Jâan 20

Jezü jö lə̂ kuzü

(Mat 28.1-8; Mar 16.1-8; Luk 24.1-12)

1Po mbatchâ lə̂ dɨmâche, ndə̂ gbô tchô ndə̂po lakə̂ bu, Malê yû gö ndə̂ Magadalä ê atə̂pâ cho kuzü nə̈. Tche wûn rə̂ pä a rô täme tə̂ ma cho kuzü nə̈ nə̂. 2Tche kpê kə̈ gbô Chemôn-Pîêre la ngâ djisîpili ndə̂ Jezü nyïndə̂ yê tə̂ gbölösə̂nə̈ lâme. Tche tô rə̂ sə̈ andjê päkëdə̂: «A jî Gbölö Gbïɛ̈ lə̂ cho kuzü nə̂, ârâ wûn-âbo sə̂ tchô ndə̂ a za tchë tâ-a!» 3Käko Pîêre wûtu la djisîpili nə̈ lâme, andjë ê atə̂pâ cho kuzü nə̈. 4Andjë gburə̂ gbɛ̂ kä lə̂ rö, praâbalë djisîpili nə̈ lâme rô tə̂ Pîêre, kə̈ wûtu pâ cho kuzü nə̈ dokʉ̈tchê tə̂ yê. 5Tche chî küma yê kə̈ wûn amawû lə̂ba ndə̂ âwâ bêche, praâbalë tche lîâbo atə̂lə̂ nə̈-a. 6Chemôn-Pîêre wûtu la tchêngbâ yê, kə̈ lî bhâlə̂ cho kuzü nə̈, tche wûn amawû lə̂ba ndə̂ âwâ bêche, 7la alə̂ba ndə̂ a î rə̂ tə̂ küma Jezü. Lə̂ba nə̈ lâme wâbo la amawû lə̂ba ndə̂ lɛ̈n nə̈ nyɛ̂ɛ̂ sə̂nə̈-a, praâbalë a rö rə̂ sə̂ ngâ tchô ngbî. 8Pânə̈ djisîpili ndə̂ tche wûtu dokʉ̈tchê pâ cho kuzü lâme, lî kə̈ wûn rə nə̈, kə̈ gâmba rə̂. 9Bëte andjë djêâbo tchə̂lə̂ pö ndə̂ Mbëtï Ndjapä tô rə̂ alême dämba nə̂-a, mbëtï nə̈ tö rə̂ pä, äwäpä Jezü jo lə̂ kuzü#20.9 Nyë dɨ̈ Aps 16.10.. 10Pânə̈ adjisîpili nə̈ dôtə̂ andjê atə̂ndə̂ andjê.

Jezü mätə̂ yê sə̈ Malê yû gö ndə̂ Magadalä

(Mat 28.9-10; Mar 16.9-11)

11Sə̂nə̈ lâme, Malê sə̂ də sûwu ndola ma cho kuzü nə̈ lakə̂ kɨ. Ndə̂ gbô tchë ndə̂po lakə̂ kɨ, tche ndrâ ndə̂kə̂ wun tchô atə̂lə̂ cho kuzü nə̈. 12Käko tche wûn aânje bïchuû ndə̂ andjë yû grôgrô lə̂ba, andjë sə̈ sə̂ tchô ndə̂ a zâ krʉkrʉ Jezü alême tâ. Ngânə̈ balë sə̂ dəsə̂ küma yê, ânyë ngânə̈ balë sə̂ dəsə̂ da yê. 13Andjë yû tchë päkëdə̂: «Ɛ̈chë, mo kɨ̈ bëte giamâ?» Tche tô rə̂ päkëdə̂: «Bëte azü zä Gbölö Gbïɛ̈ ndə̂ mê, kə̈ rô la tchë. Më wûn-âbo sə̂ tchô ndə̂ andjë zâ tchë tâ-a!» 14Ndə̂ gbô pö nə̈ wâ lə̂ ma yê, tche djêtə̂ yê kə̈ wûn Jezü ndə̂ tche krʉ̂, tchâme tche wûn-âbo sə̂nə̈ pä Jezü kä me-a. 15Jezü yû tchë päkëdə̂: «Ɛ̈chë, mo kɨ̈ bëte giamâ? Tchabâ kä ndə̂ mo pu tchë?» Malê wûntî pä earə̂ kə̂ wun tchô pâ kɨ̈ndɨ̈ nə̈ lâme kä, ânyë kə̈ tô rə̂ sə̈ tchë päkëdə̂: «Gbölö akrə, âdə momö kä ndə̂ âzâ tchë ânyë kə̈ rô la tchë, amö nyisə̂ tchô ndə̂ mo zâ tchë tâ sə̈ mê, ndə̂kə̂ pa më e ndə̂kə̂ za tchë.» 16Jezü tô rə̂ sə̈ tchë päkëdə̂: «Malê!» Malê djêtə̂ yê, kə̈ tô rə̂ la ma heborö päkëdə̂: «Rabunï!» Ndə̂ ânyîndə̂ kə̂ to rə̂ päkëdə̂: «Earə̂ kə̂ nyisə̂ rə.» 17Jezü tô rə̂ sə̈ tchë päkëdə̂: «Amö ngbiabô mê ngbî tchâtə-ê, bëte më kêngabô bhândə̂ Bha mê dämba nə̂-a. Praâbalë amö êë kə̈ tô ndə̂ma mê sə̈ arə̂mâ ndə̂ mê päkëdə̂: Mê âkenga atə̂ndə̂ Bha mê, ndə̂ tche wâ ndjë tə̂ Bha nyê, tche wätə̂ Ndjapä ndə̂ mê, kə̈ wâ ndjë tə̂ Ndjapä ndə̂ nyê.» 18Käko Malê yû gö ndə̂ Magadalä ê kə̈ tô rə̂ sə̈ adjisîpili ndə̂ Jezü päkëdə̂: «Më wûn Gbölö Gbïɛ̈ nə̂!» Pânə̈ tche nyîsə̂ tchêngbâ pö ndə̂ Jezü tô rə̂ sə̈ tchë.

