Jọnụ 6

Isi Nke Isin

Jesu E Ye Mmadụ Nnụ-uku Isẹn Ihiẹn-oriri

(Mat 14.13-21; Mak 6.30-44; Luk 9.10-17)

1Ọhụn e mẹgụ, Jizọsị nọ fetu Ohimin Galili hụn wụzị Ohimin Taịberiasị. 2Igunrun hi-ogbe hụ e sọn ẹ, makẹni wẹ hụn ọrụn-atụmẹnya ndị ọ rị a rụnnị ndị emu rị a kụ. 3Jizọsị nọ shi elu ugu, ya lẹ ndị nsọnmazụụn a nọ nọdị alị ebẹhụ.

4Ogẹnni, Mmẹmmẹ-nghafe ndị Ju e rumẹgụọ.

5Jizọsị e weshi ẹnya elu, hụn igunrun ịhịan lala d'e kunrun ẹ. Ọ nọ sị Filipu, “Elebe kẹ ẹnyi a nọ ṅọn brẹdi kẹni ndịnị ri?” 6O gi ẹ hụ lele Filipu, ya nwẹn a marịngụọlẹ ihiẹn o jẹnkọ d'e mẹ.

7Filipu nọ za a, sị, “Egho ọrụn akpọhịn ọgụn iri ezukọdẹ ṅọn brẹdi k'e ru wẹ ile ẹka, ọsụọn'a nị wẹ ri ẹkẹrẹ-ẹkẹrẹ sụọ!”

8Onyẹ ohu imẹ ndị nsọnmazụụn Jesu w'a kpọ Andrụ, nwẹnẹ Saịmọnụ Pita, nọ sị a, 9“O nwọn nwata bu ogbe brẹdi isẹn wẹ gi ọka bali mẹmẹ lẹ azụn ẹbụọ ebeni; kalẹ, ebe ọhụn sikọ d'a pụ igunrunni?!”

10Jizọsị nọ sị, “Gwa nị wẹ nọdị alị.” Irurue rị ebẹhụ ọda. Ya ndị hụ nọ nọdị alị. Ikẹnnyẹ rị imẹ wẹ wụ ihiẹn nọ kẹ nnụ-uku isẹn. 11Ya kẹ Jesu nọ weri brẹdi ndị hụ, ọ kpanmịngụ Osolobuẹ, ọ nọ keni ndị hụ nọdị alị ya; ọ nọ mẹzi azụn ndị ahụn ẹrịra, wẹ nọ ri kẹ wẹ chọ. 12E rijungụ wẹ ẹfọ, Jesu nọ sị ndị nsọnmazụụn a, “Kpọnkwama nị ifunfun ẹ, makẹ hụn ọwụlẹ gha a la iwi.” 13Ya wẹ nọ kpọnkwama wẹ, ifunfun ẹ họdụ imẹ ogbe brẹdi bali isẹn hụ wẹ ri jun ụkpalị mmẹbụọ!

14Ogẹn ndị ahụn gi hụn ọrụn-atụmẹnya Jizọsị rụn, wẹ nọ sị, “Ezioku-ezioku, ọnwan wụ onyẹ-amụma hụ Ẹkụkwọ-nsọ sị n'ọ lala imẹ ụwa!”

15Jesu a hụn a nị w'e d'a bịa d'e gi ikẹn weri ẹ d'e kin eze, ọ nọ pụzị, ya sụọ nọ shi elu-ugu.

Jesu E Jẹn Ijẹn Elu Mirin

(Mat 14.22-33; Mak 6.45-52)

16O ru ẹnyasị, ndị nsọnmazụụn Jesu nọ shi Ohimin Galili, 17banye imẹ ụgbọ-mirin, buli, jẹnkọ Kapanọm. Ọhịhị a gbagụ, Jesu eke bịa d'e kunrun wẹ. 18Ohimin hụ e mẹhunmẹ ọda-ọda yeni okẹn ufere rị a kpọnị. 19A nyanpụ wẹ ihiẹn rịkẹ maịlị ẹtọ mọbụ ẹnọ, wẹ nọ hụn Jesu k'o jẹnla ijẹn elu mirin, a nọkunmẹ ụgbọ hụ. Egun nọ tụma wẹ. 20Kanị ọ nọ sị wẹ, “Mmẹ rọ! Atụlẹ ni egun!” 21Wẹ te nọ chọ n'ọ banyeni wẹ imẹ ụgbọ; kanị ozigbo, ụgbọ hụ nọ ru mkpẹnrẹn mirin alị hụ wẹ jẹnkọ.

