Jâan 11

Kuzü Lazäre, agü Jezü

1Ngâ köchë wä alême la tə̂kömbô, rə̈ yê wû pä Lazäre akrə gö ndə̂ Betanï. Betanï nə̈ wätə̂ yɛ̈yɛ̈ gö ndə̂ Malê la yûngâ yê Mârete. 2Malê də̈ ɛ̈chë ndə̂ tche sû yömbö alême pâ da Gbölö Gbïɛ̈, ânyë kə̈ trô rə̂ la su küma yê lâme, tchetchë kä ndə̂ gʉ̈me nə̈ Lazäre wâ la tə̂kömbô. 3Anyînə̂ nə̈ wân tchô sə̈ Jezü kə̈ tô rə̂ päkëdə̂: «Gbölö Gbïɛ̈, agü zə̈ kä la tə̂kömbô.» 4Ndə̂ Jezü djê rə̂, kə̈ tô rə̂ päkëdə̂: «Tə̂kömbô nə̈ lâme wâbo ndə̂kə̂ pa tche tchûtchü la rə̂-a. Praâbalë tə̂kömbô nə̈ lâme wä ndə̂kə̂ pa azü lusə̂ Ndjapä lə̂ köbosə̂ nə̈, ndə̂kə̂ pa lə̂ köbosə̂ nə̈, azü lusə̂ Modô ndə̂ Ndjapä.»

5Jezü nyïndə̂ Mârete la yûngâ yê Malê la Lazäre. 6Ndə̂ Jezü djê pö ndə̂ tə̂kömbô ndə̂ Lazäre nə̈, tche kâ mbô lö bïchuû sə̂ tchô ndə̂ tche sə̂ tâ lâme. 7Pânə̈ tche tô rə̂ sə̈ adjisîpili ndə̂ yê päkëdə̂: «Azə̈ dötə̂ azə̂ atə̂ Judë.» 8Adjisîpili nə̈ tô rə̂ sə̈ tchë päkëdə̂: «Earə̂ kə̂ nyisə̂ rə, angangaâtə ajuîfu bhâye nyïndə̂ kə̂ nye mö la täme, mo nyïndə̂ kə̂ kä dotə̂ zə̈ atêe?» 9Jezü tô rə̂ ndə̂nə̈ sə̈ andjê päkëdə̂: «La tchêdalo balë, dalo wâbo lə̂nə̈ lə̂ könô gbɛ̂ tchêpâ nə̈ bïchuû? Âdə ngâ akrə ânə la tchêdalo, kə̂ gʉ̂teabô da yê tee-a, bëte tche wün tchô ndə̂sə̂ ngbänga ndə̂ tchêbêche âtə. 10Praâbalë âdə ngâ akrə ânə lə̂ bütchî, tchê gʉteadje da yê bëte ngbänga tchô wâbo lə̂ yê-a.» 11Pânə̈ ndə̂ Jezü tô pö lâme, tche kâ tô rə̂ sə̈ andjê päkëdə̂: «Agü azə̂ Lazäre lôlö, mê eadje ndə̂kə̂ jo tchë.» 12Adjisîpili tô rə̂ sə̈ tchë päkëdə̂: «Gbölö Gbïɛ̈, âdə tche âlôlö, tchê tchadje.» 13Dëkë Jezü nyïndə̂ kə̂ to pö ndə̂ kuzü Lazäre, praâbalë adjisîpili nə̈ wûntî pä tche tö pö ndə̂ mbämbä lö. 14Käko Jezü tô rə̂ kraâ sə̈ andjê päkëdə̂: «Lazäre tchû nə̂. 15Më wä la mômô tə̂ pö ndə̂ nyê, bëte më sə̂âbo bhâye tə̂ lo nə̈ lâme ndə̂kə̂ tcha tchë-a. Rə lâme kä ndə̂ âzadje köbo sə̈ nyê ndə̂kə̂ gamba pö ndə̂ mê. Praâbalë azə̈ êë atə̂ ndrotə̂ yê!» 16Käko Tomä ndə̂ a ê rə̂ tə̂ yê pä mîɛ̈, tô rə̂ sə̈ angâ yê adjisîpili päkëdə̂: «Azə̈zə̂ ndjë, azə̈ ë ngbâ yê ndə̂kə̂ tchu la tchë!»

