Jâan 4
4
Jezü la ngâ ɛ̈chë gö ndə̂ Samarï
1-3 Afarizïɛ̈n djê rə̂ pä Jezü wä la adjisîpili tə̂ gbölösə̂nə̈, kə̈ sə̂ lakə̂ za batɛ̂me ndə̂ ngû sə̈ azü ârô Jâan. Tə̂ lëge nə̈, Jezü la tə̂ yê zâbo batɛ̂me ndə̂ ngû sə̈ azü-a, kütû adjisîpili ndə̂ yê kä ndə̂ âza batɛ̂me ndə̂ ngû sə̈ azü. Ndə̂ Jezü djê pö ndə̂ a dɨ rə̂ la rə̈ yê, tche âlafô bhâ Judë kə̈ dôtə̂ yê atə̂ Galilë. 4Ndə̂kə̂ ka atə̂ Galilë, tche wä ndə̂kə̂ ro lə̂ gö ndə̂ Samarï. 5Tche wûtu lə̂ ngâ gö ndə̂ Samarï ndə̂ rə̈ nə̈ wû pä Sïchâre. Gö nə̈ lâme wä ndola kɨ̈ndɨ̈ ndə̂ Jakôbo zâ rə̂ sə̈ modô ndə̂ yê Jozêfu#4.5 Nyë dɨ̈ Jen 33.19; Joz 24.32.. 6Sə̂ tchô nə̈ lâme, kudû-ngû ndə̂ Jakôbo kä tâ. Ndə̂ Jezü mômo gbɛ̂ ngbâ wrʉ̂, tche sə̂ bêche tə̂ maga kudû-ngû nə̈. Dalo nə̈ wä alême ndola gûgû tchə̂lə̂ɛtchô.
7Ngâ ɛ̈chë gö ndə̂ Samarï nə̂ ndə̂kə̂ tu ngû nə̈. Jezü tô rə̂ sə̈ tchë päkëdə̂: «Tu ngû sə̈ mê, më ndjô rə̂.» 8Dëkë adjisîpili ndə̂ yê rô nə̂ atə̂lə̂ gbölö gö nə̈ ndə̂kə̂ yo kɨ̈zɨ̂. 9Ɛ̈chë gö ndə̂ Samarï lâme tô rə̂ sə̈ Jezü päkëdə̂: «Atöko kä ndə̂ momö ndə̂ mo wâtə̂ juîfu, mo yûkû ngû ndə̂kə̂ ndjo rə̂ tchânə̂ mê, ndə̂ më wâtə̂ ɛ̈chë gö ndə̂ Samarï âtə?» Bëte ajuîfu nyîâbo ndə̂kə̂ sə lə̂ gbâtə̂ andjê la azü gö ndə̂ Samarï-a. 10Jezü tô rə̂ ndə̂nə̈ sə̈ tchë päkëdə̂: «Âdə mo âwunsə̂ rə ndə̂ Ndjapä za rə̂ sə̈ azü, ânyë kə̈ wûnsə̂ akrə ndə̂ tche yûkû ngû tchânə̂ zə̈ ndə̂kə̂ ndjo rə̂ âtə, dëkë momö kä ndə̂ âyukû ngû nə̈, ânyë tche za ngû ndə̂ âza tchîsûwu sə̈ mö.» 11Ɛ̈chë nə̈ tô rə̂ sə̈ tchë päkëdə̂: «Gbölö Gbïɛ̈, ngâ rə wâbo tchânə̂ zə̈ ndə̂kə̂ tu ngû nə̈ la rə̂-a, ânyë kudû-ngû nə̈ lï tə̂ gbölösə̂nə̈. Mo âgbo ngû ndə̂ âza tchîsûwu lâme bhâ tchêbâ? 12Mo wä gbölö kə̈ rô Jakôbo, âta ârâ ndə̂ tche zâ kudû-ngû âtə sə̈ ârâ, ânyë tchetchë la tə̂ yê tche ndjô rə̂ la abechë ndə̂ yê la agia ndə̂ yê lâme?» 13Jezü tô rə̂ ndə̂nə̈ sə̈ tchë päkëdə̂: «Akrə balë balë gbɛ̂ ndə̂ tche ndjô ngû âtə, gʉ ngû âkä nyu tchë. 14Praâbalë akrə ndə̂ tche ndjô ngû ndə̂ mê zadje rə̂ sə̈ tchë, gʉ ngû âkä nyu bata tchë tee-a. Ngû ndə̂ mê zadje rə̂ sə̈ tchë wadje lə̂ yê batə̂ küma ngû, ndə̂ tchîsûwu ndə̂ logbɛ̂ logbɛ̂ wutu lə̂nə̈.» 15Ɛ̈chë lâme tô rə̂ sə̈ Jezü päkëdə̂: «Gbölö Gbïɛ̈, za ngû nə̈ lâme sə̈ mê ndə̂kə̂ pa gʉ ngû kä nyuabô mê nyû-ê, käko mê kä nəabô nə̂ tchâtə ndə̂kə̂ tu ngû-î.»
