लूका 9
9
बाह्र चेलन्हक सेवा
मत्ती १०:५-१५; मर्कूस ६:७-१३
1येशू बाह्र जन चेलन बलैल। हुँकन भूत लागल सब मनैन्हकमसे भूत निकर्ना ओ बेरम्हेन चोखैना शक्ति ओ अधिकार देक 2परमेश्वरक राज्यक प्रचार कर ओ बेरम्हेन चोखाए पठैल। 3उहाँ हुँकन कल, “यात्रम टेक्नी, झ्वाला, खैना चिज, पैँसा, ओ फेर्ना लुगालत्ता कुछु जिन बोकहो।#लूक १०:४-११; प्रे १३:५१ 4टुह्र जौन घरम बास बैठ्बो, गाउँसे नैनिक्रटसम, उह घरम बास बैठ्लरहहो। 5यदि मनै टुँहन स्वागत नैकरहीँ कलसे, उ ठाउँसे जाइबेर परमेश्वरक न्यायक चिन्ह देखाइक लाग आपन ग्वारक धूर झराअइहो।#९:५ आपन ग्वारक धूर झरैना काम गाउँक मनैन चेताउनी देना काम कर, काजेकलसे चेलावँ खुशीक खबर प्रचार करल समयम हुँक्र सुन्ल, तर हुँक्र परमेश्वर मनैन देना मुक्ति स्वीकार नैकर्ल। आपन ग्वारक धूर झरैना काम, चेलावँ गाउँक मनैनसे सक्कु सम्बन्ध टुटाइट ओ हुँक्र गल्लीमक धूर समेत आपन ग्वारम लाग नैदेहठुइट कना बातक संकेत कर्ठा। चेलावँ येशू ख्रीष्टक ओ परमेश्वरक प्रेरित रलकओर्से, याकर मतलब यदि गाउँक मनै आपन पापी मन घुमाक परमेश्वरकठे नैअइना हो कलसे, परमेश्वरक दण्ड परिअइलसे, हुँक्र अपन्हे जिम्मेवार बाट कना फे हो।” 6तबदोस्र चेलावँ गाउँ-गाउँम जाक खुशीक खबर प्रचार कर्ल ओ रोग्याबेरम्हेन चोखैल।
7गालील क्षेत्रक शासक हेरोद येशूक करल सक्कु कामक बारेम सुन्क अलमलम परगैल, काकरकि कुई कहँट्, “यूहन्ना मुवलमसे जिरल।”#मत्ती १६:१४; मर्क ८:२८; लूक ९:१९ 8कुई कहँट्, “यी त एलिया हुइट।” कुईजुन, “यी त अघट्टे अगमवक्तामध्येक मुवलमसे जिरल” कहँट्। 9हेरोद कल, “यूहन्नक घ्याँचा त मै काट लगैनहुँ। तर यी के हुई ज्याकर बारेम मै असिन बात सुनटुँ?” तबठेसे ऊ येशूह भ्याँट कर्ना विचार कर्टीरल।
पाँच हजार मनैन खवैलक
मत्ती १४:१३-२१; मर्कूस ६:३०-४४; यूहन्ना ६:१-१४
10प्रेरितक रूपम पठागैल् चेलावँ येशूकठे घुम्ल। हुँक्र जौन-जौन काम कैरख्लह, उ सक्कु बात येशूकठे बटोइल। तब येशू आपन चेलन केल लेक बेथसेदा सहरक लग्घ रहल उजार ठाउँम गैल। 11तर धेर मनै यी बात थाहाँ पैल त, पाछपाछ गैल। येशू हुँकन स्वागत कर्ल ओ परमेश्वरक राज्यक बारेम सिखैल। उहाँ बेरम्हेन फे चोखैल।
12जब सन्झ्या हुइलागल, तब येशूक चेलावँ उहाँकठे जाक कल, “यी मनैन विदा कैदी। हिँक्र आसपासक गाउँम जाक आपन खैना, बैठ्ना व्यवस्था अपन्हे करहीँ, काकरकि हम्र उजार ठाउँम बाटी।”