Jezü wätə̂ kə̂ jo ndə̂ akuzü

17Ndə̂ Jezü wûtu ndola Betanï, kə̈ djê rə̂ pä a chï Lazäre bhâlə̂ cho akuzü âmbô rə̂ nə̂ lö voanə̈. 18Betanï wä kïlömɛ̂tere vötaâ la Jerûzalêmo. 19Ädə̈ käko ânyë angbängbä ajuîfu nə̂ ndə̂kə̂ za gbôgbô tə̂ su Mârete la Malê bëte gʉ̈me andjê ndə̂ tche tchû lâme. 20Ndə̂ Mârete djê rə̂ pä Jezü kä lakə̂ nə, tche ê lə̂ köbo yê, Malê sə̂ andə̂ ye nə̈ bhâ tchâalê. 21Mârete tô rə̂ sə̈ Jezü päkëdə̂: «Gbölö Gbïɛ̈, âdə mo âsə alême tchâtə, gʉ̈me mê tchuabô tee-a. 22Praâbalë angaâtə më wünsə̂ nə̈ pä, rə gbɛ̂ ndə̂ mo yûkû nə̈ tchânə̂ Ndjapä, tchê kʉadje rə̂ sə̈ mö.» 23Jezü tô rə̂ sə̈ tchë päkëdə̂: «Gʉ̈me zə̈ joadje lə̂ kuzü.» 24Mârete tô rə̂ sə̈ tchë päkëdə̂: «Më wünsə̂ nə̈ pä tchê joadje lə̂ kuzü lə̂ lö ndə̂kə̂ jo ndə̂ akuzü sə̂nə̈ ndə̂ tchêbêche krʉ.» 25Jezü tô rə̂ sə̈ tchë päkëdə̂: «Më wätə̂ kə̂ jo ndə̂ akuzü, kə̈ wâ ndjë la tchîsûwu. Akrə ndə̂ tche zâ su yê sə̈ mê, âdəndjë rə̂ ndə̂ tche tchû, tchê wadje la tʉ̈rʉ̂ la yê. 26Akrə ndə̂ tche wâ la tʉ̈rʉ̂ la yê, ânyë kə̈ zâ su yê sə̈ mê, tchê tchuabô balë tee-a. Mo gâmba pö lâme nə̂?» 27Mârete tô rə̂ sə̈ Jezü päkëdə̂: «Tə̂ lëge nə̈, Gbölö Gbïɛ̈, më gâmba rə̂ nə̂ pä mo wätə̂ Krîsiti, Modô ndə̂ Ndjapä ndə̂ tche wân tchë ndə̂kə̂ nə atə̂ bêche âtə.»

