Luku 18
18
Isi Nke Mmẹsatọ
Imẹ Ekpere Ogẹn Ile
1Jizọsị nọ gi ilu ghọsị ndị nsọnmazụụn n'o furu nị wẹ e mẹ ekpere e mẹsọnmẹ, anịnị wẹ ndụn gụ wẹ. 2Ọ sị, “O nwọn okẹnnyẹ ohu oku rị ẹka imẹ obodo ohu. Ara tụ egun Osolobuẹ, ara gbaye ịhịan. 3Okpoho ohu di ẹ nwụn rịzị obodo hụ; ọ hụ a bịa d'a rịọ okẹnnyẹ hụ, ‘Dodo, d'a hannị mmẹ lẹ onyẹ rị e mẹgbuni m eṅẹn!’ 4Okẹnnyẹ hụ a jụbe n'o lekọ a ẹnya ihun, ọ nọ sị enwẹn ẹ, ‘Ọsụọn'a nị m'a ra tụ egun Osolobuẹ mọbụ gbaye ịhịan, 5m sikọ d'e gi ufiri nsọngbuni okpohoni di ẹ nwụn rị e ye m mẹ wẹ ye ẹ ihiẹn run'ẹ, makẹ ẹhụ gha a ghanahịn m yeni ọbịbịanị ọ rị a bịa ogẹn ile!’ ”
6Di-nwọnni-ẹnyi nọ sị, “Ụnụ a nụgụọ ihiẹn eje okẹnnyẹ ahụn oku rị ẹka ku. 7Osolobuẹ emẹkọ wẹ ye ndị nke ẹ rị a kwanghọsị a uhinhin lẹ efinnaị ihiẹn runi wẹ? N'o biekẹ d'e yeni wẹ ẹka?
8“M rị a gwa ụnụ, o jẹnkọ d'e mẹ wẹ ye wẹ ihiẹn runi wẹ, mẹdẹ ẹ ngwa. Kanị Nwa nke Ịhịan bịa, n'ọ hụn ndị nwọn okukwe imẹ ụwa?”
Ilu Jesu Tanị Ndị Ro N'a Rịka Wẹ Mma
9Jizọsị ta iluni makẹ ndị ahụn rị e lelịa ndị ọzọ makẹni wẹ ro n'a rịka wẹ mma: 10Ọ sị, “Ikẹnnyẹ ẹbụọ jẹn Ụlọ-nsọ d'e mẹ ekpere: ohu wụ onyẹ Farisi, hụn-ẹbọ wụ onyẹ a na ụgwọ-isi — onyẹ wẹ gi njọ marịn. 11Onyẹ Itu-Farisi e jẹnzụka, mẹ ekpereni: ‘Osolobuẹ, a kpanmịn m'ị nị anọnị m kẹ ndị ọzọ: m'a ra tụnarịn ịhịan ihiẹn ẹ, m'a ra tụ ntụ, m'a ra ghẹrẹ; anọdẹni m kẹ onyẹ ụgwọ-isi hụ rị ebẹhụ. 12M hụ e bu ọnụ mgbe ẹbụọ imẹ izuka, e ye i ohu-imẹ-iri ihiẹn ile m nwọn.’
13“Kanị, onyẹ ụgwọ-isi nọ wuzo ebe teni; ọ sadẹni ẹka bu ihun zinmẹ elu-igwee, kama, ọ hụ a fịan ẹka obi, a sị, ‘Osolobuẹ, dodo mẹ omikẹn m, onyẹ njọ kẹ m wụ!’
14“Jesu nọ sị: M rị a gwa ụnụ nị onyẹ ụgwọ-isi hụ kẹ Osolobuẹ kuni ọhụnma n'o d'a lama iwe ẹ, ẹlẹ onyẹ Itu-Farisi hụ. Makẹni, onyẹ bushi enwẹn ẹ elu, e welụa w'ẹ alị; onyẹ welụa enwẹn ẹ alị, e bushi wẹ ẹ elu.”
Ẹnya Jesu Gi E Lee Ụmụẹka
(Mat 19.13-15; Mak 10.10-16)
15O nwọn ndị rị e wẹhẹ ụmụ wẹ pa ẹka kẹni Jesu hụatụ wẹ ẹka, gọzi wẹ. Kanị, ndị nsọnmazụụn a a hụn ihiẹnni, jụgbọma wẹ. 16Ya Jizọsị nọ sị wẹ wẹhẹ ụmụẹka hụ; ọ nọ sị, “Nị nị ụmụ-ndu bịa d'e kunrun m; akụsịlẹ ni wẹ, makẹni Alị-eze Osolobuẹ wụ nke ndị nọ ẹrịra. 17M rị a gwa ụnụ ezioku, onyẹ nabanhanlẹni Alị-eze Osolobuẹ kẹ nwata abanyekọ a.”
Onyẹ-ndu Ahụn Wụ Ọdanfịn
(Mat 19.16-30; Mak 10.17-31)
18Onyẹ-ndu ohu jụ Jizọsị ajụjụ, sị a, “Ezigbo onyẹ-nkuzi, kị m'e mẹ nị m nwọn ndụn itẹbitẹ?”
