Jâan 21

Jezü matə̂ yê tə̂ adjisîpili mïndûu manə̈ bïchuû

1Pânə̈ Jezü kâ mâtə̂ yê tə̂ adjisîpili ndə̂ yê tə̂ maga gbölö kpakpa ngû ndə̂ Tïbërïyâde. Köbo sə̂nə̈ ndə̂ Jezü mâtə̂ yê wä kâkë: 2Chemôn-Pîêre, la Tomä ndə̂ a ê rə̂ tə̂ yê pä mîɛ̈, la Nätänäyêle, akrə gö ndə̂ Kanä bhâ Galilë, la abechë ndə̂ Zebede la angâ adjisîpili bïchuû ndə̂ Jezü, andjë sə̂ nyɛ̂ɛ̂ sə̂nə̈ balë. 3Chemôn-Pîêre tô rə̂ sə̈ andjê päkëdə̂: «Mê âe ndə̂kə̂ pu agiangû.» Andjë tô rə̂ sə̈ tchë päkëdə̂: «Azə̈ âe la mö.» Käko andjë ê kə̈ â lə̂ külû nə̈. Praâbalë lə̂ bütchî nə̈ gbɛ̂, andjë gbôâbo ngâ giangû balë-a. 4Ndə̂ tchô krâ, Jezü krʉ̂ tə̂ maga ngû nə̈, adjisîpili ndə̂ yê wûn-âbo sə̂nə̈ pä tchetchë kä me-a. 5Tche tô rə̂ sə̈ andjê päkëdə̂: «Abechë, nyë kä la ngâ rə ndə̂kə̂ zɨ rə̂?» Andjë tô rə̂ sə̈ tchë päkëdə̂: «Ɛ̂n-ɛ̈n.» 6Tche tô rə̂ sə̈ andjê päkëdə̂: «Nyë yï gbânda nə̈ də ndôkö, kə̂ gboadje agiangû.» Käko andjë yî gbânda nə̈, kə̈ gbɨ̂tɨ rə̂ tʉrʉ-ê, bëte agiangû sɨ̂sɨ̈ lə̂nə̈. 7Djisîpili ndə̂ Jezü nyïndə̂ yê tə̂ gbölösə̂nə̈ lâme tô rə̂ sə̈ Pîêre päkëdə̂: «Gbölö Gbïɛ̈ kä!» Ndə̂ Pîêre djê rə̂ pä Gbölö Gbïɛ̈ kä, tche yû lə̂ba ndə̂ yê ëngbânə̈, bëte tche wä la wünwün krʉ yê, pânə̈ tche tê atə̂lə̂ ngû. 8Adɨ̂ adjisîpili nə̈ kâ atə̂lə̂ külû nə̈ ndola maga ngû nə̈, kə̈ sə̂ lakə̂ gbɨtɨ gbânda nə̈ ndə̂ âsɨ̂ la agiangû lâme. Andjë sə̂âbo ngrɨ̈ tə̂ maga ngû nə̈-a, kə̂ gu ndə̂nə̈ la andjê wä kütû mɛ̂tere ngbangbo balë.

9Ndə̂ andjë jrê lə̂ külû nə̈ bêche, andjë wûn mâpa, kə̈ wûn ndjë angâ ajïwo ndə̂ agiangû wâ lanə̈. 10Jezü tô rə̂ sə̈ andjê päkëdə̂: «Nyë kä la angâ agiangû ndə̂ nyë kʉ̂ andjê lâme.» 11Chemôn-Pîêre â lə̂ külû nə̈, kə̈ gbɨ̂tɨ gbânda nə̈ atə̂ bêche. Agbölö agiangû ngbangbo balë tchêpâ nə̈ tə̂ azü bïchuû la lə̂ könô gbɛ̂ tchêpâ nə̈ vötaâ (153) sɨ̂ tchə̂lə̂ nə̈ gbûû. Ndə̂ agiangû nə̈ ngbâ tə̂ gbölösə̂nə̈ lâme, praâbalë tchə̂lə̂ gbânda nə̈ srôâbo-a. 12Jezü tô rə̂ sə̈ andjê päkëdə̂: «Nyë nə̈ kə̈ zɨ̂ rə.» Ngâ djisîpili balë wâbo ndə̂kə̂ yu Jezü päkëdə̂: «Mo wätə̂ tchabâ-a?» Bëte andjë wûnsə̂ nə̈ nə̂ pä Gbölö Gbïɛ̈ kä. 13Jezü gîtə̂ yê, kə̈ zâ mâpa, kə̈ krʉ̂ tchə̂lə̂ nə̈ tə̂ andjê, pânə̈ tche krʉ̂ ndjë tchə̂lə̂ agiangû tə̂ andjê. 14Sûsunə̈ vötaâ ndə̂kə̂ pa Jezü matə̂ yê tə̂ adjisîpili ndə̂ yê, pânə̈ ndə̂ tche jô lə̂ kuzü kä lâme.