16Jezü tô rə̂ sə̈ tchë päkëdə̂: «Amö ka kə̈ ê köchë ndə̂ zə̈, kə̈ kâ la tchë.» 17Ɛ̈chë nə̈ lâme tô rə̂ ndə̂nə̈ sə̈ tchë päkëdə̂: «Më wâbo la köchë-a.» Jezü tô rə̂ sə̈ tchë päkëdə̂: «Pö ndə̂ mo tô rə̂ pä mo wâbo la köchë lâme wätə̂ lëge nə̈. 18Bëte mo wä alême la aköchë mïndûu, tchanə̈ ndə̂ mo sə̂ la tchë angaâtə lâme wâbo tə̂ köchë ndə̂ zə̂-a, mo tö lëge pö.» 19Käko ɛ̈chë lâme tô rə̂ sə̈ tchë päkëdə̂: «Gbölö Gbïɛ̈, më wün rə̂ pä mo wätə̂ ngâ earə̂ ndə̂ma Ndjapä. 20Araâta azə̂ vöga Ndjapä alême lə̂ küma aga âtə; praâbalë nyënyê ndə̂ ajuîfu, nyë tö rə̂ päkëdə̂: Sə̂ tchô ndə̂ a voga Ndjapä tâ wä kütû bhâ Jerûzalêmo.» 21Jezü tô rə̂ sə̈ tchë päkëdə̂: «Ɛ̈chë, amö gamba pö ndə̂ mê, lo nə̈ âtadje tâ ndə̂ nyê vogabô Ndjapä Bha azə̂ lə̂ küma aga âtə tee-a, âdəndjë bhâ Jerûzalêmo-a. 22Nyënyê ndə̂ azü ndə̂ Samarï, nyë vöga Ndjapä ndə̂ nyë wûn-âbô sə̂ yê wûn-î. Andə̂ ârâ ajuîfu, ârâ vöga Ndjapä ndə̂ ârâ wûnsə̂ yê, bëte rə ndə̂ âtcha azü lə̂ kuzü tö bhândə̂ ajuîfu. 23Praâbalë dalo nə̈ âwutuadje, âwûtu nə̂ ndə̂kə̂ pa alëge azü ndə̂ andjë voga Ndjapä Bha azə̂, andjë vogadje tchë la Yingö ndjë la lëge pö. Bëte a-earə̂ kə̂ voga Ndjapä käko kä ndə̂ Bha azə̂ pu andjê. 24Ndjapä wätə̂ Yingö; ânyë azü ndə̂ andjë voga tchë, äwäpä andjë voga tchë la Yingö ndjë la lëge pö.» 25Ɛ̈chë lâme tô rə̂ sə̈ tchë päkëdə̂: «Më wûnsə̂ nə̈ nə̂ pä Mesï ndə̂ a ê rə̂ tə̂ yê pä Krîsiti, tchê nəadje. Âdə tche anə̈ nə̂, kə̂ nyiadje sə̂ arə gbɛ̂ sə̈ ârâ.» 26Jezü tô rə̂ sə̈ tchë päkëdə̂: «Më də̈ Mesï nə̈, mëmê kä ndə̂ âsə̂ lakə̂ to pö sə̈ mö âtə.»
27Ndə̂ andjë âsə̈ to pö lâme, adjisîpili ndə̂ yê kângbâ andjê kə̈ wûn Jezü la ɛ̈chë nə̈ lâme ndə̂ andjë to pö lə̂ gbâtə̂ andjê, tchə̂lə̂ küma andjê djîngɨli. Praâbalë ngâ akrə balë lə̂ gûtə̂ andjê yûâbo tchë päkëdə̂: «Giamâ tche nyîndə̂ nə̈?» Âdəndjë päkëdə̂: «Bëte giamâ mo to pö sə̈ ɛ̈chë âtə?» 28Ɛ̈chë nə̈ lâme gbôtə̂ lüsû-ngû ndə̂ yê tchâme kə̈ kâ atə̂lə̂ gbölö gö nə̈, kə̈ tô rə̂ sə̈ azü päkëdə̂: 29«Nyë nə̈ kə̈ wûn ngâ köchë ndə̂ tche tô apö ndə̂ rə gbɛ̂ ndə̂ më mbô rə̂. Krîsiti də̂âbo tchë?» 30Azü nə̈ âlafô lə̂ gö nə̈, kə̈ ê pu Jezü.