19Jizọsị nọ sị a, “K'ị rị a kpọnị m onyẹ-ọma? Onwọnni onyẹ rị mma wezụka Chuku. 20Ya marịnghọ Iwu ndịnị wẹ: ‘Aghẹrẹlẹ; egbulẹ ọchụn; ezunlẹ ohin; ebuokinlẹ ịhịan ọnụ; gbaye nẹdi i lẹ nnẹ i.’ ”
21Ọ nọ sị Jizọsị, “M hụ e dọnmẹ iwu ndịnị ile kete m marịnlẹ ihiẹn.” 22Jizọsị a nụ ihiẹn ọ za, ọ nọ sị a, “O nwọn ihiẹn ohu i kelẹni mẹ: repụ ihiẹn ile i nwọn, y'e we egho ẹ ye ndị igbẹnnyẹ, gi ẹ nwọn akụ-lẹ-ụba imẹ elu-igwee; y'a bịa d'e sọnmẹ m.” 23Okẹnnyẹ hụ a nụ ihiẹnni, ẹfọ asụọzịn'a ụsụọ kaka, makẹni o hikẹ ọdanfịn.
24Ogẹn Jizọsị gi hụn nị ẹfọ asụọzịn'a ụsụọ, ọ nọ sị, “Alị-eze Osolobuẹ k'a fụkwọ ndị-ịdanfịn ọrụn ọbanye! 25O sikọ d'a ka anyịnyan-mkpukpuke wụ kamẹlụ nfe ịgha ẹnya-olodẹn karị nị ọdanfịn banye Alị-eze Osolobuẹ.” 26Ndị nụ ihiẹnni nọ sị, “Onyẹ k'a sazị nwan ẹka nwọn nzụọpụha?”
27Jesu nọ sị wẹ, “Ihiẹn ịhịan ghalẹni a sa ẹka e mẹ, Osolobuẹ k'a sa ẹka mẹ ẹ.”
28Ya Pita nọ sị, “Lee ẹ, ẹnyi a lagụọ ihiẹn ile ẹnyi nwọn tọ sọnmẹ i!”
29Jizọsị nọ sị wẹ, “M rị a gwa ụnụ ezioku, onwọnni onyẹ gi ufiri Alị-eze Osolobuẹ latọ ụlọ mọbụ nwunyẹ mọbụ umunẹ mọbụ nẹdi lẹ nnẹ mọbụ ụmụ 30hụn jẹnkọlẹni d'e nwọnhẹn wẹ mmagi-mmagi ogẹnni, nwọnhẹnzikwọ ndụn itẹbitẹ ogẹn ahụn lalanị.”
Jesu E Kudọnzi Ẹ N'o K'a Nwụn, Lihizi
(Mat 20.17-19; Mak 10.30-34)
31Jizọsị weri mmadụ mmẹbụọ hụ shi ụsụọ, ọ nọ sị wẹ, “Gọn ni ntịn! Ẹnyi jẹnkọ nwan Jerusalẹm; ihiẹn ile ndị-amụma de banyeni Nwa nke Ịhịan jẹnkọ d'e mẹchanrịn ebẹhụ.
32“Wẹ sikọ d'e bu ẹ che ẹka ndị alị ọzọ; e gi w'ẹ gu egu, kpari ẹ, jụ a ẹsọn. 33Wẹ k'a fịan a mkpịnsịn, gbu ẹ; kanị, hụn mẹ ẹ akpọhịn ẹtọ, o lihi.”
34Kanị, onwọnni hụn wẹ ghọta; wẹ zuemẹni wẹ ya e zuemẹni.
Jesu A zụọ Onyẹ Ẹnya-ishi
(Mat 20.29-34; Mak 10.46-52)
35Ogẹn Jizọsị gi nọkunmẹmẹ Jẹriko, onyẹ ẹnya-mpịn ohu nọdị alị mkpẹnrẹn ụzọ, a rịọ ụrịọ.
36Ogẹn onyẹ ẹnya-mpịn hụ gi nụ ukwere igunrun ghafekọnị, ọ nọ jụ wẹ kẹ kị rị e mẹ.
37Wẹ nọ gwa a nị Jesu onyẹ Nazarẹtị ghafekọ.
38Ya ọ nọ yi, “Jizọsị, Nwa Defidi, mẹni m omikẹn!”
39Ndị rị ihun imẹ igunrun hụ nọ jụgbọ a, sị a kpumẹ ọnụ. Kanị, ọ nọ yikẹnmẹdẹ, a sị, “Nwa Defidi, mẹ omikẹn m!”
40Ya Jesu nọ wuzo, sị wẹ wẹhẹ okẹnnyẹ hụ. Ọ nọzụnhan, Jesu nọ sị a, 41“K'ị chọ nị m mẹn'i?” Ọ nọ sị, “Di-nwọnni-ẹnyi, m chọ nị m leghama ụzọ.”
42Jizọsị nọ sị a, “Leghama nwan! Okukwe i a zụọgụọ ị.”
43Ozigbo, ọ nọ leghama ụzọ; ọ nọ sọnmẹ Jizọsị, a ja Osolobuẹ mma. Ịhịan ile hụnn'a nọzịkwọ ja Osolobuẹ mma.
Currently Selected:
Luku 18: ikkBI
Highlight
Share
Copy
Want to have your highlights saved across all your devices? Sign up or sign in
© 2018, Mission for Language Translation/Ika Bible Translation Committee.
© 2018, Wycliffe Bible Translators, Inc.
