Enkiterunoto 21

Einoto e Isaak

1Nedamu Olaitoriani Sara anaa apa enatejo, neitaas ninye anaa enaisiligie. 2#Ilb 11.11Nenutayu Sara neiki Abraham enkayioni te nkata e moruao enye, te nkata erishata natiaka ninye Enkai. 3Neipot Abraham enkarna e nkayioni enye natoikio ninye Sara ajo Isaak. 4#Enk 17.12; Iat 7.8Nemurat Abraham enkayioni enye Isaak etaa oloo nkolong'i isiet, te inoto, anaa enaitanapa Enkai ninye. 5Etaa Abraham oloo larin iip peyie eikini ninye enkayioni enye Isaak. 6Nejo Sara, “Aaitobiraka nanu Enkai enkuenia; ore pooki ng'ae oning nekweni tenebo o nanu.” 7Nejo ninye, “Aing'ae aikata oidima atiaaki Abraham inchere keitanak Sara inkera? Ore ake eyia, natoikio ninye enkayioni te nkata emoruao enye.”

8Nebulu ina kerai, neoruni ilki, neitobir Abraham osirua sapuk ina olong naoruni Isaak ilki.

Etaarayioki Hagar o Ishmael

9Nedol Sara enkayioni e Hagar enapa Misiri natoikio ninye Abraham eiguran o enkayioni enye Isaak. 10#Ilg 4.29,30Nejoki ninye Abraham, “Taarai impang'ie ena kitok rrindik tenebo o enkayioni enye, amu meaku enkayioni ena kitok rrindik olajung'oni tenebo o layioni lai Isaak.” 11Neitanyamal ina bae Abraham oleng te nkaraki enkayioni enye sii ninye Ishmael. 12#Irm 9.7; Ilb 11.18Kake etiaaka Enkai Abraham, “Mincho kintagor ororei le nkerai o te nkaraki enkitok ino rrindik, ore pooki nikijoki Sara, taasa ina. Amu Isaak eipotieki eishoi ino. 13Naa kaitayu sii olosho tiatua enkayioni enkitok rrindik, amu ole ishoi ino sii ninye.” 14Neinyototo Abraham tadekenya enasirie, neya endaa o lbene lo lchoni le nkare; neisho Haga meiteleiki oloililai lenye tenebo ina kerai neisho ninche meshomo. Nedumunye alo nelimana ti ong'ata e Beer-sheba.

15Ore peyie emita enkare natii olbene lo lchoni neing'uaa enkerai te ntonata osanag. 16Nelo aing'uaa aton tenelamita te wueji neba anaa eng'ororoto e mbae. Amu etejo, “Mincho aduaaki keeya enkerai ai.” Ore eton tenelamita ninye, neilepie enkerai oltoilo aishir. 17Nening Enkai oltoilo leina ayioni, neipot olmalaika le Nkai Haga eing'uaa keper nejoki ninye, “Kainyoo nikigira aitanyamal iyie Haga? Miureishoyu, amu etoning'o Enkai oltoilo le nkishirata leina ayioni teine netii. 18Inyo tudumu enkerai imbung'a tukurraki inkaik inono, amu kaitaa ninye olosho kitok.” 19Nebol Enkai inkonyek e Hagar nedol enchorro enkare, nelo aiput ilo bene lenye lo lchoni enkare neisho ina ayioni metooko. 20Netii Enkai tenebo enkayioni nebulu ninye nebik tiong'ota, neaku olang'oroni padan#21.20 padan: arriyia te nkawuo le nkawuo. 21Nebik tiong'ata e Paran, neyamaki ng'otonye enkitok naitung'uaa enkop e Misiri.

Olning'o le Abraham o Abimelek

22 # Enk 26.26 Ore apa ina kata, etiaakita Abimelek tenebo Fiko aa olkitok le njore, Abraham, “Etii Enkai tenebo iyie too siaaitin pooki nias, 23ore naa taata, kayieu ninya olmumai te nanu ajo ore te Nkai mikintaas emonkoi, anaa intaas enkerai ai, anaa intaas eishoi ai. Kake ore anaa ina supatisho naaitaasa, ninye sii nanu intaasaki teina kop nitaayie omoni.” 24Nejo Abraham, “Kanya olmumai.” 25Neing'unyung'unyaki Abraham Abimelek te nkaraki enchorro natoorutuo isinkan le Abimelek. 26Nejo Abimelek, “Mayiolo ajo aing'ae otaasa ena bae, eitu sii kiliki, neitu aekata aning ometabaiki ena olong.” 27Neyau Abraham inkerra o lmong'i neisho ninche Abimelek, neitayu pokira olning'o. 28Negelu Abraham isupeni naapishana e kerra too ntare meitasho oopeny. 29Nejoki Abimeleki Abraham, “Kainyoo eitodolu kuna supeni naapishana e kerra nitegelua meitasho oopeny.” 30Nejo, “Ore kuna supeni naapishana e kerra ining'amaa too nkaik aainei metaa iyaku iyie olchakeni lai inchere atuturo ena shorro.” 31Ore te nkaraki ina, neji ine Beer-sheba#21.31 Beer-sheba: Eutu te nkutuk oo Lbrania ajo “Enchorro olmumai” aashu Enchorro e naapishana, amu teine einosa pokira oaare olmumai. 32Metaa eitaituo ninche olning'o te Beer-sheba. Nerrinyo Abimelek tenebo Fiko olkitok lenye le njore enkop oo Filistia. 33Neun Abraham enchani nanyaanyukie oloilei te Beer-sheba, neipot ninye teine enkarna o Laitoriani, Enkai oo ntarasi. 34Nebik Abraham te nkop oo Filistia inkolong'i kumok.

Currently Selected:

Enkiterunoto 21: BIBLIAPRO

Highlight

Copy