Jâan 5

Jezü tchä ngâ köchë ndə̂ tche ngêwele

1La tchêngbâ nə̈ Jezü ê atə̂ Jerûzalêmo bëte ngâ kpülü ndə̂ ajuîfu. 2Bhâ Jerûzalêmo, ngâ ngû kädje ndola manda gbadja ɛ̈bro-ngbaga: Ngû nə̈ lâme, a djï rə̂ kpakpakpa lə̂ gbadja lakpô ndə̂kə̂ pa a djutu kʉ̂tê andjê lə̂nə̈, rə̈ nə̈ la ma heborö wü pä Betezatä. A tchâmbrönda mïndûu kä ndrotə̂ ngû nə̈ lâme. 3Angbängbä a-earə̂ tə̂kömbô lö tchâmbrönda nə̈ lâme: A-earə̂ föla, andjanə̈ ndə̂ da andjê ndɨ̂, la andjanə̈ ndə̂ ngâ tchâme-tə̂ andjê ngêwele. [Andjë sə̈ bëte ngû nə̈ ndə̂kə̂ pa ätro. 4Bëte ngâ ânje ndə̂ Gbölö Gbïɛ̈ jrë tə̂ngâlo lə̂ ngû nə̈ ndə̂kə̂ mbo rə̂ pä ngû nə̈ tro. Dokʉ̈ earə̂ tə̂kömbô nə̈ ndə̂ tche jre lə̂ ngû nə̈ pânə̈ ndə̂ âtrô lâme, tə̂kömbô ndə̂ yê nə̈ âmbo tchë atöko, tche tcha-ê#5.4 Pö ndə̂ âwâ lə̂ Korochë lâme, a gbôâbo rə̂ lə̂ angâ angbängbä abəndɨ Mbëtï Ndjapä-a..] 5Tchâme, ngâ köchë kä tâ ndə̂ tche mbô ngû tə̂ akrə gbɛ̂ la lə̂ könô gbɛ̂ tchêpâ nə̈ mïndûu manə̈ vötaâ la tə̂kömbô (38). 6Ndə̂ Jezü wûn tchë ndə̂ tche lô bêche, ânyë kə̈ djê rə̂ pä tə̂kömbô nə̈ mbö tchë gasa-ë, tche yû tchë päkëdə̂: «Mo nyïndə̂ nə̈ pä tə̂ zə̈ daka?» 7Earə̂ tə̂kömbô nə̈ tô rə̂ sə̈ tchë päkëdə̂: «Gbölö Gbïɛ̈, akrə mê wâbo tâ ndə̂kə̂ yi mê atə̂lə̂ ngû nə̈ ndə̂ âtro lâme-a. Âdə më ânyində̂ kə̂ te lə̂ ngû nə̈, dëkë ngâ akrə tə̂ lə̂nə̈ dokʉ̈tchê tə̂ mê nə̈.» 8Jezü tô rə̂ sə̈ tchë päkëdə̂: «Alafô, za kʉ̈ngrʉ ndə̂ zə̈ kə̈ nə̂.» 9Posə̂nə̈, tə̂ köchë lâme dâka-ê, tche zâ kʉ̈ngrʉ ndə̂ yê kə̈ sə̂ lakə̂ nə, dëkë lö nə̈ lâme wätə̂ lö sabäa. 10Ajuîfu tô rə̂ sə̈ köchë ndə̂ tə̂ yê dâka lâme päkëdə̂: «Angêta wätə̂ lö sabäa, ndïɛ̈ zâbo köbo sə̈ mö ndə̂kə̂ pa mo za kʉ̈ngrʉ ndə̂ zə̈ kə̂ nə la rə̂-a.» 11Tche tô rə̂ sə̈ andjê päkëdə̂: «Köchë ndə̂ tche tchâ mê lâme kä ndə̂ âtô rə̂ sə̈ mê päkëdə̂: ‹Za kʉ̈ngrʉ ndə̂ zə̈ kə̈ nə̂.›» 12Andjë yû tchë päkëdə̂: «Tchabâ kä ndə̂ âtô rə̂ sə̈ mö päkëdə̂: ‹Za kʉ̈ngrʉ ndə̂ zə̈ kə̈ nə̂?›» 13Praâbalë köchë ndə̂ tə̂ yê dâka lâme wûn-âbo sə̂ yê-a, dëkë Jezü dô nə̂ kâbu kə̈ yû lə̂ kpûlû azü ndə̂ andjë sə̂ sə̂ tchô nə̈ lâme.