Jezü mätə̂ yê sə̈ adjisîpili ndə̂ yê

(Mat 28.16-20; Mar 16.14-18; Luk 24.36-49)

19Ârə̂ âsə̈ wa la tchêndə̂gölo lə̂ lö nə̈ lâme, adjisîpili pâlatə̂ andjê bhâlə̂ ngâ nda ndə̂ andjë tchû manda nə̈ pâ andjê la wawa ajuîfu. Jezü nə̂, kə̈ krʉ̂ lə̂ gûtə̂ andjê, kə̈ tô rə̂ sə̈ andjê päkëdə̂: «Nyë sə̈ la zɨtɨ su!» 20Pânə̈ ndə̂ tche tô pö lâme, tche mâ akönô yê la krabadja yê tə̂ andjê. Adjisîpili nə̈ wâ la mômô tə̂ gbölösə̂nə̈ bëte rə̂ ndə̂ andjë wûn Gbölö Gbïɛ̈. 21Jezü kâ tô rə̂ sə̈ andjê päkëdə̂: «Nyë sə̈ la zɨtɨ su! Batə̂ rə̂ ndə̂ Bha mê wân mê, mëmê ndjë gbɛ̂, mê âwan nyê.» 22Pânə̈ ndə̂ tche tô pö lâme, tche wû foo pâ andjê, kə̈ tô rə̂ päkëdə̂: «Äwäpä nyë gbo Kpɨ̂ki Yingö! 23Âdə nyë âko pö lə̂ küma ngâ akrə, a koadje pö lə̂ küma yê. Âdə nyê âkoabô pö kô lə̂ küma ngâ akrə, angbongbo arə ndə̂ yê wadje kpôlə̂ küma yê.»

Jezü la Tomä

24Tomä, ngânə̈ balë lə̂ gûtə̂ adjisîpili lə̂ könô gbɛ̂ tchêpâ nə̈ bïchuû, ndə̂ a ê rə̂ tə̂ yê pä mîɛ̈, tche sə̂âbo sə̂nə̈ ndə̂ Jezü wûtu-a. 25Adɨ̂ adjisîpili nə̈ tô rə̂ sə̈ tchë päkëdə̂: «Ârâ wûn Gbölö Gbïɛ̈ nə̂!» Praâbalë Tomä tô rə̂ sə̈ andjê päkëdə̂: «Âdə mê âwun-abô grʉ̈ pândi tchânə̂ yê wûn-î, ndjë âdə mê âyiabô ɛ̈ könô mê yî lə̂ grʉ̈ pândi tchânə̂ yê lâme, ânyë kə̈ yîâbô könô mê lə̂ grʉ̈ ku tə̂ krabadja yê lâme yî-î, mê gambabô rə̂ balë tee-a.»

26Dɨmâche balë pânə̈, adjisîpili kâ pâlatə̂ andjê bhâ tchâalê nə̈, Tomä kä ndjë lə̂ gûtə̂ andjê. Ndə̂ andjë tchû manda nə̈ ëtâ, Jezü nə̂, kə̈ krʉ̂ lə̂ gûtə̂ andjê, kə̈ tô rə̂ päkëdə̂: «Zɨtɨ su wä pâ nyê!» 27Pânə̈ tche tô rə̂ sə̈ Tomä päkëdə̂: «Amö yi küma ɛ̈ könô zə̈ tchâtə, kə̈ wûn tchânə̂ mê, amö yi könô zə̈ lə̂ krabadja mê. Amö gbotə̂ kə̂ kosə̂ pö-ê, praâbalë amö gamba rə̂!»

28Tomä tô rə̂ sə̈ tchë päkëdə̂: «Gbölö Gbïɛ̈ ndə̂ mê la Ndjapä ndə̂ mê!» 29Jezü tô rə̂ sə̈ tchë päkëdə̂: «Bëte rə̂ ndə̂ mo wûn mê kä ndə̂ mo gâmba rə̂? Mômô kä tə̂ andjanə̈ ndə̂ andjë wûn-âbô mê wûn, ânyë kə̈ gâmba rə̂.»

Dju mbëtï âtə

30Jezü kâ mbô akpɨ̈ngbɨ̈ arə tə̂ gbölösə̂nə̈ tchâtchu adjisîpili ndə̂ yê, ndə̂ a mbôâbo rə̂ mbô lə̂ mbëtï âtə-ê. 31Angâ arə nə̈ ndə̂ a mbô rə̂ lə̂ mbëtï âtə, a mbö rə̂ ndə̂kə̂ pa nyë gamba rə̂ pä Jezü wätə̂ Krîsiti, Modô ndə̂ Ndjapä. Âdə nyë âgamba rə̂, nyê wadje la tchîsûwu lə̂ köbosə̂ yê.

Currently Selected:

Jâan 20: lnl

Highlight

Copy