Jezü kɨ̈

28Pânə̈ ndə̂ Mârete tô rə̂ käko, tche ê kə̈ ê yûngâ yê Malê, kə̈ tô rə̂ sə̈ tchë lə̂ hûɛ̈ päkëdə̂: «Earə̂ kə̂ nyisə̂ rə wûtu nə̂, tche kä lakə̂ e mö.» 29Ndə̂ Malê djê rə̂, tche âlafô wândâ wändä kə̈ kpê pu Jezü. 30Dëkë Jezü lîâbo lə̂ yɛ̈yɛ̈ gö nə̈ dämba-a, gbô tchë kä bhâ sə̂nə̈ ndə̂ Mârete gbô tchë tâ lâme. 31Ajuîfu ndə̂ andjë sə̂ bhâ tchâalê ndrotə̂ Malê lakə̂ za gbôgbô tə̂ su yê lâme, andjê âsə̈ wun rə̂ ndə̂ Malê âlafô wândâ wändä ânyë kə̈ wûtu, andjë wûtu kə̈ zâ tchêngbâ yê. Andjë wüntî pä tche âe atə̂pâ cho akuzü nə̈ ndə̂kə̂ kɨ. 32Malê wûtu sə̂ tchô ndə̂ Jezü sə̂ tâ. Ndə̂ Malê âsə̈ wun Jezü kə̈ gʉ̂te tchâtchâ yê, kə̈ tô rə̂ sə̈ tchë päkëdə̂: «Gbölö Gbïɛ̈, âdə mo âsə̂ alême tchâtə âtə, gʉ̈me mê tchuabô tee-a.» 33Ndə̂ Jezü wûn Malê la kɨ̈ la ajuîfu ndə̂ andjë zâ tchêngbâ yê, nyonyo rôpâ yê, ânyë tchə̂lə̂ küma yê djîngɨli. 34Tche yû andjê päkëdə̂: «Nyë chï tchë bhâ tchêbâ?» Andjë tô rə̂ sə̈ tchë päkëdə̂: «Gbölö Gbïɛ̈, amö nə kə̂ wun-adje rə̂.» 35Jezü kɨ̂. 36Käko ajuîfu tô rə̂ päkëdə̂: «Tche wä alême tə̂ lëge agü Lazäre!» 37Angânə̈ lə̂ gûtə̂ andjê tô rə̂ päkëdə̂: «Tche jï la a-earə̂ föla, tche wâbo ndə̂kə̂ kitə̂ köbo ndə̂kə̂ pa Lazäre tchu?»

Jezü jö Lazäre lə̂ kuzü

38Jezü kâ wâ la nyonyo tə̂ gbölösə̂nə̈, tche ê atə̂pâ cho kuzü nə̈. Cho kuzü nə̈ wä bhâlə̂ ngö täme ndə̂ a bê manda nə̈ la ngâ gbölö täme. 39Jezü tô rə̂ päkëdə̂: «Nyë rö täme lâme chï!» Mârete, nyînə̂ kuzü nə̈ tô rə̂ sə̈ tchë päkëdə̂: «Gbölö Gbïɛ̈, tchâfo yê fôfö. Voanə̈ lö yê kâ âtə.» 40Jezü tô rə̂ ndə̂nə̈ sə̈ tchë päkëdə̂: «Më tôâbo rə̂ âme sə̈ mö pä, âdə mo âza su zə̈ sə̈ mê kə̂ wun-adje gbölö gbôgbô ndə̂ Ndjapä?» 41A rô täme lâme-ê, Jezü kênga la yê atə̂ lafô kə̈ tô rə̂ päkëdə̂: «Bha mê, më zä ayîabâ sə̈ mö bëte mo djê mê nə̂. 42Më wünsə̂ nə̈ pä mo djë mê logbɛ̂. Më tö rə̂ käko bëte azü ndə̂ andjë tâkpa ndrotə̂ mê âtə, ndə̂kə̂ pa andjë gamba rə̂ pä momö kä ndə̂ âwân mê.» 43Pânə̈ Jezü ôn ngbôô päkëdə̂: «Lazäre, wûtu-ê!» 44Lazäre wûtu lə̂ cho kuzü nə̈-ê, a gʉ̈ä ada yê la akönô yê la tchâtchu yê la lə̂ba ndə̂ rə̈ nə̈ wû pä lɛ̂n-ɛn. Jezü tô rə̂ sə̈ andjê päkëdə̂: «Nyë zü arə lâme tə̂ yê, kə̈ gbôtə̂ yê tche gû etə̂.»

