ कैक सामदानम पो ढैजिठा।#मत्ती ५:१५; लूक ११:३३ 17काकरकि गोप्यम रहल सब बात खुलस्त पारजैनेबा।#मत्ती १०:२६; लूक १२:२ 18#मत्ती २५:२९; लूक १९:२६उहओर्से सुन्ना बातम ध्यान देओ। काकरकि ज्याकरठे बा ओहीह आकुर देजाई ओ ज्याकर नैहो वाकरठे ज्या बा कैक उ सम्झठा उ फे वाकरमसे अछिन्जाई।”#८:१८ यी पदक अर्थ हो: काकरकि म्वार वचन बुझ्ना कोसिस करुइयन आउर बुझ्टीजहीँ, तर बुझ्ना कोसिस नैकरुइयन “हम्र परमेश्वरक वचन बुझ्ली” कैक गल्ती विचार कर्लसे फे, हुँकन्हक सुनल डान्चे वचन फे जातसे हेराजहिन।
येशूक डाई ओ भैयन
मत्ती १२:४६-५०; मर्कूस ३:३१-३५
19तबदोस्र येशूक डाई ओ भैयन उहाँह भेँटाए अइल। मनैन्हक भीड रहलओर्से, हुँक्र उहाँह भ्याँट नैसेक्ल। 20कुई उहाँह कहल, “अप्नक डाई ओ भैयन अप्नह भ्याटक लाग बाहर अश्या लागट।”
21येशू कल, “परमेश्वरक वचन सुनुइयन ओ कहल मनुइयन म्वार डाई ओ भैयन हुइट।”
आँधीह शान्त पर्लक
मत्ती ८:२३-२७; मर्कूस ४:३५-४१
22एक दिन येशू चेलन्हकसँग लाऊम चिहुर्ल ओ हुँकन कल, “आब हम्र समुद्रक उपार जाई।” 23उहाँहुँक्र ओठेसे नेङ्ग्ल। जैटीजैटी येशू लाऊम निन्दागैल। उहब्याला आँधीबौखा आइल ओ लाऊ पानीले भर लागल त, हुँक्र बरा आपत्म परगैल।
24चेलावँ येशूकठे जाक असिक कटी उहाँह उठैल, “गुरुजी, गुरुजी हम्र बुरलग्ली!”
येशू उठ्ल ओ आँधीबौखा ओ छल्कह हप्कैल। तबहेँ आँधीबौखा ओ छल्का ठम्ह्गैल् ओ जातसे शान्त होगैल्। 25येशू चेलन कल, “टुन्हक विश्वास खै?”
हुँक्र छक्क पर्ल ओ डरैटी अप्न-अप्न कल, “यी कसिन मनैया हुइट? आँधीबौखा ओ छल्का समेत हिँकहार कहल मन्ठन।”
धेर भूत लागल मनैयह चोखैलक
मत्ती ८:२८-३४; मर्कूस ५:१-२०
26तबदोस्र उहाँहुँक्र लाऊम गालील समुद्रक उपार गेरासेनस कना क्षेत्रम गैल। 27येशू लाऊमसे उत्रल त, धेर भूत लागल एकठो मनैया उहाँक सामुन्ने आइल। ऊ सहरक मनैया रह, तर वाकर नङ्ट रलक ओ घरम नैबैठ्लक धेर दिन होरलहस। ऊ मुवल मनैन ढर्ना ठाउँओर केल बैठ। 28येशूह देख्टीकि ऊ कर्रसे चिल्लाइल ओ उहाँक पाउ पर्टी कहल, “सबसे उच्च परमेश्वरक छावा, येशू! अप्नक हमनसे का काम? म्वार बिन्ती बा, कि अप्न परमेश्वरक नाउँम ‘मै टुँहन दण्ड नैदेहम’ कैक कही।” 29काकरकि येशू उ भूतन पैल्हहेँ “ओहीह छोर्” कैरख्लह। भूत्वा उ मनैयह घरीघरी आक्रमण करस। सिक्रीले वाकर हाँठ ओ ग्वारा बाहान्देलसे फे, ओहीह रेखदेख करुइयन्हक सामुन्नेम ऊ सिक्रीह टुर्क छाङछिङ पारदेह ओ भूत्वा ओहीह सुनसान ठाउँओर नेङ्गाइस।
30येशू ओहीह पुछ्ल, “ट्वार नाउँ का हो?”