13येशू हुँकन कल, “टुह्रहे हिँकन खैना देओ।”
चेलावँ उहाँह कल, “हमारठे पाँचठो रोटी ओ दुइठो मच्छी केल बा। का हम्र अत्रा धेर जन्हक लाग खैना चिज किन्क आनी?” 14पुरुष मनै केल पाँच हजार रलह।
येशू चेलन कल, “मनैन पचास-पचास जन्हक समूह बना-बना बैठाओ।” 15चेलावँ मनैन ओसहेँक बैठ लगैल। 16येशू पाँचठो रोटी ओ दुइठो मच्छी लेक स्वर्गओर हेर्टी परमेश्वरह धन्यवाद देल। तबदोस्र उहाँ रोटी खन्टा-खन्टा चेलन देल, चेलाहुँक्र मनैन देल।#९:१६ येशू रोटी ओ मच्छी चेलन देटीरल, काकरकि उहाँ अन्तसे आन्क नाहीँ, तर अचम्मक तरिकाले रोटी ओ मच्छी बह्राक मनैन खवाइक लाग चेलन देल। 17हुँक्र सबजन अघाअघा खैल, ओ उब्रल टुक्रिटुक्रा उठैल त बाह्र छिट्वा हुइल्।
पत्रुसक स्वीकार
मत्ती १६:१३-२१; मर्कूस ८:२७-३१
18एक दिन येशू अकल्हे परमेश्वरसे प्रार्थना करटलह। उ ब्याला चेलावँ फे लग्घहेँ रलह। येशू हुँकन पुछ्ल, “मनै महीह के हो कैक कठ?”
19हुँक्र कल, “कौनोजन अप्नह ‘बप्तिस्मा देहुइया यूहन्ना हुइट’ कठ, कौनोजन ‘एलिया हुइट’ कठ, कौनोजनजुन ‘अघट्टेक अगमवक्तामध्येक एक जन मुक फेदोस्र जिरल’ कठ।”#मत्ती १४:१-२; मर्क ६:१४-१५; लूक ९:७-८
20येशू हुँकन पुछ्ल, “टुह्र जे! महीह के हो कैक कठो?”
पत्रुस उहाँह जवाफ देल, “अप्न परमेश्वरक पठाइल ख्रीष्ट हुइटी।”#यूह ६:६८-६९
21तब येशू यी विषयम “कौनोजहनसे जिन बटोइहो” कैक हुँकन कर्रा आज्ञा देल।
22येशू कटीगैल, “मै मनैयक छावह दुःखकष्ट सहपरी। अगुवाहुँक्र, मुख्य पूजारीहुँक्र ओ शास्त्रीहुँक्र महीह इन्कार करहीँ। ओ मै मुवापैम तर तीसर दिनम मुवलमसे फेदोस्र जिजैम।”#९:२२ येशू क्रूसम मुल त, मनै उहाँक शरीरह एकठो बरानक पत्थ्रा खोल्क बनाइल गर्यम ढर्ल (मर्कूस १५:४३-४६)। पाछ, येशू फेदोस्र जिगैल। यी और जुनी लेक अइना बात नैहो (अर्थात् च्वाला फेर्ना काम फे नैहो), भेष बदल्ना काम फे नैहो। तर मुनासे आघ येशूक उमेर, रूप, रङ्ग जसिन रलहिन, मुवलमसे फेदोस्र जिल त, उह उमेरम, उह रूप, रङ्गम उह येशू जिटीह बाट कना बात हो।
