Jọnụ 5

Isi Nke Isẹn

Jesu A Zụọ Onyẹ Nwọnlẹni Onyẹ E Yen'ẹ Ẹka

1Omẹgụ, Jesu nọ shizi Jerusalẹm makẹni o nwọn mmẹmmẹ ndị Ju rịnị.

2Imẹ Jerusalẹm, ọ nwọn ọgọdọ wẹ rụnye ẹhụ Ọnụ-mgbọn Atụnrụn. W'a kpọ ọgọdọ hụ Bẹtẹsida#5.2 Bẹzata. ọnụ Hibru. O nwọn ẹworo isẹn wẹ kpu elu wẹ. 3Ndị bu ọda emu rị a kụ e dinẹsọnmẹ ẹworo ndị hụ: kẹ ndị ẹnya-ishi kẹ ndị ngụrọ kẹ ndị ọrọ kinmin, e che ni wẹ mẹhunmẹ mirin ọgọdọ hụ. 4Makẹni, mmọn-ozi Di-nwọnni-ẹnyi a bịa mbụ-lẹ-ẹbụọ d'e mẹhunmẹ mirin hụ. O mẹhunmẹgụ a, onyẹ bu ụzọ banye a dịnhịn emu ọwụlẹ rị a kụn'a.

5O nwọn onyẹ ohu dinẹ ebẹhụ emu rị a kụ kete ahụa ẹbụọ-arịa-ọgụnnaị. 6Ogẹn Jizọsị gi hụn a, marịn n'o tegụọ emu hụ kụma a, ọ nọ sị a, “Y'a chọghọ n'ị dịnhịn?”

7Okẹnnyẹ hụ emu rị a kụ nọ sị, “Diọkpa, enwọn m onyẹ e bu m e che imẹ mirinni wẹ mẹhunmẹ ẹ; m chọ nị m banye, onyẹ ọzọ e bu m ụzọ banye.”

8Jizọsị nọ sị a, “Lihi ọtọ! Heri ute i jẹnmẹ ijẹn!” 9Ozigbo, okẹnnyẹ ahụn nọ dịnhịn, heri ute ẹ, jẹnmẹ ijẹn.

Ụhụọhịn Ezumikẹn kẹ ihiẹnni mẹ. 10Ya kẹ ndị-ndu ndị Ju nọ sị okẹnnyẹ hụ Jizọsị zụọ, “Tannị wụ Ụhụọhịn Ezumikẹn, o furuni nị y'e bu ute i. Iwu gi i.”

11Ọ nọ shịarị wẹ, sị, “Onyẹ hụn zụọnị m sị m, ‘Heri ute i jẹnmẹ ijẹn.’ ”

12Wẹ nọ jụma a, “Onyẹ wụ onyẹ hụ sị ị heri ute i jẹnmẹ ijẹn?” 13Kanị okẹnnyẹ hụ Jizọsị zụọ amarịn onyẹ ọ wụ, makẹni Jizọsị a rụbangụọ imẹ igunrun rị ebahụn.

14Omẹgụ, Jizọsị a hụn a imẹ Ụlọ-nsọ. Ọ nọ sị a, “Lee ẹnya: Y'a rịgụọ mma! Mẹbehi nwan njọ amamgbe ihiẹn ka ọhụn gha e mẹ i.” 15Okẹnnyẹ ahụn nọ jẹn d'a gwa ndị-ndu ndị Ju nị Jesu wụ onyẹ hụ zụọn'a.

16Ya kẹ ndị-ndu ndị Ju nọ kpokpomẹ Jesu o gi mẹ ihiẹnni Ụhụọhịn Ezumikẹn. 17Kanị Jizọsị nọ sị wẹ, “Echẹn kẹ Nẹdi m rị a rụn, mmẹ nwẹn hụkwọ a rụn.”

Jizọsị lẹ Osolobuẹ Han

18Ufiri ihiẹnni o ku, ndị-ndu ndị Ju nọ sị nị wẹ k'e gburịrị a. Makẹlẹ, ẹlẹ n'ọ dan iwu Ezumikẹn sụọ, kanị, ọ kpọzịkwọ Osolobuẹ Nẹdi ẹ, ya wụ nị ya lẹ Osolobuẹ han.

Ikẹn Jesu

19Jizọsị nọ sị wẹ, “Ezioku kẹ m rị a gwa ụnụ, Nwa asaẹka gi uche ẹ mẹ ihiẹn ọwụlẹ — mmanị ihiẹn ọ hụn Chuku-Nẹdi rị e mẹ; makẹni ihiẹn Chuku-Nẹdi mẹ kẹ Nwa a nkẹ e mẹ. 20Makẹni ihiẹn Nwa a a sụọ Chuku-Nẹdi, o ye Nwa a ikẹn a rụn ihiẹn ile Nwa a rị a rụn. O k'e yedẹ ẹ ikẹn rụn hụn ka ndịnị, kẹni ọ tụ ụnụ ẹnya. 21Eziẹ, kẹ Chuku-Nẹdi dọn e weli onyẹ nwụnhụnnị e we ndụn e ye ẹ, ẹrịra kẹ Nwa a dọnzi e we ndụn e ye ndị ọ chọ n'o ye. 22Onwọnni onyẹ Chuku-Nẹdi e kin ikpe, kama, o bugụọ ikpe ile che Nwa a ẹka kin, 23kẹni ịhịan ile gbaye Nwa a kẹ wẹ dọn a gbaye Chuku-Nẹdi. Onyẹ gbayelẹni Nwa a agbayeni Chuku-Nẹdi zihẹn'ẹ.