31Ndə̂ ɛ̈chë lâme rô, adjisîpili ndə̂ Jezü tô rə̂ sə̈ tchë päkëdə̂: «Earə̂ kə̂ nyisə̂ rə, amö zɨ kɨ̈zɨ̂!» 32Praâbalë Jezü tô rə̂ sə̈ andjê päkëdə̂: «Kɨ̈zɨ̂ ndə̂ mê zɨ rə̂ kä tâ ndə̂ nyë wûn-âbo sə̂nə̈-a.» 33Adjisîpili yûtə̂ andjê lə̂ gbâtə̂ andjê päkëdə̂: «Ngâ akrə nə̈ la kɨ̈zɨ̂ sə̈ tchë?» 34Jezü tô rə̂ sə̈ andjê päkëdə̂: «Kɨ̈zɨ̂ ndə̂ mê wä ndə̂kə̂ mbo rə ndə̂ su akrə ndə̂ tche wân mê nyîndə̂ nə̈, kə̂ ka kua ndə̂ tche zâ rə̂ sə̈ mê ndə̂kə̂ mbo rə̂. 35Nyënyê la tə̂ nyê, nyë tôâbo rə̂ päkëdə̂: ‹Gbô nyîpï kä po voanə̈ ndə̂kə̂ soa ndjî rəgʉ lə̂ kɨ̈ndɨ̈?› Praâbalë më tö andə̂ me nə̈ sə̈ nyê päkëdə̂: Nyë kënga la nyê kə̈ wûn tchô; andjî rəgʉ lə̂ kɨ̈ndɨ̈ nə̈ drô nə̂, äwä ndə̂kə̂ pa a soa rə̂! 36Earə̂ kə̂ soa ndjî rəgʉ nə̈ âgbo makətche-kua ndə̂ yê, kə̂ pala andjî rəgʉ nə̈ bëte tchîsûwu ndə̂ logbɛ̂ logbɛ̂. Käko akrə ndə̂ tche lû rəgʉ la tchanə̈ ndə̂ tche sôâ rə̂, mômô ndə̂ andjê wä balë. 37Bëte ndoka âtə wätə̂ lëge nə̈, ndə̂ âtô rə̂ päkëdə̂: ‹Ngâ akrə lü ndjî rəgʉ, ngânə̈ ngbî soa rə̂.› 38Më wän nyê ndə̂kə̂ soa ndjî rəgʉ ndə̂ nyë wûn-âbô yûkü nə̈ wûn-î. Angâ azü wün yûkü dokʉ̈tchê tə̂ nyê, nyë nə̈ andə̂ nye nə̈ ndə̂kə̂ soa kütû ndjî rəgʉ, ndə̂ andjë wûn yûkü tə̂ pö ndə̂nə̈ lâme.»
39Angbängbä azü gö ndə̂ Samarï lə̂ gö ndə̂ Sïchâre zâ su andjê sə̈ Ndjapä lə̂ köbosə̂ pö ndə̂ ɛ̈chë lâme tô rə̂ sə̈ andjê päkëdə̂: «Arə gbɛ̂ ndə̂ më mbô rə̂ tche tô pö ndə̂nə̈ sə̈ mê.» 40Ndə̂ azü gö ndə̂ Samarï nə̈ wûtu ndola Jezü, andjë yûkû nə̈ sə̈ tchë ndə̂kə̂ pa tche sə ndə̂ anyê tchâtə. Tche mbô ndjë lö bïchuû tchâme. 41Angbängbä azü kä zâ su andjê sə̈ Jezü lə̂ köbosə̂ pö ndə̂ tchetchë la tə̂ yê tô rə̂. 42Azü nə̈ tô rə̂ sə̈ ɛ̈chë lâme päkëdə̂: «Âdə̂âbo kütû bëte pö lə̂ ma zə̈ kä ndə̂ ârâ zâ su ârâ sə̈ Jezü-a, praâbalë ârâ djë rə̂ la tü ârâ, kə̈ wûnsə̂ nə̈ pä tche wätə̂ lëge earə̂ kə̂ tcha azü tchêbêche âtə.»