Igunrun Hụ Jizọsị Ye Ihiẹn-oriri A Chọmazị A

22Eki e fọn, ọ nọ we igunrun hụ wẹ latọ nfetu ohimin ẹnya nị ụgbọ ohu sụọ te rị ebẹhụ bụ Jesu esọnni ndị nsọnmazụụn a banye ẹ, ndị nsọnmazụụn a sụọ wị pụ. 23Kanị ogẹnni, ụgbọ ndị ọzọ gha Taịberiasị bịa rị nwan ẹhụ ebahụn wẹ nọ ri brẹdi ogẹn Di-nwọnni-ẹnyi gi kpanmịngụ Osolobuẹ yeni brẹdi hụ. 24Ogẹn igunrun hụ gi nwan ghọta nị kẹ Jesu kẹ ndị nsọnmazụụn a arịzị ebahụn, wẹ lẹ enwẹn wẹ nọ banye ụgbọ ndị hụ gha Taịberiasị bịa chọshi Jesu Kapanọm.

Jesu Wụ Ihiẹn-oriri Ahụn E Ye Ndụn

25Ogẹn wẹ gi hụn Jesu nfetu “ohimin” hụ, wẹ nọ sị a, “Onyẹ-nkuzi, ele ogẹn k'i gizi ru ebeni?!” 26Jesu nọ sị wẹ, “Ezioku kẹ m rị a gwa ụnụ, brẹdi ụnụ ri rijun ẹfọ haịn ụnụ gi a chọ m, ẹlẹ ọrụn-atụmẹnya ndị ahụn ụnụ hụn. 27Egizilẹ ni ufiri ihiẹn-oriri e wiwini a rụngbu enwẹn ụnụ, kanị ihiẹn-oriri hụn sikọ d'a rị jẹnrin ejẹn, e ye ndụn itẹbitẹ, ihiẹn-oriri ahụn Nwa nke Ịhịan jẹnkọ d'e ye ụnụ, makẹni Nwa nke Ịhịan kẹ Chuku-Nẹdi tumẹ.”

28Wẹ nọ nwan sị a, “Kị ẹnyi jẹnkọ d'a rụn hụn wụ ọrụn Osolobuẹ?”

29Jesu nọ sị wẹ, “Ọnwan wụ ọrụn Osolobuẹ: ikwerini onyẹ hụn o zihẹ.”

30Wẹ nọ sị a, “Elee ọrụn-atụmẹnya k'i jẹnkọ nwan d'a rụnghọsị ẹnyi nị ẹnyi hụn a kweri ihiẹn i ku? K'ị jẹnkọ d'e mẹ? 31Ndị nẹdi ẹnyi kanị ri mana imẹ atụ; ya kẹ wẹ de imẹ Ẹkụkwọ-nsọ, sị, ‘O ye wẹ brẹdi gha elu-igwee bịa ri.’ ” 32Ya kẹ Jizọsị nọ sị wẹ, “Ezioku kẹ m rị a gwa ụnụ, ẹlẹ Mozizi ye ụnụ brẹdi gha elu-igwee bịa; Nẹdi m rị e ye ụnụ ezigbo brẹdi hụ gha elu-igwee bịa. 33Makẹni brẹdi Osolobuẹ wụ onyẹ hụ gha elu-igwee bịa, hụn rị e ye ụwa ndụn.” 34Wẹ nọ sị a, “Diọkpa, yemẹ nwan ẹnyi brẹdini ogẹn ile.”