24“M rị a gwa ụnụ ezioku, nị onyẹ nụ oku m kweyeni onyẹ zihẹni m, hụnyẹ e nwọngụọ ndụn itẹbitẹ. Amakọ w'a ikpe, kama, ọ ghagụọdẹ ọnwụn banye ndụn.

25“Ezioku kẹ m rị a gwa ụnụ, ogẹn lala — o rụgụọdẹ nwan — ogẹn ndị nwụnnị k'e gi nụ olu Nwa Osolobuẹ, ndị nụn'a a rị ndụn. 26Kẹ Chuku-Nẹdi dọn nwọn ndụn imẹ enwẹn ẹ, ẹrịra k'o dọnzikwọ ye Nwa ikẹn o gi e nwọn ndụn imẹ enwẹn ẹ. 27O yegụọzị Nwa a ikẹn o gi kin ịhịan ile ikpe makẹni ịya wụ Nwa nke Ịhịan. 28Anịlẹ ni ọnwan tụ ụnụ ẹnya, makẹni ogẹn lala hụn ndị ile rị imẹ ili jẹnkọ d'e gi nụ olu ẹ, 29a pụha wẹ — ndị mẹ mma e lihi banye ndụn itẹbitẹ; ndị mẹ njọ e lihi narịn ikpe-ọmụma.

Ndị A Shịanị Jesu Ẹri

30“Asa m ẹka gi ikẹn m mẹ ihiẹn ọwụlẹ. M hụ a nụ ihiẹn Osolobuẹ rị a gwa m, e gi ẹ a han eṅẹn; ya wụ, ezigbo eṅẹn kẹ m'a han, makẹni arị m e mẹ uche m, kalẹ uche onyẹ zihẹni m. 31M shịanị enwẹn m ẹri, ẹri m ẹlẹ hụn w'e gi dọn. 32O nwọnzighọ onyẹ a shịanị m ẹri. A marịnghọ m nị ẹri ọ shịanị m wụ ezioku. 33Ụnụ e zigụọ wẹ d'a jụ Jọnụ. Ọ gwagụọ ụnụ ezioku. 34Ẹlẹ ni m chọ ẹri ịhịan, kanị m rị e ku ihiẹnni kẹni ụnụ nwọn nzụọpụha. 35Jọnụ te rị a dụn, e nwun kẹ ukpẹ; ụnụ a ghọghọghọ nị ukpẹ ẹ ẹkẹrẹ ogẹn.

36“Kanị m nwọn ẹri hụn ka hụn Jọnụ shịanị m. Ọrụn ndị hụn Nẹdi m ye m rụn, ya wụ ọrụn ndịnị m rị a rụn, wẹ rị a shịanị m ẹri nị Chuku-Nẹdi zihẹ m.

37“Chuku-Nẹdi lẹ enwẹn ẹ hụn zihẹni m a shịagụọnị m ẹri. Ụnụ anụtuni olu ẹ; ụnụ ahụntuni k'ọ nọ; 38oku ẹ arị imẹ ndụn ụnụ, makẹni ụnụ ekwerinini onyẹ o zihẹ.

39“Ụnụ a mụ Ẹkụkwọ-nsọ a mụshi ẹ ikẹn, makẹni ụnụ ro ni imẹ ẹ kẹ ụnụ a gha nwọn ndụn-itẹbitẹ; bụ Ẹkụkwọ-nsọ hụ rị a shịanị m ẹri, 40kanị ụnụ achọnị nwan nị ụnụ bịa d'e kunrun m kẹni ụnụ nwọnrin ndụn. 41M'a ra narịn ọjịja-mma ịhịan; 42kanị a marịnghọ m ndị ụnụ wụ, nị ihiẹn Osolobuẹ ara sụọ ụnụ. 43M gi nwan ẹfan Nẹdi m bịa, ụnụ anabanhannị m, kanị onyẹ ọzọ gi ẹfan enwẹn ẹ bịa, ụnụ a nabanhan a. 44Nanị nkẹ ụnụ a dọndẹ nwan kweri? Ụnụ hụn a narịn ọjịja-mma ẹka ibe ụnụ, kanị ụnụ ara lịlịma nị Onyẹ hụ ya sụọ wụ Osolobuẹ ja ụnụ mma.

45“Erokwọlẹ ni nị m k'e kpe ụnụ ẹka Chuku-Nẹdi; onyẹ e kpeni ụnụ wụ Mozizi ahụn ụnụ gi dọn ẹnya. 46Makẹni, omẹni ụnụ te gi oku Mozizi dọn, nkẹ ụnụ e gi oku m dọn, makẹni mmẹ kẹ Mozizi de banyeni. 47Ebe o mẹni ụnụ egini ihiẹn Mozizi de dọn, nanị ụnụ e dọn nwan gi oku m dọn?”

Currently Selected:

Jọnụ 5: ikkBI

Highlight

Copy