मत्ती 23
23
शास्त्री ओ फरिसीहुँकन धिक्कार
मर्कूस १२:३८-४०; लूका ११:३९-५२; २०:४५-४७
1तब येशू भीडक मनैन ओ आपन चेलन कल, 2“शास्त्रीहुँक्र ओ फरिसीहुँक्र मोशक व्यवस्था सिखैना अधिकार पाररख्ल। 3उहओर्से टुह्र हुँकन्हक कहल सब बात मानपर्ठा, तर हुँकन्हक व्यवहारक नकल जिन करो, काकरकि हुँक्र औरजहन सिखैना त सिखैठ, तर हुँक्र अप्न आपन सिखाइल अनुसार नैचल्ट। 4हुँक्र धर्मकर्मक उठाइ नैसेक्ना भर्वा मनैन बोकैठ, तर अप्नभर, उ भर्वा उठाइक लाग एकठो अङ्ग्रीले फे नैछुट।
5“हुँक्र ज्या काम कर्ठ, मनैन देखाइक लाग केल कर्ठ। हुँक्र आपन लिल्हार ओ पख्रम बहन्ना व्यवस्था-पत्री#२३:५ व्यवस्था-पत्री: व्यवस्था-पत्री छालक छुटीमुटि बाकसअस चिज रह। उहिँम पुरान नियमक मुख्य-मुख्य पद लिखल रह। यहूदीहुँक्र विशेष कैक प्रार्थना करबेर पख्रम या लिल्हारिम व्यवस्था-पत्री बान्धँट्। बराबरा बनैठ, ओ अपन्हेह धर्मी देखाइक लाग आपन लुगक झब्रा#२३:५ लुगक झब्रा: बाहिरी लुगम रना लुगक झब्रा सादा या रंगित रह ओ मोशक व्यवस्था अनुसार इस्राएली पुरुषहुँक्र ओसिन लुगा लगाइँट्। फे नम्मा-नम्मा बनैठ।#मत्ती ६:१; गन्ती १५:३८; व्य ६:८ 6हुँक्र भ्वाजभत्यारम ओ सभाघरम मुख्य-मुख्य आसनम बैठ खोज्ठ, 7ओ बजारम मनै हुँकन ‘अभिवादन’ करल ओ ‘गुरु’ कहल चहठ।
8“तर टुँहन कुई फे ‘गुरु’ जिन कह, काकरकि टुन्हक ‘गुरु’ त एक्कठो बाट, ओ टुह्र सबजन दादुभाइअस बराबर बाटो। 9पृथ्वीम किहुह फे ‘बाबा’ जिन कहो, काकरकि स्वर्गम रहुइया परमेश्वर केल टुन्हक ‘आत्मिक बाबा’ हुइट। 10टुँहन कुई फे ‘अगुवा’ जिन कह, काकरकि टुन्हक एक्कठो ‘अगुवा’ ख्रीष्ट जो हुइट। 11टुह्रमध्ये सबसे बरा हुइखोजुइया टुन्हक सेवाचाक्री कर।#मत्ती २०:२६-२७; मर्क ९:३५; लूक २२:२६ 12महान हुइखोजुइया छुटी हुई; छुटी हुइखोजुइया महान हुई।#लूक १४:११; १८:१४
13“टुह्र शास्त्री ओ फरिसीहुँकन धिक्कार बा! टुह्र कपटी बाटो! काकरकि स्वर्गक राज्यक द्वारीम टुह्र ताल्चा लगारख्लो। टुह्र अपन्हे फे भित्तर नैजैटो ओ और जैना मनैन फे जाइ नैदेटो।”
[14“टुह्र शास्त्री ओ फरिसीहुँकन धिक्कार बा! टुह्र कपटी बाटो! काकरकि टुह्र विधवन्हक घरबार लुट्ठो, तर टुह्र अपन्हेह धर्मी देखाइक लाग भर नम्मा-नम्मा प्रार्थना कर्लक बहाना बनैठो। उहओर्से टुह्र झन् धेर दण्ड पैबो।]
15“टुह्र शास्त्री ओ फरिसीहुँकन धिक्कार बा! टुह्र कपटी बाटो! काकरकि टुह्र एकठो मनैयह आपन धर्मम आनक लाग संसारभर चहर्ठो, ओ यदि कौनो मनैया आगैल्कलसे, टुह्र ओहीह आपनसे दोबर नरकक् योग्यक बनैठो।
16“टुह्र आन्धर अगुवन धिक्कार बा! टुह्र ‘मन्दिर छुक किर्या खैलसे कुछु नैहुइट्, तर मन्दिरक स्वान छुक किर्या खैलसे किर्या लग्ठा’ कैक सिखैठो। 17टुह्र कसिन मूर्ख कि आन्धर बाटो! कौन धेर महत्वपूर्ण हो: स्वान कि स्वानह शुद्ध पर्ना मन्दिर? 18टुह्र ‘वेदी छुक किर्या खैलसे कुछु नैहुइट्, तर वेदीम चह्राइल भेटी छुक किर्या खैलसे किर्या लग्ठा’ कैक फे सिखैठो। 19टुह्र कसिन आन्धर बाटो! कौन धेर महत्वपूर्ण हो: भेटी कि भेटीह शुद्ध पर्ना वेदी? 20वेदी छुक किर्या खउइया वेदी ओ उहिँम चह्राइल सब भेटी छुक किर्या खैठा। 21ओसहेँक मन्दिर छुक किर्या खउइया मन्दिर ओ मन्दिरम रना परमेश्वरह छु-छुक किर्या खैठा। 22ओ स्वर्गक नाउँ लेक किर्या खउइया परमेश्वरक सिंहासनक ओ उहिँम बैठ्ना परमेश्वरक नाउँम किर्या खैठा।#यशै ६६:१; मत्ती ५:३-४
23“टुह्र शास्त्री ओ फरिसीहुँकन धिक्कार बा! टुह्र कपटी बाटो! काकरकि टुह्र पुदीना, सूँप ओ जीराजसिन कम महत्वपूर्ण चिजिक फे दश भागक एक भाग परमेश्वरह चह्रैठो। तर व्यवस्थम रहल न्याय, दया ओ विश्वास जसिन धेर महत्वपूर्ण बातक कुछु मतलब नैकर्टो। टुह्र कम महत्वपूर्ण ओ धेर महत्वपूर्ण सब बात मानपर्ठा।#लेवी २७:३० 24टुह्र आन्धर अगुवन हुइटो। टुह्र भुसना लिलक डर पानी छन्ठो, तर ऊँट्टोहजुन लिलडर्ठो!