Jezü tchä modô ndə̂ ngâ gbölö earə̂ kua
43La tchêngbâ lö bïchuû lâme, Jezü âlafô tchâme kə̈ ê atə̂ Galilë. 44Bëte tchetchë la tə̂ yê tche tö rə̂ alême päkëdə̂: «A luabô sə̂ ngâ earə̂ ndə̂ma Ndjapä lə̂ gö ndə̂ yê la tə̂ yê tee-a#4.44 Nyë dɨ̈ Mat 13.57; Mar 6.4; Luk 4.24..» 45Ndə̂ tche wûtu bhâ Galilë, azü gö ndə̂ Galilë nə̈ zâ tchë bhândə̂ andjê, bëte andjë wûn rə gbɛ̂ ndə̂ tche mbô rə̂ alême bhâ Jerûzalêmo lə̂ kpülü ndə̂ Pâke lâme nə̂. Bëte andjë ë alême ndə̂ kpülü nə̈.
46Jezü dôtə̂ yê atə̂ Kanä ndə̂ âwâtə̂ ngâ yɛ̈yɛ̈ gö ndə̂ Galilë, ndə̂ tche mbô rə̂ pä ngû dôtə̂ yê tə̂ vɛ̂n-ɛn lâme. Ngâ gbölö akrə ndə̂ tche mbo kua lə̂ gbadja ndə̂ gbïɛ̈ kä tâ. Modô ndə̂ yê kä la tə̂kömbô bhâ Käpërënäyûmo. 47Ndə̂ tche djê rə̂ pä Jezü tö bhâ Judë kə̈ wûtu nə̂ bhâ Galilë, tche ê kə̈ gbô tchë, kə̈ dɨ̂ tchə̂lə̂ ma yê sə̈ tchë ndə̂kə̂ pa tche e atə̂ Käpërënäyûmo, kə̂ tcha modô ndə̂ anyê, ndə̂ tche wâ ësə̂ kuzü. 48Jezü tô rə̂ sə̈ tchë päkëdə̂: «Âdə nyë âwun-abô akpɨ̈ngbɨ̈ rə la arə ndə̂ âropâ küma azü wûn-î, nyê zabô su nyê sə̈ Ndjapä balë tee-a.» 49Gbölö earə̂ kua lâme tô rə̂ sə̈ tchë päkëdə̂: «Gbölö Gbïɛ̈, amö e bhândə̂ mê dokʉ̈tchê ndə̂kə̂ pa bechë ndə̂ mê tchu.» 50Jezü tô rə̂ sə̈ tchë päkëdə̂: «Amö gu atə̂ndə̂ zə̈, modô ndə̂ zə̈ kä la tʉ̈rʉ̂ la yê.» Köchë lâme gâmba pö ndə̂ Jezü tô rə̂ sə̈ tchë lâme, kə̈ gû etə̂. 51Ndə̂ gbô tchë ndə̂po lə̂ köbo ndə̂kə̂ gu atə̂ndə̂ yê, a-earə̂ kua ndə̂ yê zâ köbo yê, kə̈ tô rə̂ sə̈ tchë päkëdə̂: «Bechë ndə̂ zə̈ kä la tʉ̈rʉ̂ la yê!» 52Gbölö akrə nə̈ yû andjê päkëdə̂: «Lə̂ dalo nə̈bâ kä ndə̂ tə̂ bechë nə̈ dâka?» Andjë tô rə̂ sə̈ tchë päkëdə̂: «Dalîtə lə̂ dalo balë la tchêngbâ gûgû tchə̂lə̂ɛtchô kä ndə̂ tə̂ yê nə̈ dâka ngbâ tə̂ yê ndə̂ âwô.» 53Bha nə̈ wûn rə̂ pä lə̂ dalo nə̈ lâme kä ndə̂ Jezü tô rə̂ sə̈ tchë päkëdə̂: «Bechë ndə̂ zə̈ kä la tʉ̈rʉ̂ la yê!» Posə̂nə̈, tchetchë la azü tchâalê ndə̂ yê gbɛ̂, andjë zâ su andjê sə̈ Jezü. 54Bïchuû kə̂ mbo ngâ kpɨ̈ngbɨ̈ rə ndə̂ Jezü kä lâme. Tche mbö rə̂ la tchêngbâ nə̈ ndə̂ tche tô bhâ Judë, ânyë kə̈ dôtə̂ yê atə̂ Galilë.
Currently Selected:
Jâan 4: lnl
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc.