14La tchêngbâ nə̈ Jezü gbô tchë bhâlə̂ gbölö nda Ndjapä kə̈ tô rə̂ sə̈ tchë päkëdə̂: «Wunsaâ, tə̂ zə̈ dâka nə̂, amö ka mbôâbô ngbongbo rə mbô-ê, ânyë ngâ ngbongbo rə kä gboabô mö gbô kə̂ ro anə̈ dokʉ̈tchê lâme-ê.» 15Köchë lâme gû, kə̈ tô rə̂ sə̈ agbölö azü ndə̂ ajuîfu pä Jezü kä ndə̂ âtchâ mê. 16Bëte rə̂ kä ndə̂ ajuîfu jêtə̂ kə̂ pu tchâma Jezü tə̂ pö ndə̂nə̈ ndə̂ tche mbô rə nə̈ lâme lə̂ lö sabäa. 17Jezü tô rə̂ sə̈ andjê päkëdə̂: «Gbô Bha mê kä lakə̂ mbo kua logbɛ̂, mëmê ndjë gbɛ̂ më kä lakə̂ mbo kua.» 18Pâ pö nə̈ lâme, agbölö azü ndə̂ ajuîfu pû köbo gbɛ̂ ndə̂kə̂ won Jezü, bëte rə̂ ndə̂ tche ndɨ̂ tchə̂lə̂ ndïɛ̈ ndə̂ sabäa, la rə̂ ndə̂ tche tô rə̂ pä Ndjapä wätə̂ Bha anyê la tə̂ anyê, tchâme tche nyïsə̂ nə̈ pä ânyë wä balë la Ndjapä.

Gbôgbô ndə̂ Modô ndə̂ Ndjapä

19Jezü zâ pö kə̈ tô rə̂ sə̈ andjê päkëdə̂: «Ɛn-ɛn, tə̂ lëge nə̈ më tö rə̂ sə̈ nyê, Modô nə̈ mbôâbo rə pâ küma yê-a, praâbalë tche mbö kütû rə ndə̂ tche wûn rə̂ tə̂ Bha nə̈ ndə̂ tche mbô rə̂. Arə gbɛ̂ ndə̂ Bha nə̈ mbo rə̂, Modô nə̈ mbö ndjë rə̂. 20Bëte Bha nyïndə̂ Modô ndə̂ yê, ânyë kə̈ nyîsə̂ arə gbɛ̂ ndə̂ tchetchë la tə̂ yê mbô rə̂ sə̈ tchë. Tchê kä nyiadje sə̂ agbölö angâ arə sə̈ Modô nə̈ âro anə̈ âtə, ndə̂kə̂ pa tchə̂lə̂ küma nyê gbɛ̂ djingɨli. 21Bëte Bha jö akuzü, kə̈ mbô rə̂ ndə̂kə̂ pa andjë sə la tʉ̈rʉ̂ la andjê. Modô nə̈ ndjë gbɛ̂ zä tchîsûwu sə̈ akrə batə̂ rə̂ ndə̂ su yê nyîndə̂ nə̈. 22Bha wâbo ngbanga ndə̂ ngâ akrə balë-a, praâbalë tche gbôtə̂ kə̂ wa ngbanga nə̂ gbɛ̂ tchânə̂ Modô nə̈, 23ndə̂kə̂ pa azü gbɛ̂ lusə̂ Modô nə̈ batə̂ rə̂ ndə̂ andjë lusə̂ Bha. Akrə ndə̂ tche lûâbô sə̂ Modô nə̈ lû-î, dëkë tche kôsə̂ kə̂ lusə̂ Bha ndə̂ tche wân tchë lâme nə̂.

24«Ɛn-ɛn, tə̂ lëge nə̈ më tö rə̂ sə̈ nyê: Akrə ndə̂ tche djê pö ndə̂ mê, ânyë kə̈ zâ su yê sə̈ akrə ndə̂ tche wân mê, tche kä la tchîsûwu ndə̂ logbɛ̂ logbɛ̂, ngbanga wâbo lə̂ küma yê-a, praâbalë tche rô lə̂ kuzü nə̂, ânyë kə̈ wâ la tchîsûwu. 25Ɛn-ɛn, tə̂ lëge nə̈ më tö rə̂ sə̈ nyê, dalo nə̈ âwutuadje, praâbalë âwûtu nə̂, ndə̂ akuzü djeadje tchə̂lə̂ gɨ̈ Modô ndə̂ Ndjapä, ânyë andjanə̈ ndə̂ andjë djeadje tchə̂lə̂ gɨ̈ yê, andjê səadje la tʉ̈rʉ̂ la andjê. 26Käko batə̂ rə̂ ndə̂ Bha wâ la tchîsûwu lə̂ yê la tə̂ yê, käko ndjë tche zä köbo sə̈ Modô nə̈ ndə̂kə̂ wa la tchîsûwu lə̂ yê la tə̂ yê. 27Tche zä gbôgbô sə̈ Modô nə̈ ndə̂kə̂ wa ngbanga bëte tche wätə̂ Modô ndə̂ Akrə. 28Käko äwäpä tchə̂lə̂ küma nyê djingɨliabô djîngɨli-î, bëte dalo nə̈ wutuadje ndə̂ azü gbɛ̂ ndə̂ a chî andjê bhâlə̂ cho akuzü, andjê djeadje tchə̂lə̂ gɨ̈ Modô ndə̂ Akrə, 29ânyë kə̂ joadje lə̂ kuzü ndə̂ andjê. Andjanə̈ ndə̂ andjë mbô tchôtchô rə, andjê joadje lə̂ kuzü ndə̂kə̂ sə la tʉ̈rʉ̂ la andjê. Praâbalë andjanə̈ ndə̂ andjë mbô angbongbo rə, andjê joadje lə̂ kuzü ndə̂kə̂ pa a wa ngbanga lə̂ küma andjê. 30Më wâbo ndə̂kə̂ mbo rə ngbâ su mê la tə̂ mê-a. Më wä ngbanga kütû lə̂ köbosə̂ pö ndə̂ Ndjapä tô rə̂ sə̈ mê, kə̂ wa ngbanga ndə̂ mê wä djîrə̂, bëte më pûâbo köbo ndə̂kə̂ mbo rə ngbâ su mê la tə̂ mê-a, praâbalë kütû rə ndə̂ su tchanə̈ ndə̂ tche wân mê nyîndə̂ nə̈.»

