Luku 19

Isi nke Mmitenẹi

Kẹ Zakịọsụ Dọn Rogharị

1Ya kẹ Jizọsị nọ banye Jẹriko, ghafekọ. 2Okẹnnyẹ ohu w'a kpọ Zakịọsụ rị ebẹhụ. Zakịọsịnị rị ndị-isi ndị a na ụgwọ-isi; ọdanfịn k'ọ wụ. 3Ọ hụ a chọ n'ọ hụn onyẹ Jizọsị wụ, kanị ọ sanị ẹka legha Jizọsị imẹ igunrun hụ makẹni o mẹkẹ mkpụrụ.

4Ya ọ nọ gbashi ihun d'e nyinrin osisi sikamọ, kẹni ọ hụn Jesu, makẹni ebẹhụ kẹ Jesu jẹnkọ d'a gha. 5Ogẹn Jesu gi ru ebahụn, o lee ẹnya elu, ọ nọ sị Zakịọsụ, “Zakịọsụ, hidan ozigbo, nị m sikọ d'a nọdịrịrị iwe i tannị.”

6Zakịọsụ nọ hidan ozigbo-ozigbo, gi ịghọghọ nabanhan a. 7Ịhịan ile hụnn'a nọ kpemẹ, a sị, “O shigụọ nke onyẹ-njọ d'a nọdị!”

8Zakịọsụ nọ turu, sị, “Di-nwọnni-ẹnyi, lee ẹ, m rị nwan e kebe ihiẹn ile m nwọn ụzọ ẹbụọ e we ohu e ye ndị igbẹnnyẹ! Omẹni o nwọn onyẹ m mẹgbu, m jẹnkọ d'a kụkin ẹ ya ụzọ ẹnọ!”

9Ya Jizọsị nọ sị a, “Nzụọpụha a bịaọlẹ ezi-lẹ-ụlọnị tannị, makẹni okẹnnyẹni wụzịkwọ nwa Ebraham. 10Nwa nke Ịhịan bịa d'a chọ ndị tuhuni kẹn'ọ zụọpụha wẹ.”

Ndị Wẹ Ye Egho Zụ Afịa

(Mat 25.14-30)

11Ya Jizọsị nọ tazịnị ndị rị e sọnn'ẹ ilu ọzọ, makẹni, hụnnị o rumẹgụ Jerusalẹm, wẹ rị e ro ni Alị-eze Osolobuẹ e d'e weri ọnọdị ozigbo-ozigbo. 12Ọ sị wẹ, “Okẹnnyẹ ohu wụ nwa eze jẹnkọ alị teni nị w'e d'e kin ẹ eze n'ọ lụa. 13Ọ nọ kpọ idibo ẹ iri, ye wẹ egho ọrụn akpọhịn ọgụn-isẹn ụzọ iri. Ọ nọ sị wẹ, ‘Gi ni eghoni zụ afịa d'e ru n'a lụaha m.’ 14Kanị, ize okẹnnyẹ ahụn rị e ze ndị alị a. Wẹ nọ zi ndị ozi sọnmẹ ẹ d'a sị, ‘Ẹnyi achọnị nị okẹnnyẹni kị ẹnyi.’

15“Kanị, wẹ nọkwọ kin ẹ eze hụ. Ọ nọ lụa. Ozigbo, ọ nọ kpọ ndị idibo ẹ hụ o ye egho, n'ọ marịn erere afịa wẹ zụ.

16“Nke ibuzọ a pụha, sị, ‘Di-nwọnni ẹnyi, e gigụọ m egho i ye m nwọnhẹn iri chen'ẹ.’ 17Ọ nọ sị a, ‘Ezigbo odibo! Y'e mẹkẹ. Ebe o mẹ ni y'e kwọndọngụọ ihiẹn mẹgbu enwẹn ẹ ẹkẹrẹ ọhụnma, weri obodo iri kịma.’ 18Hụn mẹ ẹ ẹbụọ nọ pụha, sị, ‘Di-nwọnni-ẹnyi, e gigụọ m egho i ye m nwọnhẹn isẹn chen'ẹ.’ 19Ọ nọ sị a, ‘Yụ nwẹn, weri obodo isẹn kịma.’ 20Odibo ọzọ nọ pụha, sị, ‘Di-nwọnni-ẹnyi, lee egho i; m gi ẹkwa kẹnmẹ ẹ butọ. 21Egun i rị a tụ m, makẹni y'e zekẹ; y'e ri ihiẹn ị rụnlẹni, a ghọrị ihiẹn ị kụnlẹni.’

22“Eze nọ sị a, ‘Eje-odibo! Oku-ọnụ ị kẹ m k'e gi kin i ikpe. Y'a marịnghọ nị e zekẹ m, nị m'e ri ihiẹn m rụnlẹni, a ghọrị ihiẹn m kụnlẹni. Ẹlẹ ịya? 23Kị haịn nwan i gilẹni bu egho m cheni m imẹ ụlọ egho#19.23 Aza., kẹni, m bịa, e weri m ya lẹ ọmụnịnwa rịn'a?’