23येशू सबजहन कल, “कौनो मनैया म्वार पाछ लाग चहठा कलसे, ऊ आपन इच्छा छ्वार ओ हरेक दिन आपन क्रूस बोक्क म्वार पाछ लाग।#मत्ती १०:३८; लूक १४:२७ 24काकरकि आपन प्राण बचाइ खोजुइयन प्राण गुमैहीँ। तर म्वार पाछ लग्लक कारण आपन प्राण गुमुइयन जीवन पैहीँ।#मत्ती १०:३९; लूक १७:३३; यूह १२:२५ 25संसारभरिक धनसम्पत्ति हाँठ पर्लसे फे, मनै अपन्हेह गुमाडर्ल कलसे, हुँकन का फाइदा? 26महीसे ओ म्वार वचनसे कुई शरम जिन मान। यदि कुई शर्माई कलसे, मै मनैयक छावा आपन महिमम फेदोस्र यी संसारम अइम त, मै फे ओहीसे शर्मैनेबाटुँ। मै उ ब्याला परमेश्वर बाबक ओ पवित्र स्वर्गदूतन्हक महिमम अउइयाबाटुँ। 27मै ठोक्वा कहटुँ कि अठे रहल कौनो-कौनो मनै परमेश्वरक राज्यह नैद्याखट्सम नैमुनेहुइट।”
येशूक रूप परिवर्तन
मत्ती १७:१-८; मर्कूस ९:२-८
28येशू यी बात कलक लगभग आठ दिन पाछ पत्रुस, यूहन्ना ओ याकूबह लेक येशू पर्वत्वम परमेश्वरसे प्रार्थना कर गैल।#२ पत्र १:१७-१८ 29परमेश्वरसे प्रार्थना कर्टीकर्टी उहाँक रूप बद्ललन#९:२९ उहाँक रूप बद्ललन याकर मतलब उहाँक रूपक आकारप्रकार बदलगैलन कलक नैहो, तर उहाँक अनुहार उहाँक लुगाअस चह्कार उज्जर हुइलन कहल हो। ओ उहाँक लुगा चम्कना उज्जर हुइलन। 30तब्बहे मोशा ओ एलिया देखपर्ल, ओ येशूसे बात बट्वाइलग्ल। 31यी दुइ जन फे चह्कार उज्जर देखपर्ल। उहाँहुँक्र यरूशलेमम येशूक मृत्यु हुइना बारेम बात बट्वाइटलह। 32पत्रुस ओ हुँकहार सङ्घरेन जुन निन्दाइल रलह। हुँक्र जग्ल त, येशूह चह्कार उज्जर ओ उ दुइ जहन उहाँकसँग ठह्र्याइल देख्ल। 33मोशा ओ एलिया ओठेसे जाइलग्ल त, पत्रुस येशूह कल, “गुरुजी, हम्र यिहाँ रलक बरा मजा हुइल्। हम्र यिहाँ तीनठो झोँप्री बनाई। एकठो अप्नक लाग, एकठो मोशक लाग ओ एकठो एलियक लाग।” तर का बोल्नु कना पत्रुसह होस नैहुइलन।
34पत्रुस बोल्टीबोल्टी बद्री आक छोप्लन। उ बद्री उहाँहुँकन छोप्लन त, चेलावँ डरैल। 35तब बद्रीमसे असिन आवाज आइल्, “यी म्वार छावा हुइट। मै हिँकहीन रोज्नहुँ।#९:३५ मै हिँकहीन रोज्नहुँ: परमेश्वर येशूह मनैन्हक मुक्ति देहुइया हुइक लाग रोज्ल। टुह्र हिँकहार कहल मनहो।”#यशै ४२:१; मत्ती ३:१७; १२:१८; मर्क १:११; लूक ३:२२ 36आवाज ठम्हल त, चेलावँ येशूह केल देख्ल। हुँक्र आपन द्याखल यी घटनक बारेम पाछसम#९:३६ पाछसम: सम्भवत: येशू मुवलमसे फेदोस्र जिक स्वर्गम उठागैल् समयसम चेलावँ यी बात किहुसे फे नैबटोइल। फे किहुसे नैबटोइल।
भूत्वा लागल लौँरा चोखैलक