Azü nyïkrə pö ndə̂kə̂ won Jezü

(Mat 26.1-5; Mar 14.1-2; Luk 22.1-2)

45Angbängbä ajuîfu ndə̂ andjë nə̂ ndə̂kə̂ wun Malê, ânyë kə̈ wûn rə ndə̂ Jezü mbô rə̂ lâme, andjë zâ su andjê sə̈ tchë. 46Praâbalë angânə̈ ê kə̈ gbô afarizïɛ̈n kə̈ tô pö ndə̂ rə ndə̂ Jezü mbô rə̂ lâme sə̈ andjê. 47Käko agbölö a-earə̂ kə̂ wa ngela sə̈ Ndjapä la afarizïɛ̈n ê gbölö kpûlû ndə̂ a-earə̂ kə̂ wa ngbanga ndə̂ ajuîfu, kə̈ tô rə̂ päkëdə̂: «Köchë âtə mbö akpɨ̈ngbɨ̈ rə tə̂ gbölösə̂nə̈, giamâ kä ndə̂ azə̈ mbo rə̂? 48Âdə azə̂ âgbotâ käko, azü gbɛ̂ zadje su andjê sə̈ tchê. Azü ndə̂ Rômo nəadje ndə̂kə̂ ndɨ gbölö nda Ndjapä ndə̂ azə̂ la azü gö ndə̂ azə̂!» 49Ngânə̈ balë lə̂ gûtə̂ andjê ndə̂ rə̈ yê wû pä Käyîfu ndə̂ tche wâtə̂ gbölö earə̂ kə̂ wa ngela sə̈ Ndjapä lə̂ ngû nə̈ lâme, tche tô rə̂ sə̈ andjê päkëdə̂: «Nyë wûn-âbo sə̂ rə balë lə̂nə̈-a! 50Nyê wûn-âbo sə̂nə̈ pä, ädäka ndə̂kə̂ pa ngâ akrə balë tchu lə̂ kpâlâ azü gö nə̈, käko ânyë azü gö nə̈ gbɛ̂ tchuabô tchû-î.» 51Apö ndə̂ Käyîfu tô rə̂ lâme tôâbo bhândə̂ yê-a. Praâbalë batə̂ rə̂ ndə̂ tche wâtə̂ gbölö earə̂ kə̂ wa ngela sə̈ Ndjapä lə̂ ngû nə̈ lâme kä ndə̂ tche tô ndə̂ma Ndjapä. Tche tö rə̂ pä Jezü wä ndə̂kə̂ tchu bëte azü gö ndə̂ ajuîfu. 52Tche wâbo ndə̂kə̂ tchu kütû bëte azü gö ndə̂ ajuîfu nə̈-a, praâbalë tche wä ndjë ndə̂kə̂ tchu bëte abechë ndə̂ Ndjapä gbɛ̂ ndə̂ andjë krʉ̂ tchə̂lə̂ tə̂ andjê katchôgbɛ̂, ndə̂kə̂ pala andjê sə̂nə̈ balë.

53Kpô lo nə̈ lâme kä ndə̂ andjë nyîkrə rə̂ ndə̂kə̂ won Jezü. 54Käko Jezü kôsə̂ nə̈ ndə̂kə̂ nə kraâ lə̂ la ajuîfu gbɛ̂. Tche gbô tchâme kə̈ ê ndola dälä lə̂ ngâ gö ndə̂ a ê rə̂ tâ pä Ëfräyîme. Tche sə̂ la adjisîpili ndə̂ yê ngbâ angâ alö.

55Lö kpülü ndə̂ ajuîfu ndə̂ a ê rə̂ tâ pä Pâke ndô nə̂. Angbängbä azü lə̂ agö ê atə̂ Jerûzalêmo dokʉ̈tchê tə̂ lö kpülü nə̈ ndə̂kə̂ djutu kâkpö ndə̂ andjê, ânyë kə̂ gro lə̂ la Ndjapä. 56Andjë pû Jezü lə̂ gbölö nda Ndjapä, kə̈ tô rə̂ lə̂ gbâtə̂ andjê päkëdə̂: «Nyë wün rə̂ atöko? Tchê nəadje ndə̂ kpülü âtə?» 57Agbölö a-earə̂ kə̂ wa ngela sə̈ Ndjapä la afarizïɛ̈n zâma päkëdə̂: «Âdə ngâ akrə âwunsə̂ nə̈ ndə̂ Jezü sə̂ tâ, äwäpä tche kra tü azə̂ ndə̂kə̂ pa a za tchë-ê.»

Currently Selected:

Jâan 11: lnl

Highlight

Copy