24“Eze nọ sị ndị turu ebẹhụ, ‘Napụhan'a egho hụ, we ẹ ye odibo ahụn nwọn iri.’ 25Kanị wẹ nọ sị a, ‘Di-nwọnni-ẹnyi, o nwọngụọlẹ iri nụ!’ 26Eze nọ sị wẹ, ‘M rị a gwa ụnụ, wẹ jẹnkọ d'e yecheni ndị ile nwọnni, kanị, ndị nwọnlẹni, wẹ jẹnkọ d'a napụdẹ wẹ hụn wẹ nwọn. 27Nke ndị iṅẹnrẹn m ahụn chọlẹni nị m wụrụ eze wẹ, wẹhẹ ni wẹ d'e gbu idẹnya m ebeni.’ ”

Jesu A Banhan Jerusalẹm Nọkẹ Eze

(Mat 21.1-11; Mak 11.1-11; Jọn 12.12-19)

28Ogẹn Jesu gi kugụ ihiẹnni, ọ nọ jẹnmẹ Jerusalẹm o jẹnkọ. Ọ hụ ihun; ndị ya lẹ wẹ wị hụ e sọn ẹ. 29O rumẹ Bẹtifeji lẹ Bẹtani hụn rị ugu w'a kpọ Ugu Olivu, ọ nọ zi ndị nsọnmazụụn a ẹbụọ ozi: 30ọ sị wẹ, “Banye ni obodo ahụn mẹ ẹkẹrẹ rị ihun; ụnụ banye, ụnụ sikọ d'a hụn nwa-jaki wẹ limẹtọ ebẹhụ, hụn wẹ nyintulẹni kaka; tọpụ n'a wẹhẹ. 31Onyẹ sị ụnụ, ‘Kị ụnụ rị a tọrịn'a?’ Sị n'a hụ, ‘Onyẹ-nwọnni-ẹnyi chọ a.’ ”

32Ya ndị hụ o zi nọ jẹnmẹ, hụnchanrịn ihiẹn ile kẹ Jesu dọn gwa wẹ. 33Ebe wẹ rị a tọpụ nwa-jaki hụ, ndị nwọnn'ẹ nọ sị wẹ, “Kị ụnụ rị a tọpụnị nwa Jaki hụ?”

34Wẹ nọ sị, “Onyẹ-nwọnni-ẹnyi chọ a.” 35Ya wẹ nọ wẹhẹni Jesu nwa-jaki hụ. Wẹ nọ gbama ẹwuru wẹ e yiye elu ẹ ye elu jaki hụ; ya wẹ nọ yeni Jesu ẹka nyinrin ẹ. 36O nyinkọ, igunrun ahụn hụ e gi ẹwuru wẹ e yiye elu ẹ a gbama ụzọ.

37Ogẹn o gi ru ẹhụ Jerusalẹm, ebẹhụ wẹ gha a kpọtu Ugu Olivu, igunrun ndị nsọnmazụụn a nọ ghọghọma, e weshi olu elu a ja Osolobuẹ mma makẹ ihiẹn atụmẹnya ndị wẹ hụn, a sị,

38“Ịja-mma ya rịnị

Eze ahụn gi ẹfan Di-nwọnni-ẹnyi bịa!

Udọn ya rị elu-igwee,

Ngọzi ya rịnị Osolobuẹ

ebẹhụ kachanrịn elu ejẹn.”

39Kanị ụfọdụ ndị Itu-Farisi rị igunrun hụ nọ sị Jesu, “Onyẹ-nkuzi, jụgbọ ndị nsọnmazụụn ị!”

40Jizọsị nọ sị wẹ, “M rị a gwa ụnụ, ndịnị gba nkịtịn, ọmụma ndịnị rị ebeni jẹnkọ d'e yimẹ oro hụ.”

Jizọsị A Kwannị Jerusalẹm Ẹkwan

41Ogẹn Jesu gi nwan ru ẹhụ Jerusalẹm, ọ hụn a, ọ nọ kwanman'a ẹkwan, 42sị, “Ẹghẹẹ, ịyụ, ịyụdẹ! Tannị, omẹni i te marịn ihiẹn nkẹ e ye i udọn! Kanị, e zuemẹgụọ nị wẹ i ya! 43Ogẹn lala, hụn ndị iṅẹnrẹn i jẹnkọ d'e gi kehunmẹchanrịn ị, gha azụụn ile zụnbanhan imẹ i. 44Wẹ jẹnkọ d'e tikpọ ị ru alị, yụ lẹ ndị rị imẹ i: onwọnni ogbe ọmụma ohu wẹ gi tụn ị hụn wẹ jẹnkọ d'a latọ elu ibe ẹ, makẹni y'a marịnnị ogẹn Osolobuẹ gi bịa d'e mẹni i ọhụnma.”

Jizọsị A Chụpụ Ndị Rị Ụlọ-nsọ A Zụ Afịa

(Mat 21.12-17; Mak 11.15-19; Jọn 2.13-22)

45Ya kẹ Jizọsị nọ banye Ụlọ-nsọ, chụpụma ndị rị ebahụn e re ihiẹn, 46a sị wẹ, “Wẹ de ẹ imẹ Ẹkụkwọ-nsọ nị Osolobuẹ sị, ‘Ụlọ m jẹnkọ d'a wụ ụlọ wẹ nọ e mẹ ekpere’, kanị ụnụ e gigụọ a nwan họnrin ebe ndị ohin a warị.”

47Ụhụọhịn ile, Jizọsị hụ a kuzi imẹ Ụlọ-nsọ. Ndị-isi nchụn-ẹjan lẹ ndị-nkuzi Iwu lẹ ndị-isi ndị Ju hụ a chọ nị wẹ gbu ẹ, 48kanị, ahụnnị wẹ ụzọ mẹ ẹ, makẹni nkuzi ẹ e werigụọ igunrun ahụn ile.

Currently Selected:

Luku 19: ikkBI

Highlight

Copy