मत्ती 24

अन्‍तिम दिनिक चिन्‍ह

मर्कूस १३:१-३७; लूका २१:५-३८

1तबदोस्र येशू मन्‍दिरमसे निकर्क जाइबेर उहाँक चेलावँ उहाँह मजामजा पत्‍थ्रले बनल मन्‍दिर देखाए अइल। 2येशू हुँकन कल, “टुह्र यी दरवार द्‌याखटो ना! जाट्‌टीसे मै टुँहन कहटुँ, एक पत्थ्रक उप्‍पर और पत्थ्रा रह नैदेक सब ध्वस्‍त बनाजाई।”

3येशू जैतून पर्वत्‍वम रहबेर उहाँक चेलावँ एकान्‍तम उहाँकठे आक पुछ्‌ल, “कही गुरु, यी घट्‍ना कैह्‍या हुई, अप्‍न फेदोस्र अइना ओ यी संसारक अन्‍त्‍य हुइना चिन्‍ह का रही?”

4तब येशू हुँकन जवाफ देल, “होसियार रहो, त टुह्र ध्‍वाखा नैपैबो। 5काकरकि धेर जन ‘ख्रीष्‍ट मैहे हुइटुँ’ कैक दाबी कर्टी अइहीँ, ओ धेर जहन भ्रमम परहीँ। 6जब टुह्र घमासान लडाइँ ओ हूलदङ्‌गा सुन्‍बो, तब जिन डरैहो। यी त हुइहीपरी, तर संसारक अन्‍त्‍यभर तबहेँ नैहुई। 7काकरकि जातिक विरोधम जाति, ओ राज्‍यक विरोधम राज्‍य उठी। जहोँरतहोँर अनिकाल परी ओ भुइँचाल आई। 8यी सब त दुःखक सुरु केल हो।

9“तब मनै टुँहन पक्रहीँ ओ सजाय देहक लाग लैजहीँ, ओ टुँहन मुवाइ फे सेकहीँ। टुह्र म्‍वारम विश्‍वास कलर्क कारण सब जातिक मनै टुँहन हेल्‍हा करहीँ।#मत्ती १०:२२ 10धेर जन विश्‍वासमसे पाछ हट्‍जैहीँ। हुँक्र एक-औरजहन ध्‍वाखा देहीँ ओ हेल्‍हा करहीँ। 11धेर झूटा अगमवक्तन अइहीँ, ओ धेर जहन छल करहीँ। 12जहोँरतहोँर पापक बिगबिगी रही ओ धेर जन्‍हक प्रेम जुर होजहीन। 13तर आखिरीसम विश्‍वासम पलरना मनै बचाजैहीँ।#मत्ती १०:२२ 14स्‍वर्गक राज्‍यक बारेम खुशीक खबर सारा संसारम प्रचार कैजाई, ताकि हरेक जातिक मनै सुन्‍ना मौका पैहीँ, तबदोस्र संसारक अन्‍त्‍य हुई।

15“उहओर्से जब टुह्र, दानिएल#२४:१५ दानिएल: दानिएल पुरान नियमक एकठो अगमवक्ता रलह। अगमवक्तक ब्‍वालल् वचन अनुसार, नाश करुइया घिनलग्‍टिक दुष्‍टह पवित्र ठाउँम ठह्र्‍याइल देख्‍बो (पह्रुइया बुझ),#दान ९:२७; ११:३१; १२:११ 16तब यहूदियम रहुइयन पर्वत्तोओर भगहीँ। 17घरक छतम रहुइयन सरसामान लेह घरभित्तर नैजाक छतहेँमसे भग्‍ने करहीँ।#लूक १७:३१ 18खेत्‍वम रहुइयन आपन झुल्‍वा लेह घुम्‍क घर जिन अइहीँ। 19उ समयम गर्भवती जन्‍नीमनैन्‍हक ओ दूध खवैना डाई मनैन्‍हक कत्रा बिजोग हुहीन। 20हिउँदम या बिसैना दिनम टुँहन भाग जिन पर कैक प्रार्थना करो। 21काकरकि उ समयम अस्‍सिन महासङ्‍कष्‍ट हुई, कि परमेश्‍वर सृष्‍टि करलठेसे आम्‍हीसम कबु फे नैहुइलहो, ना कबु हुउइया हो।#दान १२:१; प्रका ७:१४ 22यदि परमेश्‍वर उ कष्‍टक समय नैघटैना हो कलसे, कुई फे नैबचुइया हो। तर आपन र्‍वाजल मनैन्‍हक कारणले, परमेश्‍वर उ समय घटैना निर्णय कैरख्‍ल। 23उ ब्‍याला कुई, ‘हेरो! ख्रीष्‍ट अठे बाट!’ या ‘ओठे बाट!’ कही कलसे, विश्‍वास जिन करहो। 24काकरकि झूटा ख्रीष्‍टहुँक्र ओ झूटा अगमवक्तन देखपरहीँ, ओ स्‍याकलसम परमेश्‍वरक र्‍वाजल मनैन फे उल्‍काइक लाग हुँक्र अचम्‍म-अचम्‍मक काम करहीँ ओ चिन्‍ह देखैहीँ। 25हेरो, मै टुँहन सब बात आघहेँ जनादेरख्‍नु।

