Jẹnẹsisi 16
16
Isi Nke Mmisin
Haga Hụn Sẹra Sị Mụdọnn'ẹ Nwa
1Saraị nwunyẹ Ebram amụnịnị Ebram nwa. Kanị Sẹra e nwọn nwagbọọ Ijiptu ohu wụ igbọn ẹ, hụn ẹfan a wụ Haga.
2Ya Saraị nọ sị Ebram, “Y'a hụngụọ a nị Osolobuẹ anịnị m mụ nwa; dodo, du igbọn m ranhịn, ikẹnkwọ a gha m ẹka a mụ ụmụ.” Ebram nọ kweri ihiẹn Saraị ku. 3Ya kẹ nwunyẹ Ebram wụ Saraị nọ we igbọn ẹ wụ Haga onyẹ Ijiptu ye di ẹ wụ Ebram lụma. Hụn mẹ ẹ ahụa iri wẹ bịa alị Kenaanị kẹ ihiẹnni gi mẹ. 4Ebram e sọn Haga ranhịn, Haga nọ tụrụ imẹ. Ogẹn Haga gi hụn n'ọ rị imẹ, ọ nọ lelịama di-nwọnn'ẹ wụ Saraị.
5Ya kẹ Saraị nọ sị Ebram, “Yụ haịn m gi rị e ri ụyanị! Mmẹ we igbọn m ye i; ọ hụn a n'ọ tụrụ imẹ, ọ nọ lelịama m! Osolobuẹ ya hannị mmẹ lẹ yụ eṅẹn!!” 6Ya Ebram nọ sị Saraị, “Ọ hụghọ mma, igbọn i rị ị ẹka, ihiẹn sụọn'ị y'e gi ẹ mẹ.” Ya Saraị nọ mẹjama Haga, ọ nọ gbapụnị Saraị.
7O ru, mmọn-ozi Osolobuẹ nọ hụn Haga ebe ohu mirin nọ a mụpụha imẹ atụ, ebẹhụ mirin nọ a mụpụha ụzọ Shuru. 8Mmọn-ozi ahụn nọ sị a, “Haga, igbọn Saraị, elebe k'i gha pụha ebeni? Elebe k'i jẹnkọ?” Haga nọ sị a, “M gbapụkọnị di-nwọnni m wụ Saraị.”
9Mmọn-ozi Osolobuẹ nọ sị a, “Lakin iwe di-nwọnni i, y'e welụan'a isi alị.” 10Mmọn-ozi Osolobuẹ ahụn nọ sịzị a, “M k'e mẹ ụmụ ị ba ụba, nkesịnị onwọnni onyẹ k'a sa ẹka gụn wẹ.” 11Mmọn-ozi Osolobuẹ nọ sịzị a, “Ị rị nwan imẹ; i sikọ d'a mụ okẹnnyẹ; ẹfan a k'a wụ ‘Ishmẹlụ#16.11 Asụsụ Hibru, Ishmẹlụ wụ “Osolobuẹ a nụ anụ.”’, makẹni Osolobuẹ a nụọlẹ ụya ị rị a kwan. 12O k'a gụn agụngụn jaki-ọfịa#16.12 Lele Job 39.5-6. — a lụsọn onyẹ ọwụlẹ ọgụn, onyẹ ọwụlẹ hụ a lụsọn ẹ ọgụn; ya lẹ umunẹ ẹ ekwerigbamakọ.”
13Ya Haga nọ kpọ Osolobuẹ hụn gwa a oku “Ẹl-rọị”, hụn wụ “Chuku hụn rị e leghanị”, makẹni ọ sị, “Mmẹ gidẹ nwan ẹnya m hụn Onyẹ-hụn-e-leghanị m ra?” 14Ya haịn wẹ gi kpọ ebe ahụn mirin gha a mụpụha “Biẹ-Lahaị-rọị” hụn wụ “Ọmị Onyẹ hụn rị e leghanị.” Ẹgbata Kadẹshi lẹ Bẹrẹdi k'ọ rị.
15Omẹgụ, Haga nọ mụnị Ebram okẹnnyẹ, Ebram nọ gụn a Ishmẹlụ. 16Ebram rị ahụa isin kwasị ọgụn-ẹnọ ogẹn Haga gi mụn'a Ishmẹlụ.
Currently Selected:
Jẹnẹsisi 16: ikkBI
Highlight
Share
Copy
Want to have your highlights saved across all your devices? Sign up or sign in
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.