Jezü la Pîêre

15La tchêngbâ kɨ̈zɨ̂ nə̈, Jezü tô rə̂ sə̈ Chemôn-Pîêre päkëdə̂: «Chemön, modô ndə̂ Jâan, mo nyïndə̂ mê kə̈ rô andjanə̈ âtə?» Chemön tô rə̂ päkëdə̂: «Ɛn-ɛn, Gbölö Gbïɛ̈, mo wûnsə̂ nə̈ nə̂ pä më nyïndə̂ zə̈.» Jezü tô rə̂ sə̈ tchë päkëdə̂: «Amö bata angbavö ɛ̈bro-ngbaga ndə̂ mê!» 16Jezü kâ tô rə̂ sə̈ tchë tə̂ bïchuû nə̈ päkëdə̂: «Chemön, modô ndə̂ Jâan, mo nyîndə̂ mê nə̂?» Pîêre tô rə̂ päkëdə̂: «Ɛn-ɛn, Gbölö Gbïɛ̈, mo wûnsə̂ nə̈ nə̂ pä më nyïndə̂ zə̈.» Jezü tô rə̂ sə̈ tchë päkëdə̂: «Amö watə̂ earə̂ kə̂ bata aɛ̈bro-ngbaga ndə̂ mê!» 17Jezü kâ tô rə̂ sə̈ tchë tə̂ vötaâ nə̈ päkëdə̂: «Chemön, modô ndə̂ Jâan, mo nyîndə̂ mê nə̂?» Pîêre wâ la nyonyo bëte rə̂ ndə̂ Jezü kâ tô rə̂ sə̈ tchë tə̂ vötaâ nə̈ päkëdə̂: «Mo nyîndə̂ mê nə̂?» Tche tô rə̂ sə̈ Jezü päkëdə̂: «Gbölö Gbïɛ̈, mo wünsə̂ rə gbɛ̂, mo wûnsə̂ nə̈ nə̂ pä më nyïndə̂ zə̈!» Jezü tô rə̂ sə̈ tchë päkëdə̂: «Amö bata aɛ̈bro-ngbaga ndə̂ mê. 18Ɛn-ɛn, tə̂ lëge nə̈ më tö rə̂ sə̈ mö, ndə̂ gbô mö ndə̂po tə̂ bechë, momö la tə̂ zə̈ kä ndə̂ âi wû pâ lə̂ba ndə̂ zə̈, kə̂ e kusə̂ tchô ndə̂ su zə̈ nyîndə̂ nə̈. Âdə mo âdu nə̂, mo âyi könô zə̈ ânyë ngâ akrə ngbî kä ndə̂ â-iadje wû pâ lə̂ba ndə̂ zə̈, kə̂ e la mö kusə̂ tchô ndə̂ su zə̈ nyîâbô nyîndə̂ nə̈-ê.» 19Jezü tö pö lâme ndə̂kə̂ nyisə̂ köbo ndə̂ Pîêre tchuadje la rə̂, ânyë a lusə̂ Ndjapä lə̂ köbosə̂ kuzü yê. Pânə̈ Jezü tô rə̂ sə̈ tchë päkëdə̂: «Za tchêngbâ mê.»

Jezü la djisîpili ndə̂ tche nyïndə̂ yê

20Pîêre djêtə̂ yê kə̈ wûn djisîpili ndə̂ Jezü nyïndə̂ yê, tchanə̈ ndə̂ tche dɨ̂tə̂ yê ëla ngbôgo Jezü tə̂ ma kɨ̈zɨ̂ lâme, ânyë kə̈ yû tchë päkëdə̂: «Gbölö Gbïɛ̈, tchabâ kä ndə̂ âyosə̂ zə̈?» 21Ndə̂ Pîêre wûn tchë, kə̈ yû Jezü päkëdə̂: «Gbölö Gbïɛ̈, andə̂ ye nə̈, giamâ kä ndə̂ âgboadje tchë?» 22Jezü tô rə̂ sə̈ tchë päkëdə̂: «Âdə mê ânyində̂ nə̈ pä tche sə la tʉ̈rʉ̂ la yê ndjoa tə̂ lo kə̂ ka ndə̂ mê, äwün mö? Momö, amö za tchêngbâ mê.» 23Kütû pâ pö lâme, azü ndə̂ Krîsiti tô rə̂ lə̂ gbâtə̂ andjê pä, djisîpili lâme tchuabô andə̂ ye nə̈ tee-a. Praâbalë Jezü tôâbo rə̂ sə̈ Pîêre pä tchê tchuabô tee-a, tche tö rə̂ päkëdə̂: «Âdə mê ânyində̂ nə̈ pä tche sə la tʉ̈rʉ̂ la yê ndjoa ëtə̂ lo kə̂ ka ndə̂ mê, äwün mö?» 24Djisîpili nə̈ lâme kä ndə̂ âwûn rə nə̈, ânyë kə̈ mbô rə̂ lə̂ mbëtï; azə̈ wünsə̂ nə̈ pä pö ndə̂ tche tô rə̂ lâme wätə̂ lëge pö.

Adɨ̂ pö

25Angâ arə kä tâ ndə̂ Jezü mbô rə̂. Âdə a âmbo rə̂ mbö balë balë gbɛ̂ lə̂ mbëtï, më wünsə̂ nə̈ pä ngâ tchô wâbo ndə̂kə̂ pa a kʉ ambëtï lâme tâ pâ cho âtə-a.

Currently Selected:

Jâan 21: lnl

Highlight

Copy