35Jizọsị nọ sị wẹ, “Mmẹ wụ brẹdi hụn e ye ndụn. Onyẹ bịa d'e kunrunni m, ẹgụn agụnkọ a; onyẹ kwerinini m, ẹgụn mirin agụnkọ a. 36Kanị, a gwagụọ m ụnụ ya mbụ nị ụnụ a hụngụọ m, kanị ụnụ ekwerini.

Uche Osolobuẹ Kẹ Jesu Bịa D'e Mẹ

37“Ndị ile Nẹdi m ye m sikọ d'a bịa d'e kunrun m; achụpụkọ m onyẹ ọwụlẹ bịa d'e kunrunni m 38Makẹni, aghanị m elu-igwee bịa d'e mẹ uche m, kanị uche onyẹ hụn zihẹni m. 39Ọnwan wụ uche onyẹ zihẹni m: nị onwọnni akpụ onyẹ ohu o ye m jẹnkọ d'e hunahịnnị m, kama, nị m k'a gha ọnwụn weli wẹ Ụhụọhịn ikpanzụụn; 40uche Nẹdi m wụ nị onyẹ hụn Nwa, kwerin'ẹ, jẹnkọ d'e nwọn ndụn itẹbitẹ; m sikọ d'e weli ẹ Ụhụọhịn ikpanzụụn.”

41Ya kẹ ndị Ju ahụn nọ dẹnnwịnnwịnman'a, makẹni ọ sị, “Mmẹ wụ brẹdi hụ gha elu-igwee bịa.” 42Wẹ hụ a sị, “Ẹlẹ Jesu nwa Josẹfụ wụ ọnwan, hụn ẹnyi marịn ndị mụn'a? Nanị o dọn nwan a sị, ‘M gha elu-igwee bịa?’ ”

43Jizọsị nọ shịarị wẹ, sị, “Edẹnnwịnnwịnzịlẹ ni. 44Onwọnni onyẹ k'a s'ẹka bịa d'e kunrun m mmanị Chuku-Nẹdi zihẹni m dọha a; m k'e weli hụnyẹ Ụhụọhịn ikpanzụụn. 45Wẹ de ẹ imẹ Ẹkụkwọ ndị-amụma nị, ‘Osolobuẹ sikọ d'a kuzi wẹ ile.’ Onyẹ hụn e gọn Chuku-Nẹdi ntịn, a mụnarịn a, jẹnkọ d'a bịa d'e kunrun m. 46Ẹlẹ n'o nwọn onyẹ hụntu Chuku-Nẹdi wezụka onyẹ ahụn gha ebe ọ rị bịa; ịya sụọ hụntu Chuku-Nẹdi. 47Ezioku kẹ m rị a gwa ụnụ, onyẹ ọwụlẹ kwerini e nwọngụọ ndụn itẹbitẹ.

48“Mmẹ wụ brẹdi hụn e ye ndụn. 49Ndị nẹdi ụnụ kanị ri mana#6.49 Ịya kẹ wẹ kpọ ihiẹn-oriri hụ Osolobuẹ gha elu-igwee zihẹ ni ndị Izrẹlụ imẹ atụ ogẹn Mozizi. hụ wẹ ri imẹ atụ, kanị, a nwụnhụnghọ wẹ. 50Kanị hụnnị m rị e ku wụ brẹdi hụn gha elu-igwee bịa, hụn onyẹ rin'ẹ ghalẹni a nwụn. 51Mmẹ wụ brẹdi hụ rị ndụn hụn gha elu-igwee bịa. Onyẹ hụn ri brẹdini jẹnkọ d'a rị ndụn jẹnrin ejẹn. Ẹhụ m wụ brẹdi hụ m jẹnkọ d'e ye kẹni ndị rị ụwa rị ndụn.”

52Ya kẹ ndị Ju ahụn lẹ ibe wẹ nọ dọma, “Nanị okẹnnyẹni e dọn ye ẹnyi ẹhụ a ri?”