ऊ उहाँह जवाफ देहल “म्वार नाउँ ‘हजार्या’ हो,” काकरकि उ मनैयह धेर भूत लागरलह। 31तबदोस्र उ भूत “हमन अतल कुण्डम जिन पठाई” कैक येशूसे घरीघरी बिन्ती कर्ल।
32ओठे लग्घ पक्खोम एक बगाल सुवर चह्रटलह। उ भूत “हमन उह सुरिन लाग दी” कैक बिन्ती कर्ल। येशू हुँकन अनुमति देल। 33भूत उ मनैयकमसे निकर्क सुरिन्हकम गैल। तब सलबगालीक सुवर पख्वमसे ढनमनैटी समुद्रम गिर्ल ओ बुर्क मुगैल।
34यी देख्क उ सुवर चह्रुइयन ओठेसे भग्ल ओ यी बात सहर ओ आसपासक इलाकम फैलैल। 35तब धेर मनै का होरहल कैक ह्यार अइल। हुँक्र येशूकठे अइल त, भूत लागल मनैयह चोखाइल देख्ल। ऊ लुगा लगैलरह ओ वाकर दिमाग ठीक होरलहस। हुँक्र ओहीह येशूक पाउठे बैठल देख्क डरैल। 36उ मनैया कसिक चोखाइल कैक देखुइयन उ घटनक बारेम हुँकन्हकठे बट्वादेल। 37तब गेरासेनस कना इलाकम रहल धेर गाउँक मनै येशूह “अप्न हमार इलाका छोर्क चल्जाइ” कैक बिन्ती कर्ल, काकरकि हुँक्र एकदम डरारलह। येशू समुद्रक उपार घुमक लाग लाऊम चिहुर्ल त, 38उ चोखाइल मनैया उहाँसे बिन्ती करल, “महीह फे अप्नकसँग लैजाई।”
तर येशू ओहीह घर पठैटी कल, 39“आपन घर जाओ ओ परमेश्वर टुँहार लाग महान काम कैदेल कैक सबजहन सुनाओ।” तब उ मनैया गैल् ओ “येशू महीह चोखैल” कैक सारा सहरम प्रचार करल।
मुवल लौँर्या ओ बेराम महिला
मत्ती ९:१८-२६; मर्कूस ५:२१-४३
40येशू गालील समुद्रक उपार पुग्ल त, सब मनै उहाँह स्वागत कर्ल, काकरकि हुँक्र उहाँक अश्या लागटलह। 41उहब्याला याइरस नाउँ रहल सभाघरक शासक आक येशूक पाउ पर्टी “म्वार घर आदी” कैक एकदम कर्रसे बिन्ती करलग्ल, 42काकरकि हुँकहार एक्कठो केल सन्तान बाह्र वर्षक छाई मुवमुव करटलहन।
येशू हुँकाहारसँग जाइलग्ल त, चारिओर्से मनैन्हक भीड उहाँह डब्नाअस करटलह। 43भीडम एकठो जन्नीमनैया रलही। हुँकहार रगत बहटी रना समस्या#८:४३ रगत बहटी रना समस्या: यी मैन्हावारी बिग्रल समस्या हुइसेकी। हुँकहार रगत बाह्र वर्षसम बहटीकबहटी त नैरहलहुहीन, तर ब्याला-ब्यालाम हुँकहार मैन्हावारीक समयम सामान्य अवस्थमसे धेर रगत बहल हुहीन। हुइलक बाह्र वर्ष होरलहीन। बैदावनसे देखाइट्-देखाइट् आपनठे रहल सक्कु धनसम्पत्ति खर्च कैरख्लही। तर फे हुँकहार रोगम कुछु सुधार नैहुइलरलहिन। 44मनैन्हक भीडम खुस्टटी येशूक पाछ जाक उहाँक लुगक किनार छुटीकि हुँकहार रगत बहना रोग चोखागैलिन्।
45येशू कल, “महीह के छुवल् हँ?”
सबजन “मै नैछुनु” कल।
पत्रुस कल, “गुरुजी, भीडमक मनै ढकेलिकढकेला कर्नाम अप्नह छुउइय हुइल।”
46तर येशू कल, “कुई महीह छुलक्क हो, काकरकि म्वारमसे शक्ति निक्रलक मै थाहाँ पैनु।”
47आब नुक नैसेक्जाइ कना सोँच्क उ जन्नीमनैया डरले लग्लगैटी#८:४७ उ जन्नीमनैया काजे डरैली कलसे हुँकहार रगत बहना रोग रलक कारण यहूदीन्हक चलन अनुसार ऊ अशुद्ध रलही, ओ अशुद्ध मनै औरजहन छुव नैपाइँट्। तर ऊ जन्नीमनैया येशूह छुली ओ छुटीसाइट येशूजुन “महीह कै छुवल हँ?” कलकओर्से ऊ जन्नीमनैया “गल्ती कैडर्नु कि?” कैक डरैली। येशूक सामुन्ने आक उहाँक पाउ पर्ली। ऊ अप्न येशूह छुलक कारण ओ छुटीकि चोखैलक बात सबजन्हक आघ बट्वादेली। 48येशू हुँकहीन कल, “बाबु, म्वारम विश्वास कर्लकओर्से टुँ चोखारलो, आब मजासे जाओ।”
49येशू उ जन्नीमनैयसे बट्वैटीरलह त, सभाघरक अगुवा याइरसक घरसे खबर लेक आइल मनै कल, “अप्नक छाई त ओरागैल्, आब गुरुजीह काकर दुःख देना?”
50यी सुन्क येशू याइरसह कल, “जिन डराओ, म्वारम विश्वास कर्लरहो, उ लौँर्या जिजाई।”
51येशू याइरसक घर पुग्ल त, पत्रुस, याकूब, यूहन्ना ओ लौँर्यक डाई-बाबह बाहेक और कौनोजहन भित्तर पैँठ नैदेल। 52घरम लौँर्या मुलक कारण मनै विलाप कै-कै रुइटलह। येशू हुँकन कल, “जिन रोओ, बाबु मुवल नैहो, यी त सुतल् बा।”
53तर लौँर्या मुगैल् कैक सबजहन थाहाँ हुइलकओर्से, हुँक्र उहाँक बात हाँसिम उरादेल। 54तब येशू उ लौँर्यक हाँठ पकर्क कल, “बाबु, उठ्!” 55तबहेँ उ लौँर्यक प्राण घुम्क आगैलिस, त ऊ जुरुक्कसे उठगैल्। येशू हुँकन “लौँर्यह कुछुकुछु खाइक लाग देओ” कल। 56लौँर्यक डाई-बाबह बहुत अचम्म लग्लन। तर येशू हुँकन यी विषयम “किहुसे जिन बटोइहो,” कैक कर्रा आज्ञा देल।
Currently Selected:
लूका 8: thl
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