मत्ती १७:१४-१८; मर्कूस ९:१४-२७
37द्वासर दिन उहाँहुँक्र पर्वत्वमसे घुम्ल त, धेर मनै उहाँह भ्याँट कर अइल। 38भीडमसे एकठो मनैया कहल, “गुरुजी, दया कैक म्वार छावह हेरदी, काकरकि म्वार सन्तान यिह छावा केल हो। 39भूत्वा यहीह घरीघरी आक्रमण कर्ठस त, एकचोट्टे कर्रसे चिल्लैठा ओ झरफर-झरफर कर लग्ठा। याकर मुहमसे फेस्कुर आजैठस। भूत्वा यहीह प्राय: च्वाट नैलगाक छोर्बोछोर्बोनैकर्टस। 40मै अप्नक चेलन म्वार छावकमसे भूत्वह निकारदेओ कैक बिन्ती कर्नु, तर हुँक्र नैसेक्ल।”
41येशू कल, “टुह्र आजकाल्हिक कस्सिन मनै हुइटो, एक्को विश्वास नैकर्टो, भारी अटेरी बाटो! कैह्यासम टुन्हकसँग रहम? मै कहाँसम सहुँ? उ लौँरह यिहाँ आनो।”
42उ लौँरा येशूकठे जैटीजैटी, भूत्वा उ लौँरह झट्कलस ओ ऊ झरफर-झरफर करलागल। तर येशू भूत्वह हप्कैल, त उ लौँरा चोखागैल्। तब येशू ओहीह वाकर बाबक जिम्मा लगादेल। 43परमेश्वरक महान शक्ति देख्क सब मनै छक्क पर्ल।
येशू आपन मृत्युक बारेम द्वासर फ्यारा बट्वैलक
मत्ती १७:२२-२३; मर्कूस ९:३०-३२
मनै येशूक करल काम देख्क अचम्म मन्ल त, येशू चेलन कल, 44“म्वार बात ध्यान देक सुनो। मै मनैयक छावा, शत्रुन्हक हाँठम सुम्प्वापैम।” 45तर चेलावँ यी बात नैबुझ्ल। हुँकनसे याकर अर्थ नुकादेगैलक कारण, यी बात हुँक्र थाहँ नैपैल। हुँक्र याकर अर्थ का हो कैक पुछ्ना आँट फे नैकर्ल।
सबसे बरा के हो?
मत्ती १८:१-५; मर्कूस ९:३३-३७
46तब चेलावँ “हमार बीचम सबसे बरा के हो?” कैक आपसम वादविवाद करलग्ल।#लूक २२:२४ 47येशू हुँकन्हक मनक विचार बुझ्क एकठो लर्कह आपनठे आन्क ओहीह हुँकन्हक बीचम ठह्रेइल, 48ओ चेलन कल, “म्वार नाउँम असिन लर्कन स्वीकार करुइया महीह स्वीकार कर्ठा, ओ महीह स्वीकार करुइया महीह पठुइयह स्वीकार कर्ठा। टुह्रमध्येम जे सबसे छुटी हुई,#९:४८ छुटी हुइना कलक सक्कुजन्हक सेवा कर्ना हो। सबसे बरा उह हुई।”#मत्ती १०:४०; लूक १०:१६; यूह १३:२०
पक्षम लगुइया ओ विरोध करुइया
मर्कूस ९:३८-४०
49यूहन्ना येशूह कल, “गुरुजी, हम्र एकठो मनैयह देख्ली। ऊ मनैन्हकमसे भूतन निक्राइटह। हम्र ओहीह ओसिक कर नैदेना कोसिस कर्ली, काकरकि ऊ हमार पक्षम लग्ना मनैया नैहो।”
50तर येशू कल, “ओहीह जिन रोको, टुन्हक विरोध नैकरुइयन टुन्हक पक्षक हुइट।”
सामरिया क्षेत्रक मनै विरोध कर्लक