25“टुह्र शास्त्री ओ फरिसीहुँकन धिक्कार बा! टुह्र कपटी बाटो! काकरकि टुह्र भाँरावर्तन उप्रउप्र त मिस्ठो, तर टुन्हक भित्तरजुन ल्वाभ ओ दुष्टताले भरल रठा। 26आन्धर फरिसीहुँक्र! पैल्ह टुन्हक भित्री भाग सफा करो, ओ वाकर बाहर फे सफा हुइपर्ठा।
27“टुह्र शास्त्री ओ फरिसीहुँकन धिक्कार बा! टुह्र कपटी बाटो! काकरकि टुह्र त चून लगाइल गर्याअस बाटो, जौन गर्या बाहरसे त एकदम मजा देखपर्ठा, तर भित्तरजुन मुवल मनैन्हक हड्डी ओ अशुद्ध चिजले भरल रठा।#प्रे २३:३ 28ओसहेँक बाहरसे ह्यारबेर टुह्र मनैन्हक सामुन्ने धर्मीअस देखपर्ठो, तर टुन्हक भित्तरजुन कपट ओ दुष्टताले भरल रठा।
29“टुह्र शास्त्री ओ फरिसीहुँकन धिक्कार बा! टुह्र कपटी बाटो! काकरकि टुह्र आपन पुर्खन्हक मुवाइल अगमवक्तन्हक गर्या सजिसजाउ बनैठो ओ आपन पुर्खन्हक मुवाइल धर्मी जनहुँकन्हक सम्झनम मजामजा गर्या बनैठो। 30टुह्र कठो, ‘हम्र आपन पुर्खन्हकसँग रटी कलसे, अगमवक्तन मुवैना हुँकन्हक कामम सहमत नैहुइनेरलही।’ 31असिक अप्न अगमवक्तन्हक हत्या करुइयन्हक सन्तान रहल बातक प्रमाण टुह्र अपन्हे देठो। 32आपन पुर्खन्हक सुरु करल पाप काम पूरा करो।
33“टुह्र साँपन्हक सन्तान! टुह्र नरकक् दण्डसे कसिक उम्क सेक्बो?#मत्ती ३:७; १२:३४; लूक ३:७ 34उहओर्से मै टुन्हकठे अगमवक्तन, बुद्धिमान मनैन ओ शास्त्रीहुँकन पठैबुँ। टुह्र हुँक्रमध्ये कत्राजहन मुवैबो, कत्राजहन क्रूसम टङ्गाक मुवैबो, ओ कत्राजहन सभाघरम कोर्रा लगैबो ओ सहर-सहरम सँतैबो। 35निर्दोष हाबिलक हत्याठेसे लेक मन्दिर ओ वेदीक बीचम मुवागैल् जकरियासम्मक (ऊ बेरेक्याहक छावा रलह) रगतक सब दोष टुन्हक कपारिम परी।#उत ४:८; २ इति २४:२०-२१ 36जाट्टीसे मै टुँहन कहटुँ, यी दण्ड आजकाल्हिक मनैन्हक कपारिम परी।
37“यरूशलेम सहरक मनै, परमेश्वरक अगमवक्तन मुवैना ओ उहाँक पठाइल सन्देशवाहकहुँकन पत्थ्रले मार्क मुवैना मनै टुह्र हुइटो। मुर्घिन्या चिङ्नीन छ्वापअस, मै घरीघरी टुँहन जम्मा कैक सुरक्षा देह चहनु, तर टुह्र नैमन्लो। 38हेरो, टुन्हक सहर उजार हुउइया बा।#यर २२:५ 39मै टुँहन कहटुँ, टुह्र ‘परमप्रभुक नाउँम आइल मनैयक प्रशंसा ह्वाए’ कैक नैकहट्सम टुह्र महीह फेदोस्र नैदेख्नेहुइटो।”#भज ११८:२६
Currently Selected:
मत्ती 23: thl
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.