26“यदि मनै टुँहन ‘हेरो, उहाँ उजार ठाउँम बाट’ कहीँ कलसे, उहाँ जिन जाओ, ओ ‘हेरो, उहाँ भित्तर क्‍वाठम बाट’ कहीँ कलसे फे विश्‍वास जिन करो।#लूक १७:२३-२४ 27जसहेँक आकाशम बद्री चिम्‍कलसे सक्‍कुओरसे देखपर्ठा, ओसहेँक मै मनैयक छावा घुम्‍क अइना दिनम सक्‍कुओरसे देखपरम। 28डाङ्‌गर रहल ठाउँम गिढ पर्ठ।#लूक १७:३७

29“उ महासङ्‍कष्‍ट ओरैटीकि दिन अन्‍धार होजाई, ओ जोन्‍ह्‍या फे नैचम्‍की। आकाशमसे तोरैँया खसजाई, ओ आकाशक सब शक्ति डगमगाजाई।#यशै १३:१०; ३४:४; इज ३२:७; योए २:१०-३१; ३:१५; प्रका ६:१२-१३ 30ओ अन्‍तम मै मनैयक छावा, अइटीरहल चिन्‍ह आकाशम देखपरी। पृथ्‍वीमक सब जातिक मनै रुवाबासी करहीँ, ओ मै मनैयक छावह शक्ति ओ महान महिमासहित बद्रीम आइट्‍ देखहीँ।#दान ७:१३; जक १२:१०-१४; प्रका १:७ 31तुरहीक बरा आवाज आई त मै मनैयक छावा, आपन स्‍वर्गदूतहुँकन पठैम, ओ हुँक्र सारा स्‍वर्ग ओ पृथ्‍वीमसे म्‍वार र्‍वाजल मनैन जम्‍मा करहीँ।

32“अञ्‍जीरक रूख्‍वमसे एक बात सिखो: जसिक रूख्‍वा पल्‍हाक पत्‍या लागल कलसे, घाम छ्‌याँक लग्‍घ बा कैक टुह्र जन्‍ठो, 33ओसहेँक म्‍वार कहल बात पूरा हुइट्‍ देख्‍बो त, म्‍वार अइना दिन पुगरहल कैक जनहो। 34जाट्‌टीसे मै टुँहन कहटुँ, यी सब बात पूरा नैहुइट्‍सम यी पुस्‍ता नैबित्‍ने हो। 35आकाश ओ पृथ्‍वी बित्‍क जाई, तर म्‍वार वचन कबु नैबिती।

36“म्‍वार अइना दिन कैह्‍या हो कैक ना त स्‍वर्गदूत जन्‍ठ, ना त मै, छावा, जन्‍ठुँ। यी बात परमेश्‍वर बाबा केल जन्‍ठ। 37मै मनैयक छावा घुम्‍क अइना दिनिक अवस्‍था नोअक समयकअस रहुइया बा।#उत ६:५-८ 38जलप्रलय हुइनासे आघ, नोआ जहाजम नैपैँठट्सम मनै खैटिरलह, पिटीरलह, ओ भ्‍वाजकाज कर्टिरलह। 39परमेश्‍वरक कराइल जलप्रलय सबजहन नाश नैकरट्‍सम हुँक्र कुछु थाहाँ नैपैल। मै मनैयक छावा, घुम्‍क अइना दिन फे ओस्‍तै हुउइया बा।#उत ७:६-२४ 40खेत्‍वम काम कर गैल् दुइ जन मनैमध्ये एकठो लैजाजाई ओ और छोरजाई। 41सँगसँग पीठा पिस्‍टी-पिस्‍टी दुइ जन जन्‍नीमनैमध्ये एकठो लैजाजाई ओ और छोरजाई।

42“प्रभुक अइना दिन थाहाँ नैरलकओर्से, जागा रहो! 43एकठो बात याद करो: यदि घरक मालिक चोर्‍वा रात्‍क कौन समयम आइकठा कैक जन्‍ट कलसे, ऊ जागा रनेरलह, ओ चोरोह आपन घर फ्‍वार नैदेनेरलह।#लूक १२:३९-४० 44उहओर्से टुह्र तयार रहपर्ठा, काकरकि मै मनैयक छावा, कैह्‍या घुम्‍क अइम कना बात टुँहन थाहाँ नैहो।

45“बुद्धिमान ओ विश्‍वासयोग्य काम करुइया के हो? घरमुली ओहीह आपन घरक काम करुइयन्‍हक खानपानक व्‍यवस्‍था करक लाग अगुवा बनैठ। 46मालिक घुम्‍क आइल समयम यदि हुँकहीन ठीक तरिकासे काम करँट्‍ देखहीँ कलसे, हुँकहीन पुरस्‍कार देहीँ। 47मै जाट्‌टीसे टुँहन कहटुँ, मालिक हुँकहीन आपन सारा धनसम्‍पत्तिक जिम्मा देहहीन्। 48तर यदि उ काम करुइया दुष्‍ट बाट ओ ‘मालिक हाली नैअइहीँ’ कटी 49मतोरेन्‍हकसँग खैनापिना कर्ना ओ और काम करुइयन जथाभावी पिट्ना काम करहीँ कलसे, 50हुँकहार नैचिताइल दिन ओ समयम मालिक अइहीँ। 51तब मालिक हुँकहीन कर्रा दण्ड देह्‍हीँ, ओ हुँकहार दशा कपटीन्‍हकअस हुउइया बाटन। हुँक्र उहाँ दुःखले दाँत पिस्‍टी रुवाबासी कर्टीरह्‍हीँ।”

Currently Selected:

मत्ती 24: thl

Highlight

Copy