53Ya kẹ Jizọsị nọ sị wẹ, “Ezioku kẹ m rị a gwa ụnụ, mmanị ụnụ ri ẹhụ Nwa nke Ịhịan, ra ẹdeke ẹ, ụnụ enwọnkọ ndụn imẹ ụnụ. 54Onyẹ hụn ri ẹhụ m, ra ẹdeke m, e nwọngụọ ndụn itẹbitẹ; m sikọ d'e weli ẹ Ụhụọhịn ikpanzụụn. 55Makẹni, ẹhụ m wụ ihiẹn-oriri nke-esi, ẹdeke m wụ ihiẹn-ọrịra nke-esi. 56Onyẹ ri ẹhụ m, ra ẹdeke m, k'a rịsọnmẹ imẹ m, mmẹ lẹ enwẹn m a rịsọnmẹ imẹ ẹ.

57“Kẹ m dọn rị ndụn makẹni Chuku-Nẹdi zihẹni m rị ndụn, ẹrịra kẹ onyẹ hụn rini m k'a dọn rị ndụn makẹni m rị ndụn. 58Ọnwan wụ brẹdi gha elu-igwee bịa; ọ nọnị kẹ hụn ndị nẹdi ụnụ kanị ri, kanị a nwụnhụnkwọ wẹ. Onyẹ ri brẹdini, o jẹnkọ d'a rị ndụn jẹnrin ejẹn.”

59Ebe Jesu rị a kuzi imẹ ụlọ-ofufe ndị Ju rị Kapanọm k'ọ nọ ku ihiẹn ndịnị.

Oku Hụn E Ye Ndụn Itẹbitẹ

60Ndị nsọnmazụụn a bu ọda a nụ ihiẹnni, wẹ nọ sị, “Okuni e zekẹkwọ-o! Onyẹ sikọ d'a saẹka mẹ ẹ?!”

61Jizọsị a marịngụọ nị ndị nsọnmazụụn a rị e dẹnnwịnnwịn makẹni o ku ihiẹnni. Ọ nọ sị wẹ, “Ọnwan k'e mẹdẹ nwan ụnụ kweribehi ra? 62Kị ụnụ k'e mẹzi nwan ụnụ hụn Nwa nke Ịhịan k'ọ lakọ elu-igwee ọ rị mbụ? 63Mmọn-nsọ sụọ e ye ndụn, ịhịan mmaka asaẹka mẹ ihiẹn-anaị: oku ndịnị m rị a gwa ụnụ wụ oku imẹ-mmọn lẹ oku e ye ndụn. 64Kanị ẹlẹ ụnụ ile kweri.” Gha mbidọn lala, Jesu a marịngụọ ndị kwerilẹni lẹ onyẹ hụn jẹnkọ d'e ren'ẹ.

65Ọ nọ sịzị, “Ọnwan haịn m gi sị ụnụ n'o nwọnni onyẹ jẹnkọ d'a saẹka bịa d'e kunrun m mmanị Chuku-Nẹdi mẹ ẹ bịa.”

66Gha ogẹnni jẹnmẹ, ndị bu ọda imẹ ndị e sọnn'ẹ nọ kin azụụn, esọnzini w'ẹ ghahunmẹ.

67Ya Jizọsị nọ sị ndị nsọnmazụụn a mmẹbụọ hụ, “Ụnụ nwẹn sikọ d'a pụzị?”

68Saịmọnụ wụ Pita nọ za a, sị, “Di-nwọnni-ẹnyi, onyẹ kẹ ẹnyi burukọ? Ịyụ e ku oku ndị e ye ndụn itẹbitẹ. 69Ẹnyi e kwerighọ, marịnzịkwọ, nị ịyụ wụ Onyẹ-nsọ Osolobuẹ.”

70Jizọsị nọ sị wẹ, “Ẹlẹ mmẹ họrị ụnụ mmẹbụọ? Kanị onyẹ ohu imẹ ụnụ wụ Ekwensụ!”

71Judasị nwa Saịmọnụ Iskarọtụ k'ọ rị e ku, makẹni ịya jẹnkọ d'e re ẹ, ọsụọn'a n'ọ wụ onyẹ ohu imẹ ndị nsọnmazụụn a mmẹbụọ.

Currently Selected:

Jọnụ 6: ikkBI

Highlight

Copy