Apö ndə̂ a tô rə̂ pâ Jezü

31«Âdə mê âto pö pâ mê la tə̂ mê, dëkë ngâ akrə balë ndə̂kə̂ gamba rə̂ səabô tee-a. 32Ngâ akrə ngbî kä ndə̂ âwâ ndə̂kə̂ to pö pâ mê. Më wünsə̂ nə̈ pä pö ndə̂ tche tô rə̂ pâ mê wätə̂ lëge nə̈. 33Nyënyê alême kä ndə̂ âwân azü sə̈ Jâan ânyë tche tô pö pâ lëge pö. 34Âdə andə̂ me nə̈, âwâbo ndə̂kə̂ pa ngâ akrə ngbî to pö pâ mê-a, praâbalë më tö pö nə̈ lâme ndə̂kə̂ pa nyë tcha lə̂ kuzü. 35Jâan wä alême batə̂ lâmba ndə̂ âtcho, ânyë ngbänga nə̈ za tchô, käko nyë gämba rə̂ ndə̂kə̂ vu ngɨ̈ kpîɛ̂kpîɛ̂ rə̂ ndə̂sə̂ ngbänga nə̈. 36Praâbalë angâ arə kä ndə̂ âtô pö pâ mê tə̂ gbölösə̂nə̈ kə̈ rô andə̂ Jâan. Arə nə̈ lâme də̈ akua ndə̂ mê, ndə̂ Bha mê zâ rə̂ sə̈ mê ndə̂kə̂ mbo rə̂. Akua nə̈ lâme la tə̂ yê ndə̂ mê mbo rə̂, ätö pö pâ mê, kə̈ nyîsə̂ nə̈ pä Bha kä ndə̂ âwân mê. 37Bha ndə̂ tche wân mê lâme tö pö pâ mê la tə̂ yê. Nyë djêâbo tchə̂lə̂ gɨ̈ yê-a, kə̈ wûn-âbo ndjë tchâtchu yê lo balë-a. 38Pö ndə̂ yê wâbo tə̂ su nyê-a, bëte nyë zâbo su nyê sə̈ akrə ndə̂ tche wân tchë lâme-a. 39Nyë pü dju apö ndə̂ Ndjapä, bëte nyë wünsə̂ nə̈ pä nyë âgbo tchîsûwu ndə̂ logbɛ̂ logbɛ̂ lə̂ köbosə̂ nə̈. Dëkë apö Ndjapä lâme kä ndə̂ âto pö pâ mê. 40Praâbalë nyë nyîâbo ndə̂kə̂ nə pu mê ndə̂kə̂ gbo tchîsûwu ndə̂ logbɛ̂ logbɛ̂-a.

41«Më pûâbo köbo ndə̂kə̂ pa azü gamba mê-a. 42Praâbalë më wûnsə̂ nyê nə̂, kə̂ nyində̂ Ndjapä wâbo lə̂ nyê-a. 43Mëmê, më nə̈ la rə̈ Bha mê, nyë mbôâbo la sə̂ mê-a. Âdə ngâ akrə ngbî ânə la rə̈ yê la tə̂ yê, tchanə̈ lâme kä ndə̂ nyê mbo la sə̂ yê! 44Nyë nyïndə̂ nə̈ pä angâ nyê gamba nyê, nyê gamba ndjë andjê, ânyë kə̈ nyîâbô nyîndə̂ kə̂ pu köbo ndə̂kə̂ pa Ndjapä gamba nyê lâme, nyë âza su nyê sə̈ mê tchïtchïnə̈ atöko? 45Nyë zäbô rə̂ zâ lə̂ küma nyê pä mëmê kä ndə̂ âyiadje pö lə̂ küma nyê tchâtchu Bha mê. Möyîze ndə̂ nyë zâ su nyê pâ yê lâme kä ndə̂ âyiadje pö lə̂ küma nyê. 46Âdə nyë âgamba pö ndə̂ Möyîze, dëkë nyë gâmba ndjë pö ndə̂ mê nə̂, bëte Möyîze mbö mbëtï pâ mê. 47Praâbalë ndə̂ nyë gâmbabô apö ndə̂ tche mbô rə̂ lə̂ mbëtï lâme gâmba-ê, käko nyë âgamba pö ndə̂ mê to rə̂ tchïtchïnə̈ atöko?»

Currently Selected:

Jâan 5: lnl

Highlight

Copy