51येशूक स्वर्ग जैना समय लग्घ आइल त, उहाँ अठोट लेक यरूशलेम जाइलग्ल। 52येशू “आघहेँ जाक सब चिज ठीकठाक पर्नेकरो” कैक आकुरजहन सामरिया क्षेत्रक एकठो गाउँम पठैल। 53तर मनै उहाँ यरूशलेम जाइट कना थाहाँ पैल त, कुई फे उहाँह स्वागत नैकर्लन।#९:५३ कुई फे उहाँह स्वागत नैकर्लन: यहूदीहुँक्र ओ सामरी मनै शत्रु-शत्रु रलह। यहूदीन्हक सहर यरूशलेमम परमेश्वरक मन्दिर रह। सामरीहुँक्र उ मन्दिरह नैमानँट्। उहओर्से हुँक्र, येशू ओ उहाँक चेलवन यरूशलेम जाइट् देख्क, खुशी नैरलह। परमेश्वरक वास्तविक मन्दिर त हुँकन्हक सामरिया क्षेत्रम बा कैक हुँक्र विचार करँट्। 54यी देख्क याकूब ओ यूहन्ना येशूह कल, “प्रभु, यदि अप्न चहबी कलसे, ‘आकाशसे आगी वर्षाक हुँकन भस्म करी’ कैक हम्र परमेश्वरसे कैदेहटी।”#२ राज १:९-१६ 55तर येशू चेलन्हकओर घुम्क हुँकन हप्कैल। 56तबदोस्र उहाँहुँक्र और गाउँम गैल।
चेलाहुँक्र तिरपर्ना मूल्य
मत्ती ८:१९-२२
57उहाँहुँक्र जैटीजैटी डगरिम एकठो मनैया येशूह कहल, “अप्न जहाँ गैलसे फे, मै अप्नक पाछपाछ जैबुँ।”
58येशू जवाफ देल, “फेहोरेन्हक आपन ड्वान्डर रठन, चिरैँचुरुङ्गन्हक आपन ठाँट रठन, तर मै मनैयक छावक आराम कर्ना निश्चित ठाउँ फे नैहो।”
59और एकठो मनैयह येशू कल, “म्वार पाछ लागो।” तर उ मनैया असिक कहल, “प्रभु, पैल्ह मै घर जाक आपन बाबह माटी देलिउँ, त अप्नक पाछ लगम।”
60येशू कल, “मुवल मनै मुवल मनैन माटी देह्हीँ।#९:६० मुवल मनै मुवल मनैन माटी देह्हीँ: जब येशू यिहाँ पैल्ह फ्यारा “मुवल मनै” प्रयोग कर्ल, तब उहाँ उहाँक्म विश्वास नैकरल मनैन जनाइक लाग आलङ्कारिक भाषक हिसाबले प्रयोग कर्ल। उहाँक्म विश्वास नैकर्लकओर्से, हुँक्र लौव जीवन नैपैलरलह। उ लौव जीवन कलक परमेश्वरसे सङ्गति कैक जिना जीवन हो। येशू ओसिन मनैन, आपन मुवल मनैन गर्ना काम देहपर्ठा, तर चेलावँ उहाँक पाछ लग्ना ओ उहाँक राज्यक घोषणा कर्ना कामह प्राथमिकता देहपर्ठा कैक कल। तर टुँ जाक परमेश्वरक राज्यक प्रचार करो।”
61और एकठो मनैया फे येशूह कहल, “पैल्ह मै जाक आपन घरक मनैनसे विदावारी लेलिउँ, त अप्नक पाछ लगम।”#१ राज १९:२०
62येशू ओहीह कल, “हर ज्वाँटबेर पाछओर हेरुइयन परमेश्वरक राज्यम काम नैलग्ट।”
Currently Selected:
लूका 9: thl
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
